معاناة مع والداي

[مشكلتي]

السلام عليكم

بدون اي مقدمات لأني حقا كرهت و خايف ندير شي حاجة معاهم

عندي 19 سنة و نصف

والداي منذ كنت صغير يخافو عليا خوف كبير جدا يفوق الجدود بكثييير


لدرجة اني لم العب في صغري في الشارع مثل الناس ،

ليس لي أقارب أذهب عندهم


المهم نأتي للمشكلة الأهم : لحد الآن مازالو يخافون علي جدااا جداا ، خصوصا الوالد ...

يعني أنا من ولاية داخلية ، نحب نخرج خارج الولاية ماكاش ما يخلينيش ، نحب نروح للبحر ، و الله ما نشوفه لوكان منروحش معاهم ، يجب أن أبقى في حدود المدينة فقط

و الله أخجل من نفسي كثيرا لما يقولولي أصدقائي تروح معانا للبحر أو تحويسة أو اي شيئ ، يقولولي اذا في مشكلة المال و الله ما يهمك كلش خالص من عندنا و المكان موجود ، لكن .....

كرهت هذه المعيشة جدا ، و الله الإنسان لازمه يتحمل المسؤولية في صغره ، لكن أنا و الله حاس بأني كبرت مثل الفتاة ،

لم يتركني أتحمل المسؤولية ، ما خلانيش نعافر الدنيا برا ،

يرحم والديكم فقط قولولي غدوة يزيد بيا العمر و تتقدر أي قدرة كيفاش راح ندير ، هل يا ترى راح نعيش كيما الباقي ؟؟!!!

خايف يجي نهار وين ننفجر ، و نقوللهم أو نديرلهم شيئ لي نندم عليه ، و لي يغضبهم و يغضب ربي ، و مارانيش حاب نوصل لهاذ الموصل

فقط قولولي أرجوكم أرجوكم كيفاش نتصرف معاهم ، و كيفاش ندير ، و كيفاش حتى نقدر نقنع الوالد بلي مارانيش صغير ، راني كبير ، و لازمني نتحمل المسؤولية ، و لازمني نخرج خارج هاذ الجو و الا راح ننفجر ...

شكرا لإصغاءكم

[صمت الرجوله]

و الله يا اخي مانيش عارف نمد نصيحة في مثل هاذ المواقف غير نقولك راهم يقعدو والديك و اشكر ربي لي عندك والديك و حاول تقنعهم بالكلام اللين....انت حالك مثل صديقي تزوج و مزال حاسبو باباه صغير و الغريب مايخليهش يروح لبحر غير لكان معاي انا و صديق اخر لا غير و هاذ الشيئ خلاه مسكين لا يعتمد عليه اطلاقا لدرجة لما يكون حاب يركب برغي "vise" في الدار مايعرفش و لازم يعطلي و ياما دافعت عليه في صغرو من اقرانو و من حتى لي قل عليه و هذا كله بسبب والده ربي يغفرلو
على هاذيك حاول تقنع والدك بالكلام اللين انك رجل و مبقيتش صغير قبل فوات الاوان

[زبدة ذايبة]

وش من دنيا تعافرها ؟؟؟؟؟؟

19 سنة وين تروح ؟؟؟؟؟؟

مازال المشوار طويل قدامك

راك مراهق مازال ماوصلتش للمرحلة اللي تهدر فيها على مواجهة الحياة.

وبما أن الأب تاعك يمنعك فهذا خير دليل على أنك مزالك صغير.

تظن أنه ماشي حاب تخفف عليه المسؤولية.

بالعكس ماذابيه يجي النهار اللي يقول وليدي ولى راجل.

وبما انه يمنعك فهذا يدل على أنك مازال ماراكش قادر تعرف حاحات كثيرة موجودة في الدنيا.

شحال من واحد ضاع وضيعوه صحابوا.

شحال من واحد راح للتدخين والمخدرات والكحول بسبب الأصدقاء.

ويتمنى لو كان يرجع بيه الزمان لوكان ماخلاهش باباه يمشي مع هذاك النوع من الأصدقاء.

عكس وش راك تشوف وتحس باباك يعرفك مليح ويعرف قدراتك.

ويعرف أنه مازال الحال عليك.

ماتتقلق ماتزعف عليه

نهار تجيب الباك ان شاء الله وتدخل للجامعة.

وتشق الحياة العلمية والعملية بمفردك.

هذاك النهار تعرف معنى يكون عندك أصدقاء صالحين.

هذاك النهار تقدر تروح للبحر بلاما يخاف عليك تغرق في الماء أو يغرقوك صحابك في الرذائل.

راك ملحق ان شاء الله على المسؤلية.

كون راجل برك نهار اللي يعطيلك باباك المسؤلية والحرية تكون قدها.

أما الآن دير جهدك تعاون الوالد تاعك تطيعه وتحسن إليه وتكون بار بيه.

ودير في بالك ماكاش واحد في الدنيا ماذابيه يكون وليدو راجل قد الأب والأم.

يعني نحي من راسك الأفكار السطحية والطفولية اللي كتبتها الفوق وماترضيش صحابك على رصاية والديك.

الرجولة والمسؤولية ماراهيش تحواس وخرجة وبحر

الرجولة الحقيقية تبدى من طاعة الله عزوجل وطاعة الوالدين.

رب يوفقك بني.

[one none]

صمت الرجوله بالضبط هذي هي لي راني حاير فيها يا خويا ،

زبدة ذايبة ، طفولي !!!! شكراا،
دعيني أوضح لك من فضلك ، أنا و الحمدلله درست في مكان بعيد قليلا عن منزلنا ، عرفت جميع أنواع الأشخاص ، من الأفضل إلى الأسوء ، حتى أسوء ما يمكنك تخيله ، عرفت حتى أشخاص متعلقين بالإجرام ، و لكن الحمدلله لم تهتز و لا شعرة مني ، عرفت أشخاص قادرين على تلويث معتقداتي ، لكنني لم و لن أتسامح في هاته المعتقدات ، جميع من كانو أصدقائي أو جلهم ، إما الآن في السجن أو في دواهي و السجن ينتظرهم ، يعني المصير واحد ، و أنا بالعكس كنت دائم النصح لهم ، و لكن ما إن أرى الشخص أعوجا لا يعتدل فأهم بالإبتعاد عنه ، و الآن أقدر على القول أنه لم يعد لي أصدقاء مقربين فقد ما يسمى بالمعارف ، تخلصت من كل ما لا يصلح ...

من الواضح أنك تكلمت حسب غريزتك كأم ، أو على الأقل هذا ما يظهر لي ..

الأب يمنعني خوفا علي و ليس لمعرفته بأني صغير ، الحمدلله يا ربي قدرت على تعلم بزاف صوالح من هذه الحياة ، عاشرت كيما قتلك بزاف ناس ، صالح و طالح ، لكن أن أبقى مسجونا في البيت هذا شيئ سيصيبني بالجنون ، لدي هوايات مثل المطالعة ، و التي اكتسبت منها مهارات علمية و ثقافات جميلة تفيدني في شتى النواحي ، تعلمت أيضا القليل من البرمجة التي ستفيدني لا محالة ، و هذه أشياء لا أعتبر ان شخصا مازال "طفوليا" كما نعته قادر على أن يصنع الإرادة على التعلم ، ففي حين أرى الشباب أمثالي يبحثون عن جديد الأغاني "الراي" و عن ماذا فعل هذا و ماذا فعل ذاك ، فإني أشغل نفسي بقراءة كتاب أو بتعلم شيئ من أي مكان

لكن أتعرفين مدى خطورة أن يكبر الذكر بين 4 جدران ، أن يقضي 19 عاما في المنزل ؟؟؟!!! أظن أن شخصا آخرا كان ليصاب بالجنون ...

شفت أنك تكلمتي عن أني نتبع اصحابي بزاف ، رغم اني ما ذكرتش هاذ الشي ،أختي في الله و خالتي ، أنا نشوف الناس من جميع الأعمار ، و من جميع الأفكار ، عندهم قدرة أنه يخرج يدور يعمل حاجات في حياتي ، نظن ماراحش تفهمي مشكلتي جيدا لأنه الذكر و الأنثى مش كيف كيف

و الله ما لقيت كيفاه نفهمك ، يا خالتي ، ناس يخافو على لي عندهم 8 و 9 سنين ،
هل من العدل أني نشوف ناس عمرها 15 سنة تروح تجول وحدها و علابالي بلي راح تكبر تاكلة على روحها و أنا نقعد نشوف ؟

علابالك بلي في وقت الرسول صلى الله عليه و سلم شاب عمره 16 قاد جند المسلمين ؟؟ 16 سنة قائد لجيش ، و أنا 19 تقوليلي مازلت طفولي ،

أنا مانيش نتبع في صحابي ، و سبق و قلت تخلصت من جميع من لا يفيدني و من جميع من أفكاره فارغة ، لكن هاذا شيئ فطريا يكبر معا الذكر ،

و الرسول صلى الله عليه و سلم يقول : لا خير في ذكر لم يجل ،،،

اسمحيلي على هاذ الجملة لكن حاب نقولك : أنه ردك لم يزد في قلبي إلا نارا تشتعل ، لم يزدني إلا إصرار على الخروج من القوقعة ،



شكرا لك على ردك و شكرا على حسن استماعك لي ، و آسف على أي جملة لم أحسن صياغتها فقد خانتني التعابير في كثير من المحطات ،

[dede2000]

الوالد يحبك وكما نقولو بالعامية موش هو ليهدر الكبدة نتاعو لتهدر ،هو موش يخاف عليك من البحر يخاف عليك من النسمة الطايرة، الشوف النصيحة من المفروض اليوم نقدموها لباباك مي الله غالب ماهوش معانا ،باش نقولو لا افراط ولا تفريط وخلي وليدك يتنفس شوية.

[sohaibdz]

الاب تاعك علابالو واش راهو يدير كيما يوصل الوقت باش تكون مسؤول يمدلك المسؤولية و تكره منها بصح مزال الوقت برك

[bachir94]

اخي والله حالتك مثل حالتي أنا الآن 23 سنه ونصف لما كنت تحت العشرين كنت مثلك تماما يعني من الجامع للدار للمدرسة أصحابي يعيطولي ارواح تسهر معانا ولكن مستحيل يخليني والدي ... كان والدي يقول لي لا نوم قبل العشاء ولا كلام بعدها .. يعني نصلي العشاء ونرجع لدار نرقد كنت عايش حياة شغل حريتك تحسها محدوده شغل راك في حبس مي عندك صلاحيات أنّك تخرج تروح للجامع وترجع للدار وتروح للمدرسه قداه من مرّه نقول نهرب من الدار ولا ندير حاجه باشعه مي ستر ربي كنت كيفك انت نفس التخمام سبحان الله نروح نشكي للوالدة الله يحفضها نقوللها الراجل لازم يجرب الحياة برا ويخرج يكتشف و لازمه يتحمل المسؤولية في صغره ونشبه روحي بالفتاة قدامها ... لكن الآن الحمد لله ... لما وصلت للمرحلة الجامعية تعمدت أن أختار شعبة خارج الولاية التي أسكن فيها وليت ما يشوفيني غير في العطل نتع الربيع والشتاء يعني بعد 3 أو 4 أشهر يشوفوني مرّه و بالعقل بالعقل والف اعليها الوالد رخف وراح التزيار هذا ... لذلك أنصحك بالصبر أخي لكي لا تخسر والديك يعني الحاله هذي مش دايمه عام ولا عامين وتروح للجامعه وتتهنّى تولي تتوحش لقعاد في الدار ربي معاك وربي يروقك الصبر ....

[ابو سليمان10]

المشاركة الأصلية كتبت بواسطة مشكلتي

السلام عليكم

بدون اي مقدمات لأني حقا كرهت و خايف ندير شي حاجة معاهم

عندي 19 سنة و نصف

والداي منذ كنت صغير يخافو عليا خوف كبير جدا يفوق الجدود بكثييير


لدرجة اني لم العب في صغري في الشارع مثل الناس ،

ليس لي أقارب أذهب عندهم


المهم نأتي للمشكلة الأهم : لحد الآن مازالو يخافون علي جدااا جداا ، خصوصا الوالد ...

يعني أنا من ولاية داخلية ، نحب نخرج خارج الولاية ماكاش ما يخلينيش ، نحب نروح للبحر ، و الله ما نشوفه لوكان منروحش معاهم ، يجب أن أبقى في حدود المدينة فقط

و الله أخجل من نفسي كثيرا لما يقولولي أصدقائي تروح معانا للبحر أو تحويسة أو اي شيئ ، يقولولي اذا في مشكلة المال و الله ما يهمك كلش خالص من عندنا و المكان موجود ، لكن .....

كرهت هذه المعيشة جدا ، و الله الإنسان لازمه يتحمل المسؤولية في صغره ، لكن أنا و الله حاس بأني كبرت مثل الفتاة ،

لم يتركني أتحمل المسؤولية ، ما خلانيش نعافر الدنيا برا ،

يرحم والديكم فقط قولولي غدوة يزيد بيا العمر و تتقدر أي قدرة كيفاش راح ندير ، هل يا ترى راح نعيش كيما الباقي ؟؟!!!

خايف يجي نهار وين ننفجر ، و نقوللهم أو نديرلهم شيئ لي نندم عليه ، و لي يغضبهم و يغضب ربي ، و مارانيش حاب نوصل لهاذ الموصل

فقط قولولي أرجوكم أرجوكم كيفاش نتصرف معاهم ، و كيفاش ندير ، و كيفاش حتى نقدر نقنع الوالد بلي مارانيش صغير ، راني كبير ، و لازمني نتحمل المسؤولية ، و لازمني نخرج خارج هاذ الجو و الا راح ننفجر ...

شكرا لإصغاءكم

سلام عيكم
اولا لا تتهور فتفعل شىء تندم عليه..ولا تخاصم اهلك...فقد تفعل مثلهم مع اولادك
ثانيا انا لدي قصة مشابهة...الحل هو بالتدريج....لا تغير الامر جذريا مرة واحدة

[،،ايمان،،]

انا ضد الابن يسافر مع اصدقاءه خارج الولاية

مبقاش لامان نهائيا المنكر ره صاري

حتى المدن و العائلات لي راهي تكري في بيوتهم يشترطو عائلة و لا مكان للاصحاب الذكور فقط

شخصيا لن اسمح لابني السفر مع اصحابه حتى و لو وصل عمره 24 سنة و مهما يعرف ناس كاين الخديعة و كاين الخيانة

[one none]

،،ايمان،، و الله ما قلت اني أسافر مع صحابي ، أصلا ما عنديش صحاب ، كلهم بعدتهم عندي ، أنا فقط ضد التقييد و التكبيل المفرط ، قليل من الحرية ستفي بالغرض

[SAMI005]

السلام عليكم

عندي مشكل مشابه .. لكن ليس نفسه فأنا الوالد كان يخاف علي لكن أنا كنت أفعل كما أشاء كعناد و رد فعل ... الحقيقة أني كنت ديما نتشاجر معاه و ديما في شد وجذب ..

لأنو تبالي كان باغي يسيطرلي على حياتي و يخنقني ههههه .. باش يردني عبد مطيع و مربوط مانقدر ندير والو خارج الدار هههههه ... إيماجيني بلي كبش العيد ما يشتينيش

نقرب عندو بش نذبحو معاه !! ولا كي يخدم خدمة ما يبغينيش نتعلم منو على أساس أني إذا تعلمتها راني راح نولي نخدمها ونبطل القراية ههههه .. أنا نشوف بلي هذه التصرفات

راهي نابعة من الخوف من الدنيا لأنو هو شاف منها بزاف حوايج مش ملاح .. مي هذا يبقى ماهوش سبب بش يمنعك منها .. على كل حال أنت راهي حالتك أفضل من بعض

الناس

لأنو كان واحد نعرفو دخلاتو يماه للعسكر ذراع عليه .. يعني قاجا ذراع ..

وفي الكفة الأخرى كان واحد نعرفو من قوة أنو أبوه معلابالوش بيه ولا يدير حوايج ماتتخيلهاش ..

والناس اللي تقوللك 19 سنة راك صغير راهي غالطة .. 19 سنة الناس راهي تزوجت و بلولاد ..

مولا 19 سنة هذا راهو بلغ قبل 5 أو 6 سنوات وأنت تقولو راك صغير !!

نتاج مولا 19 سنة هذا راهم في مكافحة الإرهاب فالجبل .. وأنت تجي تقولو ماتخرجش من الدار ؟؟

مي ننصحك إذا كنت تقرا و كنت في وقت كيما هذا تاع Les vacances شوف كش خدمة .. تجيب فيها دراهم من جيهة وزيد تتعلم بزاف حوايج من جهة ..

هكا يولي ذراع عليه يدير فيك الثقة سيرتو كي تقضي حوايج للدار .. يولي ينقص الخوف تاعو ويولي يعول عليك ..

على العموم .. الدنيا مزالت طويلة قدامك 19 سنة أفضل عمر بالنسبة ليا ... لأأنك تتعلم بزاف حوايج .. متزربش للدنيا كعادش راها جاياتك .. وزيد من الفوق راه مافاتك والو

غير متخممش .. وكي راك تعلمت البرمجة هذا راه كنز كبير لأنك مباعد تحتاجها

و النصيحة الأهم هي بر الوالدين تاعك وجامي تقوللهم لالا .. لأنو كي تشوف الناس كيفاه تعاملك برا تعرف بلي مكانش واحد يحبلك الخير فالدنيا كيما باباك و أمك

ويقدرو ينحيو من فوامهم على جالك بلا مقابل

[نور لاتراه]

السلام عليكم
بحثت في المشكلة عن ما اريد ايجاده فلم اجده
ببساطة العمل
سيشعرهما ان الشاب ذا 19 مستقل ماليا
وهذا جانب من المسؤولية وليس كلها

[ابو سليمان10]

المشاركة الأصلية كتبت بواسطة ،،ايمان،،

انا ضد الابن يسافر مع اصدقاءه خارج الولاية

مبقاش لامان نهائيا المنكر ره صاري

حتى المدن و العائلات لي راهي تكري في بيوتهم يشترطو عائلة و لا مكان للاصحاب الذكور فقط

شخصيا لن اسمح لابني السفر مع اصحابه حتى و لو وصل عمره 24 سنة و مهما يعرف ناس كاين الخديعة و كاين الخيانة

الاصوب ان تعلميه العتماد على نفسه و عدم الانخداع....و ان يكون حاصل على رصيد كبير من التربية و التدين....المتربي المتدين حتى لو خدع او غرته نفسه لايطول الامر الى و يعود للطريق

مثلا انا والدي من هذا النوع...تدريجيا عودتهما على السفر مثلا ...لانني لو لم افعل ذلك لحصلت لي مشاكل بعدها...انا مثلا الان اعمل خاج ولايتي...كيف كنت سافعل لو لم اتعود الاعتماد على نفسي

[kacimo.samy]

السلام عليكم

والله يا اخي انا معك في هذا لاني رأيته بأمي عيني
يوجد بعض اصدقاء ولانهم لم يكونو منفتحين و ما شافو والو
جا لجامعة وضيعاته ؟؟
اصبح يدخن و يشرب و و و ؟؟
و 19 سنة اصبر قليلا سترى وتفهم
حاجة وحيدة التي انصحك بها ثقف نفسك عن طريق القراءة والمطالعة
هذا كتاب انا اطالع فيه حاليا

هكذا تكون واجد للاي شئ



و الوالد متخوف من فلذة كبده تضيع في وقتنا هذا
لذلك انتظر الفرصة فقط
وهي الجامعة سترى وتتعلم

[خالد عنابي]

راني حاير برك فلي يقولو مازال صغير

الله اكبر !! 19 سنة ومازال صغير ؟؟ وقتاه يكبر مالا ؟؟

الحرص الزائد له اثر سلبي والانسان يخرج مايقدرش على شقاه

والحل في القيام بتصرفات تفهم والديك جيدا بلي ماراكش صغير

وربما الخطأ منك وانك تقوم ببعض التصرفات التي يفهموها على انك مازال وليدهم الصغير

لازم توصللهم الميساج بلي راك وليتي كبير ولازم تعتمد على روحك

اذا لم ينفع ذلك هنا يجب الانتقال الى الخطة ب

والخطة ب هي يخبطو ريسانهم على الحيط

دير وش في راسك تنقل اخرج اسهر اتخذ قراراتك تصرف وخليهم يهدرو

شوف كاش خدمة في فاستفود او متجر او اي حاجة

الدخل المالي من اهم مقومات الاعتمادية الذاتية