Flan pâtissier من مطبخي

omaymen · 2013-01-25, 21:45

السلام عليكم يا اخواتي
جبتلكم اليوم وصفة بنينة ولذيذة وسهلة التحضير فلان باتيسيير تقدري تقدميه مع القهوة او كديسير
بالنسبة لمقادير العجينة الصابلي
250غ فرينة,125 زبدة,قرصة ملح,صفاربيضة2ملعقة سكر,2 ملعقة زيت,2ملعقة حليب.
تاخذي صحن غامق تحطي فرينة وتضيفي الزبدة مقطعة مكعبات وتكون باردة وتخلطي مليح باطراف اصابعك حتى تولي مرملة
من بعد تزيدي قرصةملح مع 2 ملعقة سكر وتخلطي بسرعة,زيدي ضيفي صفار بيضة مع 2ملعقة زيت و 2 ملعقة حليب ولمي كلش باطراف اصابعك تتحصلي على العجينة خليها ترتاح في frigo
كيترتاح حليها و ديريها في صينية مدورة 24سم واثقبيها بالشوكة.

كريم باتيسيير:
1لتر حليب,155غ سكر,125 غ نشاء,3 بيض.فانليا(درت 2 ساشيات صغار)
في كسرونة حطي نص لتر حليب مع 155 غ سكر,فانيليا و خليه يغلي.
في صحن غامق حطي نص لتر تاع حليب الباقي مع 125 غ نشاء وخلطي مليح حتى ذوب النشاء ,زيدي البيض وخلطي كلش مليح اومبعد زيديلهم الحليب اللي سخن مع التحريك
عاودي رجعي كلش في الكسرونة وحركي حتى تعقدلك وخليها تدفا شوية.
حطي الكريمة فوق العجينة وطيبهافي فرن على درجة حرارة 190 لمدة 50د حتى الساعة او حتى تشوفيها طابت مليح
وبالصحة و العافية