اختي و الخطبة

[مشكلتي]

السلام عليكم

اثق جدا برايكم و ارجو نصحي و هل كنت مخطئة فيم فعلت

تقدم لخطبة اختي البالغة من العمر 24 سنة اهل شاب اقول اهل شاب عن طريق صديقة اختي التي تبلغ 17 سنة كانو راح يخطبوها هي فقالتلهم انا صغيرة

المعروف عن صديقة اختي انها فتاة طائشة و اخي يحذر دايما اختي منها

المهم بعد مجيء اهل الشاب والدة الشاب أولا لم يحضروا شيئا معهم غير علبة عصير و انا هنا لا أقول كيف لا يحضرون ولكن هناك عدة خيارات تدل على الكرم و القدر

ثم عندما سالت والدتي عن الشاب لماذاةلم يات معهم فأجابوها انهم يجيو هوما و كي تعجبهم ساهل يجي هو

سالتهم عن عمله عامل لديه محل تجاري

عن البيت فقالت انها لا تقبل ان تعيش معها للعروس و ان الأولوية لبناتها .. بناتي يجيو و يجمعون منحبش لي يقلقهم و للعروس اذا تحب دير دارها وحدها ولا دبراسها مع العلم عندهم الضيق يعني العروس هاذي وين دير دارها الله اعلم

ثم اهل الشاب من ولاية بعيدة نسبيا يعني مش نفس الولاية


المهم أمي كانت سترضى بزوبج اختي الشاب على اساس كبرت و فرصها ممكن تقل مع العلم اختي مزالت مهيش تاع دار من حيث شغل الدار و حتى طبيعة شخصيتها خجولة احسن حساسة و مدارت حتى مستقبل لروحها حرفة عمل شطارة

ووانا كنزتجربتي ف الزواج تع البعد و التمرميد قلت لماما معجبونيش الناس و الكتاب مبين من عنوانو

بعد تفكير كبيير من أمي رفضت العريس

اختي تغيرت فجأة و رجعت متهدرش معانا العلم أمي راحت سقساتها اذا تعرفو و اذا حباتو قالتهلها لالا و سقسات اختي الأخرى فهي مقربة جدااا منها قاتلها لالا حبت تجرب برك و تتعلم فيهم

هل أخطأت عندما ضغطت على امي بالرفض انا خفت عليها خاصة انو شخصيتها ضعييفة مش حمل زواج البعد


المهم بعد مدة اختي رجعت تتكلم عادي و لكن انا قلت ممكن ظلمتها و فوتت عليها الزواج أشعر بندم شدييييد و معلاباليش كيفاش نصلحو

حتى لما صراتلي مشاكل مع زوجي قلت ممكن اختي دعاتني رغم اني لم انو شرا بل كان حرصااا

ما رأيكم و كيف اصبح علاقتي باختي
داختي انطوايية كثيرا و لا تتكلم و غير زاثقة من نفسها ..نهار كامل مكسلة ما دير والو و اي حاجة تبكي ز موسوسة من روحها بشكل عام لانها نحيفة و انها قصيرة ليست قصيرة كثيرا لكنها غير واقفة بنفسها رغم انها جميلة و ناعمة خجولة يعني فيها صفات مليحة و لكن غير واقفة بتاتا في نفسها كذلك فشلها في الدراسة خلاها هكا

انا كنت حابتها تنجح أولا مع ذاتها وتتخلص من الكسل و مشاعر الاحباط ثم تفكر بالزواج و نختار خيار صائب

هي قبل الحادثة كانت تقريبا في نفس المزاج يعني مش الحادثةةاللي بدلتها فقط كملت و رجعت متهدرش معانا

[ع.عيسى]

هل تعتقدين انك انت منعت مكتوب اختك ؟...كلشي مكتوب ..انت نيتك حسنة لذلك لا داعي بالشعور بالذنب لم تخطئي في شئ ... ..بالنسبة لاختك 24 سنة لازم تعلموها ...على حساب ما تحكي هي لا تصلح بان تكون زوجة... درتي بالراي كي ضغطتي على اهلك بالرفض ... .. الزوجة لا يكفي فقط ان تكون خجولة وتحشم وناعمة ومليحة ..اهم شء شخصيتها ومستوى تفكيرها في مواجهة مصاعب الحياة وايضا قوة بدنية باش تقوم بكل واجباتها .....لازملها تاهيل جسمي ونفسي وعقلي ...ابداو معاها من دركا وربي يرزقها ان شاء الله

[أمير القوافي]

بغض النظر التفاصيل الاخرى انت تدخلت وقلت ان زواج البعد فيه تمرميد بحكم تجربتك وكأن هذا هو حجة واكبر سبب لرفض العريس
رغم انه يبدو انك تزوجتي لبعيد ومن حق اختك ايضا ابداء رأيها و القبول ان ارادت طبعا ان لم يكن في العريس مايعاب

وتصرفك هذا قد يفهم انه انانية منك

[بلا صوت]

والله حسب مافهمت نتي الولي تعها هنا ، صح تمدي رايك مي على أسباب واقعية مش على حجج واهية ( لبعد ول حاجه )
زيد أختك صغيرة على الزواج والمستقبل قدامها
نتي لدرتيه من باب مصلحة اختك ونظن الرفض كان في محلو من زاوية خبرة تيعيك واحساسك ، مي ننصحها تشوف فورماسيو ول ترجع لقرايتها باه تتحسن نفسيتها راهي تغمت من دار ولوكان تقدرو تشوفولها بسيكولوغ

[حورية تو]

في أمور الزواج لازم تشاورو المعنية بالأمر وتمدولها جميع النقاط ونبعد تمدو رايكم أنكم ما قابلينش للأسباب المذكورة ماش ترفضو العريس وهي زي الأطرش في الزفة ماهيش علبالها حتى علاه رفضتوه ...
من ناحية نفسيتها ومشاكلها الخاصة اجبدوها ليكم وتناقشو معاها ممكن عندها حاجة حابة تديرها ...تكوين أو عمل ...او دراسة عاونوها حتى تخرج من قوقعتها
من ناحية الطبخ والأمور المنزلية شجعوها كطبخك جيد في كذا أو حابين ناكلو الطبخة تاعك لي تجي بنينة على يديك أو اليوم نديرو كذا مع بعض أو نجربو كذا .....الخ
موفقة اختي وربي يكون معاها*

[toulay]

وعليكم السلام ورحمة الله وبركاته
اختك معندهاش لسان تهدر بيه هل انت الناطقة باسمها ولا المحامية تاعها ولا واش صح اختك تخاف عليها ولكن هي المعنية بالامر شاوروها مدولها فرصة تخمم تصلي استخارة ومبعد تقبل ولا ترفض هذاك امر يخصها وحدها هي
وتاني قضية البعد مشي تجربتك الفاشلة تنطبق على الناس كامل كاين مثلا هي تسكن فالشرق وهو خدام في ادرار ولا جانات ونورمال عايشين كاريين لباس بيهم والحمد الله
تصرفك كان اناني جدا حتى لو كانت نيتك طيبة ولكنها انانية مع الاسف الشديد
وحيرتني تاع 24 كبرت ياو راها في عمر الزهور في عز شبابها ميهمش وقتاش تتزوج لانو كاين تلقاهم تزوجوا على 18 وتمرمدوا تمرميدة كحلة كبروا قبل الوقت وكاين مثلا تتزوج وفي عمرها 30 عايشة عيشة الاميرات والسلطانات
وفيما يخص ام العريس عندها الحق على الاقل كانت صريحة معاكم قالت تسكن وحدها ومشي شرط معاهم فالدار تبني يروح يكري مثلا راها من البداية حطتكم فالصورة وقاتلكم عندي بناتي من المفروض تفرحوابهذا التصرف الشجاع لانو هكذا راح يبقى الاحترام والقدر
صدقني يا اختي كاين لعندهم قصر وميقبلوش لعروسة تسكن معاهم تقولك ربي يسهل عليه يدبر راسه
وفيما يخص انو اختك فنيانة وغيرها معليش زيدوا احكوا معاها خلوها تخلط فالكوزينة الله يبارك فاليوتيب القنوات تاع الطبخ دايرين حالة وتاني القنوات لينقلوا الروتينات تاع التنظيف
ربي يعوض اختك ان شاء الله
بالتوفيق

[محمد محمد.]

وعليكم السلام ورحمة الله وبركاته

شوفي يا أختي الكريمة ، أنا لن أعلّق على هذا لأن الأمر قد حدث ووالدتك رفضت الخاطب وإنتهى الأمر والآن حاول أن تصلح علاقتك مع أختك .

ولكن أريد أن أقول لك شيئا في ما يخصّ مستقبل أختك ، إذا تقدم إليها خاطب وهي بهذه المواصفات التي ذكرتها فيجب أن تخبروا الخاطب بهذا حتى يكون على علم لأن إخفاء هذا الأمر خيانة ، وماشي حتى يتزوجها و إذا قدّر الله يحصل ما يحصل بينهم تقولوا ظلموها وحقروها ، فعلى حسب ما ذكرت فإن أختك ليست مؤهلة للزواج نهائيا ، لازم تعطوها دفعة متينة باش تفطن ، 24 سنة راها كبيرة مراهاش صغيرة .

[بسمة ღ]

السلام عليكم
لن أتكلم عن المشكلة ، بل سـأتكلم حول طبيعة أختكِ
هذه حالة كل شخص انطوائي غير اجتماعي ، كونه يصعب عليه التواصل مع الاخرين و يخشى النقد او المواجهه كونه يعتبره خطر
يجب عليكم مساعداتها و مسانداتها و اشعارها بالامان و دعمها قدر المستطاع خاصة عاطفيًا فالمعروف الانطوائي حساس جدا
مهما كان عمرها ان شاء الله فوق 30 ، لازم تساعدوها و تخلوها تخرج من عزلتها
ربي يرزقها بفتى طيب

[Amir ami]

24 سنة ماشي تاع مسؤولية!!!! غريب ماتقولين. وثانيا لا تعترضي على خطاب اخواتك ولكن اعطي راي ويكون كملمح فقط. كل انسان يختار طريقو في هاته الحياة. انت حكمتي على خطيب اختك من خلال تجربتك انت في الزواج.

[عسجدة]

بارك الله فيك
لوكان جيتي اختي نوريلك شكون انا ...هههه
المهم ديريني اختك واسمعيني مليح
راح نهدر في بلاصتها بلاك حشمت منك:

على جال علبة عصير ترفضين لي الخاطب ....
24 سنة في عمري .....علاه مزلتي تشوفي فيا صغيرة .....نتاجاتي رآهم بولادهم ....

وأنا راني قابلة نسكن مع عجوزتي انتي واش دخلك ...
الناس زوجت في فرنسا و ناس في قطر وانتي ولاية عند راسي تقولي بعيدة ....

زيد بالزيادة الراجل معلابالوش بالشغل الدار
واش من شغل هذا اللي تحبي على جالوا ...
على جال تسياق ولا على جال الطياب ...
نطيبلوا حبة بطاطا ياكل ويسكت وروح عندوا ونتعلم
والله ما حق عليك

بالعكس كي نتزوج تولي عندي ثقة في نفسي ونولي نوجد في روحي باه نكون أسرة ....

ماشي انتي زوجتي ودرتي الدار وجايا دبري عليا ......كي نكبر وقيلا انتي راح تتفكريني وجي طلي عليا ....


المهم اياك ثم اياك ثم اياك زيدي دخلي روحك في اختك .....

حابة تتزوج خليها تتزوج ....

ربما تتزوج وتكون ناجحة في المستقبل ...

ياك يخدم الراجل ...راح ياكل ويخليها للجوع ......


سلام

[kimjia]

كان في امكانك إبداء رايك فقط ﻻ الاسرار على والدتك حتى ترفض ï»» تقومي بإسقاط تجربتك على موضوع اختك ﻻ نو كل واحد ومكتوبو ونتي كن تسمعك ختك تهدري عليها هكذا انها تقريبا على حساب كﻻ مك أنها مهيش قد مسؤولية الزواج اكيد مش غير متهدرش معاك المهم واحد مزاد متعلم ويعرف كلش وناس بزاف اكيد مولدوش وفي فامهم مﻻعق نتاع ذهبويقدرو يديرو كل واش راكي حابة من زوج اختك المستقبلي الملاعق المتسخة أيضا يمكن العيش معها بسعادة

[nihal159]

السلام عليكم.
أخطأت ياختي مع الأسف؛ و فوّتي على أختك فرصة التغيير للأحسن و أنها تخرج من العزلة لي راهي فيها و يزيد ثقتها في نفسها.و تبدا مرحلة جديدة في حياتها.
ماعجبتكش علبة العصير؛ ياختي كون على الأقل طلبتو تشوفو الخاطب و حددتو موعد آخر و عطيتو لنفسكم فرصة ثانية للتفكير.
ماعجبتكمش كي قالت أم الخاطب ،الكنّة ماتسكنش معايا؛ ياختي هذا هو عين العقل و الصواب ؛ واش لي ماعجبكش في كلامها، سبحان الله.
خلاصة القول؛ هذي هي نتيجة حكم النساء.

[نينو]

السلام عليكم
من حقك تخافي على اختك. وتعطي رأيك . لكن كان من الأفضل السؤال على الخاطب واصله و.... . الفتاة انطوائية ولكن لو كان زوجها جيد ويحبها سوف يخرجها من انطوائها . سوف يعطيها ثقة في نفسها. معليش كل شيء بالمكتوب. ربي يرزقها الزوج الصالح يارب.

[nadir_telecom]

أولا أنتي مخطئة ياسيدتي بالضغط على أمك باش تبطل
ثانيا وش دخلك حكمك على السيد مديه نتيجة أو خلاصة و مديها لأمك و ختك المعنية بالأمر باش تقرر نتيا ما عندك حتا دخل ولله العظيم
ثالثا نتي راكي تقولي كانت حابة تجرب فيهم معناتها الطفلة كانت قابلة مبدئيا نتوما على رفضتو وش هاذ الحقرة
رابعا الحالة لوصلتها لي راهي فيها ختك و الإنطواء و الأمور الزوجية ماتعرفش ديرهم لا طياب لا هم الزمان غلطتكم نتي و ماماك
لوكان جيتي نتيا لاضتها ليك و ماماك مرة على مرة تعلمها لوكان ماراهيش هاذي حالتها
و في الأخير أطلبو منها السماح و إبداو معاها من جديد أحتويي ختك و علميها شوية شغلات و إنشالله ربي يجيبلها مكتوب زين و السلام

[ityou]

حرام عليكم تفكير سادج في الازواج سالو عليه او شوفوه