9 اولاد مشتاقة حتى لظلهم و انا في سن 80

[مشكلتي]

السلام عليكم

انا راني جدة جبت 9 اولاد و كلهم باولادهم حتى اولاد اولادهم ضحيت على جالهم حياتي شفت المر و عانيت على جالهمالحفى و الشر و البرد و العرى باش نقريهمو نرجهم رجال و نسا اليوم كبرو و تزوجو كامل و ضناو ولاو كل واحد لاتي في دارو و اولادو مانشوفهمومش من العيد الى العيد كي الجبانة المنسية راني دوكا مع وليدي واحد معمرين عليا داري ولادو في داري خلاهالي راجلي و شهريتي الحمدلله و رانا متعاونيين شهريتي قليلة والو وهوما طامعين كامل فيا و انا يا ربي نتعاونو على الترسيستي و الاكل راكم تعرفو شهريتي و شهريتو تساوي نصف شهرية نتاعهم هوما كلهم اطباء و مدرسين و البنات كلهم لباس عليهم كي يكثرو يجيبولي صابونة المهم انا لااريد شيئ منهم حابتهم يتفكروني و يجو ليا و مايخبو عليا والو انا امهم و راني مريضة عندي اكثر من 7 عمليات جراحية دايرتهم و الناس كامل تشهدلي بالطيبة جيراني هنا يموتو عليا مشكلتي حابة نشوفهم برك قلبي محروق عليهم نبات نبكي في الليل كي نتفكرهم انا مانقدرش نروح ليهم انسانة مريضة و كبيرة وعاطلة مانحبش نهلكهم و وليدي لي راني معاه يحللهم ارواحو شوفوها و طايعني و زوجتو تخدمني الليل و ماتخطينيش ماعرفتش المشكل وين لوكان ضريتهم في صغرهم قال راني نخلص درتلهم غير المليحة جريت عليهم كامل زواجاتهم سبوعاتهم كل شيء كان على راسي و اليوم كي راني عاطلة مالقيت حتى واحد انا راه في عمري 80 سنة و قريت في والاستعمار و عانيت من الاستعمار و عشت يتيمة رباتني غير يما و كي تزوجت تمحنت عليهم يعني هل هذا هو جزائي .........ملاحظة ابنت ابني هي لي راهي تكتبلي بعدما حكاتلي على منتداكم و كيفاش تحلو المشاكل للناس و حتى انا كنت ساعات نقعد معاها تحكيلي مشاكل لي تعرض هنا و نحاولو نردو الناس للخير و اليوم قلتلها علاش ماشي انا لي نكتب مشكلتي لي راهي حارقتلي قلبي مالاما تحشمونيش يالوكان بكلمة ساعدوني

[جَمِيلَة]

السلام عليكم ورحمة الله وبركاته
مرحبا أيتها الجدة الكريمة
لا أدري ما أقول أنت تمرين بوقت عصيب ولن يستطيع أحد أن
يحس بما تمرين به إلا من عايشه
لكنها الحياة ترهقنا بتقلباتها، فبعض الأبناء لا يحسون بنعمة آبائهم وأمهاتهم
حتى يخسروهم، والبعض الآخر يتمنى لو تعود أمه إلى الحياة من جديد ولو لحظة واحدة...
أنت أيتها الجدة أنعم الله عليك بنعمة لو انتبهت لها واستشعرتها
قد يتخفف عنك الحزن والأسى
هذا الامتحان الذي وقعت فيه غربل لك أبناءك وبين لك البار
من العاصي، بين لك من يستحق وجودك معه وتضحيتك من أجله ممن لا يستحق ذلك
هذا الابن الذي لم يتخلّ عنك وبقي معك هو وأبناؤه استغني به عن البقية
لأنه هو من يستحقك وبجدارة، واعلمي أن من ابتعدوا عنك هم المحرومون
محرومون من برك ومن ابتسامتك ومن سعادتك بوجودهم من دعواتك لهم بالتوفيق
من رضاك عنهم وحنانك ورعايتك لأبنائهم هذا هو الحرمان الحقيقي
أما أنت فقد عوضك الله بأحسن منهم مجتمعين حتى لا تكوني بحاجة إليهم
وأذكرك بقول الله عز وجل: "يا ايها الذين امنوا ان من ازواجكم وابناءكم عدوا لكم فاحذروهم"
قد يكون الله قد عصمك مما هو أكبر بابتعادهم عنك -الله أعلم-
كما وأذكرك بما ورد في قصة الخضر مع سيدنا موسى عليهما السلام،
لما قتل ذلك الابن العاصي الذي كان والداه مؤمنين وقد كان عاصيا وعاقا، فابدلهما الله خيرا منه
رزقهما ابنا بارا رحيما طيبا يقوم على رعايتهما ويخدمهما أنساهما معاناتهما مع الآخر.
يعني يا أيتها الجدة خففي عن نفسك استمتعي بوقتك مع ابنك الذي اختارك أنت ومع أبنائه قرة عينك
واعلمي أن الله عز وجل لا يختار لنا إلا الخير وإلا ما هو في صالحنا مهما بدا لنا في الظاهر أنه مؤلم وسيء
فعين الانسان قاصرة عن رؤية الحقيقة
اشغلي وقتك بأمور طيبة بالذكر والقرآن ومتابعة الحصص الدينية، ولا تتركي فراغا
إلا وملأته بالخير
واستغلي وجود احفادك وولدك الذي معك لأقصى حدّوكأنك لا تملكين غيرهم
وإن تذكرت أبناءك الآخرين ادعي لهم بالهداية لعل الله يستجيب لك
وأرجوك ان لا تدعي عليهم بالشر مهما كنت غاضبة او حزينة
فدعوة الوالد على ولده ليس بينها وبين الله حجاب
عسى الله أن يأتيك بهم جميعا
أسأل الله عز وجل أن يخفف عنك وأن يلين قلوب أبناءك
ويجمعكم من جديد على الخير
تحياتي

[بلا صوت]

بوسيلي الجدة ع راسها وقوليلها قالك بلا صوت متقلقيش يا ماما راكي في الجنة ان شاء الله ، نتي قولي لوليدك يعيطلهم ويقولهم الوالدة راهي راهي مريضة غراف ، وكما إجيوك قوليلهم وش قلتيلنا هنا

قلها تدعيلي ندي الباك بتفوق
وكل واحد قرا تعليقي يدعيلي

[اميرة الامواج]

بارك الله فيك
عموما انا جالسة مع جدتي وقد أخبرتها ماذا قالت جدتك ....قالت لي جدتي انا نهدر وانتي اكتبي ولهذا سأكتب :

يالحبيبة اللي بدلك بالقول بدله بالقشوروا واللي مسقساش عليك لا تسقسي عليه أحمدي ربي كي صبتي اللي يرفدك على كبرك كاين اللي اولادها عشرة وماتت في الزنقة ودفنوها غير موالين الخير ....
أحمدي ربي كي رآه مسخرلك هذيك الكنة ورافدتك وادعي ربي يحفظلك هذاك الوليد وهذيك الكنة .....زيد بالزيادة يتبحروا قع انتي علاه راكي تخمي عليههم .....احنا ولدنا وربينا وكبرنا للربي العالي ....متسناي منهم والوا ومتكحليش قلبك عليهم لا جاو جاو ولا مجاوش ربي يحفظهم ....
زيد بالزيادة انا هربت منهم ومن حس ولادهم وانتي تحوسي عليهم ....
لوكان جاو معاك راكي كرهتي منهم ومن ضبيحهم ومن مشاكلهم انا كنت معاهم وفي بيت كبيرة كانوا دايريلي غير الخباط من ضبيح ولادهم .....حتى درك راني الحمد لله نرقد في رحمة ربي .....
يالحبيبة متعرفيش كامل الخير وين كبري خاطرك وسعي قلبك ....
انتي ثاني كي يجوا في العيد اتشنفي وديري روحك تبكي وتشتكي علاه تخليها في قلبك وتشوفي كيفاه يتبدلوا ....
بصح انا خايفة يجوا ويكرهوا هذيك الكنة اللي راهي رافداتك ....راكي عارفة هذاك الحط والرفود والطياب والتسياق يعي يالحبيبة ....غيرى قاتلك الكنة تحوسي عليهم روحي ليهم .....
اتهلاي في اللي اتهلى فيك واللي ناسيك ادعيلوا غير دعوة الخير ...
والله جيتي قريبة ليا غيرى نسيتك فيهم ..
ادخلي اقراي في محو الأمية كيما انا واشري هذاك الهم واسمعي القران ....
ايه تبقاي على خير يالحبيبة .....

هههههه انقطع الخط .....
ربي يحفظلي جدتي اللي ديرلي كل شهر سنيوة بقلاوة ....عليها نبيع الدنيا ....

ربي يحفظ جدتك وقولي لها لا تنسانا بالدعاء الصالح



سلام

[Elwawy]

المشكل فيك يجب أن تتركي الناس و شأنهم, عندكي إبن يعيش معكي و أولادو بركات, لا حاجة لكي لأي شخص أخر.

جدي أصدقاء أو ناس تحكي معهم يزورنك و تزورنهم كجيرانك الرائعين, أما الأبناء من فضلك إنسيهم, لن يعلق لكي أحد رتبة أو يطلب مشورتكي أحد و لن يذكر فضلكي أحد لأحد...

قد يبدو ما أكتبه غريب نوعا ما لكنه الحقيقة -نرجسية الأمهات-

[Anabela]

هدرتك حلوة مام وركي فغبينة ربي يحفظك الحاجة ويطول عمرك ،علابالنا تغيضك لي وليتي منسية ولهاو وخلاوك بصح وش راح ديري تقريبا ناس لات هكا خاصة مع كبار السن يشوغوهم بلافايدة الا مارحم ربي ، يعني المشكلة راهي عامة ويقلك اذا عمت خفت، احتسبي عملك لله عزوجل وادعيلهم بالهداية ومتشديش فقلبك علا خاطر التخمام يضرك اكثر مينفعك، نتي لوقت لي يجو فرحي بيهم وبينيلهم قيمتهم عندك ، بلاك يجي نهار يفطنو مع روحهم ، ومتقارعيش منهم يجو يحوسو عليك اقضي اوقات هامية مع ناس لي عايشة معاهم وجوارينك الحياة قصيرة باه نبقاو نخمو فلي يبغينيا ولي ميبغيناش والحمد لله ربي رز4ك بابن ومرتو طيبيين ملاو عليك وقتك ،تفكري بلي كين ناس وحدخرين بعد عمر طويل لقاو رواحهم وحدهم لا انيس لا زوج لاولد ، احمدي ربي على النعمة العظيمة ومتبينيش لولدك بلي ناقصك حاجة وا لي يحوس عليك هكا ميحسش بالنقص ويزيد اهتمامو بيك ،ودعينا دعوة الخير ومين ذاك نزلينا نعرفو اخبارك انا تهمني نسمع عليك وربي يحفظك و يسترك و يفرحك دنيا واخرة