هل لي ذنب ؟

[مشكلتي]

السلام عليكم

انا فتاة عزباء لدي 2 أخ و زوجاتهم عايشين معانا
صار بيننا مشاكل و تقدمت لابي و حكيت له كل الامر
لكن ابي كبير قليلا في السن و انا المدللة نتاعو يعني يقلي الحاجة الي تضرك احكيهالي
حكيتلوا على المشاكل و قتلوا مدير والو قلي صحا و هكذا باش يغرفهم كيفاش دايرين
هوما الي غلطوا في حقي صراحة المهم انا حكيتلوا قع واش كاين الحقيقة

المشكل هو اني خفت بابا كاشما يصرالوا مثال يتقلق ولا يقعد يفكر فيا برك
يعني كي حكيتلوا عادي معنديش ذنب
علما انو كل مرة يسقسيني اعليهم واش راهم دايرين فيها ونقلوا لباس اعليهم قايمين و هوما العكس

[nadir_telecom]

ربي يحفظلك باباك بصح من الأفضل ماتقلقيش باباك كي عاد مريض

[ع.عيسى]

علواش دخلتي باباك في سوق النسا؟...لانه ممكن تعمريه باحداث نص صح ونص من نسج خيالك. وهو بفرط المحبة لك يدخل في صراع معاهم ومن بعدها تكبر ويدخلوا فيها اخوتك ومن بعد تزيد تكبر تصرا قطيعة رحم ومن بعد تكبر ويتعمر من جهة أبناءه ويغيضو الحال ويطلعلو السكر والدم.... الخ وكل هذا بسبب مشاكل النسا لي ابدا ما تخلاصش.. امالا خلي باباك طرونكيل افضل*

[رَمَادِيَاتْ]

الأمر يختلف باختلاف نوعية المشكلة.

المشكلة الكبيرة لا يجب اخفاؤها بطبيعة الحال، أما تلك التفاصيل اليومية المتكررة في كل بيت فالأولى أن لا تستغلي عاطفته اتجاهك وتقحميه فيها مرة أخرى.

[الأيمان]

الأفضل أن تحكي لأمك وليس أبوك بما أنك المدللة ..و الأب مريض متزيديش تقلقيه ممكنتطلعلو لاطونسيون بسبتكو يتشل وتزيدي تشعري أكثر بالذنب....
وحاولي تتعلمي مهارات التعمال مع اخوانك ...ولست وحدك من يعاني أعرف مؤخرا وحدة قاتلك تخدم في نسا خاوتها كي الكلبة ودايرين فيها الشر ..وتزيد تشري وحدها صابونها ....مرة صديقتها جابتلها قرعة ريحة قاتلها والله خاوتي مادروهاليش ...و نزيدك هذي المرة تزوجت صغيرة و تطلقت خلال 3 أشهر وجابت ولد كبر حتان عاد 27 سنة ...الفاجعة أنو توفى خلال شهر لربما ...و هي التي تتحدثعنه دائما وتحلم بتزوجيه ....الخ
لاتقلقي فجميعنا مبتلون ونسعى للصبر و لا تشكي لاحد واشكي لربي سبحانو واذا تخنقتي اكتبي في ورقة واحرقيها أوتعالي فضفضي هنا لكي نساندك فترتاحين ..
خذي هذه القاعدة :
عمرها النار مطفيها بالنار ...النار طفيها بالماء ...

[tassnim5]

اجعليه ينسى ما قلتي له و لا تخبريه مستقبلا بالمشاكل, بل اشتكي لله فقط و تفادي الاحتكاك بهم من أجل أبيك.

[لؤلؤة تلمسان]

ان كانت مشاكل كبرى وتستحق اخباره فقد فعلت صوابا

وان كانت مشاكل يمكن لامك او اخويك حلها او بالتحدث مع الكنتين تحل

فكان الاجدر بك ان لا تخبريه

حاولي ان تبيني له العكس الان واجعليه يرتاح ... حفظه ربي لكم

[اميرة الامواج]

بارك الله فيك
يعني حرشتي باباك على نسا خاوتك
في رايك كي قولتي لباباك واش كونتي تحوسي يدير ....
اكيد قولتيلوا لغرض ما ....
وديري حاجة في راسك أن باباك راه يكره نسا خاوتك انطلاقا منك ....
ويحوس ينتقملك بأي شكل اليوم اوالغد .

وكاش ما يصرى لنساء خاوتك انتي السبب الأول ......ولا نساء خاوتك كرهوا باباك كذلك انتي السبب ....

ولهذا عليك أن تحسني صورة نساء خاوتك قدام باباك ...كي لا يبقى الحقد في قلبه اتجاههم ..
اللوسة سوسة .....ههههه
وربي يجعل الخير
ويهديك ربي كي تصرى كاش حاجة بينك وبينهم متحكيش لباباك .....الراجل ما يخممش كيما المرأة ...
خاصة الاب ميحبش على بنتوا المدللة ....

والله احنا عندنا لوسة طلقت 2 نساء خاوتها و يتمت 6 اطفال .....

انعلوا ابليس

سلام من قلب يحب السلام

[محمد محمد.]

السلام عليكم

بهذا الفعل أنت تؤذين أخاك بالدرجة الأولى ووالدك بالدرجة الثانية .

وإذا إنتقم والدك منهن فإن هذا سيضر أخاك بالدرجة الأولى ، وإذا وصل الأمر للطلاق غادي الأخ تاعك يولي عليه الضرر ، النفقة والهم و الشقاء وخاصة إذا كان عنده أولاد .

أختي ديري حاجة في بالك ، زوجة أخوك عندما تسكن معكم فهي تنازلت عن حقها في السكن فعليكم أن تقدروا هذا الأمر ، وإن كانت فعلت شيئا كبيرا لا ينبغي السكوت عنه فعليك بإخبار الأخ لا الوالد .

[بـــيِسَة]

>السلام عليكم

قولي حسبي الله ونعم الوكيل فقط دون فعل اي شيئ
و لاحظي
>

[مراد حبيب الله]

بسم الله الرحمن الرحيم
ابنتي ما تفعلينه دنب كبير يحبه الشيطان إسمه النميمة أي نقل أخبار و أحوال الغير ثم الغيبة أي تتكلمين في غيرك لو علموه لغضبوا و وقعت في فتنة كبيرة
توقفي عن دلك ،اذكري غيرك بخير يرتاح و يحبك الجميع