شربة بيضاء 1 ............ بنتها هايلة هاد الشربة

[أمنية غفران]

السلام عليكم و رحمة الله تعالى و بركاته
.................................................. .....

نقدم ليكم الليلة أحلى شربة بيضاء رقم 1 تعجبني بزاف علاخاطرش بنينة و سريعة و ما تشدش الوقت

الطريقة

في طنيجرة اسكرفجي حبة بصل و ضيفي ليها مغرف سمن و شوية دجاج الي عندك و نص مغرف قهوة فلفل اكحل و عود قرفة من الأحسن و ورقة رند و الملح وقلي حوالي خمس دقائق و ضيفي الماء السخون و خليها الطيب

و كي تشوفي الدجاج طاب نحيه و قطعيه قطع صغيرة وفي هذه الاثناء ضيفي للمرقة شوية دويــــدة وخليها طيب ما تديش الوقت في طيابها

و من جهة حضري شوية من المرق يكون بارد و صفار حبة بيض و ضيفي له كمية لاباس بيها كثري ما تخافيش من المعدنوس مقطع رقيق علاخاطرش هو سر بنتها و زيدي عصير ليمونة و خلطي مليح

ضيفي قطع الدجاج الى المرقة الي تبان ليكم لونها اسود رايحين تقولو هادي شربة سوداء ماشي بيضاء ههههههه هاداك من الفلفل اكحل برك

و ضيفي خليط صفار البيض و المعدنوس و الليمون و خلطي مليح هنايا تشوفي لونها ولات بيضاء خلي تغلي شوية حاجة زوج دقايق لا أكثر و طفي النار

وقبل ما تقدميها ضيفي ملعقة زيت زيتون و كاين الي يضيفو سمن و قدميها للعائلة الكريمة بالصحة و الراحة و الشفاء

هنايا قدمتها مع كـــــوكة بالعجينة البرونزية

.................................................. ..........

ياو كيما قلت ليكم بنتها هايلة هاد الشربة











في أمان الله