قصتي مع المخدرات

[صالح القسنطيني]

السلام عليكم

وقفت على شعر شعبي لأحد المتمكنين فيه و كان يتكلم على هذه البلية، فرغبت إلى الكتابة حول ما كتب فيه من غير تقليد له، فنسجتها على ما اختاره من حرف..

فولد ما ظهر لكم


هـــذي قصــــــتي كـفاه بدات -------- نحـكيها اليوم فسمـــــــــــــعوا ليا

و كفاه قلبت عليا الأيـــــامات -------- اسمعوا يا خاوتي ما تشفوا فــــيا

مـع بلية دمــــــرت مجتمعات -------- حبيتها ذبــحتني و ضحـكت عليا

بـسبتها عين يما بالدمع بكات -------- و أنا فــي غفلة غرقتني الدنـــــيا

قلبـها تقطــــــع عليّا بـالكيّات -------- غــارقة في هم ضال تخمم بــــيا

تقولي يا وليدي هذي ما حياة -------- نقولها واش تفهمي في الحياة نتيا

الـوالد امرض طاح بـكيلوات -------- التربية تاعو شافهـا ما نـفعت فيا

كـــان يوصيني بزين الكلمات -------- يقولي تكبر و تخـرجنا من مزريا

و اليوم شافني نبلع المخذرات -------- و هو ما كان يسنى هذي البليـــا

شغلت بيا خاوتي و لخواتات -------- حديث كل واحد واش حال خويـا

ما نعرف الحي من لي مات -------- عقلي بعتوا صباح مع لعشــــــــيا

يا ما درت مع ناس عدوات -------- حتى صرت حد ما يســــال عليــا

و يا ما بلعت بسبتها المُرّات -------- و يا ما تكويت بنار شغلتها بيديــا

لحقتني البلية بسبت قعـــدات -------- مع صحاب نحسبهم ينحو عليـــا

كنت نجالسهم في الحكــيات -------- و هم يبرموا الحيّة قدام عنـــــــيا

اليوم الأول فات سالمـــــات -------- و في الثاني طحت فـــــــي البليّا

قالولي هي هدية من الهديات -------- أقبلها بركا ما تشبح في العقليـــا

ذوقها تلقا شحال من لــــذات -------- تنسى بها الهم و كل مسؤوليــــا

تنسى الماضي و لي فــــــات -------- و يومك تزهاه و تنحي شويا

مــا فيها والو شوي جبـــدات -------- و إذا كملت طرف هي الرجوليا

من بعد بديتها معاهم بالنفحات -------- و نقول محال تلصق فــــــــيّا

النفحة صارت عندي عادات -------- و بعد الطرف وليت بالكميّــــا

و العادة كبرت الى سهـرات -------- شوفو وين وصلت برجلـــــــيا

و مزال كثير من المصيبات -------- كبرت على راسي شويا بالشويا

بلعت كل الأنواع المشهورات -------- في سوقنا بأرضنا الــجزائريا

جمعت بين الغبرة و الحــبات -------- و الحقنات قعرت بيهــــم يديا

حكمت فيا و مـــشاة في ذات -------- و تخلطت بالدم تفرت فـــــــيا

سجنت عقلي طول السـاعات -------- ما عندي حت شغل غير هــــيا

فرطت في جميع الخدمــــات -------- نهار ديما راقد من صبحــــيا

و في ليل ديما مع سهــــرات -------- نبــرم و نشم و نحرق بيديــــا

يما ضال تسنا فيا ليــــــــلات -------- بالـــها مشغول تخمم علــــــيا

و انا غارق في اللّـــــــــذات -------- حسبـــت هذي هي حياة الدنيا

نبات في زقاق في ظلـــمات -------- نترامى في زنق بلا شخصـــــيا

لي يشوفني يقول به دعـوات -------- خرجو فيه اليوم قبل الآخريـــّا

آه شحال تكويت من كيّــــات -------- و شحال شت المــــوت بعينيا

آه شحال عفست من شوكات -------- و أنا ساير كيفي كالبـــــــهميّا

آه شحال خسرت من صحبات -------- و طحت على راسي بكلــــيا

شحال ضحكوا عليا ضحكات-------- قالوا يساهل بهلول العقلــــيا

قالوا دواه في حبة و حشيشات -------- هذا عبد ما تنفعو الوعضيا

مين نمشي يشوفو معايا شوفات -------- واحد فيهم ما يحنّ عليــــــّا

شكون يحن على مول البليـات -------- ما لقيت في ناس غير والــديا

صدقوا ما تقولي هذي كـذبات -------- و الله حقيقة مرت علــــــيا

مدولي من قبل في زمان فات -------- و سناو حتى حكمت فيـــــا

من بعد قالوا اطلع بالحبــــات -------- مش كل يوم نديرو فيك مزيا

الصدقة خلاص في ذيك ليمات -------- و اليوم بجيبك نمدو المنسيا

لا خدمة و لا قدمة في الحـياة -------- و يلزمني سوارد في جبــيا

وليت ننهب و نتبع السرقــات -------- لازمني دراهم قبل اليليـــــا

آه حبيت و حب المشكـــلات -------- و الحب هلكني و زاد عليّـــا

لخطر قلب فارغ من طاعات -------- فتعلّق بالزين و ذيك الفتيّــــا

و شحال كان بينا خصـومات -------- تزيدني هم و نكره الدنيـــــــا

و باه ننسى بلاوي البــــنات -------- قلتلهم لازم لحشيشة جبوها ليا

تلمت في راسي الطــــامات -------- سوق البنات و مخدرات عليا

ناس تمشي للقدام بالخطوات -------- و أنا نمشي للّور كل ثنـــــــيا

رمضان ثقيل طويل ليمــات -------- لا طاعة و لا عبادة فيه بالكليا

في نهار ديما غارق برقدات -------- نوض قبل الأذان صايم بنيّـــا

واش نقول واش من حكايات -------- أيام ظلمة نشرب في سم الحيّا

أياماتي قصايص و حكايات -------- ما نسمع والو تسدو وذنـــــيا

غــرقت في بحر المعصيات -------- و ناس قالوا هلك و تبع دنـــيا

يما ما ملت برفع الدعـــوات -------- آه و الله ما ننسى خير والديا

في يوم من ذيك ليمـــــــــات -------- دخلت للدار لفراش يسنا فيــا

لخطر دار درتها غير للسبات -------- منقعد فيها ما نحكي حكـــــيا

دخلت لقيت يما في الصــــلاة -------- تبكى و تدعي بالصلاح ليّـــا

و دموع على خذها سيــــلات -------- و تقول يا ربي شوف ليّــــــا

وليدي هلكتو بلية مخــــدرات -------- يا رحمان دعوت حن عليــــا

نجي وليدي من ذيك الجلسات -------- و ردو لحجري و ردو ليّـــــا

دمعتها سايلة و يديها مرفوعات -------- و الله مننسا دموعك يا الغاليا

ثم قلبي المريض تحـرك حركات -------- كما شت حالة يما بـــعينيا

بكيت و طاحو من عيني دمعات -------- و تفكرت صغري و التربيا

تفكرت حجر يما و الـضحكات -------- كما كنت صغير تطلقهم لــيا

و اليوم بكيتها و هي في معاناة -------- بدلت ذيك ضحكتها بالبكـــيا

دخلت عليها و دموعي سايلات -------- قبلت راسها بوسات نقــــــيا

و من يومها غيرت الــــــــحياة -------- و بدلت طريق الهم و مزريا

عنيت في الأول كثير معــــاناة -------- بصح صبرت و حكمت الشديا

بديت نرفع لربي الدعــــــــوات -------- يا ربي فرج و توب علــــيا

و نصـلي الصلاة في الجماعات -------- و بعدت صحاب الشر عليّـــا

شت من روحي كل يوم تغيرات -------- و لقيت في صلاة لذة بْهـــيا

و اليوم أني طلقت المــــخذرات -------- و عايش كالناس حياة زهـــيا

بدلت ذيك الجلسات بالحلــــقات -------- و بدلت الغنا بالآيات الربانـيا

نسال ربي الثبات حتى الممــات -------- و يبعد عني كل سوء و بلــيا

خويا أني شفت بزاف شوفـــات -------- و اليوم أني ناصحك فاسمع ليا

اخطيك بزاف فيها بــــــــركات -------- و فيق لعمرك و بدل العقلــــيا

التوبة مفتوحة توب قبل الممات -------- ما تقول انا عبد تفرت فـــــــيا

اخطيك من طريـــــــق الخليات -------- طريق ربي خير ليك و ليـــــا

خويا المخدرات سوق المهلكات -------- ما فيها حت خير فاسمع ليــــا

تلفت عقولنا و خربت الــذات -------- و هي لي ولات تحكم فيك و فيا

ما تقول صغير مزال ايامات -------- الخير ما تربطو بعمارك الفانيا

شوف يماك و شوف الدمعات -------- طيح فيهم عليك و انت في لاهيا

أني نصحتك و كتبت كلمات -------- شفت مع لي مجرب هذي البلـــيا

نظمتها ليكم من قلب جات -------- قصد بها المدمنين على الكيــا

و نختم النظم بالدعــــــوات -------- بالصلاح لجميع الناس و ليــــا

(صالح) من كتب هذي لبيات -------- و هو المعافى منها بالكليـــــا

مسراتش ليا هذي لحكيـــــات -------- بصح صراو لناس قراب ليـــــا

و نختم الكلام بزين الصـــلاة -------- على محمد سيّد الأنبــــــــــــيا

و لله نرفع الدعــــــــــــــوات -------- فيا رب ارحم و استجب لــــــيا





نظمها صالح القسنطيني في جلستين

و السلام عليكم

[العواد]

والله إنها مدمرة المجتمعات ...بدأً من صحة المتعاطي إلى تغير السلوك مع الأسرة ثم المجتمع..ثم...ثم.......!!!!!
تقبل فائق التقدير أخي صالح مواضيعك في الصميم ....وطريقة طرحها جميلة جدا ......ننتظر الباقي بشغف..

[طاهر القلب]

و الله إنها طامة كبرى تنخر جسم هذه الأمة و هي للأسف منتشرة و تتنشر بكثرة
أسبابها مشاكل هنا و هناك , تستقطب ضعاف القلوب و الإيمان
شكرا لك أيها الصالح على مواضيع المتميزة و البناءة ...أرجو ان تتقبل شكري

[صالح القسنطيني]

المشاركة الأصلية كتبت بواسطة العواد

والله إنها مدمرة المجتمعات ...بدأً من صحة المتعاطي إلى تغير السلوك مع الأسرة ثم المجتمع..ثم...ثم.......!!!!!
تقبل فائق التقدير أخي صالح مواضيعك في الصميم ....وطريقة طرحها جميلة جدا ......ننتظر الباقي بشغف..

سعدت بمرورك و ردك اخي العواد

فجزاك الله عني خيرا

و شكر لك جهدك المبذول و تواصلك معنا

و بارك فيك و في عقلك و قلمك

[زيتوني محرز]

أخي صالح :
كلماتك وإن كانت مستمدة من الواقع الشعبي المعيش فهي تمس شغاف القلب ، تفتح فيه فرجة للأمل ، تنير دروب الحيارى الهائمين بين المخدرات والسموم الأخرى ........
ازرع بذور الخير دوما ، وانتظر الحاصدين ، وتأكد بأن الكلمة الصادقة تصيب مقتلها ولو بعد حين .
دمت قلما مبدعا لاينضب حبره

[عادل الجلفاوي]

المخذرات دمرت مجتمعات ومازالت تقوم بدورها الجباني اتجاها العالم كله وخصوصا الشباب منه
كلمات عذبة صادقة ......شكرا لك اخي صالح تقبل مروري

[هبة الله الرحمن]

السلام عليكم ورحمة الله وبركاته
ماشاء الله عليك أخى الفاضل ...دائما مجدد فى مواضيعك وكلماتك....فلطالما صنفت المخدرات ضمن افات المجتمع...عافانا الله منها وعافى أخوتنا وأبناءنا منها ...
تقبل مرورى المتواضع على صفحتك

[نزار علي]

سلام الله عليكم
أجدت أخي صالح مبنى ومعنى
بورك فيك

[مولود حداد]

السلام عليكم ورحمة الله
يعجبني هذا النوع من الشعر الذي يتناول هكذا قضايا
مشكور يا صالح وتقبل المرور
موفق ودام لك التألق

[صَمْـتْــــ~]

أحسنت أخي بِطرحِك لهذا لموضوع القيِّم بطريقةٍ مشوّقة تُغري القاريء لإعادة قراءته مرّاتٍ و مرّات دون ملل
وكم نحنُ بحاجة لمثلِ هذه المواضيع المُعالِجة لما تحتويه على نصائِح تُلامِسُ الفِكر..
ومن المعلوم أنّ العقل السليم في الجسم السليم، ومن مالت نفسه للمخدّرات دمّرَ صحّته وفقدَ عقله
وعندما يفقِدُ الشّخصُ عقله يُصبِحُ بين أنيابِ الرّذائِل و الأفعالِ التي تكونُ نِتاج اللاّوعي..
وكسبيلٍ للنّجاةِ من هذه المُدمّرة للعقول..يتوجّبُ علينا كبحَ النّفسِ عن كلِّ ما يسبّب لها ضررا، ولن يكون ذلِك سوى بِعودتِنا للدّين الذي يَحفظُ أخلاقنا و يٌعطينا الإرادة على اجتناب المُهلِكات..
،،،،
بارك الله فيك أخي صالح
وجعل نصائِحك نبراساً يُنير العقول
تقديري واحتِرامي

[يوسُف سُلطان]

حبيبي الغالي
.. أثابك الله وأحسن اليك .. وجعلك مصلحا صالحا ..
أبيات فعلا تقيس ... نسأل الله لنا الهداية ..ونحمده أن عافانا ممّا ابتلى به كثيرا من عباده
فقط لأني أقرأ حروفك بحبّ فلا أريد أن يكون بالنص هذا

و نختم الكلام بزين الصـــلاة -------- على محمد سيّد الأبنــــــــــــيا

... أخوك يوسف

[mifi]

ربي يهدينا

[صالح القسنطيني]

المشاركة الأصلية كتبت بواسطة زيتوني محرز

أخي صالح :
كلماتك وإن كانت مستمدة من الواقع الشعبي المعيش فهي تمس شغاف القلب ، تفتح فيه فرجة للأمل ، تنير دروب الحيارى الهائمين بين المخدرات والسموم الأخرى ........
ازرع بذور الخير دوما ، وانتظر الحاصدين ، وتأكد بأن الكلمة الصادقة تصيب مقتلها ولو بعد حين .
دمت قلما مبدعا لاينضب حبره

مرزرك اخي محرز شرف لي

و ردك أفخر به...


جزاك الله عنا خيرا

و بارك فيك و شكر لك و وفقك لكل خير

دمت بخير

[صالح القسنطيني]

المشاركة الأصلية كتبت بواسطة عادل الجلفاوي

المخذرات دمرت مجتمعات ومازالت تقوم بدورها الجباني اتجاها العالم كله وخصوصا الشباب منه
كلمات عذبة صادقة ......شكرا لك اخي صالح تقبل مروري

و شكرنا موصول بك اخي عادل الجلفاوي

و قبل لك ودنا و احترامنا

بارك الله فيك

[صالح القسنطيني]

المشاركة الأصلية كتبت بواسطة الهيبة من الله

السلام عليكم ورحمة الله وبركاته
مشاء الله عليك أخى الفاضل ...دائما مجدد فى مواضيعك وكلماتك....فلطالما صنفت المخدرات ضمن افات المجتمع...عفانا الله منها وعفى أخواتنا وأبنائنا منها ...
تقبل مرورى المتواضع على صفحتك

و عليك السلام و رحمة الله و بركاته


و آمين.....
و بارك الله فيك اخية و جزاك خيرا و وفقك لكل نعمة