موضوع مميز طبق فلفل محشي رااااائع بطريقتي الخاصة بالتفصيل من مطبخي

oum anas 69 · 2013-06-18, 00:21

السلام عليكم
اليوم جبتلكم طبق لذيذ جدا و يحمر الوجه و هو من أطباقي الرمضانية أو نقدموا للضيوف و هو فلفل محشي على طريقتي الشخصية و بلا مانطول عليكم نخليكم مع الصور و الشرح
نحضر مرق أبيض بالدجاج عادي كيما تاع الكباب أو السفيرية و نخليه يطيب حتى تخثار المرق و يقعد غير شوية

من جهة أخرى كنت غليت شوية أرز أبيض مع ورقة رند
في مقلة عميقة طيبت كمية من اللحم المفروم مع بصل و ثوم و التوابل في قليل من الزيت أو السمن و زدتلو فنجان ماء صغيرباش يطيب مليح ثم أضفت الأرز و زدتلو شوية فلفل و لفاح و قليل من القرفة ثم طفيت و أضفت المعدنوس بكثرة + 3 قطع جبن للنكهة و يخلي الأرز مجمول

نجو الآن للفلفل خيري الحبات لي مجوفين مليح الداخل أغسليهم و قطريهم و نشفيهم مليح

أقطعي بسكين الرأس الفوقاني و فرغيهم من الزريعة ثم ذري فيهم شوية ملح باش مايجيش سامط أوكي

عمريهم بالحشو بواسطة يدك أو ملعقة قهوة

كي تكملي ستفيهم في سينية الفرن هكذا باش تحكمهم السخانة مليح ههههه و أدهنيهم بشوية زيت مليح لزم تدهني الحبة كامل أوكي ..... الحق أنا نستعمل يدي نحط شوية زيت و نحكم الحبة ندهنها مليح
هذه هي طريقتي أفضل من أنك تقليه في الزيت و تتعبي و تتحرقي و الزيت يترتق و يتطاير و نتي هاربة هههههههههههه ووووووووووو

دخلي الصينية للفرن طلعيها الفوق و شعلي الشواية فقط شوفي

كي تشوفي بلي تحمر منافوق أقلبي الحبات و رجعي للفرن و هكذا على كل الجهات ... راه مايشدش وقت بزاف

هنا طابو خلاص

و هنا المرق كذلك طاب و ككل مرة نقول بلي إذا كان للضيوف صفوا المرق من البصل
وعصرت عليه رشة ليمون مممممم

قشري حبات الفلفل المحشي و حطي في صحن التقديم ثم ضعي عليه القليل من المرق و زينيه بالمعدنوس و قدميه لضيوفك أو لعائلتك بالصحة والراحة

إن شاء الله ينال إعجابكم و تجربوه لأنه فعلا لذيذ جدا جدا و مايتشبعش
ممكن تعملوه مرق أحمر لكن هذا أفضل و دائما نقول لازم نقصوا من إستهلاك الطماطم المصبرة لأنها تهلك المعدة
سلام حبوباتي في لقاء و طبق آخر بإذن الله

ساندي 28 · 2013-06-18, 00:29

انا من محبي هدا الطبق بالذات يعطيك الصحه حبيبتى ام انس اطباقك دائما مميزة ومختاره بعنايه يسلمو ايديكي حبيبتى انا اول واحد ترد هههههه الطبق ليا انا راهم راقدين اششششششششششش واحد مافاق هههههههههه

oum ibrahim · 2013-06-18, 00:31

يعطيك الصحة ام انس فعلا يشهي ينفع لرمضان اللهم بلغنا اياه

oum anas 69 · 2013-06-18, 00:38

اقتباس:

المشاركة الأصلية كتبت بواسطة omnadjem.10

انا من محبي هدا الطبق بالذات يعطيك الصحه حبيبتى ام انس اطباقك دائما مميزة ومختاره بعنايه يسلمو ايديكي حبيبتى انا اول واحد ترد هههههه الطبق ليا انا راهم راقدين اششششششششششش واحد مافاق هههههههههه

ههههههه واش راكي ديري لضرك روحي ترقدي بصحتك عزيزتي و بوسيلي الكتاكيت