الدرس الاول من دورة الحلويات مع زينب

زينب 83 · 2017-05-02, 08:53

السلام عليكم و رحمة الله ووبركاته

صباح الخير غالياتي

درس اليوم سيكون عن طريقة تحضير غريبية الورقة القسنيطية بشكل جديد و جميل
حبيبت نبدى بدرس سهل كبداية

هذه الغريبية لذيذة جدا و سهلة و ناجحة في نفس الوقت

مقادير العجينة

فنجال صغير زبدة او سمن ذايب و بارد
5 فناجل فرينة مغربلة
رشة فانيلا
و ماء زهر
رشة ملح

مقادير الحشو
1 كلغ كوكاو محمص ملييييح حتى يرجع لونه احمر
350 غ سكر عادي
جلجلانية محمصة
زيت عند الحاجة

نبدأ على بركة الله
اولا نحضر العجينة بخلط جميع المقادير راح نتحصلوا على عجينة مطاطية مثل عجينة البقلاوة
نخليوها تريح اقل شيء ساعة

نرجع للحشو
نرحي السكر في الرحاية اليدوية و اقصد هنا رحاية القهوة حتى يرجع بودرة بعدها نزيدولي الكوكاو و نرحيوه معاه حتى ترجع عجينة يعني الكوكاو ايضا بودرة

لتسهيل العملية نرحيو الكوكاو في الروبو و مباعد في رحاية القهوة

كاين يخلطو السكر مع الكوكاو و يرحيو و هاذي العملية خاطئة لانو راح يبقى السكر حبيبات و راح نحسوه عند الاكل

لازم نرحيو السكر اولا حتى يرجع بووودرة و بعدها نزيدولو الكوكاو

اذا عجينة الكوكاو بقات تتفتت ممكن نزيدولها ملعقة زيت و نعجنو مليح
العجينة لازم تكون يابسة ماش جارية
في الاخير نزيدو الجلجلانية

طريقة التشكيل

نحلو العجينة في الة البقلاوة حتى الرقم الاخير
لازم تكون رقييييقة
نقصوها شريط و نحطو فوقه حربوش الكوكاو و ندورو العجين مرتين
في الدورة الثانية ندهنو حاشية العجينة ببياض البيض او الماء

و نبداو نقصو الحربوش مقروطات

كل مقروطة نشلحوها في الوسط بالسكين و بعدها نضغط على الحبة كما في الصورة راح نتحصل على شكل جميل

نحطوها طيب على نار متوسطة و لازم تبقى بيضاء مايتغيرش لونها

يعد ماطيب ندهنوها بجولي و نزينوها بالبيستاش

اضافة الجلجلانية المحمصة تحطيها طعم تحفة احسن من العادية

هذا كان درسنا الاول و اي سوال انا في الخدمة
و هذه بعض الافكار من مطبخي في تشكيل مقروط الغرس

راني خليت مجال التطبيقات مفتوح لانه كل اخت و ظروفها و باذن الله الدروس راح تكون كثيرة و لي ماقدرتش طبق في درس ممكن في درس اخر .... لكن هذا لا يمنع انه اصحاب التطبيقات راح تكون عندهم مكافآت مستقبلا

اذا لقيت تفاعل في مواضيع الحلويات راح نفتح دورة لتعليم طي المناديل بطريقة فنية و حصرية لمنتديات الجلفة

في امان الله غالياتي

zokhrofa · 2017-05-02, 09:59

اه جمييييييل جدا خسارة برك فيها الحشو كنت حابة نوض اليوم نديرها

ياريت اختي زينب المرة الجاية قبل ما تحطي الدرس قوليلنا على واش تحتاج الوصفة من قبل على الاقل نوجدوهم

شكرا بزاف على الوصفة

naila166 · 2017-05-02, 10:03

شكرًا على الوصفة رائعة الله يبارك عليك

زينب 83 · 2017-05-02, 10:34

اقتباس:

المشاركة الأصلية كتبت بواسطة naila166

شكرًا على الوصفة رائعة الله يبارك عليك

يبارك فيك حبيبتي اهلا و سهلا

زينب 83 · 2017-05-02, 10:30

اقتباس:

المشاركة الأصلية كتبت بواسطة zokhrofa

اه جمييييييل جدا خسارة برك فيها الحشو كنت حابة نوض اليوم نديرها

ياريت اختي زينب المرة الجاية قبل ما تحطي الدرس قوليلنا على واش تحتاج الوصفة من قبل على الاقل نوجدوهم

شكرا بزاف على الوصفة

اهلا بالفنانة زخرفة
ماجاتش الفرصة اني نقولم بلي مبدعة ما شاء الله افكارك كلها تحفة و انا شخصيا استفدت منها بزااااف بزاااف نتمنى دايما نشوف مواضيعك المميزة

اما بالنسبة للحلوى فالتطبيق ليس اجباري عندك الوقت و طبقي وقت ماحبيتي حبيبتي

zokhrofa · 2017-05-02, 20:25

اقتباس:

المشاركة الأصلية كتبت بواسطة زينب 83

اهلا بالفنانة زخرفة
ماجاتش الفرصة اني نقولم بلي مبدعة ما شاء الله افكارك كلها تحفة و انا شخصيا استفدت منها بزااااف بزاااف نتمنى دايما نشوف مواضيعك المميزة

اما بالنسبة للحلوى فالتطبيق ليس اجباري عندك الوقت و طبقي وقت ماحبيتي حبيبتي

هاااا هاذي شهادة نعتز بيها و نحتفظ بيها في قلبي صحيتي اختي زينب

حسنا بما انو ماشي اجباري مالا عندي الوقت انا عمبالي نطبقو و تصحيلنا الاخطاء و حتى التلاميذ كامل يطبقو باش نجوزو للدرس الثاني

نقولك حاجة ؟ قل هو الله احد على واش درتي انا مانحبش بزاف حلويت تقليدية بصح كي تكون شابة تشهيني على الاقل ناكل حبة

زينب 83 · 2017-05-02, 23:37

اقتباس:

المشاركة الأصلية كتبت بواسطة zokhrofa

هاااا هاذي شهادة نعتز بيها و نحتفظ بيها في قلبي صحيتي اختي زينب

حسنا بما انو ماشي اجباري مالا عندي الوقت انا عمبالي نطبقو و تصحيلنا الاخطاء و حتى التلاميذ كامل يطبقو باش نجوزو للدرس الثاني

نقولك حاجة ؟ قل هو الله احد على واش درتي انا مانحبش بزاف حلويت تقليدية بصح كي تكون شابة تشهيني على الاقل ناكل حبة

انت بالذات حاباتك طبقي هههه علابالي عندك لمسة خاصة و راح نستفاد منك صراحة احببت كل مواضيعك و طريقة طرحك للافكار و خاصة انك تطرقتي للاكل الصحي لي انا نحبو بزاااف ...صراحة ابدعتي

fleur de lili · 2017-05-02, 10:21

بسم الله مشأالله تحفة
شكرا علي المجهود
ربي يحفض هذوك اليدين ليتلفو في حرير

زينب 83 · 2017-05-02, 10:34

اقتباس:

المشاركة الأصلية كتبت بواسطة fleur de lili

بسم الله مشأالله تحفة
شكرا علي المجهود
ربي يحفض هذوك اليدين ليتلفو في حرير

تسلمي يا غالية ....كنت قلتلك مرة بلي نتفاءل بردودك الجميلة .... شكرا جزيلا

اميريم19 · 2017-05-02, 10:39

يعطيك الصحة اخت زينب راح نطبق في اقرب فرصة ان شاء الله وديما متابعة للدروس بارك الله فيك

زينب 83 · 2017-05-02, 11:00

اقتباس:

المشاركة الأصلية كتبت بواسطة اميريم19

يعطيك الصحة اخت زينب راح نطبق في اقرب فرصة ان شاء الله وديما متابعة للدروس بارك الله فيك

تسلمي حبيبتي و مرحبا بيك

sabinaz · 2017-05-02, 11:11

السلام عليكم
انت رائعة وافكارك في القمة الله يبارك عليك,

ايمان يمن · 2017-05-02, 11:22

جاري التطبيق لاحلي زينب فالمنتدي كنت شفت الحلوي من قبل وخفت نجربها لانو اكيد عندها اسرار لنجاح الكيفية وبارك الله فيك حطيتيلنا الوصفة بكل الاسرار.شكرا
عندي استفسار كمية الجلجلانية شحال ومرحية ولا لالا.هاذ الحلوة نقدرو نعسلوها ولا لالا.الحشو يتلم غير بالسكر والكاكاو قصدي منزيدولو وأبو بغير الزيت اذا متلمش؟شكرا حبيبتي

الفجر القادم · 2017-05-02, 11:50

يعطيك الصحة حبيبتي زينب و بارك الله فيك و في اهلك و جعلها الله في ميزان الحسنات.
فقط سؤال اخيتي، هل من الممكن استبدال السكر عادي بالسكر الرطب،؟ و بالنسبة لعجينة الكاوكاو اذا ما تلمتش بالزيت ماذا نضيف؟ و هل يمكن طحن الكاوكاو و هو ساخن؟
جزاك الله خيرا اخيتي و شكرا مسبقا. و عذرا على الاسىئة الكثيرة بالتوفيق للجميع.

زينب 83 · 2017-05-02, 12:59

اقتباس:

المشاركة الأصلية كتبت بواسطة الفجر القادم

يعطيك الصحة حبيبتي زينب و بارك الله فيك و في اهلك و جعلها الله في ميزان الحسنات.
فقط سؤال اخيتي، هل من الممكن استبدال السكر عادي بالسكر الرطب،؟ و بالنسبة لعجينة الكاوكاو اذا ما تلمتش بالزيت ماذا نضيف؟ و هل يمكن طحن الكاوكاو و هو ساخن؟
جزاك الله خيرا اخيتي و شكرا مسبقا. و عذرا على الاسىئة الكثيرة

بالتوفيق للجميع.

لا حبيبتي سقيي قد ماحبيتي هذا ركن للتعلم
شوفي السكر الرطب يطلق الماء و جيك عجينك الكوكاو رخوة

ايه ممكن ترحيه سخون بصح الرحاية تاعك راح تسخن ماش مليحة للموتور

و الكوكاو كي ترحيه بودرة مع السكر راح يرجع عجينة وحدو لانه الكوكاو يطلق الزيت ... و اذا ماتلمتش زيدي غير ملعقة صغييييرة و لمي راح يتلم و ماتقدريش تزيدي حاجة اخرى