زملاء العمل قليلي الادب

[مشكلتي]

السلام عليكم
انا بنت فعمري 24 سنة كملت قرايتي تخصص بيولوجي كما كامل طلبة بديت نحوس على خدمة فالتخصص تااعي وفالتعليم وفي اي مجال يشبهلو حتى لقيت عرض فواد كنيس على صيدلية قدام دارنا تحوس على بائعة بدون تفكير بعثتلو حتى ومكنتش دايرة فراسي كامل نخدم فصيدلية
قبلني نخدم عادي حتى وانا بدون خبرة قالي تفوتي مدة تاع ستاج ثلاث اشهر او اكثر على حسب درجة التعلم وتشوفي روحك الا تقدري قبلت
الصيدلي انسان محترم مالقيت حتى مشكل معاه المشكلة فالبنات اللي نخدم معاهم من الاسبوع الثاني المعاملة تاعهم معايا قساحت ورجعو يحاسبوني على اتفه الامور مثلا عندك سمانتين هنا ومزال متعرفيش هذيك الحاجة !! شافوني نكتب قالك مراكيش فالجامعة قتلهم نحفظ انا بهذي طريقة قالولي مشفناهاش جابت نتيجة معاك راكي غير تخلطي كيفكيف كل ما يمر شهر ولا شهرين انا الان داخلة فثلاث اشهر حسيت روحي تقدمت شوي لكن هما مزالهم يقولولي نورمالمون راكي طيري ضرك كي نغلط ولا ننسى حاجة ترفع صوتها عليا يهدرو بالفاظ غير محترمة مفيهاش القدر انا كل مرة نواجههم منسكتش لكن هكذاك ونتاثر بزاااف يجيني تقلاق ووليت منحملش نبقى معاهم فنفس البلاصة نحسب الوقت بالدقايق باش يخرجو خاطر يكملو على ربعة منبعد يجو الاولاد من المفروض نقعد معاهم نصف ساعة برك لكن باش نتعلم اكثر نقعد مرات حتى للستة كي لاقية راحتي مع الاولاد اكثر مايحاسبونيش كما يديرو هما
كلش كلش وتقليل الادب قاتلي مالقينا حتى فايدة فيك لكان نسيت حاجة قالوهالي يديرولي شرع تجي كوموند نخدمها معاهم مايعجبهاش تستافي ابدا تقلي متعرفيش تستفي اانا اني قاعدة نشوف فيها حاجة عادية نفرغو دوا فوق طابلة منبعد نحطوه فبلاصتو هيا تقلي ماتعرفيش !!!
الحاجة ثانية لي مقلقتني هما متفاهمين بزاف مع بعضاهم لكان غلطو يفوتو الغلطة تاعهم بالتفاهم وواحد مايسمع انا الورقة تاعي يلصقوها فالحيط باش الصيدلي ويشوفها ويقولولي القايلها حل وحدك وتشناف والعياط داير حالة وكي راني جديدة اغلب الحالات منعرفش نسقمهم نلقى روحي نخلصهم من دراهمي ونسكت
يقصرو يضحكو مع بعضاهم وانا كي الحجرة ساكتة ثمن سوايع كان غير هانية برك مرات تسماطلي نقول نبقى حياتي هك نخدم فبلاصة مفيها حتى واحد يونسني على اقل بكلام طيب ولا تبسيمة صباح الخير مايقولوهاش كان ماندخلش بالسلام عليكم مايردوش مرضت مرة ماجيتش يومين كلمة ريحتي ماقالوهاش بعكس الولاد مشاء الله
والناس اللي مش مربية احيانا يدخلو يشوفوني جديدة ميساعفوش يقلك عيطليلي ليهم نتي متعرفيش ! ولا يقلك نتي وش قريتي
جديا بديت نخمم نحبس لانو كي نرجع للدار نجيب معايا غير الهم والشكوى نبقى غير نشتكي منهم
نحب نتجاهلهم شحال من مرة بصح وليت منقدرش ... نواجههم الصيدلية ولات مارشي اللي يدخل يلقانا نعيطلو لداخل ! حتى فارماصيان مرات يفوت علينا وتبقى تعيط قدامو عادي جدا

وش الحل مع العباد هذوا الله يستركم

[ع.عيسى]

استقيلي وهني راسك

[أم رقية نسرين]

بكل بساطة حبسي الخدمة و هني راسك
بصح الشي لي مفهمتوش نتي بيولوجيا واش من ستاج تاع ثلاث أشهر هادا ؟؟؟ تخصص خاطيك واش هادي بائعة راهي صيدلية مهيش كوسميتيك
حوسي على خدمة في اختصاصك
ربي يرزقك

[بشرئ عاشقة العلم]

رهن يديرولك هكا غير باش تستقيلي بسكو رهم غايرين منك ...مديريش عليهم و اصبري ..كون جيت في بلاصتك نقعدلهم كي الحجر باه يزيدو يموتو بالغيرة حتى تصيبي خدمة اخرى مشي تستقيلي غير هكا و صايي ...رهن يزيدو فيها بلعاني بلي مركيش تعرفي ، تسكني و خليهم ، هذي هي الدنيا مرحش تلقائي ناس ملاح فكل بلاصة و كل ما تعاملنيش مع ناس سميين كما هناك كل ماكانتش تجربتك في الحياة مميزة و تعطيك تجربة عن كيفية التعامل مستقبلا ...

[فراح 70]

وعليكم السلام ورحمة الله
ماكاين حتى مجال يخلو من المشاكل أخيتي، تروحي للاساتذة تلقايهم يقولوا نفس الكلام للاداريين نفس الكلام للاطباء نفس الكلام..... يعني حتى والمستوى العلمي يكون عالي لكن تشوفي أخلاق وتعامل لا يوافقه، اذا حبيتي تخدمي هذا هو الواقع ماراحش يتبدل ولازم تصبري عليه وتتعايشي معه، وإذا ماقدرتيلوش اعرفي بلي ماشي هذا هو مجالك وخليه للي يقدروا عليه،
على حسب علمي أن شهرين المتربص مايخرجش كامل للزبائن/المرضى ومايلاقيهمش يبقى الداخل يكتب ويحفظ في الأدوية وتصنيفاتها... بعدها يبدا بلعقل ويبقى يتعلم دايما (حتى اللي عنده خبرة ) ويغلط ويكتشف الجديد واللي يعجب ويرضى بمستواه فتأكدي أنه يولي للوراء.
و كل واحد وقدراته، الواحد يشوف للمتوسط باش يديرو مرجع له ويتقدم، ماشي باش يبقى يقارن ويفشل.
المثبطين تلقايهم وراح تتعاملي مع كامل أصناف الناس لذلك كما قلتلك سابقا إما تصبري وتتعايشي وتواصلي طريقك وإما تخلي المجال مكاش خيار ثالث،
أما بخصوص الاولاد يعاونوك اكثر فممكن لكن تفكري تان هو من تزيين الشيطان لكما ربما تلقاي زملاءهم من نفس الجنس يشتكوا من بعضهم بعض، ومن ترك شيئا لله عوضه الله بخير منه،
ربي يقربلك اللي فيها خير