أوراق الديــــول بالسمـــيد والبــوراك والبريــك

[fatimazahra09]

السلام عليكم
حرصت على كتابة هاد الموضوع قبل دخول شهر رمضان المبارك و كان حرصي اكتر على ادراج صور كون لقيت انطقها من اجل عيونكم الحلوين ......هههههههههههههه
و الحمد لله و الشكر لله .....ربي قدرني على ذلك



هادي وصفة ممتازة .... لصناعة الديول بالسميد فقط ....مارايح يجيكم لا ثقيل لا يقطر بالزيت و خصوصا مارايحش يجيكم يابس .......ونظن انو كل وحدة فيكم عندها فكرة على الديول كي يتخدمو بالسميد او الفرينة او الاثنين
بدون اطالة :
المقادير والطريقة ان شاء الله :
سمي بسم الله وحطي مقدار 250 غ سميد في القصعة ودري معاه قرصة ملح وبليه فقط وخليه يريح نصف ساعة .....هادي احسن طريقة باش يتحل فيها السميد ويجيك ساهل للتدليك .... كيما نعملو للمطلوع ....
المهم اعجني بعدها مليح القرصة ...بالناشف فقط حتى تترخف وتصبح لينة .....كيما نعملو كي نعجنو المسمن ....
المهم اعجني وزيدي الماء بالعقل و زيدي اعجني حتى يدخل كامل هاداك الماء ....
هنا العجينة راهي فاتت عجينة المسمن و ولاة كيما نتاع السفنج .... زيدي بلي بالماء و حاولي تجريها حتى تشوفي هادوك الخيوط في العجين ...
هنا حبسي بيدك وحطي الخليط في البلاندور وزيديلو 1 كاس من الماء + 2 م ك زيت فقط و ظربي 1 دقيقة ...
شوفي بعينك لامازلت العجينة ثقيلة زيديلها .... و ظربي دايما ....روحي بالعقل مع الماء .... لاتجرالك و يخسر الخليط وبالتالي يفسدولك اوراق الديول ....
لازم تتحصلي على خليط كيما نتاع لي كراب ( les crêpes ) او الفطائر .... جاري شوية على نتاع البغرير ....
وجربي دايما ورقة وحدة بالبانسو نتاع السيليكون و مشي على المقلة نتاعك .... لازم تكون المقلة مليحة وما تلصقش ....اي نوع من مقلة تيفال توفي بالغرض ....برك لازم تكون d'origine .
ادا شفتي الخليط ثقيل شوية ويفوتلك بالسيف زيدي شوية صغيرة نتاع الماء بارد طبعا( من اول الوصفة استعملي الماء البارد)
المهم ادا كان مليح ...اشعلي على المقلة نتاعك ونقصيلها كامل النار و ابداي على بركة الله ......حطي البانسو في الخليط ومشي في المقلة ...مشي في الخطرة الواحدة زوج مرات في نفس المكان ... مرة من اليمين للشمال و عاودي ارجعي من الشمال لليمين ... وزيدي دخليه في الخليط وفوتي وين حبستي ديري مرة من يمين للشمال ومن الشمال لليمين ... ودايما ابداي بالحاشية ومن بعد في الوسط راهي جيك ساهلة .... وحاولي ما تخليش ثقوب .... اغلقي كامل الورقة ....وخليها طيب لثواني معدودة فقط .....كي تشوفي الحاشية بدات تديكولا من المقلة ارفديها برفق و حطيها على سربيتة نقية طبعا ..... عاودي العملية و حطي مباشرة ورقة فوق ورقة وكل مرة تحطي غطي بهاديك السربيتة ...
مارايح يصرالهم والو .....ولازم في هادي المرحلة تكونو خفاف بالبانسو .... رايحين تتعودوعلى الطريقة ان شاء الله
وجدي الحشو نتاعك كيماتبغي ...حنا نديرو البوراك باللحم المفروم أما البريك تعلمتو.... و حتى هو يعجبني وكي نمل من هاداك ندير الاخر .....هههه
المهم انا هادي طريقتنا في تحضيرو :
نحط شوية زبدة او سمن مقدار 1 م ك في طاجين ماشي مقلة و ندبل معاه 1 بصلة كبيرة مقطعة شرائح .... مع الملح والفلفل الاسود فقط كي تدبال نحط اللحم المفروم ونقلي حتى تاني بتغير لونو .... نزيد كمية من الماء مقدار كاس فقط ونخليه يطيب على نار قليلة باش ما يفيضش ... كي نشوف هاداك الماء كامل تبخر مع التحريك كل خطرة ...نكحز هاداك اللحم على جهة و نحط 2 بيضات على الاقل ولي يبغي يزيد الثالثة ماكانش مشكل ونقليهم في هاديك الجهة لوحدهم من بعد عاد نخلطهم معااللحم لي كان طايب وناشف مليح من المرقة نتاعو .... نطفي النار ...ونقطع المعدنوس رقيق و نخلط كلشي ... نخليه يبرد باش ما يقطعليش اوراق الديول و ونبدا نعمر فيهم .... و كيما كامل الناس نقليهم قبل الادان بشوية .....
راني جبت النهار الاول نتاع رمضان المبارك يجري ....هههههه
هادو الصور وكونكم متاكدين رايحين يجوكم طريين ويتقرمشو .... هادي نفس طريقة صنع ديول الخطفة نتاع سينية النحاس برك recette revisité ... وماريحين تلقاوها حتى في مضرب ........
كانت بذرت مجهوداتي الشخصية والله شاهد على ما اقول ......و خاصة لحابة ديرهم بالسميد وماعندهاش سينية النحاس ....نقوللها جربي في المقلة وبهاد الطريقة ......رايحة تميزي لروحك كيفاش جاوك .......
ان شاء الله نكون عند حسن كل وحدة حطت ثقتها الكاملة فيا ...
وكونكم متاكدين اني مارايحاش نخيب ظنكم في حتى وصفة
ان شاء الله ....








































انتظر تطبيقاتكم ..........وآراءكم خاصة
سلامي الحار ليكم كامل........... و رمضان مبارك ان شاء الله