مسكوتشو بالفلان رووووووووووووعة

[ام سراج وملاك]

اهلا بالجميع كيما تعرفوني دائما كشما نلقى وصفة جديدة ونجربها وتنال رضا عائلتي وانا اولهم منبخلش عليكم نصورلكم المراحل ونحطهالكم باش لي مشافش الوصفة من قبل يجربها واكيد مينسانيش بدعوة خير منطولش عليكم ونخليكم مع احلى مسكوتشو بالفلان عجبتني بصح انا درت وصفة المسكوتشو الخاصة بي لي منبدلهاش انا نحطلكم مقادير وصفة نتاعي ولي تحب دير الوصفة نتاعها ماشي مشكل المهم انها تعجبكم نخليكم مع المقادير



مقادير المسكوتشو
4 بيضات + كاس سكر عادي + كاس فيه باط ياؤورت اي ذوق والباقي نكملو حليب + كاس زيت + 2 مغارف كبار كاكاو + زوج كيسان ونصف فرينة + 2 باكيات خميرة القاطو

زوج باكيات فلان ذوق شيكولا ونصف لتر حليب زدت مغلرف كبيرة سكر للحشو



اولا نطلع البيض بالبتار مليح نضيفلو السكر بشوي ونبقى نخلط بالبتار نكمل نحط باقي المقادير وفي نفس الوقت نخلط كي نكمل نكونو وجدنا صينية نتاعنا نحطو ورق الزبدة ندهنوه بالزيت ونرشو الفرينة وندخلوها تطيب كي تطيب المسكوتشو نخليوها تبرد ونحطوها مباشرة في صحن التقديم نشدو موس ونقطعوها دائرة ونحيو الوسط ونفتوه باش نحط خليط لفلان والمسكوتشو في بلاصتو منهزوهاش كي نحطوها في صحن التقديم باش متفسدش نوليو لطريقة تحضير لفلان
نحطو نصف لتر حليب مع زوج باكيات فلان شكولا كي يغليو ضفتلهم فتات نتاع المسكوتشو لي نحيتو ورجعتو للوسط صاحبة الوصفة الاصلية دارتو في روبو يترحاو مليح انا فتتو عادي بيدي خطراه المسكوتشو خفيفة بزاف وضفتو للفلان نخليكم مع صور بلاكش تفهمو مليح بالنسبة التزين كل واحد وذوقو



هنا صورت الخطوة الاولى برك نتاع المسكوتشو باقي الصور تحذفولي للاسف في الصور كاس فيه باط ياؤوورت وحليب والبيض طلعتو بالبتار وبديت نضيف باقي المقادير













هنا ضفت للفلان الفتات نتاع المسكوتشو







هنا التورتة راهي واجدة







هذي الوصفة الاصلية لهزيت منها الفكرة