ما حظوظ من كانت له سابقة مع الأمراض العصبية في الحصول على إعفاء؟

[عمر الفاروق 27]

بسم الله الرحمن الرحيم
السلام عليكم و رحمة الله و بركاته،

خاوتي أنا طالب جامعي وصلني أمر استدعاء كطالب ضابط احتياط لصالح المدرسة التطبيقية للنقل و المرور بتلمسان و راني مستعد نفسيا باش نروح نفوتها، المهم مين رحت نسحب الاستدعاء تاعي من مقر فرقة الدرك الوطني لقيت باللي رسلوا لشقيقي الأصغر أمر استدعاء مرفوق بأمر التحاق حيث أن شقيقي الأصغر من مواليد 1994 ذو مستوى دراسى رابعة متوسط و خلال السنتين الأخيرتين عانى من مرض عصبي أو نفسي ما، راح لشحال من عند طبيب و اختصاصي و شرب شحال من دوا و الحالة تاعه خطرات يكون مليح كاللي ما كان والو و خطرات يتهلوس و يولي يعاني من عدة هواجس،
المهم خاوتي غير هو ما نستحملوش يروح يفوت العسكر خاطرش ما زال هش نفسيا رغم أنه يظهر طبيعي و كون يعرضوا علي يقولوا لي فوت عامين عام ليك و عام ليه نفوتهم بكل فرح و سرور.
خاوتي انصحوني كيفاش نتصرفوا في هذه الحالة باش يجيب الإعفاء؟
يروح يخاطر يركب و يدي معاه الملف الطبي؟ و هل عنده حظوظ مليحة باش ينال الإعفاء؟ و إذا كنت أنا مجند هل هذا الشي يساعده باش يُعفى؟
و في حالة ما ركبش كون يسجل في التكوين المهني ينال التأجيل؟
خاوتي ثقلت عليكم بالأسئلة سامحوني بصح راهي حالة مُستعجلة بارك الله فيكم.