للرجال خاصة

[مشكلتي]

مساء الخير
اخوتي حابة نستشيركم انا عرفت شاب في احد التكوينات و قد اعجب بي بشدة و انا كذلك اعجبت به تكلمنا مدة سنتين و لم نصرح ولا يوم بحبنا لبعضنا كان الاهتمام هو الدليل القاطع على حبنا مرت الايام و اردت الرجوع الى الله فقطعت علاقتي به مدة اربعة اشهر و هو عمرو لا عيطلي ولا كلمني خلاني في راحتي المهم جاء الخطاب و انا ارفض الى ان جاء اخرهم فضغط ابي علي فقبلت المهم الشخص الاول سمع من احدى صديقاتي بلي تخطبت فانصدم للخبر و مبعد حكا معاي بعدها قلتلو مزال مدرتش حفلة الخطوبة المهم قعد يحكي معاي و لما جاء يوم الخطبة قلتلو غدوة خطبتي تصدم لانه كان يظن انني اكذب او نلعبلو على المورال المهم هنا صرح بكل شيء قالي حبيتك و جامي حبيت و لا راح نزيد نحب بعدك و انا تمنيتك تكوني زوجتي و انتي كنني كل شيء في حياتي و قالي لما انسحبتي قلت نخليها تشوف مشاعرها و روحها معاي و رح ترجع لكن انت مرجعتيش حط اللوم علي انا حزنت و بكيت في يوم خطبتي حتى تنفخوا عينيا و مزلت للان نبكي قلتلو علاه مقلتليش من الاول بلي تحبني و كنت ناويني قالي خفت نلغيلك شخصيتك شفتك انسانة طموحة و حابة تخدمي و انا منحبش اللي تخدم و ظروفي قاهرة مخلاتنيش نرتبط بيك حاليا
انا درك راني في غم كبير لانني خايفة نظلم الخاطب الجديد لانني منطيقش حتى نسمع صوته طول الوقت نخمم في الشخص الاول و نتحسر على اللي متمسكتش بيه

واش ندير تعيشو عاونوني و قولولي برك علاه الرجال ديما هكا كتروح الطفلة من يديهم يندمو و يرميو باللوم عليها

[bachir94]

هوا كان يسّنا فيها تجي منّك أنت بصح أنت ما فهمتيهاش.... أنصحك أذا كنت متأكدة 100 بالمئة أن هذا الشخص الذي تعرفت عليه في التكوين هو صادق في مشاعره وراح يخطبك صح في المستقبل ماش يتمسخر بيك ومن بعد يطيشك ... حبسي الخطبه فورا ....

[خالد عنابي]

هههههههههههههههه

السيد كان مدايرك لعبة وكي تخطبتي حسبك فقتي من الغفلة تاعك غاضو الحال ولى حاب يفسد عليك

هكذا هم بعض الرجال

ولو كان صادقا ماكانش يبقى يهدر معاك عامين وما يفاتحكش بموضوع الخطبة والان لما تخطبتي وراح تشوفي مستقبلك ولى يقول نحبك

قوليلو فض المكتوب بيناتنا ههه

[رفيق الكل]

السلام عليكم
اللي جاء من الباب مرحبا به
اللي قعد يطل من الشباك خطينا منو
اهلك تعبو عليك ورباوك وحابينك تتزوجي موش تبقاي تستني في خونا يفهم روحو
مبروك الخطوبه غقبال الزواج ان شاء الله

[محمد جديدي التبسي]

سنتين من الكلام واش كنتو تحكو سبحان الله؟؟؟
ماجاتش مرة حتى بالمزاح انو قالك ع الخطبة والزواج؟؟
هذا ما يخيفنا منكن يا فتيات لذلك البعض أصبح لا يفكر في خطبة فتاة حتى يتحدث معها ويعرف عقليتها واذا في قلبها واحد؟؟؟
فسدتو علينا وعليكم ربي يصلح رايك ماذنب من خطبك وتقدم من الباب وفرح بك؟!
المثير للحيرة والغرابة في موضوعك هو علاقتكما المحرمة لعامين أكثر من غرابة سؤالك عن عقليات أشباه الرجال! لأن الرجل اذا عجباتو وحدة يتقدملها من الباب او على الاقل يصارحها برغبته في الزواج مش يفوت الوقت عامين كاملين!

[مراد سابقا10]

هكذا وتقولوا على الشباب علاه ميتزوجش

انا عييت نفهم حاجة ضرك هذا ليخطبك وناوي الحلال هو حاط مدي بنت فاميليا

وانت درت علاقات سابقة اشرحلي برك كيف يستقيم الأمر ؟؟؟؟؟؟؟

[FELLA BIO]

نقولك اختي حتى وانت طلبتي رأي الرجال خاصة ..كيما قال الاخ محمد جديدي التبسي و الله فسدتو على كل واحد صاحب نية ..كيفاش تخلي لحلال وتبكي على لحرام إلى دام عامين بلا أي خطوة جدية ..بصراحة نستغرب من حال الدنيا التي العدل فيها قليل ..كان الأجدر بخطيبك ان تكون من نصيبه فتاة عفيفة لم تختلط الرجال ..لكن الله أراد ..وارادته فوق كل شئ ..اهداك رجلا صادقا ليصلح لك أمرك ..فلا تضيعي الفرصة اختي ..اقطعي إي علاقة مع السابق واحمدي الله على نعمة الحلال ..موفقة

[زبدة ذايبة]

هذا تمسخير راه يدير فيه.

وحتى انت راكي تتمسخري.

حبيت ونحب وخليتوا وخلاني

هذا كله كلام فارغ.

شحال من وحدة صرالها هكذا.

غدوة لو كان تبطلي الخطبة على هذا الخاطب.

رح يقولك ( مول التكوين) اصبري عليا حتى نوجد روحي.

وابقاي تستناي.

بعد سنوات من الانتظار رح يقولك بابا قالي بالسيف تتزوج ببنت صاحبو

ولا بنت خوه.

انت في هذاك الوقت تكوني كبرتي بسنوات.

وزيادة على هذا الشيعة اللي رايحة تديها وخسارة العرض.

وابقاي في هذاك الوقت تحلمي بخيال رجل يجي يخطبك.

ماتزيديش تهدري معاه نهائيا.

راكي رايحة ترتبطي برجل ماتحطيلوش عرضه في التراب

بسبب أوهام الحب والمسلسلات اللي تظلي تشوفي فيها.

عامين وهو غير يشوف ويتخيل

بدون أي خطوة فعلية.

وكي عرف انك مقبلة على زواج

بدات المناورات من طرفه.

اخطيك منو وفكري في زوجك المستقبلي.

ركزي على السؤال عن أخلاقه ودينه.

واهتمي تفقهي في دينك تعرفي حقوق زوجك.

وتعرفي واجباتك.

هذا كله اللي راكي تعيشيه الوهم في الوهم.

ماتبكي ماتتقلقي .

كوني إمرأة صالحة وماتكونيش لعبة.

يلعب بيك أي واحد. مرة يلعب بيك مول التكوين. مرة مول الحانوت. مرة إبن الجيران ومرة.........

الرجل الحقيقي اللي تحبيه هو رجل حياتك.

الرجل اللي يجي لداركم ويهدر مع باباك.

يجي قدام كامل الناس حتى يقول أنه يريدك زوجة.

أما الذكر اللي يشوفك مجرد أمنية او حلم هذا ماعندك ماديري بيه.

الحقيقة تفصل بين الحلم والواقع.

وكوني إمرأة واقعية وماتكونيش مجرد خيال في فكر رجل.

ماتخليش لحلال وتبكي على لحرام.

ماعندك حتى دليل أنه يريدك زوجة.

مجرد كلام يقدر أي شخص يقولهولك.

نقدر الآن نكتبلك كلمات الحب والعاطفة.

لكن ماعندها حتى معنى أمام الواقع.

اللي يحبك يجي لداركم.

هذا النوع من الرجال هو اللي يستاهل محبتك.
وإخلاصك.

ومايستاهلش تخونيه وتخدعيه.

كاين من النساء الآلاف. لكنه اختارك انت.

كاين اللي أجمل منك وأصغر منك.

لو كان يشك فيك للحظة أو يحس أن

هناك رجل آخر تبكي عليه. من غدوة يشوف فتاة أخرى.

ماتطلقيش وش في يدك وتبعي مافي الغار.

الأعضاء كامل نصحوك.

وإذا عندك لعقل راكي تفطني.

اتمنى لك السعادة

[{ حديث الوجدان }]

حسبتو فيلم مكسيكي
ياو تزوجي خليك ماكاين خب ولهم يحزنون تزوجي حصني روحك وخلي وناكدلك يلي قالك نانزوجس بغير تلقايه معرس بعد مدة وجيزة ��

[Saif al-Islam]

أختي الكريمة


يا فتاة إتّقي اللّه في مشاعر الناس ......هل تريدونها فتنة في الأرض و فساد ........إتّقو اللّه في مشاعر الشّباب يا فتيات ..... هل أخطأ الخاطب عندما عرف و طبّق الشّريعة الإسلامية و أتى البيت من بابه لطلب خطبتك .....أليس حرام عليك ردّه بعد موافقتك على خطوبتكما و إستبداله بشخص آخر تربطك معه بعلاقة محرّمة طوال سنتين .....ما دنب هذا الشاب الذي خطبك من كل هذا يا أختاه ....ألم تخافي على نفسك أن يستمر الشاب الذي تربطك به علاقة طوال سنتين في عاداته و مكالماته للأخريات حتى وإن تزوّجتي به .....ألا تخافي على نفسك أن يتخلّى عنك الشاب في أيّ لحظة و يستبدلك بأخرى بعد فسخ خطوبتك .....ألا تخافين على نفسك يا أختاه أنّ هذا الخاطب هو آخر من يطرق باب منزلك رغبة في خطبتك .....عودي لرشدك ...... و توبي إلى اللّه سبحانه و تعالى على ما إقترفتي بمصاحبة و الكلام مع أجنبي طوال سنتين ......

أختي الكريمة

إستغفري اللّه تعالى ....و تعرّفي مع هذا الشاب الذي خطبك ..... و أحسني الظّن به ، و ربّما كتبه اللّه لكي لينقذك من سخطه عليك و يعوّضك بما هو أحسن من صاحبك طوال سنتين من معصية .......

و إن لم تجدي فيه ما تحبينه و كانت نيتك صادقة إتجاهه ....فما عليكي إلاّ بمصارحته و فسخ هذه الخطوبة بدل تدمير حياة هذا الشاب بعد الزّواج به .


عذرًا يا أختي إن كنت قاسٍ في كلامي....لأنّ الورطة التي وضعتي فيها نفسك ستكون لها عواقب وخيمة عليك إن لم تحسني التصرّف و العودة للصّواب ، و لأنّ البيوت ستنهار إذا كانت أساساتها بُنيت من الحرام ، لذلك راجعي نفسك قبل فوات الأوان

[sohaibdz]

بصراحة غريب امرك انت والديك بعتوك تتعلمي حرفة في التكوين وليتي تتعرفي و تحبي و يحبوك ،،، متحشميش كيما تشوفي وجه باباك؟!! ولا خلاص راح الحياء ؟!!...و الخاطب هذا علاه مرفضتيهش كيما لي قبلو ؟!! واش ذبو باش يتزوج بوحدة تتكلم مع الرجال في السر؟!!
الله يهدينا و يهديك

[الأرض المقدسة]

الله المستعان - استغفري الله - وتوبي اليه واملئي قلبك بكلام ربك - عسى الله ان يزيل ما علق به من شوائب الحب الأول !! - كما يجب أن تقطعي علاقتك به - وفي المقابل احتسبي الأجر في ذلك كله على الله تعالى - اسأل الله العظيم رب العرش الكريم أن يذهب حزنك وألمك ويبصرك بما هو خير لك ويحببك فيه - أمين ... أمين .

[ابو سليمان10]

هذا دليل على ان الزواج نتيجة الحب مجرد كذبة...الملموس هو الاولى...الحب لايطعم خبزا

[قدور بن عاشور]

و الله غير ضحكتيني و أنا ماقادرش نضحك.
قاتلك تنفخو عينيا من البكاء.
حابة تبدلي واش في يدك بالهواء و الريح و الوعود.
ربي يهديك، تبدين غير ناضجة و لست أهلا لتحمل مسؤوليات أكبر من مسلسلات مهند.

[~أمة الله~]

السلام عليكم ورحمة الله وبركاته
يا أختي الكريمة، كيفاش ما تمسكتيش بيه وهو لم يخطبك من أهلك ولم يحرّك ساكنًا، يتمسخر ولا كيفاش، أو حاب يلومك باش يريّح ضميره هو؟
الأفضل تركزي على مَن خطبكِ، إذا كان ذا دين وخُلق، ورجل صالح وموصفاته تساعدك كمّلي الحكاية واقطعي علاقتك مع الأوّل في كلّ الاحوال، وإذا لم تكمّلي مع هذا، لي حابك يكلّم أهلك...
فتح الله عليك