الجزء 1 : كُوزِينَةْ الأَكْلْ الصِحِّيْ ........... مع زُخْرٌفَةٌ

[oumelabedmh]

من عيوني اختي زخرفة هدا تاع ان انس ربي يحفظها وهو انك تذوبي نص كاس سكر في ثلاثة ارباع الكاس ماء ساخن يغلي ومن بعد تزيدي كاس حليب بودرة وكي يمتزج الخليط تحطيه في الثلاجة حتى يتكاثف تاني يوم يكون جاهز وهدا هو الرابط اول مرة نحط رابط مانعرف اذا يصلح ولالاhttps://www.djelfa.info/vb/showthread.php?t=1221090

[oumelabedmh]

وكاين وصفة ام وليد في اليوتيوب مدايرة نيستلي عادي والكراميليزي

[امّ اياد]

مس الخيرات
راكم تحكو على شوفان غالي شريتو مرة وحده برك من عند عشاب بصح نوعية لي شريتها مش مليح درت بيه مسكوتشو
زخرفة يعطيك الصحة على لوبيا بصح فيها البصل ياسر

[أم البراء 2017]

المشاركة الأصلية كتبت بواسطة zokhrofa

ها مليح ام البراء قوليلي و الشوفان شحال يدير و وين تلقاوه انا لقيتي عند الصيدلية 280دج ل 100غ قريب هبلت هههه

يدير 30 35الف باطة تاعو فيها 500 غرام
نورمالمو كاين فل سوبيرات

[oumelabedmh]

انا نستعمل هدا النوع الي حطاتو الاخت قبلي

[zokhrofa]

اه صحيتو بزاف شفتو هذا بصح ما رفدتوش باش نقرا بلي شوفان هههههه

ام اياد ما فهمتش قصدك فيها بزاف البصل ؟

[ام هدول]

مسالخير ...لبنات ..ربي يدوم الصحة والعافية عليكم
زخرفة طلبتي مني وصفة البطاطا مشرملة اول مرة ندرها ...اتفضلي الطريقة

تقطعي البطاطا مربعات ومن بعد اضيفيلها ..سنينات ثوم مرحي ناعم وشوية ملح وفلفل اسود وكركم وزنجبيل وراس الحانوت ..ونص قرن فلفل حار مقطع رقيق ..وفنجان خل ابيض ...وفنجان ماء وزوج مغارف كبار ..زيت المائدة ...وتحطيها في الكوكوت وتغلقي عليها لمدة عشرة الى 15 دقيقة على نار قللللللللييلة جدا ...

[zokhrofa]

او يعطيك الصحة اختي ام هدول ساهلة ماهلة قوليلي انا ماعنديش الكوكوت تخرجلي ياك ؟

[zokhrofa]

اليوم درت شربة فريك للي حابة تعرف طريقتي :

تعمري قدرة بالماء

تحطيها فوق نار قاوية

ترمي فيها على حسب كمية الماء المكونات الاخرى :

اتنان حبة بصل طويل منقية و مقسومة على اتنان
اربع حبات جزر منقيين و مقطعين اذا كانو خشان

اتنان كوسة قرعة خضرة

اتنان لفت

كاس حميصة تكون شمختيها 24 سا و غليتيها 45دقيقة و خبيتيها في الفريغو او في نفس اليوم استعمليها

ربطة صغيرة قصبر

ملح

زيت

كروية

راس الحانوت

كركم

قرفة عود صغيييرة

حبة الحلاوة

زريعة البسباس

فلفل اسود

فلفل احمر

طماطم مصبرة لي حابة لون احمر او طماطم حب

كي يغلي الكل نقسي كامل للقدر و خليها 2 سا طيب في غرضها

بعدها نحي كلش ما عدى الحمص

شلي الفريك مليح و ضيفيه ليها يغلي 5 دقائق و طفي عليها ترتاح نصف ساعة

بالهناء و الصحة

[امّ اياد]

ايه انا مشريت هدا تاع كويكر لي شريتو جاي في كرطونة
زخرفة ايه قصدي كمية البصل كبيرة ميغلبش طعم البصل على الوصفة
فالرد الاخير قريت معندكش كوكوت قولي كفاش طابتلك لوبية الله يبارك راهي طايبة مليح حتى انا نقعها ليلة من قبل بصح لازم نغلق عليها فالكوكوت والا مطبليش

[محتاجة لعفو الله]

المشاركة الأصلية كتبت بواسطة zokhrofa

شكراااااا ممممم يشهي نزيدلو زيت الزيتون برك و ناكلو بلا لبن ههه


اختي حبيت برك نبهك الخطأ هو انك تغطي بكيس بلاستيكي

غطي غير بالغطيوة و راح يفور بدون حتى مشكل و اذا الغطيوة فيها ثقب اغلقيهم باللباب تاع الخبز

ارجو انك تفرحيني المرة الجاية و تقوليلي راني درتو و خرج يهبل بدون كيس بلاستيكي

أختي زخرفة انا قصدت البلاستيك الغذائي film alimentaire انظن انو متواجد في كل بيت تقريبا غير لاكان هو تاني مضر والله ما علابالي

[zokhrofa]

اهلا ام اياد لا ما يغلب والو خاطش تقليه ملييييح مع الخل حتى يولي ذهبي من بعد ترمي الباقي

ايه انا طيابي كامل فالطنجرة ما عنديش كوكوت

السر الوحيد هو انو طيابي يضرب مرات قريب ثلاث سوايع فوق النار خفييييفة

لوكان تزيدي للنار راح الماء يتبخر و اللوبيا ملطيبش خاطش هي تحب بزاااف الماء يعني طاسة لوبيا طيب في ثلاثة طاسات ماء

لذلك مرقي مليييييح و خليها على نار هادية كي طيب زيدي للنار باش يتبخر المرق الزايد و تجي خاثرة

[zokhrofa]

المشاركة الأصلية كتبت بواسطة محتاجة لعفو الله

أختي زخرفة انا قصدت البلاستيك الغذائي film alimentaire انظن انو متواجد في كل بيت تقريبا غير لاكان هو تاني مضر والله ما علابالي

اه صحيتي اذا قصدك الفيلم الغذائي خاطش انا فهمت بلاستيكي معناها هاذوك ساشيات اصفر و ازرق و اسود ههههه

سامحيلي اختي و صحيتي على التوضيح و عطيتيني فكرة شابة

[امّ اياد]

صباح الخير
زخرفة راني عارفة بلي نار لقوية تنشف الماء بالخف والحاجة لي راهي طيب متديش وقتها بلاك ماء تاعكم ثاني مليح حنا الماء عدنا شوي مالح نهار لي نحوس ندير حبوب لازملي نطيب بالماء المعدني
علبالك كلما طابت الحاجة في اقل وقت ممكن كلما احتفضت بعناصرها الغذائية وهادي الحاجة المليحة فالكوكوت

[zokhrofa]

صباح الخير اختي ام اياد العكس اختي كلما طابت في اقل وقت كلما لم تخرج كل المواد لي فيها و تصبح صعبة الهضم في المعدة ردي بالك من هذه المعلومة عاودي تأكدي منها

انا مصدر ديالي محمد الفايد و هو قال الاكل في الكوكوت راه مافيه حتى فايدة طبعا راني نهدر على الوقت تقدري طيبي في الكوكوت و تنقسي بزاف للنار

اما على الماء ما عندو حتى دخل شوفي كيفاش ديري المرة الجاية

شمخيها 24سا من بعد غليها 45 دقيقة و ارمي الماء اذا تحتاجيها في هذاك النهار استعمليها اذا ما تحتاجيهاش خبيها فالمجمد انا هكذا ندير تخرجلي زبدة