نصائحكم و افكاركم لنجاح مشروعي

[om assil]

السلام عليكم
اخواتي انا ربة بيت حابة نخدم الحلويات في الدار للناس حابة تعطيوني نصائح باه ينجح مشروعي من ناحية الانواع واش تنصحوني الانواع اللي يطلبوها الناس و ثاني الاسعار بالكيلو والحبة يقداه الناس راهم يخدمو مانيش حابة نكوي الناس و على اي انواع نركز على الانواع الفخمة برك نتاع اللوز و الجوز و لا ندير السيمبل و الاشهار كيفاه يعرفوني الناس ربي يعيشكم اللي عندها اي فكرة او نصيحة ما تبخلش عليا

[مريم الصابرة]

السلام عليكم اختي
ربي يعاونك يا رب شوفي انا تعلمت الحلزى عندي افكار لكن ننصحك تروحي لقسم الحلويات كاينة السيدة ام رامي مختصة في كل شي وهي تعطيك الجواب الصحيح وتوريلك الانواع وأشياء تتعلميها منا جربت الكثير من الانواع ونجحتلي الحمد لله وزيدي اختي نصيحة حتى تنجحي اخدمي مع الزواليين يعني تربحي حاجة قليلة وتكسبي ناس بزاف ولا تخدمي غالي وتتشرطي عليهم على الأقل راكي فالبدايات
شوفي هو القاطو بالحبة 20 دينار وباللوز يوصل حتى 50 دينار وهذا غالي بزاف وأغلبيتهم راهم يغشو ويدرو لاشابلوغ نضن تعرفيها الخبز المرحي يعاونو بيه اللوز ويهردو فالناس سبحان الله فالنعمة والغش
المهم اختي تواصلي مع السيدة ام رامي موفقة

[كاميلا]

شوفي اختي راني كيفك
اولا التكوين لازمك ديري تكوين لكان متقدريش على تكاليف المدارس الخاصة ديري عند النساء ام كاين اللي دير في دارها وتعلم لازم يدك تشطار وتهزي الصنعة اكثر واكثر ولازمك تبدعي هاد الشيء رح يميزك ويجلبلك الزبائن
الانواع هي العرايش .المخبز .طمينة اللوز والبقلاوة بيكاسو ...............لابات بلونش الجوزة الجوزية هذا على راس القايمة ومطلوبين في العراس
كاين اللي يحسبوا بالحبة 50 دج الى 70 كاين حتى 100 و 120دج كيما المقرود بالكيلو
على حساب الكوموند بصح اني قتلك عادو الناس يشتيو يديروا في العراس تاع الجوز واللوز يديروا نوعين او ثلاثة
ولازمك الماتريال شوفي الميزان لازم يكون عندك باش الديري حسابك قدقد ومضيعيش ولا فتفوته هههههههههه واكي تعرفي الاشياء الاخرة بيترا لكان عندك زيد تنحي عليك والماشينة تاع التريدة باش الديري بيها لابات بلونش واللي تزيني بيهم الطوابع هادوك تاع 7 و 9 و 8 والطوابع تاع الاشكال الوردة والبابيو الخ
وزيدك الكولورو اشري اللي يتباع بالكيلوا والفاني تاني اخطيك من هاديك اللي تتباع اشري بالكيلو ريحتها تشهي
كشما زيد في بالك نقولك منبخلكش اختي
وباش تتعرفي ابداي بالعايلة والصديقات يديرولك البيب اكي تعرفي هذي تقول لهادي

[السي محمد]

المقروض و شوفي زوجك او احد ابنائك يبيعه للمقاهي

[الصحة النفسية]

السلام عليكم أختي : سأعطيك قائمة الحلويات المطلوبة في الأعراس خاصة أعراس مناطق الوسط : المشكلة ، البقلاوة ، الكعيكعات ، المخبز ، الدزيريات ، مقروط اللوز ، التشاراك ، المشوك ، القنيدلات ، يعني حلويات تقليدية بلمسة عصرية ، ننصحك ركزي على حلويات اللوز و خطيك من الكوكاو إذا حابة تربحي و يربح المشروع تاعك ، سعر الحبة يتراوح ما بين 50 دج حتى 70 دج حسب طبيعة الكعك

[ويناروز]

ربي يسرلك اختي

أنا من اكثر المهن التي تعجبني.....كل الانواع لكن اختي حسب طبيعة المنطقة التي تقطينيها

المطلوب في الاعراس.......الاعياد.......حضري وتعاملي مع محلات بيع الحلويات تقدري تتعاملي معهم ......مع المقاهي

اما انواع الحلويات روحي لمنتدى الحلويات رايحين يعاونوك الاخوات بزاف........ربي ينجحك ان شاء الله

[om assil]

شكرا للاخوات مريم الصابرة كاميلا نيروز سي محمد ايمان ايت شكرا بزاف على نصائحكم ربي يعطيكم ما تتمناو و اختي كاميلا نشكرك على اهتمامك بزاف ما تحرمنيش من اي نصائح اخرى تتفكريها و ش هي بقلاوة بيكاسو ما عرفتهاش

[alger1]

ربي اعاونك واذا اردت المهارة في صنع الحلوى يجب عليك الاكثار من الممارسة

[خولة لبابة]

وفقكي الله.............

[منهاج]

السلام عليكم

ختي ربي يوفقك ويرزقك من واسع ابوابو ،انا راح نقولك واش يتمشى عندنا مثلا في الغرب " البحلاوة المقروط

العرايش المصيبحات لوز ونواة كوكو مخبز لوز ونواة كوكو مقروط اللوز وتهلاي في الديكور هادو تاع لعراس .

اما العادي صابلي بكل انواعه وهادا يتباع بالميزان وتاني انواع اخرى تاع حلويات

ننصحك ترضي كل الزبائن لي مقتدرين ولي ما عندهمش والله حتى لي ما عندهاش وراها تكموندي كي تكون عندها

خرجة على غفلة

وخدمي القاطو الغالي والرخيس هكدا باش تكسبي جميع الطبقات

[ryma la cool]

wafakaki alahhh okhtiiiiiiiiiii

[لينة نور]

السلام عليكم

من أجل الاشهار أنصح بكتابة معلومات شاملة عن الحلويات التي تقومين بصنعها

مع عنوانك واختيار ختم خاص بك .

وتوزعينها على المحلات في مدينتك [ لا أظن أنهم يمانعون بالصاقها على ابواب محلاتهم ]

خاصة اذا صنعت عند مختص واهتم بها من ناحية الخط والالوان .

ثم اذا أردت عودةالزبائن عليك بالاتقان والكرم وخاصة احترام موعد التسليم .

موفقة ان شاء الله

[sarl02]

المشاركة الأصلية كتبت بواسطة السي محمد

المقروض و شوفي زوجك او احد ابنائك يبيعه للمقاهي

هاودي ها اسكت علينا هذه ثان ادخل روحك فيها.؟؟؟بصح نسيت حاجة... لازملها ايركات باه تليفري المقروض والبسبوسة ولا لالا؟

[كاميلا]

المشاركة الأصلية كتبت بواسطة om assil

شكرا للاخوات مريم الصابرة كاميلا نيروز سي محمد ايمان ايت شكرا بزاف على نصائحكم ربي يعطيكم ما تتمناو و اختي كاميلا نشكرك على اهتمامك بزاف ما تحرمنيش من اي نصائح اخرى تتفكريها و ش هي بقلاوة بيكاسو ما عرفتهاش

بلا مزية واي استفسارات اخرى نحن في الخدمة

[om assil]

شكرا و بارك الله فيكم على نصائحكم ان شاء الله راح نطبق فكرة الاشهار و عجبتني فكرة صنع النوعين من الحلويات الغالي و الرخيص و اذا تعرفوا كم اسعار الحلويات بالكيلو ولا الحبة خبروني و اختي كاميلا ما جاوبتنيش وشي هي بقلاوة بيكاسو و راني سمعت العلمة فيها ماتريال نتاع الحلويات ورخيص اللي تعرف وين تقولي ربي يجازيكم الف خير