البيتزا من مطبخي

[إلهام07]

البسملة1

عجينتي السرية للبيتزا

صباح الخير عليكم .
آسفة على التأخير لكن النت كانت مقطوعة ، هذا وين كتب ربي باش نحطلكم الوصفة نتاع بيتزا الشاورما للأخوات اللي طلبوها.

هذه العجينة معتمدتها منذ تقريبا سنة راهي فعلا خفيفة جدا وطرية جدا جدا وأهم حاجة ماتنشفش كيما العجينة العادية وكل من ذاقها سألني عن الوصفة وحتى أخواتي لما اعتمدت الوصفة لاحظو الفرق خاصة كي تبقى وتسخنوها في الميكرووند ماتنشفش كيما العجينة العادية.
جربوها أكيد رايحين تعتمدوها ، سر طراوة العجينة راهو في المكونات وطريقة التخمير.

* المقادير لقرصة واحدة :
- كاس كبير فرينة مغربلة( كاس نتاع ربع لتر ناقص منو اصبع ) = حوالي 120غ واللي يحبها رقيقة بزاف يدير 100غ أنا ندير 120 كي نحب نحشي الأطراف بالجبن ونلفها لكن إذا مانيش رايحة نلف الأطراف ندير 100غ فقط جي رقيقة هكذا نحبها.
- 1.5 م ص خميرة خبز
- ربع ملعقة صغيرة خميرة كيميائية
- 1 علب ياوورت طبيعي ( ممكن نعوضو بحليب رايب )
- ½ ملعقة صغيرة ملح ( انا نغربل الملح في هذي الوصفة )
- 1 م ك زيت زيتون ( من الأحسن زيت زيتون ومايبانش طعمو وريحتو ماتخافوش لكن مهم جدا في عجينة البيتزا )
- 1 م ك سكر

* الطريقة :
1- في إناء عميق نحط نصف كمية الفرينة + السكر+ الخميرة الكيميائية + خميرة الخبز ونخلط ثم نضيف فقط الياوورت ونخلط بالمضرب اليدوي ونغطي الصحن مليح ونخليها في مكان دافئ تخمر حوالي 30-40د .

مرات نضيف للعجينة شوية زعيترة او نعناع مجفف مرحي للريحة فقط

2- كي تخمر نضيف باقي الفرينة والملح (الملح نكون غربلتو من قبل ) نلم العجينة ونعجنها مليح لمدة 5د ونشوف إذا محتاجة نزيدلها شوية ماء أو حليب دافئ هي عموما جي قدقد مانحتاجش نزيد ماء.
لازم العجينة تكون جارية شوية باش جي خفيفة وماتخافوش منها لأنو رايحة نحلها بالفرينة ماتلصقش.

3- كي نعجنها مليح وترجع ملساء ، نضيفلها الزيت ونعجنها غير شوية حق مايدخل فيها الزيت ونحطها في إناء مرشوش بالفرينة ونغطيها بكيس نايلون باش ماتنشفش ونخليها تريح لحين الاستعمال .

صلصة البيتزا على طريقة المحترفين

هذه الطريقة شفتها في قناة فتافيت في حصة مدرسة طبخ "مارثا ستيوارت" جربتها وفعلا عطاتني أحسن نتيجة في الطعم والقوام فعلا تتحصلو على صلصة طماطم مثالية بطريقة محترفة.
هذه المقادير ل1كغ من الطماطم ننصحكم تعملو كمية معتبرة وتحتفظو بيها في الثلاجة أو المجمد إذا كانت عائلتكم من محبي البيتزا والمعجنات.
* 1 كغ طماطم
* حبة بصل
* 5 فصوص ثوم
* 5 أوراق رند
* 4 ملاعق كبيرة زيت للتقلية
* التوابل: ملح ، فلفل أسود ، زعيترة ، 1 مكعب مرق دجاج ، شوية هريسة ، رشة سكر، ثوم بودرة.

التحضير:
1- نقطع الطماطم والبصل والثوم شرائح ونحطهم في كاسرول مع الزيت وباقي المكونات كلها ونخليهم على نار هادئة يطيبو في غرضهم ومرة على مرة نحركها بملعقة خشبية ( سر بنة صوص الطماطم الحقيقية أنك تخليها طيب على مهل ).
2- كي تشوفيها طابت نحي أوراق الرند وميكسي الخليط إما بالبرا ميكسور أو في الروبو ونعاودها في رحاية اليد باش تحكملي القشور والبذور وتبقى عندي صوص نظيفة وناعمة .
3- نرجع الصوص للنار ونخليها على نار خفيفة جدا حتى تثقال . نذوقها غذا محتاجة ملح او سكر أو توابل، لازم تكون شوي ناقصة ملح باش ماجيش البيتزا مالحة .
رايحة نتحصل على صوص ناعمة مخملية رائعة نخليها تبرد ونستعملها .
* ملاحظة: الصوص ماتكونش جارية وماتكونش ناشفة خلاص من الماء ، تكون متوسطة الثقل.
ماتقولوليش علاه مانرحيهاش من الأول أنا كنت نرحيها وفعلا بالطريقة هذي الطعم مختلف تماما.

طريقة عمل بيتزا الشاورما

أنا معتمدة طريقة الأخت نينافرات " وصفة شاورما اكسبرس " ، فعلا الوصفة أكثر من رائعة ساهلة وسريعة وتعطيني طعم شاورما لذيذ أحسن وأنظف من اللي تتباع ، نقلتهالكم من دفتر وصفاتي.
* نقلي شرائح نتاع اسكالوب في شوية زيت مانكثرش ونحمرهم على الجهتين ) الكمية على حساب عدد القرصات نتاع البيتزا وكل واحد وإمكانياتو ). نخلي الاسكالوب يبرد شوية قبل مانفتتو باش مايطلقش الماء نتاعو .

* نوجد صوص الشاورما:
أرحي في الروبور نصف حبة صغيرة بصل مع زوج سنات ثوم زيديلهم ملعقة كبيرة خل ونصف ملعقة صغيرة من الفلفل الأسود والكسبر المرحي والكمون وبودرة ثوم ومعاهم الملح وملعقة من الهريسة وزوج ملاعق ماء وملعقة من الموطارد خلطي الكل وصبيه فوق الاسكالوب المفتت فوق النار.
خليهم على نار متوسطة زوج دقائق مع التحريك حتى تدخل المكونات مليح فيه وطفي النار وزيدي زوج ملاعق كبيرة ماء وزيدي خلطي والشاورما واجدة.

* الآن تحضير بيتزا الشاورما:
- نشعل الفرن يسخن على أعلى درجة حرارة .
- ندهن صينية البيتزا بشوية زبدة ( طبقة خفيفة جدا ) ، صينية البيتزا راهي ضرورية باش تعطينا بيتزا كيما اللي تتباع في القوام والطعم.
- نرش مكان العمل بالفرينة و نطرح العجينة بالرولو على شكل دائري على حساب حجم الصينية.
- نحط العجينة في الصينية وندهنها بصلصة الطماطم ( لازم نحط الكمية المناسبة لأنو لو تكون قليلة رايحة جي البيتزا ناشفة ولو كان نكثر بزاف العجينة ماطيبش مليح ).

- التزيين : نوزع بالتساوي : شرائح فلفل أخضر ( ضروري راهو يبنن البيتزا روعة ) + معدنوس مقطع + زيتون مقطع ( مانكثرش باش ماجيش البيتزا مالحة )+ قطع الشاورما +قطع جبن ( انا استعملت جبن كامومبير وجبن أبيض وفي الفراغات حطيت كميات صغيرة نتاع كرام فراش بواسطة ملعقة صغيرة ( نحب دائما نحط الكرام فراش في البيتزا لأنها ماتخليش البيتزا جي ناشفة وتساعد على تمييع الأجبان ).
- نبشر جبن شيدار أو قرييار أو جبن أحمر حسب الرغبة وندخلها للفرن في الرف الوسطاني على 180° حتى تحمار من تحت ومانشعلش من فوق لأنو الجبن المبشور يتحرق بسرعة ومايبقاش مائع .

- نقطعها وهي سخونة وتقدم مباشرة بالصحة والهناء.

في الأسفل اقتراحات لتنويع حشوات البيتزا من مطبخي لذيذة جدا

بيتزات مختلفة مقترحة

هذي البيتزا اللي معتمدتها لأسرتي ( بيتزا اللحم المفروم والمرقاز – ممكن تستغناو على المرقاز لكنها المفضلة لدى أسرتي أنا - ).
نفس العجينة والصوص والطريقة المذكورة فقط الاختلاف في التزيين لا غير، الصور واضحة كفاية.
في البيتزات اللي في الأسفل لفيت جبن على الأطراف

بيتزا بالطون والأجبان وزدت رابيت شوية شيدار :

بيتزا باللحم المفروم والموزاريلا رشيتها بشوية زيت زيتون وزدت رابيت شوية شيدار من فوق

بيتزا بالاسكالوب المشوي ( متبل بملح وفلفل اسود وثوم بودرة ) والفطر الطازج محمر في شوية زبدة والموزاريلا

بيتزا بكرات اللحم المفروم والاجبان :

بيتزا بالمرقاز وجبنة الروكفور روعة ايضا لكن لازم نوزع قطع صغيرة جدا من الروكفور لانه مالح وحامض ونكهته قوية جدا انا خلطت معاه كامومبير وشيدار :




* ملاحظة: لما نلف جبن على الحواف مانحطش الجبن المبشور باش مايتحرقش حتان طيب البيتزا من تحت نخرجها ونبشر عليها جبن ونهبطها للرف السفلي ونشعللها من فوق تتحمر ونعسها لانو تتحمر بسرعة.


وهذي بيتزا بصوص الثوم والجبن هزيت الوصفة من النت :
هنا الكريات المفروض أيضا نحشيهم جبن لكن انا حبيت نحشيهم لحم مفروم
حطيت شوية صوص طماطم ومن المفروض الوصفة مافيهاش صوص طماطم
في الوسط نحط خليط الأجبان اللي هي جبن طري للطلي مع جبن مبشور و زوج فصوص ثوم مرحي وفلفل احمر بودر
والكريات ندهنهم بصوص الثوم اللي هي معدنوس مقطع رقيق مع ثوم مرحي مع ثوم بودر ومع شوية زبدة ذايبة
وفي الوسط نرش شوية معدنوس مقطع رقيق وعلى الكريات نزيد نرش جبن مبشور و شوية فلفل احمر بودر للون
كي تخرج من الفرن ممكن تتدهن الحواف على خفيف بشوية زيت زيتون او زبدة للمعان فقط

كل البيتزات المقترحة روووووووووووووووووووعة على ضمانتي .

آسفة على الإطالة لكن حبيت نشرح كل شيء بوضوح باش مايبقالكم حتى نقطة استفهام.

تحياتي ................... لهومة .

[ام محمد و ملاك]

دائما متميزة

[أم ضياء عبد الرحيم]

ماشاء الله ابداع
اول مرة نلحق على موضوعك و نرد مع الاوائل الهام راكي مبدعة و روحك خفيفة و باينة طيوبة ربي يرزقك و يفتحلك ابواب الخير و يعطيك الي في بالك و يحفظك لعائلتك و يرحم والدتك دنيا واخرة الي جابت فحلة كيما انت و يا بخت زوج المستقبل بيك
خمسة و خموس عليك

[هند11]

اممممممم يعطيك الصحة اختي الهام اطباقك روعة شكراااا على الشرح الممتاز ربي خليك للمنتدى

طلبت منك اطباقكالجديدة ليش مردتيش عليا راني نستنا فيهم

[selma2013]

الله يجازيك على الوصفة اولا على وصفة البيتزا أكيد رائعة وثانيا على وصفة الشاورما تاع نينا لأني اكتشفتها من خلالك سابقا فعلا روعة وثالثا على الشرح الكافي والوافي ربي يهنيك

[ارزاق]

قمة الرووووعة كان ابني يفرج معايا وهو يمووووت علي البيتزا قالي درلنا كفها لكان يصيب بيتزا صباح وعشية الصوص روعة منين شريتي الصينية من فضلك حوست عليها وملقتهاش نشالله ربي يفرحك بلي في قلبك

[Aya69]

إلهام يا لهوووومة يعطيك ألف صحة ويبارك في عمرك ان شاء الله
حرة الحراير ماشاء الله سخفتيني لمهم راح نهبلك بالأسئلة ^:
صلصة نفس طريقتي بصح أنا منعقباهش في رحاية وأنت أعطيتيني فكرة merci
شفت حطيتي صلصة من بعد لحم مرحي وزيتون .... أنا نخلط كل شئ مع بعض وش رايك
جبن موتزريلا كي تفتحيه فيه الماء من داخل خطراش شفت غير لي فيه ماء وعلى ماأظن نتاع سلاطة وهل يصلح نديروا
كرام فراش كي نشريها ثمثم تصوفلي منعرف علاه وأنت
وكومونبار كيفاه ذوقوا في بيتزا أنا منحبوش
وأسمحيلي كثر عليك وربي يجازيك كل خير ويرزقك زوج صالح ان شاء الله

[إلهام07]

مشكورات غالياتي على المرور ........... صدقوني العجينة جد مميزة جربوها باش تعرفو الفرق.


أختي هند راني جاوبتك هذا وين على الوصفات اللي طلبتيها كيما قلتلكم النت كانت مقطوعة جات غير على 12.00 فقط.


اختي ارزاق راني نشوف فيك تسكني في سطيف الصينيات كاين الملاح دوريجين نتاع فرنسا كيما نتاعي هذيك راهي تتباع 850دج راهي كاينة عند حانون واحد فقط في مارشي 1014 نتاع الماعن الفوق في الطابق الاول راهو يبيع غير الماركة حوسي الداخل تلقايه وكاين ماشي ماركة يديرو من 200دج حتى 300دج هذوك عند اي حانوت موجودين شوفي لثمة في مارشي 1014 ولا عند حوانت لوازم الحلويات متوفرين عادي.
ننصحك تشري حاجة مليحة نتاعي عندي قريب عامين ماراح فيها الحال ماجا فقط استحفظي بيها ماتحكيهاش بزاف راهي ماتلصقش ولازم تتدهن بالزبدة هذي ماتتدهنش بالزيت كي تدهني بالزيت يجمع قطات قطرات كي تشريها تفهمي
وزيد كي تكون في الفور طيبي فيها وتحبي طلي على البيتزا طابت ولا مازالت ماتستعمليش الموس راهو يجرحها .

[بشرى2008]

الله الله على البييييييييييييييييييييييييييييتزااااااااااااااااا اااااااااااااااااااااااااا امممممممممممم

[إلهام07]

المشاركة الأصلية كتبت بواسطة Aya69

إلهام يا لهوووومة يعطيك ألف صحة ويبارك في عمرك ان شاء الله
حرة الحراير ماشاء الله سخفتيني لمهم راح نهبلك بالأسئلة ^:
صلصة نفس طريقتي بصح أنا منعقباهش في رحاية وأنت أعطيتيني فكرة merci
شفت حطيتي صلصة من بعد لحم مرحي وزيتون .... أنا نخلط كل شئ مع بعض وش رايك
جبن موتزريلا كي تفتحيه فيه الماء من داخل خطراش شفت غير لي فيه ماء وعلى ماأظن نتاع سلاطة وهل يصلح نديروا
كرام فراش كي نشريها ثمثم تصوفلي منعرف علاه وأنت
وكومونبار كيفاه ذوقوا في بيتزا أنا منحبوش
وأسمحيلي كثر عليك وربي يجازيك كل خير ويرزقك زوج صالح ان شاء الله

أصبرني دخت ههههههههههههه
1- عادي تحبي تخلطي الزيتون تحبي تخلي أنا نحب نخليالأشياء قطع باينين للديكور يجي باهي فقط.
2- الموزاريلا ديما يجي فيها الماء لانو يعجنوها بالماء وهي تعتبر جبن طازج يعني يحتوي على نسبة ماء أعلى من الشيدار لانو الاجبان كيما الشيدار والقرييار يقطروهم مليح من الماء عليها يجيو مالحين ويعيشو فترة أطول.
نعم يصلح للسلطة وللبيتزا عادي جدا .
3- الكرام فراش عندي عام واناندير فيها في البيتزا عادي بصح تحطي كميات صغار بالمغرفة نتاع القهوة وتوزعيها بالتساوي ماتخافيش البيتزا نتاعك من بعد جي طرية وماشي ناشفة ششششش هذا سر
كي نفتح العلبة صح كيتفتحيها و طول تصوف بصح إييييييييييه على قرن باش تفسدلي كاينة الكرام فراش نتاع اسبانيا hopla حليت العلبة عندها بلاك أكثر من شهر ماصرالها والو هذيك مدة الصلاحية نتاعها اطول .
4- الكامومبار : انا نستعمل الماركة اللي في الصورة هذاك مافيهش خلاص الريحة وزيد نحط قطع صغار برك كيما شفتي ماتخافيش يعطي ريحة وطعم مع باق المكونات ممممممممم تحفة حتى اللي مايحبش الكامومبار يعجبو ومايفيقش أصلا روعة سواء في القراتان او في البيتزا انا مانكثرش لانو مالح هاكي تعرفي مع الزيتون والجبن الابيض والكامومبار والشيدار نخاف ترجع البيتزا مالحة.

[أم أسامة 07]

اااااااااااااه لهومة المبدعة سخفتيني

[أنا هي]

رووووووووووعة ماشاء الله

ربي يسلم يديك

[هند11]

شكرااااا كثير حبيبتي الهام معرفتش مقدار دقيق والفرينة باش جيني قرصة مطلوع هل نحط بالكاس وعطيني طريقة تاعك في سمبوسة والكوكا كاش عندك اطباق حطيهم نموت على اطباقك

[إلهام07]

المشاركة الأصلية كتبت بواسطة هند11

شكرااااا كثير حبيبتي الهام معرفتش مقدار دقيق والفرينة باش جيني قرصة مطلوع هل نحط بالكاس وعطيني طريقة تاعك في سمبوسة والكوكا كاش عندك اطباق حطيهم نموت على اطباقك

اولا ننصحك جربي غير بالزوج قرصات ومن بعد كي تحكمي الكيل كثري كيما تحبي أصلا من الافضل ماتكثريش القرصات لانو كي تبداي طيبي من بعد القرصات لخرين تخرجهم الطلعة من الاحسن 4 قرصات والبركة.
1- ديري حق كاس فرينة وكاس سميد تعطيك قرصة ( ديري ديما القرصة صغيرة حتان تحكمي يديك مليح وكبير القرصة إذا حبيتي )
2- قصدك بسبوسة ولا سمبوسك؟
3- الكوكا راني حاطة موضوع للعجين المورق بالتفصيل ولا تحوسي فقط على الحشو ؟
https://www.djelfa.info/vb/showthread.php?t=1449926

الأطباق بزاف هههههههههه المهم ضرك منين يفضلي وقت إن شاء الله نحطلكم موضوع على كل الوصفات اللي طلبتو

مشكورة اختي على الثقة بصح حتى انا راني نتعلم كيفكم

[cuisineshowdalatifa]

ما شاء الله أروع و أحسن من هذا مكاش , أكيد راح نطبق طريقتك و نقولك على النتيجة
شششششكرا