فاطمة غيرة الباب

[فاطمة شلف]

سال على فاطمة غيرت الباب** حتى المفاتيح والقفل ومافيها
من عذاب فاطمة ماعدت جواب*** غير لي سال وقلبو فيها
تراهنوا عليها رجال ونسوان ولحباب*ماقدروا بالمال حتى يشروها
سال على فاطمة غيرت الباب ****** ** حتى المفاتيح والقفل وما فيها
من المحنة هاج قلبها وطاب **** تعذبت من لقريب وماصبت دواها
من جرح محبوبها سمرت لبواب * جميع المفاتيح ما يحلوا ريضاها
هذي حالت لي تنخدع في لحباب * تتصدى لجميع الضربات وما فيها
مالقات خي ولا حنين حاب ****** يجي ويقسم الهم معها
مسكينة فاطمة نية فتحت لبواب *** حتى الحياة بدات تصعاب عليها
من تخمامهاحرم نومها والراس شاب*** مالقات سبة حتى باه يعادوها
يا الرايح لفاطمة وقرا لحساب ***** جيوش وعساكر ماقدروا يهزمها
علاش يافاطمة صدتي لبواب ********* حنا خيات والعدوة ربوها
حلفت وسجلت دروسي فالكتاب ***** وقلت فاطمة ماتزيدوا تشوفها
تحزمت بزوج حزمات ضنها خاب *** عطات العاهد لربي مولاها

بقلم فاطمة شلف

[بوبكر بن علي]

الله الله الله الله الله الله
فسختي قلبي علا مرجل طاب..... حتى بجواجي زدتي دمقتيها
هلكني كلامك كلدير عني راب.....واه الزفرة عدت نسرق فيها
لكن نويتيني ياعــز لــــحباب......وكلمة فيك عمري مانشتيها
قلتي لا وخي ولاحنين حـاب......عندها وفي المحنة يواسيها
والله ابياتك اثرو فيا كثيرا...يعطيك الصحة اختي فاطمة
انا اخاك ومعك بالند وانت شقيقتي....حاضر في السراء والضراء
الله يحفظك شاعرتنا من مكروه
مودتي ياغالية

[فاطمة شلف]

السلام عليكم ورحمة الله وبركاته
يا الغالي في لحباب كلامك
راه طفى هذا المشهاب
خويا العزيز والله ماننساك
لي طفت هذا المشهاب
ديما حضرلي وقت العرك
وتنسيني ضري لي طاب
تحية لك ياعز لحباب اخويا بوبكر
ربي يحفظك ان شاء الله

[فاطمة شلف]

السلام عليكم
شكرا لك اخي بوبكر على التشجيع
راه هزني ريح عصف وفات
مسموم هزم دار العشرة ومات
لض على صدري فيه بات
وشق القلب بشفرة عدة شقات
والحمد لله هذا شر وفات
شكرا لك والف تحية ياوليد العربان بوبكر في الهدة يظهر ويبان
هذوا هم اولاد الاصل اخوى في كل مكان
اقف لك وقفة الاحترام من شلف الى الجلفة

[فاطمة شلف]

ياخويا والله والله ماننساك
في الليل تهدف عليا وقف
انت واحد من العائلة راك
وسط القلب نعزوك تعرف
تحياتي ياشاعرنا واستاذنا واحينا دون مجاملة

[فاطمة شلف]

يااخويا عندك لا تزعف
ماني قاصد غير رضاك
في غيضي غير ساعف
واك انت خويا وانا اختك
تحياتي وتقديري واحترامي اليك

[بوبكر بن علي]

لا مانزعفش من اختي كنت نزعق معاك برك ههههههههه
انت اختي ونعم الاخت ....نقاسم معاك الهموم
ولي تضرك تضرني...انت جبل مايتهد...محال يهدوك هذو الناس
يافاطمة بابك غيرتيه وباب الشر ان شاءالله يغلقو ربي بسور
سلميلي على الاولاد وعلى صهيب الغالي...تحية من خالهم
الله يحفظكم جميعا
مودتي واحترامي يابنت الاصل ..شاعرتنا فاطمة

[فاطمة شلف]

السلام عليكم ورحمة الله ولركاته

الله يسلمك خويا العزيز ويدوم حياتك
تحية كبيرة من اخت الى اخيها
ربي يخليك اخ دوما ان شاء الله
سلام

[بوبكر بن علي]

المشاركة الأصلية كتبت بواسطة فاطمة شلف

السلام عليكم ورحمة الله ولركاته

الله يسلمك خويا العزيز ويدوم حياتك
تحية كبيرة من اخت الى اخيها
ربي يخليك اخ دوما ان شاء الله
سلام

وعليكم السلام ورحمة الله وبركاته
شكرا جزيلا اختي فاطمة ...الله يحفظك ويسترك
عشت نعم الاخت انت ...وهذا شرف لي
دوام الصحة والعافية والمحبة الصافية
تحياتي ومودتي شاعرتنا الاصيلة

[صَــــآابْرِيــنَــ~]

رائعة
مشكووورة

[فاطمة شلف]

السلام عليكم ورحمة الله وبركاته
مرورك اروع اختي النايلية شكرا
تحياتي

[عبد العزيز الرستمي]

السلام عليكم و رحمة الله تعالى و بركاته
محاولة جميلة
الله يبارك
تحيتي ليك

[فاطمة شلف]

السلام عليكم ورحمة الله وبركاته
شكرا اخي عبد العزيز مرورك نور صفحتي
بارك الله فيك
تحياتي

[فاطمة شلف]

مابقات ثيقة في لحباب
راني من تخمام راس شاب
نبات نتكلم ونفتش قلبي طاب
تعذبت فالحياة ماقريت حساب

[بوبكر بن علي]

المشاركة الأصلية كتبت بواسطة فاطمة شلف

مابقات ثيقة في لحباب
راني من تخمام راس شاب
نبات نتكلم ونفتش قلبي طاب
تعذبت فالحياة ماقريت حساب

ماني حيلي ماعاشرت ذياب
ماني ناكر ملحك رديتو تراب
ماعديتك مارميتك مرة بنشاب
مادرت عليك الحد مابلعت باب
ماسقدت في محبتك ماني كذاب
عزيتك كالاخت ودرتك عز احباب
انت حرمة وتخافي رب الارباب
قدرك عالي وانا درت ليه حساب
قلبي في اللسان حديثو يرطاب
طلبتلك الخير دعيت الله المجاب
تعيشي فالهنا حاجة ماتصعاب
والخيرات تطيح عنك كالكباب
امين يارب