menu رقم 4 خاص بشهر رمضان الفضيل

ninafret · 2013-07-25, 00:20

حبيباتي كيما وعدتكم هاو ليكم الموني الرابع اللي نتمنى ينال اعجابكم
نبداو بسم الله

المدخل :ساندويتشاك ماك العربي
الطبق الاول :شوربة خضار
الطبق الثاني : سفيرية البطاطا واللحم المفروم
التحلية: تحلية بدوق الفراولة

نبداو بالساندويتش اولا عملت رغيف تلقاوه في هاد الرابط

https://www.djelfa.info/vb/showthread.php?t=1059406

وكي اخمر عملتو كويرات متوسطة حليتها فوق الفرين

وحطيتها فوق منشفة وغطيتها مدة 10 د لان الجو ساخن واختمرت بسرعة وكي يكون بارد الحل نخليها من ربع ساعة لعشرين دقيقة

من بعد طيبتها في مقلة تيفال من الجيهتين

وحطيتها في منشفة وكيس حتى تبقى طرية
وحضرت الحشو اللي هو بصلة قليتها في شوية زيت وملح حتى دبالت وزدتلها لحم مفروم وكي تقلى الكل زدت 2 حبات كبيرة طماطم مرحية ونصف ملعقة طماطم مصبرة وكملي طيبيهم ماتكثريش الملح

حلي الرغيف وحطي كمية من الحشو وفوقها كمية مليحة من الجبن المبشور ممكن تستعملي شيدار ولا قرويار ولا تمزجيهم في 2 غطي الرغيف

وحطيه في لاماشين آبانيني حتى يدوب الجبن واللي ماعندهاش ممكن تردو لنفس المقلة اللي تكون ماتلصقش على نار هادئة حتى يزيد يتحمر شوية من الجيهتين ويدوب الجبن

قطعي السندويتش على 2 وقدميه سخون

هدا بنفس الطريقة الحشو فقط حطيت الدجاج في مكان اللحم المفروم

وهنا كي اختمر المرة الثانية طيبتو في الفرن ماشي في المقلة

شوربة الخضار تلقاوها هنا

بالنسبة للسفيرية
غلي رطل بطاطا بالقشور حتى تطيب خليها تبرد وقشريها وامرسيها بالفرشيطة والسر في انها ماتجيكش تلصق في اليدين انك تطيبيها بالقشور وانك تخليها تبرد تماما قبل ماترحيها بالفرشيطة زيديلها شوية ملح وكوني حمصتي شوية بصل وثوم ولحم مفروم وتزيديهم للسفيرية مع معدنوس مقطع ورشة صغيرة قرفة وشوية فلفل اسود وزيدي بيضة كاملة

شكلي كويرات احشيها بقطعة جبن ادا موجودة وممكن تستغناي عليها و ابسطيها شوية اغطسيها في بيضة مخلطة ثم رمديها في الفرينة واقليها

حطيها على ورق ماص وقدميها مع صوص بلونش بالحمص وشرائح ليمون ورشي عليها المعدنوس اللي تحب الرابط نتاع الصوص نحطهولها<

التحلية ساهلة ساهلة ولديدة

في كاسرونة حطي لتر + فنجان حليب ومعاها زوج علب نتاع كرام باتيسيار دوق فراولة ومعاهم 7 كلاعق كبيرة معمرة سكر عادي وخلي الكل على النار حتى تعقد

نحي منها قدر 2 ملاعق كبيرة والباقي صبيه في الاكواب وخليه يبرد

طلعي 3 ملاعق كبيرة مليانة غبرة الشانتيي مع كاس الا ربع حليب بارد جدا وكي نثقال مليح زيديلها زوج ملاعق كبيرة غبرة الفلان بدوق الفراز انا استعملت فلان نوارة بدوق الفراز وخلطي وزيديلها هادوك الزوج ملاعق اللي كنا خليناهم من الكرام باتيسيار

حطي الخليط فوق الكريمة وعاودي دخليها الثلاجة وممكن تزيني بحبات فراز ولا حسب الرغبة

نتمنى يكون نال اعجابكم
والموني الخامس راه واجد لكن مانقدرش نحطو لانو ممنوع نحط اكثر من موضوعين

ماتنساونيش بدعواتكم ليا بالدرية الصالحة
وصحا فطوركم

lahna moka · 2013-07-25, 00:24

صح فطورك حبوبة و بارك الله فيك على menu الرائع
انشاء الله ربي ينورلك طريقك و يفرحك بالذرية الصالحة

*عاشقة الجنة* · 2013-07-25, 00:24

تبارك الله عليك يا الفحلة

مشاء الله

ربي يعطيك ما تتمناي حبيبتي ويرزقك الذرية الصالحة باذنه تعالى
عاجلا غير آجل

أنآحلُم · 2013-07-25, 00:38

يعطيك الصحة ختي ربي يخليك

marwa marama · 2013-07-25, 01:08

تبارك الله عليك يا الفحلة

hajour · 2013-07-25, 01:12

بوركت على الوصفات الجميلة نينا

~~جوهر دعوة~~ · 2013-07-25, 01:45

ما شا الله نينا عجبتني التحلية غدوة ان شا الله نجربها
بارك الله فيك وجزاك خيرا

ام الياس04 · 2013-07-25, 02:06

ربي يحفظك و يرزقك بالذرية الصالحة

عبير ريمة · 2013-07-25, 06:06

يعطيك الصحة ديما وصفاتك رائعة شكرا

أم سراج الدين · 2013-07-25, 09:42

الله بارك كلشي رائع
عجبتني السفيرية على طريقتك باذن الله نجربها
اما تحلية بدون نقاش هههههههه لازم نجربها باذن الله

يعطيك الصحة غاليتي
دمتي متألقة

Agro34 · 2013-07-25, 10:34

تبارك الله فيك فطور يشهي لكن يا ريت تعاودلي الخبز لي درتي لان الرابط مبانش
والله يحفظك

ninafret · 2013-07-25, 11:04

آمييييييييييييييييين اخواتي ربي يتقبل منكم وراني نستنى التطبيقات بحول الله
راني عدلت الرابط نتاع الرغيف

راجية غفران ربها · 2013-07-25, 15:03

الله يبارك نينا راني نطبق نتاعك و عيني مغمظين ربي يعطيك واش تتمناي يا الغالية

pharma-93 · 2013-07-25, 16:10

nina hbiba merci bq 3la lwassafat ntaw3ak walah dayemn 4444444444444 ya3tik sa7a wrabi yehani rajelk bik hbiba 9olili hadak lkhobz li dertih fi lma9adir l9it kilo farina ana habit na9ass pusk hna 3 fedar barek ch7al ndir farina stp rpd wsaha ftork ya lfa7la

ninafret · 2013-07-25, 16:21

اقتباس:

المشاركة الأصلية كتبت بواسطة pharma-93

nina hbiba merci bq 3la lwassafat ntaw3ak walah dayemn 4444444444444 ya3tik sa7a wrabi yehani rajelk bik hbiba 9olili hadak lkhobz li dertih fi lma9adir l9it kilo farina ana habit na9ass pusk hna 3 fedar barek ch7al ndir farina stp rpd wsaha ftork ya lfa7la

حبيبتي انا راح نعطيك معيار ساهل
شفتي هداك الكاس نتاع لينوكس نتاع بكري ادا ماعرفتيهش نحطلك صورتو
هداك الكاس مليان فرينة راه يعملك زوج خبزات يعني زوج رغيف متوسط الحجم وانتي اعمليها قاعدة يعني انتوما في 3 ديري كاس ونصف فرينة ومعاهم 3 ملاعق زيت ومغرف صغيرة خميرة الخبر والملح
ملاحظة حبات الرغيف راها ماتجيكش كبيرة كيما نتاع الشاورما بهاد المقادير لان سندويتشات الماك تجي صغيرة شوية
نصيحة حبيتي انتي حاولي تعملي بالزيادة لاني مانضنش ان حبة وحدة تكفي كل واحد فيكم
انا كي عملتو اخواتي هبلوني كل وحدة كلات زوج
صحا فطورك حبيبتي جربيهم الليلة راه مازال الوقت