بطاطا شاورما ...... حصريا من مطبخي

[إلهام07]

البسملة1



صباح الخير عليكم .

تكملة للوصفات اللي طلبتوها ........ ماتقولوش راهي راحت هربت وصفة البطاطا شاورما اليوم حبيت نحطها لأنها فعلا لذيذة جدا ومميزة أنا عاودتها 3 مرات فعلا لذيذة وتعجب أسرتي والبارح درتها عشاء للضياف طبعا لحسو الصحون وطلبو الوصفة ..... لذلك تأكدت باللي لازم اليوم نحط الوصفة .

راني قريب نرجع "مدام بطاطا'' من كثرة وصفات البطاطا اللي حطيت .



المقادير :
* حبة بصل كبيرة أنا ماكانش عندي عوضتو بالبصل الأخضر
* قطعة اسكالوب يعني نصف صدر دجاجة
* حوالي 1كغ بطاطا أو أكثر قليلا حسب أفراد الأسرة
* 3 فصوص ثوم
* 1 م ك هريسة
* 1 م ك موطارد
* 2 م ك مايوناز
* 2 م ك كرام فراش ( اختياري )
* 1 بيضة
* للبيشاميل : 2 م ك زبدة + 2 م ك فرينة + 3 كيسان حليب + ملح وفلفل اسود + ثوم بودرة + قطعة جبن أبيض .
* التوابل : ملح + فلفل اسود + كمون + فلفل احمر + ثوم بودرة
* الطوايش عفوا الأجبان : جبن أبيض + جبن مبشوراي نوع +كامومبير

* الطريقة :
- في مقلاة فيها شوية زيت نذبل البصل المقطع ما نحمروش فقط نذبلو مليح.
- نضيف الاسكالوب مقطع إلى مكعبات صغار + الثوم مقطع او مرابي ( انا الجاجة نتاعي بطبوطة ومتربية على العز شفتو قطعة الاسكالوب نتاعها قداش قطعتلي )
- نقلي حتان يتحول لون الدجاج من الوردي إلى الأبيض .
- نضيف الملح ومانكثرش + التوابل : فلفل أسود + كمون ( شوية برك) + ثوم بودرة ( ونكثر هههه ) + رشة خفيفة فلفل احمر .
- نبقى مرة على مرة نحرك حتى يتقلى مليح الجاج نتاعنا في التوابل ويبدى يأخذ لون.
- نضيف الموطارد والهريسة ونقلي 2-3 دقائق أخرى .
- نطفي النار ونضيف المايونيز + الكرام فراش ( إذا ماعندكش كرام فراش ماشي مشكل ) .
- نقلي البطاطا المقطعة إلى شرائح بدون ملح بلا ما نحمرها هذا مهم.
- نخلي البطاطا تبرد شوية ونهرسها مليح بفرشيطة وهنا سيدتي نفسي عن غضبك اتفكري : الأولاد اللي ماجابوش مليح في الامتحان ... الروبة اللي ماحبش راجلك يشريهالك .... سلفتك اللي طهرت بنها وماعرضاتكش ....جارتك اللي سلفت عليك السارفيس ومارجعاتوش ....وأخيرا عجوزتك اللي كل ماجي تسمع باللي طيابك ماشي بنين .
- نضيف للبطاطا المهروسة بيضة + ملح ( مانكثرش ) + رشة خفيفة فلفل اسود+ رشة ثقيلة ثوم بودرة + رشة خفيفة كمون .
- نخلط مليح الكل ونشكل كوريات نحشيها بشوية جبن أبيض .
- نحضر البيشاميل نتاعي ونركز انو نضيفلها 1 م ص ثوم بودرة يعطي طعم رائع للطبق نتاعنا . ننتبه البيشاميل لهذا الطبق لازم تكون كمية زاكية وتكون جارية ماشي ثقيلة.
- نحط شوية بيشاميل نغطي بيها قاعدة الصينية باش الكريات مايلصقوش .
- نستف الكريات في الصينية نتاع الفرن.
- نوزع خليط الشاورما فوق الكريات ( ماحطيتمش الشاورما من تحت لأنو تحترق وتلصق في قاعدة الصينية ).
- نوزن قطع من الكامومبير انا استعملت كريمة الكامومبير اللي ماعندوش ممكن يحط قطع جبن ابيض مع انو الكامومبير تأثيرو رائع في طعم القراتان .
- نصب بيشاميل بكمية وفيرة تغطي كل الطبق وتغمره جيدا .
- نوزع جبن مبشور على وجه القراتان وندخلوه للفرن . ما نخليهش يطول لانو كلشي راهو طايب باش مايتحرقش من تحت .
- يقدم بالهناء والشفاء فقط نتعامل مع الكريات برفق كي نجي نسربي باش ما تتفتتش .


أترككم مع الصور :






























الآن للكسولات :
- نستف مباشرة البطاطا المقلية شرائح في قاعدة الصينية ونحط فوقها الشاورما ثم قطع الجبن ونصب البيشاميل ونحط الجبن المبشور وندخلها للفرن .







طبعا الوصفة بنينة بلا مانقول ...............لاه نلعبو ؟



جربووووووووووووووووووووووه لذيذ جدا . خاصة إذا عارضة عجوزتك للعشاء هذا ماشي تحريض .





* ملاحظة : انا مانحبش الكمون لكن في هذي الوصفة يعطي ريحة وطعم مليح للشاورما وطعمو مايبانش نهائيا لأنو ماكثرتش . اما الثوم بودرة فهو جدا مهم في هذه الوصفة وتاثيرة خطييييييير .


باااااي عندي بزاف خدمة . باقي الوصفات تاتي تباعا بإذن الله .



تحياتي ................... لهومة .