وصفات بالقرنون ...الارضي شوكي ..من اروع ما يكون

[اسمهان79]

السلام عليكم ورحمة الله وبركاته
اهلين بالغوالي شرفتو صفحتي المتواضعة
عندي اليوم اكثر من وصفة للقرنون (الأرضي شوكي ) كيما يسميه البعض القرناع وصفات بنينة وتحمار الوجه قدام اهل البيت وقدام الضياف
يلا على بركة الله وبسم الله
قرنون محشي بالكرنب (الملفوف)

اول شيئ وجدي صوص بيضاء مع نصف صدر نتاع الدجاج طيبيها ومن بعد نحي الصدر فتيه واحتفضي بالمرقة
نقي القرنون نتاعك وحكيه بالليمون ثم حطيه في الماء يغلي مع شوية ملح وفلفل اسود وليمون خليه يطيب مليح حتى يدخلو الطياب

في هاذ الوقت حطي ورقات الكرنب نتاعك يفورو مليح مليح حتى يطرى خلاص نحيه و قطعيه بالطول شرائط رقاق

ثم في مقلا حطي شوية زبدة وزيت وحطي الكرنب نتاعك قليه مليح في الزبدة ثم فلفل اسود ملح ثوم بودرة او طازه
هاهو كلش راه واجد الكرنب لاصوص الجاج مفتت معدنوس قطع الفرماج

خلطي كلش مع بعض ونحي نصف الكمية حطيها في بلا نتاع الفور والباقي عمري بيه القرنون نتاعك اللي طيبتي من قبل حطي عليه فرماج رابي ودخليه للفور حوالي نصف ساعة

قدميه لعايلتك بالصحة ولهنا راح يعجبك ذوق الكرنب مع القرنون طعم مختلف على الاطباق اللي متعودين نديروهم خاصة الي يحب التغيير اكيد اكيد راح يعجبو انا الحمد لله نال إعجاب كل العائلة حتى ضيافي

كفتة مفورة بالقرنون ( من اروع ما ذقت )





ساهلة وبنينة وماتاخذش وقت حقاً راااااااائعة
نحتاج الى كمية من اللحم المرحي شوية صدر دجاج مرحي 3 حبات قرنون نيئ منقي ومبروش خليط من الدبشة والمعدنوس حبيبات زيتون اخضر مقطع رقيق 1 م ص هريسة 1. م ص موطارد 1 م ص طماطم مصبرة ثوم مرحي فلفل اسود لفاح زنجبيل شوية ملح طرف صغير زبدة طرية 2 م ك خل



نخلط كلش مع بعض ثم نشكل كريات كبار نغلق كل كرية في ورق بلاستيكي ( كي تكوني اقفلي في الورق البلاستيكي ديما اغلقي للجيهة الفوقانية باه لاصوص اللي تنزل من الكريات تبقى ما تخرجش نحتاجوها من بعد)
ثم مرة اخرى في ورق الالمنيوم حطيهم في كسكاس يفورو وأغلقي الكسكاس والورق البلاستيكي ثم الغطاء الخاص بالكسكاس خليهم مدة ساعتين



كي تحلي عليهم حاولي انك لاصوص ما تسيحلكش ديريها في طاوة ثم زيديلها 1 م ص فرينة وعصرة ليمون و صفار بيضة وخلطي بسرعة على النار ( اذا جاتك الصوص قليلة زيديها شوية ماء المهم تخلطي بسرعة باه البيض والفرينة ما يديروش كتل ) تتحصلي على صوص راااااااائعة وبنينة
انا قدمت الكريات لمفورين في أعواد الشواء



وفرغت عليهم الصوص وزينت بالقاص و المعدنوس
صدقوني حباباتي من اروع ما يكوووووووووون البنة رهيييييبة
كوليهم سخونين ورديلي لخبر
قرنون بالخل وصوص البصل الأخظر.





اممممممم روعةةةةةةةة
خذي حبات القرنون بعد ما تنقيهم وتغسليهم وتحكيهم بالقارص قطعيهم على أربعة وطيبيهم في ماء وملح وفلفل اسود والخل
خليهم حتى يدخلهم الطياب مليح
من جيهة في طاوة قطعي 4 حبات بصل اخضر ( البصلة نتاع الذيول) زيدي معاها حبة بطاطة وحبة لفت اصفر ملح وفلفل اسود ولفاح وزيت وثوم وطرف من صدر الدجاج



قليهم مليح مليح على نار متوسطة ثم امرقي وخليهم يطيبو
ارحيهم بالبرا ميكسور وزيديلهم زوج حبات فرماج وبيضة كاملة والقليل من لإكرام فراش سائلة او كثيفة كما يمكن الاستغناء عنها وزيدي ارحي بالبرا ميكسور مليح



نكهيها بالفلفل الاسود والثوم بودرة البنة ما نحكيلكش روعةةةة
في هاذ الوقت يكون طاب القرنون نتاعك نحيه قطريه من الماء ثم في مقلا حطيه وزيديلو طرف زبدة وشوية زيت وملح وفلفل اسود وقليه مليح في هاذيك الزبدة ثم زيديلو دبشة و3م ك خل تضرب الريحة الله الله انا اضفتلو كمية من الفرماج المرحي



وقدمته مع صوص البصل مزين بذيول البصل قطعتهم رقيق
جربيه راح يعجبك اكيد مع بنة الخل والله تحفةةةةةةةةةةةة
قرنون محشي بالزيتون الأخضر






رائع شكلا وذوقاً
وجدي صوص بيضاء بصدر دجاج بصل ثوم لفاح ملح فلفل اسود ملعقة صغيرة فرينة وملعقة كبيرة خل ومعدنوس قليهم مليح ثم امرقي وخلي الدجاج يطيب
من جيهة حطي الزيتون الأخضر يغلي في الماء ومرة على مرة بدليلو الماء باه يتنحالو الملح ويطيب في نفس الوقت
من جيهة اخرى نقي القرنون مليح واغسليه ثم حطيت يغلي في الماء والملح والفلفل الاسود وشوية خل خليه يطيب مليح مليح
تبلي شوية لحم مرحي من جيهة اخرى
ثم خذي حبات الزيتون اللي غليتي من قبل اقسميهم بالموس من جيهة واحدة كيما في الصورة وعمريهم باللحم المرحي ثم خذي حبات القرنون الطايب عمريهم بالفرماج الطري وستفي الزيتون فوقهم بهاذ الطريقة



فتي الدجاج اللي في المرق الأبيض وحطي حبات القرنون بجنب بعض وغطيهم وخليهم يكملو طيابهم
قدميهم مع رشة معدنوس وعصرة قارص وتلذذي بالبنه الرائعة

سفيرية بالقرنون

هاذ الكيفية في الفرن ما ترفدش الزيت بزاف يعني صحية مئة بالمئة وبنييييييينة
نغلي 2 حبات بطاطا بالقشور ومن بعد نقشرها ونهرسها بالفرشيطة ومن جيهة نكون غليت حبات قرنون منقيين وهرستهم ثاني واضفتلهم شوية معدنوس وهريسة وتوابل وملح ولحم مرحي متبل وطايب

خلطيهم غير بالشوية وشكلت أصابع صغار وحطيت فرماج طري في الوسط ثم في مول السيليكون

ومن بعد الى الفور حتى شفتهم حمارو نحيهم وزيني كيما تحبي وبالصحة على قلوبكم
راهم يجيو خفاف بزاف وبنان

لاسوب بالخضار والقرنون

وعملت ثاني لاسوب بالقرنون والجلبانة والبطاطا وشوية طماطم مصبرة ودبشة ومعدنوس وطرف من صدر الدجاج وتوابل وثوم وبصل وحبة لفت اصفر وزيت قليتهم مليح مليح ومرقتهم لما طابو رحيتهم بالبرا ميكسور واضفتلهم حبات فرماج ثم جوزتهم في الرحاية اليدوية اممممممم جا روعةةةةةةةة بنة لا تقاوم
جربيييييييييييه
ومازال كاين وصفات بزاف بالقرنون
وراني مدايرا زوج مواضيع بيه هاذو الروابط نتاعهم
https://www.djelfa.info/vb/showthread.php?t=1801120

https://www.djelfa.info/vb/showthread.php?t=1762929
نتمنى يعجبوكم وتجربوهم وينالو رضاكم
في أمان الله حبيباتي
دعوة بالشفاء لكل طفل مريض

ما شاااااء الله يا اسمهان ما لقيت ما نقول غير ربي يبارك عليك وعلى ما تقدمينه
وصفاتك في القمة يا غالية والقرنون معاك الي ميحبوش راح يولي يموت فيه
لا حرمناك يااااارب
وربي يطمن قلوبكم على ابن اخوك يااااااااااااااااااااااااااااااااااااااارب

[Kaito]

يعطيك الصحة ماشاء الله اطباقك دائما رائعة وبسيطة44444444444444444

[ام و ابنة]

وصفات رووعة و لو انو اغلب الصور ما ظهروليش نظن المشكل من عندي
و لكن شرحك واضح و يكفي
ربي يشفي عبد الرحيم و كل اولاد المومنين
و يشفيك انت و كل المرضى

[ريتاج 09]

الله يبارك متألقة دائما

[omjoujou]

كالعاة دائما متالقة بمواضيعك الرائعة
بوركتي حبيبتي
ربي يشفي ولد خو ك ويشفيك ويشفي جميع المرضى المسلمين

[x ام رحاب x]

الله ايبارك يعطيك الصحة وربي ينزل عليك الشفاء انت ووليد خوك ربي يسهلك حبيبتي
واكلاتك دوما متالقة حبيبتي احلى تقيم

[جنة الفردوسْ]

مشكورة اختي على هاذ الصفات

[بنت النخلة]

السلام عليكم
يعطيك الصحة يالفحلة ماشاء الله

[زهرة الريف*]

متميزة كالعادة والأطباق روووووووووعة حنونة الله يبارك فيك
ربي يشفي كل مريض ويفرج على كل مسلم

[ام اروى وعاصم]

بارك الله فيك ورب يشفي جميع مرضى المسلمين

[اخلاص 22]

يعطيك 100 صحة

[دلوعة أبيها]

ربي يبارك فيك على كل متقدمي فيه كلش هايل ربي يحفضك وربي يشفي كل مريض ان شاء الله

[fatisousou]

ماشاء الله عليك ربي اكملك انشاء الله والله 444444444444 ربي يحفضك انشاء الله

[ام مهدي 03]

ماشاء الله عليك اختى والله خليتينى نعشق القرنون
الله يعطيك ما تتمناى