موضوع مميز لنتشارك للتحضير بهدوء للشهر الفضيل

ام راضية · 2013-04-08, 12:40

تحياتي اخواتي وان شاء الله تكونو بخير
اللَّهُمَّ بَلِّغْنا رَمَضَانَ وَأَعِنَّا عَلَى صِيَامِهِ وَقِيَامِهِ عَلَى الوَجْهِ الّذِي يُرْضِيكَ عَنَّا
اللَّهُمَّ اجْعَلْ عَمَلَنَا كُلَّهُ خَالِصَاً لِوَجْهِكَ الكَرِيمِ..
حبيت اليوم نفتح هدا الموضوع ليكون مرجعية لاخواتي وان شاء الله يلقي منكن استجابة لاثراءه
كما نعلم يفصلنا عن الشهر الفضيل حوالي 3 اشهرستقول الاخوات ما زال الوقت لكن انا اقول ان الوقت يمضي بسرعة ادا بقينا من اهل الحياة
وكدلك موضوعي هدا اساسه التحضير بهدوء
ونحن نعلم ان في رمضان تلتهب الاسعارالي درجة خيالية فتحرق جيب الزوج واعصابه
لدا تعالي انا وانت والجميع لنتشارك الافكار والتجارب والحيل للتغلب علي شجع التجار وتحضير لوازم رمضان وتخفيف الاعباء علي الزوج
وقال صلى الله عليه وسلم : ( لا ينظر الله إلى امرأة لا تشكر لزوجها ، و هي لا تستغني عنه )
كما ترين لا ينظر الله لمن لا تشكر زوجها فاكسبي رضا الله بمساعدته وتخفيف الحمل عليه
وكدلك عندما يدخل علينا ان شاء الله رمضان نكون حضرنا كل ما يلزم مطبخنا ونتفرغ لاشياء اهم ابرزها التقرب لله بالعبادات
عندي افكار بسيطة لكنني اظنها مفيدة ادا وافقتن علي هدا الموضوع
نبدا علي بركة الله

تم التثبيت لتعم الفائدة .......................همتكم يابنات

barka61 · 2013-04-08, 13:32

شكرا انا تانى رانى بديت انوجد بديت بالاوانى اللى تخصنى واللى لازم نبدلهم هذا العام ومن بعد نبدا بلحوايج الاخرين نشاء الله نستفادو من الاخوات ومذا بينا تكون اشياءاقتصادية باش تكون فرصة للجميع يوجد معانا تشكررررررررررررررررررات

رتاج علي · 2013-04-08, 17:15

السلام عليكم، الموضوع شيق و مهم، بارك الله فيك ، نحن ايضا نبدأ بالتحضير لهذا الشهر الكريم، ونسأل الله الكريم أن يبلغنا هذا الشهر، ولقد بدأنا بالفعل وذلك بتخزين الجلبانة الخضراء، خاصة وانها متوفرة هذه الأيام بكثرة وذلك بتقشيرها ووضعها في اكياس بلاستيكية ثم في البراد ( كل كيس نضع فيه مقدار وجبة)، اسأل الله الكريم أن يبلغنا هذا الشهر و أياكم.

ام زيزو · 2013-04-08, 18:23

موضوع جميل انا فكرتي
هي الجلبانة نضعها في القرعة نتاع سعيدة بلا ما تغسليها ونغلقها مليح ونحطها في الكونجيلاتور يوم الاستعمال تغسل كانها جديدة
تبقى كل جبة وحدها لا تلتصق و تستطعين تفريغ الكمية التي تحبينها تحياتي في انظار افكار الجميع

الوهرانية 1 · 2013-04-08, 18:35

حبيبتي اولا انا خلاص بديت نحضر وادا حبيبتي تضحكي عليا شريت بعض االلوازم للعيد لانو تعرفي بعد شهرين النتائج المدرسية تظهر و اسعار لوازم الحلويات تلتهب
هاد المرة شريت 3 كغ كاوكاو ابيض درته في المجمد و 4 اكياس سكر قلاصي ومازال نزيد وكل عام ندير هكدا مسبقا وفي العيد نشري غير البيض هههههه
واما في مايخص تحضيرات رمضان ان شاء الله
رانا شرينا الدجاج لانو راه رخيص ومعروف انو الدجاج كل ما طول في الثلاجة كان احسن والريحة المزفرة اكرمكم الله
فكرة الدجاج المرة الجاية نصورلكم الطريقة انشاء الله بعد ادن صاحبة الموضوع
لانو الدجاج نستعملوه محمر ومحشي واسكالوب الدجاج وبوراك و.... و......
المهم راني معاكم واي تحضير راح نكون معاكم

ام راضية · 2013-04-08, 18:56

شكرا جزيلا لكل الاخوات علي التفاعل معي في هدا الموضوع البسيط الدي اتمن ان يكون مفيد
راح ابدا باول فكرة وان شاء الله تعجبكم وما تستغربوش
اولا تخزين الدراهم ههه
يجب ان تكون معك دائما حصالة نقود خاصة بك ربما الاخوات اللي ربي موسعها عليهم راح تضحكهم الفكرة لكن معليش اضحكو واشروا وحدة راح نقلكم واش ديرو بيها
اختي ادا كنت عاملة اشتري واحدة وكل شهرية نحي مبلغ ارميه فيها وانسيه
المراة الماكثة في البيت كحالتي حاولي تفضلي كل يوم من مصروف البيت وارميه في الحصالة وانسيه طبعا اقل شيء 100دينار وشوفي من هنا لرمضان ان شاء الله راح تجدي عندك مبلغ من المال يفيدك في قضاء بعض الاشياء كلما تقشفت سيكبر المبلغ
كدلك تحايلي علي زوجك كي يخلص ونحيلو شوية من الشهرية ارميه فيها معليش حتي مائة الف انت ودكائك معه ههه
اما الاخوات المتيسرات كل يوم يضعن في الحصالة مبلغ فائض عليهن وعندما يقرب رمضان تتصدقن به لعائلة فقيرة ما رايكن في الفكرة نكمل افكاري البسييييييييييييطة والا نحبس
هده حصالتي

ام راضية · 2013-04-08, 18:59

اقتباس:

المشاركة الأصلية كتبت بواسطة الوهرانية 1

حبيبتي اولا انا خلاص بديت نحضر وادا حبيبتي تضحكي عليا شريت بعض االلوازم للعيد لانو تعرفي بعد شهرين النتائج المدرسية تظهر و اسعار لوازم الحلويات تلتهب
هاد المرة شريت 3 كغ كاوكاو ابيض درته في المجمد و 4 اكياس سكر قلاصي ومازال نزيد وكل عام ندير هكدا مسبقا وفي العيد نشري غير البيض هههههه
واما في مايخص تحضيرات رمضان انشاء الله
رانا شرينا الدجاج لانو راه رخيص ومعروف انو الدجاج كل ما طول في الثلاجة كان احسن والريحة المزفرة اكرمكم الله
فكرة الدجاج المرة الجاية نصورلكم الطريقة انشاء الله بعد ادن صاحبة الموضوع
لانو الدجاج نستعملوه محمر ومحشي واسكالوب الدجاج وبوراك و.... و......
المهم راني معاكم واي تحضير راح نكون معاكم

ربي يبارك فيك حبيبتي الوهرانية اتحقينا بافكارك والموضوع ملك الجميع وليس ملكي وكل من عتدها فكرة او تجربة تضعها

terrou · 2013-04-08, 19:33

اقتباس:

المشاركة الأصلية كتبت بواسطة ام راضية

شكرا جزيلا لكل الاخوات علي التفاعل معي في هدا الموضوع البسيط الدي اتمن ان يكون مفيد
راح ابدا باول فكرة وان شاء الله تعجبكم وما تستغربوش
اولا تخزين الدراهم ههه
يجب ان تكون معك دائما حصالة نقود خاصة بك ربما الاخوات اللي ربي موسعها عليهم راح تضحكهم الفكرة لكن معليش اضحكو واشروا وحدة راح نقلكم واش ديرو بيها
اختي ادا كنت عاملة اشتري واحدة وكل شهرية نحي مبلغ ارميه فيها وانسيه
المراة الماكثة في البيت كحالتي حاولي تفضلي كل يوم من مصروف البيت وارميه في الحصالة وانسيه طبعا اقل شيء 100دينار وشوفي من هنا لرمضان ان شاء الله راح تجدي عندك مبلغ من المال يفيدك في قضاء بعض الاشياء كلما تقشفت سيكبر المبلغ
كدلك تحايلي علي زوجك كي يخلص ونحيلو شوية من الشهرية ارميه فيها معليش حتي مائة الف انت ودكائك معه ههه
اما الاخوات المتيسرات كل يوم يضعن في الحصالة مبلغ فائض عليهن وعندما يقرب رمضان تتصدقن به لعائلة فقيرة ما رايكن في الفكرة نكمل افكاري البسييييييييييييطة والا نحبس
هده حصالتي

فكرة رائعة
ارجوا ان يثبت الموضوع لتعم الفائدة

ام زيزو · 2013-04-08, 19:46

اقتباس:

المشاركة الأصلية كتبت بواسطة ام راضية

شكرا جزيلا لكل الاخوات علي التفاعل معي في هدا الموضوع البسيط الدي اتمن ان يكون مفيد
راح ابدا باول فكرة وان شاء الله تعجبكم وما تستغربوش
اولا تخزين الدراهم ههه
يجب ان تكون معك دائما حصالة نقود خاصة بك ربما الاخوات اللي ربي موسعها عليهم راح تضحكهم الفكرة لكن معليش اضحكو واشروا وحدة راح نقلكم واش ديرو بيها
اختي ادا كنت عاملة اشتري واحدة وكل شهرية نحي مبلغ ارميه فيها وانسيه
المراة الماكثة في البيت كحالتي حاولي تفضلي كل يوم من مصروف البيت وارميه في الحصالة وانسيه طبعا اقل شيء 100دينار وشوفي من هنا لرمضان ان شاء الله راح تجدي عندك مبلغ من المال يفيدك في قضاء بعض الاشياء كلما تقشفت سيكبر المبلغ
كدلك تحايلي علي زوجك كي يخلص ونحيلو شوية من الشهرية ارميه فيها معليش حتي مائة الف انت ودكائك معه ههه
اما الاخوات المتيسرات كل يوم يضعن في الحصالة مبلغ فائض عليهن وعندما يقرب رمضان تتصدقن به لعائلة فقيرة ما رايكن في الفكرة نكمل افكاري البسييييييييييييطة والا نحبس
هده حصالتي

تعطيك الصحة ام راضية رائعة الفكرة كبداية

aouniak · 2013-04-08, 20:18

فكرة رائعة وأكيدكامل رانا معاك وأنا شخصيا بديت بالجلبانة تعرف الجلبانة تدخل في بزاف وصفات يارب يدخل علينا بالصحة والعافية وينور لينا ربي طريقنا الى الطريق المستقيم

حورية الحر · 2013-04-08, 21:13

ربي ايبارك فيك يا اختي الكريمة ارجو ان تستمري وكلنا معاك و ندعيولك انا عندي فكرة العسل انطيبو واندسو في المجمد باش في رمضان اتعسلي المقروض و لقريوش مع العلم اني انطيبهم ونضعهم في علب والى المجمد

~ حراير ~ · 2013-04-08, 21:29

ام راضية اولا نشكرك على الفكرة الرائعة و نقولك انه والدتي كل عام تقولنا هاد الكلام و تبدأ بالمواد الغذائية "زيت طماطم سكر..." و ثاني الجلبانة بلا ما طيبيها حطيها في علبة كبيرة و كل مرة اجبدي منها شوية تلقايها و كأنها جديدة
و لما يقرب رمضان نشرو اللحم و الدجاج
بالمناسبة الدجاج لما تنظفوه و تقطروه حطوه قطع قطع في السينية للمجمد لمدة ساعتين تقريبا كي يتجمد خبوه في العلبة او في ساشيات الكونجيلاسيون ..... كي تجيو تجبدوه تلقاو كل قطعة وحدها مش لاصقين في بعضاهم
اما الدبشة و المعدنوس باش يقعدو جدد لما تشريوهم حلوهم من الربطة و امسحوهم بمنشفة نظيفة و حطوهم في علبة مغلقة مليح راح يقعدولكم كانهم جدد و ما يكحالوش

يمكن راني بعدت على الموضوع
نحب نشكرك مرة أخرى
و نقولك انا راني وجدت للعيد فقط راني شريت لباس العيد للبنات و شريت طرف كتان حبيت نخيطو ستيل قبايلي سخفت عليه هيهيهيهيهيه لاتية غير نتزوق وش رايك فيا؟؟؟؟

حق الوهرانية الشاطرة كيفاش تخبي الكاوكاو في الكونجيلاتور
و الدجاج كي تخبيه من درك ما يفسدلكش؟؟؟

ام راضية · 2013-04-08, 21:51

اقتباس:

المشاركة الأصلية كتبت بواسطة اريج المسك

ام راضية اولا نشكرك على الفكرة الرائعة و نقولك انه والدتي كل عام تقولنا هاد الكلام و تبدأ بالمواد الغذائية "زيت طماطم سكر..."
ربي يحفظلك الوالدة الكريمة وهدا واش حبيت نبدا بيه
و ثاني الجلبانة بلا ما طيبيها حطيها في علبة كبيرة و كل مرة اجبدي منها شوية تلقايها و كأنها جديدة
و لما يقرب رمضان نشرو اللحم و الدجاج
اللحم والدجاج انا من راي نخلوهم لقبل رمضان علي الاقل بشهرنبدا بالاشياء اللي ما تفسدش وان شاء الله تعطينا اختي الوهرانية طريقتها
بالمناسبة الدجاج لما تنظفوه و تقطروه حطوه قطع قطع في السينية للمجمد لمدة ساعتين تقريبا كي يتجمد خبوه في العلبة او في ساشيات الكونجيلاسيون ..... كي تجيو تجبدوه تلقاو كل قطعة وحدها مش لاصقين في بعضاهم
اما الدبشة و المعدنوس باش يقعدو جدد لما تشريوهم حلوهم من الربطة و امسحوهم بمنشفة نظيفة و حطوهم في علبة مغلقة مليح راح يقعدولكم كانهم جدد و ما يكحالوش
شكرا

يمكن راني بعدت على الموضوع
نحب نشكرك مرة أخرى
العفو حبيبتي راكي في صلب الموضوع
و نقولك انا راني وجدت للعيد فقط راني شريت لباس العيد للبنات و شريت طرف كتان حبيت نخيطو ستيل قبايلي سخفت عليه هيهيهيهيهيه لاتية غير نتزوق وش رايك فيا؟؟؟؟
هه هنا راكي بعدت شويه امزح معك بصحتك وصحة لبنات ربي يحفظهم تزوقي حبيبتي وتمتعي وربي يديم عليك الفرحة

حق الوهرانية الشاطرة كيفاش تخبي الكاوكاو في الكونجيلاتور
و الدجاج كي تخبيه من درك ما يفسدلكش؟؟؟

ان شاء الله تجاوب اختي الوهرانية

ام راضية · 2013-04-08, 22:12

الفكرة الثانية حبيباتي
تحضير التوابل
عندما تشتري التوابل او تحضريها دائما نقصي كمية وخبيها في مكان جاف ومتهوي وخليها وهده الطريقة استعملها في سائر العام وكل مرة هكدا حتي تلمي كمية مليحة وكي يفوت شويه وقت وتطول عندك اشري ما يعادلها واستعملي القديمة واحتفظي بالجديدة وهكدا علي ما ياتي وانا دائما افكر في الظروف الطارئة
ابداي من الان وان شاء الله في رمضان لن تشتري التوابل وستوفري ثمنهم حطيه في الحصالة ههه
طبعا هده الطريقة لكل التوابل اللي تستعمليها
ان شاء الله تعجبكم الفكرة

الأمنيات · 2013-04-08, 22:19

فكرة مليحة اختي عجبتني راني معاكم
انا نقول لكم العام الي الفات في رمضان كان الثوم ناقص شوي شريت ونقيته ودقيته في المهراز مع شوي ملح ودرته في علب وحطيت من فوقه شوي زيت
اما القسبر احنا عندنا في رمضان خاصة اصحاب الجنوب الي كي حالتنا ينقص بزاف
نغسله ونقطعه ونحطه في علب