وصفات باستعمال الخبز اليابس / البايت / الصابح ............. زُخْرُفَةٌ

[zokhrofa]

السلام عليكم البنات

حبيت يكون هذا الملف نجمعو فيه انا و نتوما كامل الوصفات لي نقدرو نستعملو فيها


الخبز اليابس





هذا باش نشجعو النساء على عدم رمي الخبز كي يبقالهم

و باش ما نلقاوهش كيما كل عام مرمي في القمامات و دايرلنا التبهديل


خاصة في شهر رمضان الكريم

هيا شكون تبدا بسم الله و تقوللنا على وصفة نقدرو نديرو فيها الخبز اليابس




ربي يكتبهالكم في ميزان حسناتكم ان شاء الله

و مشكورين سابقا

قانون الموضوع : ارجوكم لا تشاركو بوصفات غير مجرّبة لتعّم الفائدة

[فايزة1207]

بارك الله فيك انا عندي وصفات هزيتهم من الفايس اذا تحبي نحطهم

[zokhrofa]

اذا جربتيهم اهلا وسهلا

خاطش ما نحبش النقل انا آسفة يعني معليش اذا جربتيها و ما عندكش صورة حطي صورة تاع الفايس لكن اذا ما جربتيهاش من الاحسن لا

او على الاقل نوضي ضرك جربي وحدة خفيفة و حطيهالنا ههههههه

[سحابة باردة]

الخبز اليابس أنا نستعملو في كيكةخبز تونس ابعد نحط الوصفة ودايما نستعملو مع الفيونداشي والمقبلات

[zokhrofa]

صحيتي اختي سحابة انا في انتضار خبز تونس خاطش عندي الخبز اليابس راني مخبياتو

[conductrice]

وعليكمـ السلامـ
شكرا على الإطراء اختيـ زخرفة
بالنسبة للخبز الصابحـ أو البايتـ انا ندقهـ ونديرهـ فيـ علبة كيـ ندير معقودة ولا كورات الروز نمرمدهمـ فيهـ ونقرصـ بيهـ لخبز يجيـ مقرمشـ
مراتـ نرميـ 2 مغافـ كبار فالمسكوتشوا
ونعقلـ على ماما كانت تقطعـ روندالـ وتفوتهـ فالبيض وتقليهـ يمـ يمـ يااااامـ بنة لا متيلـ لها سيتها مرة وما نجحتليشـ
نتمنى يزيدونا العضواتـ بعضـ الأفكار

[محتاجة لعفو الله]

و عليكم السلام و رحمة الله و بركاته


أنا الخبز البايت نيبسو ممبعد نحمرو شوية في الكوشة و نرحيه و نستعملو شابلوغ في المعقودة و همبرغر ....الخ و مرات كي ميكونش عندي مرحي نسكرفج كمية منو مباشرة في الوصفة اللي رايحة نديرها يزيد بنة وخفة

بارك الله فيك على الموضوع و جزاك الله خيرا

[محتاجة لعفو الله]

هادا موضوع للاخت remadna فيه عدة وصفات بالخبز اليابس انا مازال ما جربت منهم بصح عدة اخوات في المنتدى جربو منهم و نجحولهم
100/100


وصفاتي الخاصة بالخبز القديم و اليابس (حلويات) متجدد بإذن الله

و هادي بعض الاقتباسات لتطبيقات العضوات

المشاركة الأصلية كتبت بواسطة hamsa1987

راني طبقت عدة وصفات و اللي دارت حالة في وسط العائلة و زميلات العمل هي طارطة الكراميل راهي ولات مشهورة بارك الله فيكي

عندي استفسار فيما يخص طارطة الموز راني خايفة نعاودها لانها ما نجحتليش بقات لاسقة في المول و كي حبيت نحيها تفتفتت لميتها و صبيت عليها القلاصاج تاع الشكولاطة مي جات عحينة

هذا هو الشيء الوحيد اللي ما نجحليش الباقي راكي ديتي عليه دعواتي و دعوات الوالدة لاني شبعتهم كريم ديسار ـ حليب الشكولاطة ، طارطات و راني أيضا أفدت الزميلات و الاقارب بوصفاتك

ربي يخليك يا أختي و يجعلها في ميزان حسناتك

المشاركة الأصلية كتبت بواسطة ~أمة الله~

بسم الله الرّحمن الرّحيم
السّلام عليكم ورحمة الله وبركاته أخواتي

هذا تطبيقي لقاطو الشكلاطة السّحري بالخبر اليابس المرحي للأخت رمضانة حفظها الله وردّها إلينا سالمة فقد أطالت الغيبة
ماشاء الله جرّبتو شحال من مرّة خفيف وكامل في البيت يحبوه، برك أنا نقصّلو السّكر لأننا في البيت لا نحب الحلوى المسكّرة جدّا

وهذه المرّة حبيت نطبّقو في قوالب السلكون باش يكون الشكل ديالو شباب، وماكاش عندي شكولاطة فزيّنته من فوق بلاجولي تااع أختي أم عبد الله حفظها الله






هذا هو الرابط
https://www.djelfa.info/vb/showthread.php?t=549476
وجزى الله خيرا الأخت رماضنة

[سحابة باردة]

وصفة خبز تونس لسنية كبيرة نحتاج ستة بيضات كاس زيت كاس ماشي معمرسكر مبشور ليمون وكيس خميرة كاس اللبن او حليب وكاس كوكاو ااو أي نوع مكسرات مكرفج زوج كؤوس خبز يابس ومرحي نخلط الكل نضعه في سنية مدهونة وإلى الفرن الحامي على نار هادة لمدة 40 د أو حسب الفور انتاعك ثم نسقيها بشربات المضاف له عصير الليمون

[محتاجة لعفو الله]

وصفاتي الخاصة بالخبز القديم و اليابس (مملحات) متجدد بإذن الله للاخت remadna

[zokhrofa]

يعطيكم الف عافية البنات على الوصفات

[انا هي رزيقة]

موضوع قمة في الفائدة اختي زخرفة ربي يجازيك عليه كل خير ... انا الحمد لله منشريش خبز اكثر من احتياجي انا و زوجي يعني علابالنا شحال ناكلو و نشريو على قد احتياجنا و فقط... والحمد لله و اذا حصل انو بقالي شوية خبز لسبب او لاخر منرميهش ابدا نخليه ييبس تماما في مكان جاف و نطحنو في الروبو ....و ساعات نفوتو في الغربال الخشين و ساعات لا .... و نستعملو كشابلير chapelure لمعقودة البطاطا و الارز و احيانا نزيد ملعقة او اثنين في اللحم المرحي و هكذا... و نحطو في علبة محكمة الاغلاق و نديرو في الفريجيدار و يحكملي مدة طويلة دون اي تغير فيه..... وطبعا عندي صور لعيونكم الحلوين

[zokhrofa]

يعطيك الف عافية اختي رزيقة و الله بارك الله فيك

مع الاسف هذه الخطوات السهلة جدا بعض النساء تعجز عليها

او تشوفها دقة قديمة كيما يقولو

[nihal159]

السلام عليكم؛ تفكرت وصفة كانت ديرهالنا ماما أيام الشتاء بالخبز الناشف مش اليابس.

تحظر مرقة بالخضار و قطع دجاج حسب الموجود لكن الأصل في الوصفة هي الخضار لازم تكون بزاف راني قلتلكم هذي وصفة تاع الشتاء ههههههههه

و تقطع الخبز بالسكين إلى مربعات تقريبا 3 سم*3 سم و تفورو فالكسكاس؛ بعد مايفور ديروه في صحن كبير و دهنوه بقطعة زبدة و سقوه بالمرقة لي حضّرتوها من قبل؛ و الله أن بنة الخبز مع المرقة و الزبدة رهيييييييييبة؛ جربوها مستحيل تندمو عليها.

أما بالنسبة ليا؛ نديرو فالكوشة ينشف و من بعد نرحيه و نديرو شابليغ.

[zokhrofa]

هههههههههههه نفس وصفة امي نهال لكن ما رانيش شافية عليها مليح من بعد نسقسيها و تعطيني الوصفة

صح بنّة مكاش مثلها