لما تغربلي الفريك ماترميش لرطب أدخلي نقلك واش ديري بيه

إلهام07 · 2013-01-14, 12:58

السلام عليكم يا حراير المنتدى

لما تغربلو لفريك و يبقى عندكم هذاك لرطب أو البعض يسميوه نخالة ما ترميوهش ، احتفظو بيه في إناء أو كيس ، شوفو واش ممكن الديرو بيه

، راهو جدا يساعدكم في الطبخ :

لما شفت موضوع الأخت samsouma samah اللي تسأل فيه عن سر طاجين الزيتون اللي يديروه الطبابخة قررت أن أكتب هذا الموضوع حتى يستفيد الجميع عوضا عن وضع رد في موضوعها .

1/شفت في موضوع الأخت الردود اللي جاتها و أنا عندي حل أحسن ( و هذا سر أخذته أمي من عند طباخ قسنطيني ) :

أولاا : طبعا كيما قالو الأخوات لازم لاصوص تكون قليلة باش يجي طاجين الزيتون خاثر.
ثانيا : حتى تعقد لاصوص و ما جيش جارية كي الماء ، أضيفي في المرق نتاعك ( أثناء الغليان ) حوالي 1-2 ملعقة من الفريك لرطب حسب الكمية ( لما تشري الفريك و تغربليه هذاك لرطب ما ترميهش حطيه في إناء أو كيس و احتفظي بيه ).
شوفي النتيجة :
- لما تستعملي البيض في المرق : رايح يخلي ريحة ماشي مليحة.
- لما تستعملي الفرينة في لاصوص : رايحة تجمد لا صوص لما تبرد ترجع تشبه الجيلاتين ( بسبب الأميدون في الفرينة ).
- لما تستعملي الجبن في لاصوص : لأن بعض الأخوات يذوبو في لاصوص نتاع الزيتون قطع من الجبن حتى يجي بنين ، لكن رايحة تتحصلي على مرق حامض و لما يديروها في الأعراس و يفضل الأكل رايح يفسد الزيتون ( يقراص ) بسرعة بسبب الجبن.
- لكن لما تستعملي الفريك لرطب : رايح يخلي لاصوص تعقد + تولي بنينةأكثر لأن الفريك يبنن المرق

.

2/ استعمال آخر للرطب نتاع لفريك :
لما تحبي تعملي كويرات نتاع لحم مفروم في الشربة أو طاجين زيتون أو أي طاجين أو طبق ، بدلا من البيض استعملي لرطب نتاع الفريك ( أخلطي جيدا 1 ملعقة مع الكفتة ) رايح يلم الكفتة و مايخليها تتفتت لما تلوحيها في المرق و يزيد يبنن الكفتة و المرق

3/ استعمال آخر ( هذه الإضافة استفدت منها من أم ماجد ) :
يمكن نرمد السمك أو اسكالوب قبل ما نقليه في لرطب نتاع الفريك بدلا من الفرينة ، أكيد تكون النتيجة أحسن لأن الفريك ألذ من الفرينة ( شكرا أم ماجد على الإضافة ).

هذو الأسرار عرفتهم أمي من عند طباخ قسنطيني و من هذاك الوقت و احنا نعملو بهذي النصيحة و النتيجة طاجين الزيتون نتاع ماما يشهاو عليه الناس و واحد مايديرو في البنة نتاعها ، يعني ماما شومبيون طاجين زيتون

أرجو أن أكون قد أفدت الجميع

.

أنا أمهم · 2013-01-14, 13:10

مشكورة على الإفادة

جازاك الله خيرا

nano ziaya · 2013-01-14, 13:11

يعطيك الصحة اختي ع الموضوع القيم ويخليلك يماك انشاء الله

أم ماجد · 2013-01-14, 13:20

مشكورة على المعلومة انا كذلك استعمله مثلا في مكان الفرينة كي نقليو السمك او المعقودة او كي تجى شربة لفريك خفيفة
انا دائما عندى في بلارة مخبي لحين الحاجة

دعاء القلوب · 2013-01-14, 13:40

يعطيك الصحة اختي على المعلومات المفيدة
بصح ماتجيش بنة الفريك في طاجين الزيتون

إلهام07 · 2013-01-14, 13:59

اقتباس:

المشاركة الأصلية كتبت بواسطة اشورة

يعطيك الصحة اختي على المعلومات المفيدة
بصح ماتجيش بنة الفريك في طاجين الزيتون

لا، ما جيش بنة الفريك و ما تبانش خلاص باللي حطيتي فيه الفريك ، أصلا رايحة تحطي الفريك لرطب ما شي لحرش و ثاني الكمية قليلة خلاص 1-2 ملعقة ماشي حاجة لما جربيها في طاجين الزيتون و في كويرات الكفتة رايحة تعجبك إن شاء الله و تعودي ديما الديريها هكذا ، أحسن 1000 مرة من أي طريقة أخرى

دعاء القلوب · 2013-01-14, 15:45

اقتباس:

المشاركة الأصلية كتبت بواسطة إلهام07

لا، ما جيش بنة الفريك و ما تبانش خلاص باللي حطيتي فيه الفريك ، أصلا رايحة تحصي الفريك لرطب ما شي لحرش و ثاني الكمية قليلة خلاص 1-2 ملعقة ماشي حاجة لما جربيها في طاجين الزيتون و في كويرات الكفتة رايحة تعجبك إن شاء الله و تعودي ديما الديريها هكذا ، أحسن 1000 مرة من أي طريقة أخرى

انا موالفة نخثر بيها شربة الفريك بصح ان شاء الله نجربها

dahbia2009 · 2013-01-14, 16:52

جازاك الله خيرا

انا كذلك استعمله في مكان الفرينة

أم.العلم · 2013-01-14, 18:29

ربي يبارك شكرااااااااااااااااااا

إلهام07 · 2013-01-15, 08:35

اقتباس:

المشاركة الأصلية كتبت بواسطة أم ماجد

مشكورة على المعلومة انا كذلك استعمله مثلا في مكان الفرينة كي نقليو السمك او المعقودة او كي تجى شربة لفريك خفيفة
انا دائما عندى في بلارة مخبي لحين الحاجة

هذه فكرة أخرى للاستعمال ، أستسمحك أم ماجد أن أضيف هذا الاستعمال في الموضوع