عاجل

looona · 2011-03-08, 09:42

أخواتي الأعزاء أنا نحب الحلويات التقليدية
حابة توريولي الطريقة التقليدية ولا حتى الجديدة لصنع الغريبية
أنا نحبها ونحب نديرها بصح ماتحبش تطلعلي بلاك نفتح عليها الفرن

nadiem · 2011-03-08, 10:44

loona...الغريبيةالتقليدية=كيلة زبدةطرية(500غ) تخبطيها بالباتور او بيدك حتى تبياض ثم تضيفيلها نص كيلة سكر (250غ) .وتكملي تخبطي مليه المهم تكون يدك باردة باه ما تذوبش الزبدة او تحطي الوعاء لي تخدمي فيه فوق وعاء فيه ما جامد ..كي تطلعلك مليه شيحي بالفرينة وشكليها وطيبيها في فور هادئ....ماتحليش عليها..راهي ما تطولش..كي تشوفيها بياضت ونشفت نحيها بلا ماتمسيها حتى تبرد..........الغريبية من الطبيعي تجي سهلة التفتت خاطر ما فيهاش بيض يحكمها ونشالله تصلحلك ..جربيها بنص المقادير وقوليلي كيفاش جاتك...
الغريبية الجديدة لي تجي بزبدة ذايبة جربتها بصح ماجاتش تذوب فالفم جات يابسة كتر من البتي فور
حبيت نسقسيك لا عندك المقادير تاع البتي فور لي يتباع في المقاهي لي يجي كلي باللمبوط وطويل وزوج لاصقين معا بعضاهم بالكونفيتور و لونو اصفر

janna · 2011-03-08, 11:18

هاذي ياختي غريبية بالكاوكاة ديري كيلتين زبدة كيلة 1 سكر ارطب ظربيهم مليح حتان يعودو كيما لكريمة زيدي كيلة 1 كاوكاو مرحي ارطب خلطي مليح و نشفي بالفرينة قرصي واطبعي ولا كوريها كيما لغريبية التقليدية وما الطولش في الفور غير تنشف وبدا لونها يتبدل نحيها انشاءالله تنجحي فيها

OU SS AMA · 2011-03-08, 11:55

الى تعرف دير الغريبية تاع الصح الي تدوب في الفم وتشم ريحتهاتاع الصح الله الله على غريبية اجدادنااين دهبت الوصفات تاع زمان

looona · 2011-03-16, 11:27

أشكركم يأخوات ربي يعيشكم

looona · 2011-03-16, 11:37

أختي اليوم وين طليت على الأنترنات كنت ماشي قاعدة
كانت أختي اللي في الغربة مريضة
الوصفة اللي طلبتيها مني منعرفهاش
يعطيك الصحة

nadiem · 2011-03-16, 11:43

ماعليهش راهم جاوبوني الاخوات..ربي يشفي اختك

sofiane2075 · 2011-03-16, 15:49

ان شاء الله ربي يشفي اختك و ترحعلكم بالسلامة انا تاني عروستي في الغربة و لحد الان راهي في المستشفى نتمتى تدعو معايا ربي يشفيها عندها فير ربي في بلاد الغربة تفكيرنا غير فيها كي نتقلق نطل على المنتدى

أم ياسين الزهراء · 2011-03-16, 16:17

وانا هذي كيفيتي انت تبعي الخطوات وراح تنجحي ان شاء الله

كيلة تاع سمن المدينة ضربيه مليح بالباتور حتى يولي كالكريمة ومنبعد كيلي بالكيلة نفسها سكر قلاص ونقص حوالي 2 صباعتين منه وفرغي على السمن وزيدي ضربي مليح منبعد ديري الفرينة مع شوي ملح طبعا بالشوي وخلطي بيدك ماتيبسيش العجينة لازم تجي طرية وهذي نصيحة من عندي لمي العجينة انتاعك وحطيها في الثلاجة ترتاح حوالي 3 سوايع واذا حبيتي اخدميها الصباح ولعشية طيبيها اهنا نجي للطياب انا نشكلها باللمبوط ( المحقل ) تجيني اسهل وحطيها طيب وماتكثريش تمسيها وربي يسهلهالك

أم ياسين الزهراء · 2011-03-16, 16:20

انا عجوزتي قالتلي كانو زمان يديريها بالزبدة الحرة يذوبوها في النار وينحولها الكشكاش اللي تطلع ويديروها في قوطي ويحطوها في المبرد ليلة كاملة وغدوة باش يبداو يخدموها واش من الخدمة بيديها مرى دارتها كيكانت على ديدانها الله يبارك رووووووووووووووووعة تقولشي ماشينة اللي خدمتها

أم ياسين الزهراء · 2011-03-16, 16:22

وكاين الغريبية تاع الفرينة المقلية 3 نقط على القاف واللبلابي واووووووووو مرى درتها رووووووووعة دوق عيت اذا حبيتو المرى الماجية نقلهالكم