menu رقم 1 خاص بشهر رمضان الفضيل من مطبخي

[ninafret]

السلام عليكن اخواتي وصحا فطوركم
بما اني كنت مسافرة وغايبة عن المنتدى حسيت اني قصرت في اللي نقدمهولكم من اطباق
علاهاداك خممت اني كل مرة نحطلكم menu خاص برمضان من السلطة للشوربة للطبق الثاني ونكملها بديسار

1. نتمنى تنال اعجابكم الفكرة

نبداو باول فهرس بحول الله واللي راح يكون
المدخل :سلطة بالباستا والتونة
الطبق الاول :شوربة خضار متنوعة
الطبق الثاني :بطاطا محشية باللحم المفروم والبيشامال
التحلية :كرام ديسار بالفراز والتوت

سلطة الباستا بالتونة

كمية من الباستا حسب الرغبة انا استعملت هادي اللي على شكل روسورات ملونة


تغليها في ماء وملح ومغرف زيت حتى تطيب مالازمش تطيب بزاف حتى تبقى محافضة على شكلها


كي تطيب صفيها وزيديلها شوية جبن مبروش وهي سخونة حتى تتشربو خليها تبرد



زيديلها 3 ملاعق كبار خل وخلطي



زيديلها 2 ملاعق كبيرة تونة نتاع الزيت ماتصفيهاش خلي فيها شوية زيت لاننا ماراح نستعملو الزيت خلاص




وزيديلها 2 حبات بيض مغلية في الماء ومبروشة خشين وقيس ملعقة اكل من المعدنوس المقطع واللي تحب الحار كيما انا قليت قرن فلفل حار انزعتلو القشرة وقطعتو مربعات وزدتو معاها وشوية جبن مبروش



خلطي الكل وزيدي شوية ملح حسب الرغبة وماتنسايش بلي التونة فيها الملح

قدميها مرشوشة بشوية قرويار ورشة من المعدنوس



الطبق الاول : شربة خضار بطريقتي

نقي 3 حبا بطاطا و2 حبات جريوات او قرعة و 8حبات جزر وادا كاين عندك الكابويا هي تاني تمد مداق هايل للشوربة اغسلي الكل وقطعيه مربعات وحطيه في الكوكوط مع قطعة من اللحم ولا صدر دجاج حسب الموجود وممكن تستبدليهم بشوية لحم مفروم زيديلهم حبة بصل كبيرة مقطعة انصاف وزوج سنات ثوم و3 ملاعق كبيرة زيت وملح وشوية فقط كسبر مرحي وشفلفل اسود
مرقي الكل بالماء حتى تتغطى الخضر وزيدي شوية معدنوس وحشيشة مقطفة وكرافس كيما الصورة



اغلقي الكوكوط وحطيها على النار كي تبدا تصفر نقصي النار وخليها على نار هادئة من ساعة ونصف لساعتين



كي تطيب مليح نحي اللحم ولا الدجاج وميكسيها مليح وهداك الدجاج فتتيه وزيديه بعد ماترحيها





الطبق الثاني :بطاطا محشية باللحم المفروم والبيشامال

كنت عملتهالكم من قبل غيرت في الحشو فقط والمهم انكم تقليو البطاطا على نار متوسطة حتى تطيب من غير ماتحمار
راح تلقاو المراحل الاولى في هاد الرابط
https://www.djelfa.info/vb/showthread.php?t=1297932

الحشو
حبة بصل قطعتها مربعات صغيرة وقليتها مليح مع زيت وشوية ملح وزدتلها لحم مفروم وكي تقلى الكل طفيت النار وزدت شوية من الحشو اللي نحيتو من البطاطا وقليتو


وجدت صوص بيشامال عادي نقصت شوية في الفرينة لااني حبيتها شوية خفيفة وزدتلها جبن



وخلطتها مع الحشو




عمرت بيهاالبطاطا ودرتلها شوية جبن من فوق وحطيتها في مول فيه نصف كاس كريمة سائلة ولا حليب ودخلتها للفرن شوية من تحت





وكي نشفت الكريمة خليتها غير من فوق حتى تحمرت وقدمتها



ممكن تقدميها مع صوص كيما اللي في الرابط

التحلية :كرام ديسار بالفراز والتوت
ساهلة ماهلة وبنينة
وجدي 2 علب من غبرة الكريمة بدوق الفراز


نحي منها مغرف كبيرة خليها على جنب والباقي خلطيه مع لتر حليب عادي و 6 ملاعق كبيرة سكر وممكن تنقصي ولا تزيدي حسب الحلاوة اللي تحبيها حطيها فوق النار مع التحريك المستمر وكي تثقال حطيها في ليكوب وخليها تبرد ربع ساعة



في كاسرونة حطي 100غ توت اللي تكرازيه شوية بالفورشات وممكن تعوضيه بالفراز وزيديلو فنجان ماء لانو اصلا يتلق الماء وزوج ملاعق كبيرة سكر وهاديك الملعقة اللي خليناها من غبرة الكريمة



حطي الكل على نار قليلة حتى يغلي ويثقال



صبيه فوق الكريمة الاولى وزينيه حسب الرغبة ودخليه للثلاجة يبرد






نتمكنى يمون نال اعجابكم وانتضروني في ال menu الثاني ادا كفاني الوقت نحطهولكم الليلة الصور حملتهم بقالي غير نكتب
صحا صحوركم وماتنساونيش بدعواتكم في هدا الشهر الفضيل

[nouna4you]

الله يبارك يعطيك الصحة و بصحتكم الفطور

[staifia]

يعطيك الصحة والحمد لله على سلامتكـ

كلشي يشهي وعجبتني التحلية خاااااااااااصة
ربي يخليك وصح رمضانك

[oumjiji]

صح فطورك اختي nina وصفاتك روعة راني جربت وصفة البيتزا خرجت تهبل ربي يعطيك ماتتمني ويرزقك الذرية الصالحة

[ninafret]

العفو حبيباتي
اختي السطايفية ديما تفرحيني بردودك
اختي ام جيجي ربي يحفظك يا الغالية والحمد للع انها نالت اعجابك ويعطيك الصحة على التطبيق
صحا صحوركم

[malak achark]

saha ftorkem alah ybarek rabi yahfdek daaaaaaaaymen metmayza :1 9:

[ladymillion]

الله يبارك ماشاء الله بصحتكم

[لينا11]

صح فطورك عسولة وعلى سلامتك

ربي يجعلها مايدة عامرة ديما وحولها ولادك الي يهبلوك كي تطيبي وتصوري خخخخخ

[راجية غفران ربها]

lllllllllllllllllllll44444444444444444444444444444 444444444444444444444

[طهراوي ياسين]

الله يعطيك الصحة

[أم ماجد]

الله يبارك نينا دائما متميزة
اكيد رايحة نجرب واثقة في وصفاتك

[أم ريمة*]

ما شاء الله كل شىء يشهى يعطيك الصحة

[oum ibrahim]

حمدالله على سلامتك غالية ليك وحشة نينا ماشاء الله عليك menu كامل متكامل يعطيك الصحة رمضان كريم

[رحمة من المولى]

الله يعمر دارك و يزين أيامك

[serine alger]

يعطيك الصحة