menu رقم 2 خاص بشهر رمضان الفضيل

[ninafret]

سم الله نبداو مع الموني الثاني اللي راح يكون


المدخل :بوراك بالبطاطا والجبن + بريك بالبيض
الطبق الاول :شوربة فريك بطريقتي و الخاصة بمنطقتنا
الطبق الثاني : بيتزا ايطالية + ميني بيتزا
التحلية: موس لذيذة بالفلان والشانتيي ولاكرام باتيسيار

المدخل بوراك بالبطاطا والجبن + بريك
لازملك 4 ولا خمس حبات بطاطا بالقشرة غليها في الماء حتى تطيب وخليها تبرد تماما نقيها واسكرفجيها بالفرشيطة وهدا هو السر في نجاح البوراك ولا السفيرية ولا اي حاجة بالبطاطا انك تطيبيها بالقشرة وانك تخليها تبرد مليح من بعد تمرسيها لانك ادا سكرفجتيها وهي سخونة تتعجن وتولي تلصق في اليدين وماتنجميش تتحكمي فيها
زيديلها سنة ثوم وملح ومعدنوس مقطع وهريسة وزيتون اسود واخضر مقطعين وجبن مبروش اختياري خلطي الكل مع بعض



حلي ورقة البوراك وحطي كمية من الحشو بالطول ماتكثريش حتى ماتجيش الحبة مليانة واللي ياكلها مايقدرش يكملها وحطي فوقو قطع من الجبن الطري انا نستعمل جبن باربار كي العادة واغلقي الحبة كيما في الصورة









وحطيها فوق منشفة وغطيها حتى ماتنشفش وتيبس

كي تكمليها كلها اما تدهنيها بالزبدة وتدخليها للفور ولا تقليها في زيت غزير على نار متوسطة تقطريها مليح ةتحطيها فوق ورق ماص



البريك حطيتهولكم من قبل في هاد الرابط

https://www.djelfa.info/vb/showthread.php?t=1297925


فقط الحشو عملت لحم مفروق مقلي مع شوية بصل وثوم ورشيتو فوق البيضة في مكان الطماطم والبصل وكملت نفس الخطوات

الطبق الاول :شوربة او جاري فريك بطريقتي
هاد الطريقة معتمدينها عندنا في ولايتنا في شهر رمضان وفي المناسبات والاعراس جربوه يجي روعة بدون مبالغة

في طنجرة حطي لحم غنمي من الاحسن نتاع لي كوت او الشطوب وادا ماكاش اعملي دجاج زيديلهم بصلة كبيرة مبروشة مالازمش تكون مرحية بزاف لانها تولي ماء وماتكونش بنينة كي نقلوها مع اللحم وزيديلهم 3 ملاعق كبيرة زيت ورشة دبشة او حشيشة مقطفة مقطعة رقيقة وقلي الكل على نار متوسطة ولا هادئة مع التحريك مرة على مرة مدة 10د




زيديلو الملح وفلفل اسود وكسبر مرحي وشوية حار بودرة اختياري وزيدي قلي شوية



زيدي ملعقة ونصف طماطم مصبرة ممكن اقل او اكثر حسب نوعية الطماطم وخليها تتقلى مع التحريك حتى 2 د



ثم مرقي بالماء الدافي تقريبا 2 ليترات



خلي الكل على النار وكي يغلي زيدي الفريك المنقي والمغسول انا عملت فنجان مليان
ونقصي في النار وخليه يطيب على مهلو على نار هادئة انا خليتو ساعتين حتى طاب مليح اللحم

خطوة مهمة كي يطيب كلشي زيدي رشة من الدبشة او الحشيشة مقطفة و ارمي 2 قرون فلفل حار خليها تغلي دقيقة لا 2 وطفي واغلقي الطنجرة حتى 2 دقايق اخرى ووقت التقديم املي من فوق رشة سخية من الدبشة جربيه راح يجيك روعة





ماتنسايش تقدميه مع خبز الدار ولا مع الكسرة او الخميرة



الطبق الثاني بيتزا + ميني بيتزا
راني حطيتهالكم من قبل في هاد الرابط

https://www.djelfa.info/vb/showthread.php?t=1234868

فقط عملتها خبزات صغار والحشو جبن مبروش وزيتون ولحم مفروم وجات امممممممممممممم ماتتشبعش
جربوها والله روعة بدون مبالغة وراح تعجبهم كامل على ضمانتي









التحلية موس روعة روعة خاصة لمحبي الشوكولا

عملت كيس كرام باتيسيار دوق شوكولا مع نصف لتر حليب + فنجان حليب لاني حبيتها تجي خفيفة ماشي عاقدة بزاف وزدتلها 3 ملاعق كبيرة سكر وخليت الكل على نار متوسطة مع التحريك حتى ثقال شوية وخليتو يبرد



في هدا الوقت عملت كاس الا ربع حليب بارد جدا وخلطتو مع ملعقة كبيرة حليب غبرة او لحضة + 2 ملاعق كبيرة من غبرة فلون ذوق شوكولا انا استعملت فلون نوارة يعني فتحت الكيس وصبيت قيس 2 ملاعق
في خلاط حطي 150غ بودرة الشانتيي اللي تتباع بالميزان زيدي فوقها هداك الحليب البارد والمخلط مع الفلان واللحضة وضربي على سرعة عالية



حتى تتحصلي على كريمة ثقيلة زيديلها بالتدريج ثلاث ارباع الكرام باتيسار




اللي تكون بردت وخلطي بسباتولا ولا فرشيطة من فوق لتحت حتى مايخرجش الهواء
الربع اللي بقالك من الكرام باتيسيار صبيه في ليكوب


وكملي عمريها بالموس اللي تحصلنا عليها
واخيرا دري على الوجه شوية من بودرة الكاكا بصفاية




ودخليها للكونجي لاتور ساعتين من بعد نزليها للثلاجة حتى وقت التقديم وراح تتحصلو على موس خفيفة وبنينة ياخي يقلك الحاجة ام الاختراع انا سخفت على حاجة خفيفة وبنينة خلطت وجلطت وجاتني كيما بغاها خاطري


وهادي لوبيا خضراء او زاليقو كيما نسموه عندنا عملتو لبابا يموت اعليه وهادي طريقتها نزولا عند رغبة اختي فلورا 06 وخواتي اللي طلبوها

بالنسبة للوبيا في كوكوط حطي 3 ملاعق زيت مع حبة بصل مرحية و2 سنات ثوم وقيس ملعقة صغيرة دبشة او حشيشة مقطفة مقطعة رقيق قلي الكل حتى حتى يتغير اللون شوية زيدي الملح وشوية فلفل اسود وشوية كروية مرحية زيدي مغرف كبيرة طماطم مصبرة زيدي قلي شوية ومرقي بكاس ماء
في صحن حطي 200غ لحم مفروم مع 2سنات ثوم مرحية وشوية معدنوس مقطع رقيق وملح خلطي الكل وشكلي كويرات ارميها في هداك المرق اللي يغلي بلاماتحركيها خليها على نار متوسكة 5دقايق ثم حطي اللوبيا فوقها واللوبيا حاولي تقطعيها صغيرة تقريبا بطول 3سم راح تجيك بنينة وماتقلقش في اكلها المهم كملي مرقي بالماء حتى تتغطى اللوبيا وادا تحبي الجزر ممكن تزيدي معاها مربعات صغيرة جزر يعطيها حلاوة اغلقي الكوكوط وخليها على نار متوسطة تقريبا ساعة ونصف انتي كي توصل ساعة افتحي شوفي ادا لقيتي مازال فيها الماء زيديلها شوية وقت
دركا نعطيك سر البنة كي تطيب اللوبيا وتبدا تعقد ارمي زوج قرون فلفل حار وقيس ملعقة حشيشة مقطفة او دبشة مقطعة خلي المزيج يغلي دقيقتين ولا 3 وطفي وخلي الطنجرة مغلوقة حتى 2 دقايق اخرى من بعد قدميها مع رشة دبشة
وراح تجيك احلى لوبيا ماشطو جربيها راح تعجبك خاصة ادا كنتي من محبيها
وراني راح نحط لوبيا ماشطو قراتان بطريقتي عما قربيب بحول الله يجي روعة


نتمنى يكون نال اعجابكم الموني الثاني
وانتظروني في مونيهات اخرى الايام القادمة بحول الله
ماتنساونيش بدعواتكم

[oum ibrahim]

الله الله عليك نينا ماشاء الله مازال ماشبعناش المنيو الاول زدتيلنا الثاني يعطيك الصحة عجبني كلشي رووووعة خاصة التحلية ترقبي تطبيقي في اقرب فرصة

[ninafret]

المشاركة الأصلية كتبت بواسطة oum ibrahim

الله الله عليك نينا ماشاء الله مازال ماشبعناش المنيو الاول زدتيلنا الثاني يعطيك الصحة عجبني كلشي رووووعة خاصة التحلية ترقبي تطبيقي في اقرب فرصة

اهلا اهلا اهلا بالغالية ام ابراهيم ديما تفرحيني بردودك حبيبتي
مالا رانا نستناو تطبيقك في القريب بحول الله
رمضان كريم حبيبتي وصحا صحورك

[مسعودي خولة]

وش نقولك يا اختي وحبيبة قلبي نينا طبخك ماشاء الله كل يوم نجرب حاجة بالصح ندرح باه نحطها البيتزا تاعك اشكري وعاودي كل يوم نديرها وجاتني كيما لي نوكلها برا وخير منهااعتمدت الوصفة وولات هذه هي العجينة تاعي وجربت الدجاج كنتاكي هايل ومقرمش مع البيري كل يوم نجرب حاجة ربي يجازيك ان شاء الله
ونزيد نقولك كل وصفاتك محملتهم في الكمبيوتر تاعي باسم طبخ نينا ربي يحفظك ولا يحرمنا منك

[انتي بلون الورد]

الله يبارك ماشاء الله بصحتكم

[نور الهدى06]

تبارك الله عليك حبيبتي
ربي يخليك ويعليك على من يعاديك

[بنوتة الصحراء]

تسلم الايادي ويعطيك الصحة على الوصفات الرائعة

[صابرة2013]

يعطيك الصحة

[pharmajsk]

المشاركة الأصلية كتبت بواسطة مسعودي خولة

وش نقولك يا اختي وحبيبة قلبي نينا طبخك ماشاء الله كل يوم نجرب حاجة بالصح ندرح باه نحطها البيتزا تاعك اشكري وعاودي كل يوم نديرها وجاتني كيما لي نوكلها برا وخير منهااعتمدت الوصفة وولات هذه هي العجينة تاعي وجربت الدجاج كنتاكي هايل ومقرمش مع البيري كل يوم نجرب حاجة ربي يجازيك ان شاء الله
ونزيد نقولك كل وصفاتك محملتهم في الكمبيوتر تاعي باسم طبخ نينا ربي يحفظك ولا يحرمنا منك

الف مبروك لي نجحتلك البيتزا املا انا تاني غيورة سورتو في الطبخ نحب نتعلك كلش ياريت تعطيني الوصفة باش نجربها

الف صحة وعافية نينا كلش هايل
صح رمضانك

[درة بيتي]

تبار ك الله عليك وين نلقى اسمك نجي نجري كاش نهار نطيح يدقدق فمي ههههه
ثقتي عمياء في وصفاتك نينا بارك الله فيك ربي يرزقك الذرية الصالحة إن شاء اللهولا هذيك البيتزا اعتمدتها دائما وابدا كل الأهل ولاو يسقسو فيا على الغوسات ربي يزين سعدك ويفرح قلبك

[رُقية]

بارك الله فيك

[حياتي نبع امل]

ماشاء الله ربي يحفظك

[nadouch86]

الله يعطيك الصحة امممممممم شوقتيني و راني نتوحم درك كيفاه ندير انا ههههههه بصحاتكم

[أم ريمة*]

السلام عليكم على حساب البرنامج ما يجى يخلاص رمضان يكوم البنك انتاع الصح معمر بالحسنات لانها تتضاعف فى هذا الشهر الكريم بلا دعاوى الخير هذا هو التسابق للخيرات الله يجزيك على كل حرفوصح فطورك بنتى

[ام منيب]

ربي يسترك يا الشاااطرة