السلام عليكم و رحمة الله و بركاته
بسم الله
أول شيء نحب نقوللكم راني في تحضير الكسكسي بالذات أتبع طريقة تقليدية , و أحب أيضا تقديمه بالطريقة التقليدية : العايلة الكل تجتمع عليه و ليس كل شخص في صحن.
ملاحظة مهمة : أنواع الكسكسي التونسي متعددة جدا!!!!!!!!!!! لا يمكن حتى حصر عدد الأنواع هههههههه أي واحدة منكم ذاقت نوع من الأنواع توصفلي شكل الطبق و أنا إن شاء الله (إذا عرفته ) نفسرلها الطريقة إذا أمكنني.
بالنسبة لليوم حضرتلكم كسكسي دياري بالسمك و الخضار. كسكسي السمك المعروف أكثر يكون في الصيف , يعني الخضر المرافقة هي : حمص و بطاطا و قرع و بصل فقط, لكن اتبعو نفس طريقتي هذه إن شاء الله تلقاو النتيجة اللي تحبو عليها!!!!
إن شاء الله يكون موضوعي شامل , و اللي عندها أي استفسار نجاوبها إن شاء الله.
الكمية هنا تكفي من 6 ل 8 أشخاص .
من ألذ انواع الأسماك المصاحبة للكسكسي التونسي و المشهورة به هو : سمك المناني (في الخليج إسمه الهامور) لكن تقدرو تحضروه بأي نوع ..... أنا هنا حضرت بيه هو, راح تلاحظوه في بقية الصور :
كالعادة طولت عليكم سامحوني, الله غالب نحب نفسرلكم أقصى ما يمكن :
السمك إذا كبير قطعيه و إذا صغير خليه كامل, فوحيه ب : 1 م ص كركم, 1 م ص ملح , 1 م ص (تابل و كروية مرحين), فلفل أسود ,1 م ك زيت زيتون, 1 م ك فلفل أحمر (كمية الفلفل الأحمر إذا كنتي تحضري في كسكسي من نوع آخر تحطيها مع الطماطم في مرحلة التقلية لكن هنا حطيها مع السمك تعطيه لذة خاصة))
هنا فوحته , شوفوه :
هنا حضرت كل شيء نستحقه للكسكسي, و ذلك للتوضيح لكم و التصوير فقط, في الأصل يكون تحضير الخضار في نفس وقت الطبخ,
المهم ركزو معايا شوية و شوفو الصورة في نفس الوقت : أول شيء تحضريه هو بصلة تقطعيها , كمية من الكرنب قطعيها (هنا سر كبيييييييييييييييييييييييييييير هههههه : برشة ناس كي يحطو الكنب في الكسكسي يعطيهم مطعم مر شوية!!! على خاطر يحطوه قطع كبيرة مع بقية الخضار , و السر هو أنك تقطعيه و تقليه مع الطماطم في الأول !!! يعطيك بنة روعة في الكسكسي : ما تقولو لحد أسسسسسس هذا سر العايلة هههههههه)
تحضري 3 م ك طماطم مركزة, و البهارات : 1 م ص ملح, فلفل أسود, 1 م ص كركم,حبة عود قرنفل, (كيما قلتلكم قبل في الأصل يكون معاهم 1 م ك فلفل أحمر لكن بما أنه عندنا سمك فالأولى تتحط معاه موش مع الطماطم)
تحضري فلفل للتقديم, تشقيهم على جنب و تحطي في وسطهم ملح, (تابل و كروية مرحين و هذا اختياري) الفلفل هذا تقليه!!
تحضري الخضار اللي عندك : جلبانة, 3 حبات بطاطا مقصوصين أنصاف, 3 جزر مقصوصين قطع كبيرة, 1 لفتة كبيرة مقطعة طوليا, كمية قرع (6 قطع أصغر شوية من أنصاف البطاطا) , 1 سنة ثوم كبيرة, 2 بصلات صغار شقيهم من فوق بعلامة + , 1 طماطم قصيها على 4
الآن نبدا في الطبخ :
قلي البصل في الزيت (كمية الزيت تكون أكثر من اللي تستعمليها في الطواجن العادية) شوفوها هنا :
حطي الطماطم و البهارات و كاس ماء و قليهم مليح :
سر العايلة ههههههه كي تشوفي الطماطم بدات تتقلى زيديها الكرنب المقطع :
في هذا الوقت , نكيل الكسكسي بالطريقة التقليدية ههههههههه : في تونس نكيلو الكسكسي بعلبة الطماطم الفارغة : يا إما علبة الكيلو يا إما علبة الرطل ههههه,
كمية 2 علب متاع الرطل كيما تشوفو هنا: ( أنا لا أستغني عن الكسكسي الدياري حتى تلاحضو فيه أعواد القرنفل , ربي يفضللي أمي العزييييييييييييزة )
نرجعو للمرق , شوفو هنا الكرنب ولى شفاف !!!!
تو امرقو شوية ماء و حطو السمك , السمك لازم يتغطى بالماء , (تقدرو تحطو الخضر و السمك من فوق لكن أنا هنا الماعون صغير فأضطر لطبخ السمك وحده ثم بعد إخراجه نحط الخضر)
شوفو هنا السمك يسبح بكل حرية ههههه:
نرجعو للكسكسي, بما إنه دياري نغسلوه و يستقطر, إذا عندك كسكسي حانوت فقط بلليه بشوية ماء دافيء و زيديه أعواد قرنفل .
و من أسرار العائلة أيضا ههههههه نفوحو الكسكسي : 1 م ك زيت زيتون, فلفل أسود و شوية كركم, شوفو هنا :
أفركيه ملييييييييييييح بين إيديك و خليه يرتاح تقريبا ربع ساعة
هنا الخضار اللي حضرناها للمرق :
هنا السمك طاب, خرجيه و حطي الخضار في المرق, و عومي عليها الماء تقريبا لتر ماء أو أكثر (زيادة على اللي صبيتيه في الأول للسمك)
شوفو هنا نحط الخضار و بعد نصب عليها الماء يعني كمية الماء تقريبا على حسب الخضار اللي عندك, لازم يفوتها ب2 صم
كيما تشوفو هنا : هذا السمك اللي حضر, و تلاحظو اللي أنا قليت الفلفل :
أول ما يغلي المرق في المقفول (الجزء السفلي من ماعون الكسكسي) نحطو الكسكسي يفور في الكسكاس ( الجزء العلوي) , فوق نفس المرق (لازم ياخذ ريحة المرق 
ملاحظة مهمة : باش يفور الكسكسي بطريقة ناجحة : ما تحطيش الكمية الكل من الأول , حطي فقط 2 صم من الكسكسي , هو يخرج البخار من الجهات الكل و إنت كملي حطي بقية الكسكسي كاملة , شوفو هنا الكمية الأولى :
بعد ما تحطو كل كمية الكسكسي , أول ما تلاحظي البخار خرج منه, إحسب 20 دق تكون أكلتك جاهزة !!!!!!
( إذا البطاطا و القرع من النوع الطري أول ما يطيبو خرجيهم ما تستنيش للآخر)
أول ما تهبطي الكسكسي رشي عليه شوية فلفل أسود و حركيه
شوفو هنا المرق : تقريبا لتر أو أكثر شوية : ( أنا خرجت البطاطا و القرع من قبل) :
حطي الكسكاس فوق الكسكسي اللي في القصعة و صبي فيه المرق , حتى يغطي كل الكسكسي : ما تخافوش ههههههههههه ما يبقاش شربة ههههههه راح يتشربه كله!!!!
شوفو هنا كمية المرق اللي فوق الكسكسي : (أنا هنا استعملت كل كمية المرق يعني ست بيت شاطرة ههههههههه لأن الكسكسي يكون ألذ لما تكون كمية المرق مضبوطة مع الكسكسي يعني ما يبقاش منها حتى شوية و في نفس الوقت ما يوكنش الكسكسي ناشف)
اللي عندها خوف, كل مرة تمرق شوية و تخليه يرتاح و بعد تذوق .... كل مرة شوية حتى توصل لذوق الكسكسي التونسي لا ناشف و لا منفخ!!!
حركي بالملعقة بالشكل هذا : فقط حفر في الأجناب و في الوسط:
تخليه يرتاح ربع ساعة : يتشرب المرق , و بعد حركيه تلاقيه هكا:
وقتها تقدري تقدميه بالطريقة اللي تحبيها : كل شخص وحده :
أو بالطريقة التقليدية في القصعة العائلية : تحطي الخضار في الوسط و السمك و الفلفل على الجوانب :
إن شاء الله ما نكونش تأخرت عليكم يا أريج المسك و أم ياسين الزهراء الكسكسي هذا هديتي ليكم حبيباتي!!!
و بالتأكيد لكل عضوات منتدايا (عائلتي) العزيزات على قلبي...... أحبكم في الله
ملاحظة : الكسكسي بالذات من الأطباق اللي يمكن تلاقي شوية صعوبة في معرفة كمية المرق اللازمة حتى يكون لا هو ناشف و لا هو منفخ, لكن بالتجربة مرة و اثنين راح تلاقي روحك أكبر صنافة !!!!!
ما تخافوش تبعو طريقتي بالضبط و أكيد تنجحو فيه, و الله كل من ذاقه عجبو بكل صراحة ههههههه موش حوحو يشكر روحو هههههه
( تقرير عن مشاركة سيئة )، و الموجودة أسفل كل مشاركة .
2013-01-12, 09:14
و الله تمنيتكم تذوقوه : الكسكسي التونسي بالسمك !!!!!
العرض العادي
