يا شـــــعر

[بوبكر بن علي]

.............محاولة
يا شـــعر اليوم وليت رمية لـعراض /// تتالف بيــــك قصايد للناس معايــــر
ياشعر حرفك راهـم داروه لتخواض /// ادنس عـــشا وسط الحـــما غايـــــر
واحــــد قـــال وادي واعر لافـــاض /// لاخـــر قال نا عودي صـيل مقاحـر
اسقعد شيطانو مــــن مجرى نـــاض /// وزرع فـــــيه غـي رداوة لـــفـكاير
اســـبلس عــفرت منين عنـو هــاض /// رامــــي رمحو طالــيه بلـسم يتقاطر
ياشــــعر القش فــــات كل امــراض /// لا طــــب صابو ليـه لاحكيم مــــاهر
حين يدب فالدواخل اعضادو تقلاض /// ياكل مــــخ العــبد فــي عظمو ناخـر
اه ياشـــعر اسواد وجهك بعد البياض /// وحلــــيلك عــــاد العكلي منك ساخر
هـــذي ماهي ناس لي قـــال تتـعاض /// والصامط يـــــاك غلبو ماليه قاهــــر
لامن جـــا في صفك وشــد لقبــــاض /// ومــــن حــقك تتنوى ماعندك ناعــر
لامــــن نــاف راه فالــحرب خـــاض /// ســـل السيف خــلاهم قــع مكاســــر
تراس عنتير فــي الضربة رضراض /// مخـــيرهم يــــعود ع اللقــية عاثـــر
ياشـــــعارة يدزي مــن هاذ التقماض /// قولو كلمة حــــــق فــشو ذا الــخاطر
لازم ضركة تكونو لبعضاكم لضاض /// واش مشــتت شمــلكم رانـــي حــاير
مانــــي شاعر غـــي دمـــي فـــــاض /// جار الظلم وراني ع الشــعر غايـــر
مــن ذو لي طبعهم المنشار ولـقراض /// مــن ذو لي اصــلهم زوخة ومــفاخر
مـــن ذو لي كلامهم بلزهدة يحــماض /// نافــــخ ابليس فـــــي الشكوة خــــاثر
بــــن كريو راه فــــي لحدو مسقــاض /// حــت الشيخ الــسـماتي مـــخو فــاير
ويـــــن الشعر لــــي كان قولو فــياض /// وين الكلمة لي تسمعها تعشي تداثــر
طــــاح الـيوم ومـــا صـــاب للمنواض /// مكـــسر زواج يـــدي ليلو يضــاور
الشــــعر يا لخوان راه حســـن الــــفاظ /// الصــــفة متخلق ذا لي اسمو شــاعر
.........................................بقلمي(زفزافي الحاج).......................
2017/01/11