ندمت على خطبتي

[مشكلتي]

السلام عليكم اشيرو علي اصحاب الراي السديد
انا فتاة عمري 28 سنة خطبني شاب خطبة تقليدية يعني امه هي من اختارتني يوم الشوفة الشرعية شفتو ظهرلي اقصر مني لكن امي و اخي قالا لي انه قدي في الطول او اطول مني فقبلت و بحكم انني رفضت خاطبا قبله باسبوع فقد كان ابي غاضبا مني و هو لم يستشر حتى اخوتي قي الخطبة الثانية باه ميفسدوش علي على حد قولهم
صراحة انا معجبنيش شكله كليا لا وجهه ولا طوله المهم مرت الايام و جات الخطبة و هنا كانت الصاعقة كيدخل يلبسلي الخاتم تصدمت ظهر اقصر مني و اقصر مما توقعت تصدمت صدمة كبيرة و معجبنيش في وجهه متقبلتوش خلاص و فوتت خطبتي و انا في حزن محبيتش نبين برك كفاتت و راحوا و قعدت وحدي اصابتني كآبة بكيت بكاء شديدا و ندمت على اللي قبلت لانني محبيتش شكله خلااااص و لحد الان منحبش حتى نشوف صور الخطبة و منهدرش معه في الهاتف لانه مش عاجبني
راني في حيرة و غمة و قنطة معاجبنيش خلااااص راني في حالة واش ندير؟؟

[محمد جديدي التبسي]

وعليكم السلام
يجب التركيز على أخلاق الشخص لكن يجب تقبل مظهره لأن الزواج عشرة عمر وليس زواج ايام أو أشهر
في الخطبة لا ينبغي الخجل من الرفض كان عليك ان تصارحي والدتك على الاقل
اعيدي الاستخارة وان بقي الأمر في نفسك صارحي والدتك وان رفض أهلك اخبري الرجل وسينسحب من حياتك.

[toulay]

وعليكم السلام ورحمة الله وبركاته
يا اختي معجبكش افسخ الخطبة مشي بسيف ومتحتمش على روحك شخص مشي عاجبك خمم مليح كيفاش راح تعيش حياتك كاملة مع انسان مشي مقتنعة بيه وهذا الانسان عندو حقوق عليك
خمم لبعيد يا اختي وربي يفرج عليك ان شاء الله
بالتوفيق

[وَحيدَ سَلامْ]

وَعليكم السلام ورحمة الله

الزواج حياة
وانسان يرتبط بك وانت لست مقتنعه به
زواج حياته قصيرة ..
ومفتاح كل شيء بدايته والقناعة ما تفعلي


فاضلتي اقنعي والديك بالحسني
والله يقدم ما فية الصلاح والسعادة

[ع.عيسى]

ولا تكرهوا شيئا عسى ان يكون خيرا لكم .......................صل صلاة استخارة ........الشكل ليس معيار في الزواج

[sohaibdz]

بلا مثاليات و كلام خيالي اذا كنتي غير مقتنعة بيه كوني شجاعة و حبسي لانك اذا قبلتي راح تكملي معاه حياتك و ماتديريش حساب للاب تاعك لان الامر مصيرك انت و خصوصا ان هذا الشخص ما عندو حتى ذنب باش يتزوج بوحدة ماش عاجبها
و بالتوفيق

[مراد سابقا10]

رؤى عن عمر رضي الله عنه انه قال لا تزوجوا بناتكم للرجل الذميم فالمراة كالرجل في هذا المجال

انا ننصحك كوني قوية الشخصية وقولي باعلى صوتك لا اريده ولا تتراجعي مهما حدث الأمر

لا تضيعي نفسك ولا تضيعي الرجل معك وانهي كل شيء الآن

[غصن البآن]

ذكرتيني بابنة عمتي ....كانت فتاة يتمناها الكثير ..و خطبت من عائله تعرف عائلتها يعني زواج تقليدي ...المهم هي لم يعجبها لكن لم تعترض لان كانت الرؤيه لدقائق فقط
ويوم تلبيس الخواتم اتى و طبعا في اقاربها وعماتها موضفات و هي فابهى حله ..لما دخل شعرت بالخجل لانه بسيط و على قدر بسيط جدا من القبول واقصر منها بقليل ....وعماتها استهزؤو وقالو لها كيف قبلت بيه ..طبعا احنا دعمناها و كنت اقولها انها راح تعيش افضل من الجميع لانه بدا عليه فرحه بها ورضاه وقناعته ...
هي الان عندها بنت وولد ...مازالت تبدو عروس لا تتخيلين الحب الذي يجمعهما ...وكل ما اذكرها كيف كان موقفها تقول ..لو ياتو باوسم و افضل رجل بالعالم لا ابدله باصبع من زوجي ..ماشاء الله عليهم

لا اقصد ان تقبلي او ترفضي لكن تريثي فلا تعلمين اين الخير ...وعسى ان تكرهو شيئا وهو خير لكم
كثيرات هن تزوجن ممن يسر نظرهن لكن قلوبهن مجروحه لانهن لم يلقين الحب و الاخلاص
موفقه ...واستخيري الله ...فهو لا يخيب من استخاره

[الواثق]

ربي يكون مع القصير ههههه........مزية نساءنا الاغلبية قصارهههه...........انا شاك انك كنت لابسة طالو تاع 15 سم..........يعني اذا طولك 1.60 تولي 1.75 وهو بلا 1.72 يعني فيزيائيا هو اطول منك هههه................المهم ماعجبكش خليه يتهنى منك وربي يرزقك بالطويل المناسب ولن تلحقيه وان اتخذت الدرج مصعدا هههه.....الله المستعان

[Rafik.B]

هي مجرد خطبة والخطبة لمعرفة الخاطب جربي تعرفيه بالاك يعجبك وادا ما عاجبكش ماتضلميهش معاك اعطي للحكاية فرصة والله في هاد الدنيا واحد ما صاحبها كيما بغاها لازم الواحد يحدد أولويات وراهي حاجة على حساب حاجة وادا كان يهمك الجمال والله حياتك وانتي حرة واحد ما يسالك و كل واحد يتحمل مسؤولية قراراتو .

[قدور بن عاشور]

هذا زواج و هذه عشرة و هذه حياتك أنت تعيشيها وحدك
واحد مايعيشها في بلاستك.
مالا يابنت الناس افسخي الخطبة و تهناي من وجع الراس
الواحد يخطب و يتزوج باش يفرح و يتهنى ماشي باش ينغم و تتنغص حياتو
و ما تسمعيش للكلام الإنشائي و المثالي.
أجري على روحك، ماتغبني روحك ماتغبني وليد الناس معك.
كوني شجاعة و قوليها بأعلى صوتك ماعجنيش ما نتزوجوش.

[nihal159]

فسخ الخطبة شيء ساهل و بكلمة منك كلشي ينتهي؛ لذلك ننصحك تتريثي شوية؛ بالاك تلقاي فيه حاجة لي تجذبك؛ أحكي معاه و تعرفي على أخلاقو و مبادئه ممكن أفكاركم تتوافق و تغيري رأيك؛ بالتوفيق إن شاء الله.

[~أمة الله~]

عليكم السلام ورحمة الله وبركاته أختي
قدّر الله وما شاء فعل، غلطتي كي قبلتي ونتي ما شفتيه مليح ما والو...
من حقّك الفسخ، وهُو أفضل ليك وليه خير ما تظلميه من بعد وتولي في حكايات أخرى.
ربي يوفقك

[samirovich]

انا قصير والمفروض ندافع على الفصيلة نتاعي
بالصح مادام ماعجبكش خلاص ابعثيلو خاتمو و هداياه وقوليلو بالتوفيق
هم أخترعو الخطبة باش اللي يحب يتراجع يتراجع مافيها والو
خير ما تتزوجي بيه وتتعذبي ..وثاني تعذبيه هو معاك
خاطر رايح يعيش مع وحدة مش قابلاتو
خليه يروح لوحداخرة كي تشوف هذا القصير تفرح بيه
وتوري تصاور الخطبة لصحباتها

بالتوفيق

[حمزه أبو مريم]

السلام عليكم ورحمة الله
قد لا أضيف جديدا على من سبقني غير أنّه قد تعزّز مشاركتي رأيا من الأراء ..
فمسألة الشكل في الزواج ضرورية باعتقادي والدليل تشريع النظر للمخطوبة حتى يتمّ رؤية ما يدعوا الخاطب لنكاح مخطوبته ، وبما أنّ هناك ما يدعوا للنكاح هناك أيضا ما يُنفّر منه فإرغام النفس على شيء تعافه " بحجّة قد يكون حسنا في جانب آخر التي تقابلها قد لا يكون حسنا فيه " يولّد ردود فعل غير محبّبة بل كارثية ربّما ، والعلاقة هذه ليست ظرفية بل هي طويلة الأمد لابدّ فيها من ارتياح نفسي وقبول شكلي لمن نشاركه حياتنا ، فمن مقاصد الزواج السكينة للطرف الأخر فإن تعذّرت فزواج خِداج ، تبعاته تُنسي المأمول وكدمات قد لا تزول ، فترَوّيْ في الأمر قبل القبول وبالله التوفيق وإليه نئول وصّلى الله وسلّم على محمّد النبيّ الرسول .