مشكلتي لا استطيع الزواج

[مشكلتي]

السلام عليكم حبيت نحكي عن تجربتي الخاصة
منذ حوالي 5 سنوات خرجت من الخدمة الوطنية كنت متحمس جدا للزواج واريد امام نصف ديني ما كنتش نعرف كيف تجري الامور ولا كيف تفكر النساء كنت نية ومبسط الامور جدا لكني اصطدمت بواقع غريب لم اجد الزوجة وحدةى تقولي عندي واحد ووحدة تقولي مازلت ووو كانو صغار 22 23 24 سنة وكانو يدلو ويتكبرو عليا وكانهم راح يديرو فيا مزية ..ومشكلة البنات انهم في الوقت لي يقصدوهم الرجال يكونو ما جملوش عقولهم وما همش مركزين ولما يجملو عقولهم يكون فات القطار ..المهم خطبت وحدة كانت لتوها خلصت الجامعة تصورو نهار رحت نشوفها في دارهم لقيتها بالحجاب و تتخنزر ودون اي تجميل على الوجه وشروط و دلال وو.
قالتلي الوالدة اخطيك منها راهي تتكسل عليك لكن انا اصريت عليها يومين باش ردت لي الخبر بالقبول شربتني المرار طوال فترة الخطوبة
دارتني كي الخاتم في صبعها وانا في ذلك الوقت ما علاباليش كنت حاقر روحي هي تغلط وانا نطلب السماح هددتني كم من مرة بفسخ الخطوبة ..
كنت نجيبلها احلى الهدايا .....مرة شليتلها عدة هدايا ومنها علبة كحل للعينين عجبت الوالدة قاتلي خليهالي وجيبلها وحدة اخرى والله ما جبتلها ...فوتتها الوالدة على مضض ولم تقل شيئا
واحد ما عاوني كنت نخدم الليل والنهار باش نلم الدراهم وندير عرس بالشان كيما كامل الناس كانت تشرط هي لي خيرت لون الصبغة للبيت وغرفة النوم وحتى لون الكوات هي لي خيرت ...وجدت كل شيء وخسرت دراهم
وقبل العرس ب 15 يوم كنت مروح عيان جدا عيطتلي بالبورطابل ما سمعتوش انا ...وهي الويل اذا عيطت وماهزيتش عليها
المهم لقيت حوالي 15 اتصال ...عاودتلها ما تهزش يوم زوج ثلاثة ..وانا نحلل كي الكلب غير بالرسائل وهي لا ترد
الى ان كلم ابوها اخي قالو شوف خوك يجيني يطلق الطفلة كنا عاقدين شرعي ...بدون ما يقدم اي سبب
الكل كان ضدي وحملوني المسؤولية ... الاب ولاد العم الاخوال هدرة الناس .....الناس كانت موجدة روحها للعرس
المهم ايام لا انساها معاناة لا اتمناها لاحد صدمة نفسية عنيفة لاني فعلت كل شيء لينجح هذا الزواج لكنه فشل .
بعدها كرهت سيرة الزواج جملة وتفصيلا ..لو خيروني بين النار والزواج نختار النار ... لي يكلمني على الزواج نسبو
كرهت جنس الاناث ....عقدتني كل ما نفكر في الزواج نتفكر تلك الايام نولي نحبس ..لمدة خمس سنوات وانا الان بسن الواحد والثلاثين مازلت متخوف ومتردد من الزواج احس باني نسيت تلك الحادثة لكنها في لاوعيي مازالت تؤثر
كل ما يعرضو عليا الزواج اتعقد ...فكرت في عمل جلسة تنويم مغناطيسي لمحو تلك الفترة من ذاكرتي
ارجو من المجربين و من يستطع المساعدة ان يتفضل وينصحني

[exellance]

علاه تقلق في روحك راهي واضحة مثل الشمس هديك الطفلة متستاهلكش ويمكن بعد الزواج كان راح يصرا مشاكل كبيرة بينك وبينها او بين امك لهذا ربي بعدها عليك لازم تشكر ربي سبحانو ومتقنطش من رحمتو

[- بصمة خير -]

اصباع يدك مش كامل كيفكيف
كما كاين اللي كما خطيبتك السابقة
كما كاين اللي خير منها
***************
دير ربي في بالك
و اي خطوة تفكر ديرها
صلي الاستخارة
ربي ييسر امورك

[Zahra 30]

يا أخي ربي يفرج عليك و يرزقك بالزوجة الصالحة
خطيبتك كانت سوء إختيار و مشي كامل البنات كيفها
صلي الإستخارة و توكل على الله
وهذه التجربة احمد ربي لي بعد عليك هذيك الغولة
واحد من العائلة خطيبته دارتله هكا كيما راك تحكي بصح ما تعقدش بالعكس مين بطلت كان باقي شهر على العرس والله تزوج في نفس الوقت المحدد مع الخطيبة الأولى
هكا انت راك تحسسها بالنصر
يا أخي حوس و ميز و ميز و حرز وين طيح باه ماتوليش فالمشاكل مبعد
ربي يقدملك لي فيه الخير والله ربي يعطيك وحدة نية كيفك

[لحن الحياة.]

تهنيت منها خردة ما تستاهلكش
ومازال قدامك الوقت و تخير وشوف وحدة تكون قريبة ليك في السن لانها تكون اكثر وعي و رزانة زكارة في هذي لي دارتلك هاك اصلا ما تستاهلش تخسر عليها شوية دقايق من وقتك و تخمم فيها

ربي يفرج عليك مع الوقت راك تنساها ان شاء الله

[ام لجين و فيصل]

ربي يفتح عليك من جهة اخرى و البنات ماشي كيف كيف كاين الصالحة و كاين الطالحةة و ادا حبيت نوريلك واحدة طبيبة ما تندمش عليها طول حياتك برك هي اكبر منك ب 5 سنين

[اسعى لرضى الله]

بنات خرين عطاهم ربي النعمة ومفهموهاش ربي يهديها المخلوقة هدي

اما انت يا اخي نقولك جامي تحقر روحك راك راجل لاباس بيك وباين عليك ولد فاميليا الله يبارك متخليهاش تعقدلك حياتك وتكون سبة باش متزوجش وتكمل نصف دينك فوتها اي باينة كون شافلك ربي فيها خير راك زوجتها باين مشافلكش ربي فيها خير احمد ربي اللي بعدها عليك وحاول تمحيها اصلا اي متستاهلكش شوف حياتك وزيد حوس على وحدة تكون تستاهلك جامي تفقد الامل في ربي قبل كل الشيء هدا صلي قوم الليل اطلب ربي يرزقك بوحدة تكون بنت فاميليا ومدينة وان شاء الله ربي يرزقك بوحدة اللي تستاهلك عاجلا غير اجل واني قلتلك متخليهاش سبة باش تفسد حياتك اي متستاهلش والله

[BELGHOZAL2]

عسى ان تكرهو شيء وهو خير لكم و عسى ان تحبو شيء وهو شر لكم
الطيبات للطيبين
نوصيك خويا كان عندي نفس المشكل والحمد لله
رصي ميمتك تنجح اطلب منها السماح قدر ما تستطيع في كل وقت و اكد باش ترصى عليك و ربي يجيب لي فيه الخير
امك
امك
امك
امك تدعيلك بالخير كل شيء يجي وحدو ان شاء الله وكن واثق في ربي تجيك وحده مكنتش تستناها
و الراجل مفيهش العيب ابدا و زين الراجل في عقلو
وفقك الله

[aymen01]

بلاك حاسب كلش يجيك ساهلة

روح عاود ازوج قبل ما يفتوك الوقت و هي خليها درك تندم

[كمال22]

احمد ربي كي تهنيت منها
علاه معقدها على روحك...اتوكل على ربي

[براءة سامية]

هم يبكي و هم يضحك انا راني كيفك غير انا اللي نحلل و نطلب السماح تقول راك تحكي عليااا..)) و هو يظل يهدد سبحان الله ديما اللي قلبو طيب و بنيتو يصرالو هكذا ...فعلا كيما كاين بناوت هكظا كاين رجال هكظا..ما تخممش ربي يعوضك باللي خير منها و عسى ان تكرهو شيئا و هو خير لكم..و انا تاني راني صابرة و ربي يجيب اللي فيه الخير..ما تقلقش روحك و مش كامل نساء كيفكيف كيما مش رجال كامل كيفكيف

[جزائرية بافتخار]

ربي يجيبلك مافيه الخير خويا
ربي يعوضك ما خير منها
"وعـــــــــــــــــــــسى ان تحبوا شيئا وهو شر لكم"
واش عندك ماتقول بعد هاذي الاية؟
تهنتي منها
اخطيك منها وعيش حياتك راك مازلت صغير مئة الف وحدة تتمناك

[سفير الأيام]

شوف خويا اللي جوزته انت بزاف فاتوا عليه سقسيني نخبرك كنت اكثر من نية بصح خويا والله وحدة مور وحدة تندم اللي خسرت راجل يمشي حقاني في زمان قلت فيه الرجولية والفحولية للنسا


حوس دير سكنة خويا وخطيك من الزواج ويجي النهار وين ربي يرزقك بوحدة جاه وجمال وطيبة القلب


انا جوزت مرحلة قلت بلاك انا اللي غلطت معاهم بصح الطيبين للطيبات

ربي وراني وعطاني وحد الخيط لحد الان مازلت ما نامن روحي باللي يرزقني بوحدة متفهمة وجمال وخدمة وكل حاجة يتمناها اي واحد

في بادئ الامر شرحت لها وضعيتي والمشاكل اللي صادفتني وحقيقة حياتي والله لقيتها جد متواضعة وبنت عائلة ماشاء الله


الا انني في حيرة لانني اتخدت قرار الحصول على سكن قبل لازواج لكن ان تحتم الامر لن اخسرها مادام ربي رزقني بها بعغد معانات

[جزائرية بافتخار]

المشاركة الأصلية كتبت بواسطة سفير الأيام

شوف خويا اللي جوزته انت بزاف فاتوا عليه سقسيني نخبرك كنت اكثر من نية بصح خويا والله وحدة مور وحدة تندم اللي خسرت راجل يمشي حقاني في زمان قلت فيه الرجولية والفحولية للنسا

حوس دير سكنة خويا وخطيك من الزواج ويجي النهار وين ربي يرزقك بوحدة جاه وجمال وطيبة القلب


انا جوزت مرحلة قلت بلاك انا اللي غلطت معاهم بصح الطيبين للطيبات

ربي وراني وعطاني وحد الخيط لحد الان مازلت ما نامن روحي باللي يرزقني بوحدة متفهمة وجمال وخدمة وكل حاجة يتمناها اي واحد

في بادئ الامر شرحت لها وضعيتي والمشاكل اللي صادفتني وحقيقة حياتي والله لقيتها جد متواضعة وبنت عائلة ماشاء الله


الا انني في حيرة لانني اتخدت قرار الحصول على سكن قبل لازواج لكن ان تحتم الامر لن اخسرها مادام ربي رزقني بها بعغد معانات

ربي يكملّك خويا ويبعد عليكم العين وولاد الحرام ان شاء الله ربي يسهللكم

[المهاجرة لربها]

يا اخي هداك الله لا تفكر ابدا ان كل النساء مثل بعض كما ان كل الرجال ليسوا كبعض هناك اختلاف بين هذا و ذاك و بين هذه و تلك
فاحيانا تجد توامين او اختين لا يملكان نفس التفكير كل واحد له شخصية وتفكير تميز ذاته لا تجعل هذه البنت تؤثر في حياتك و لا امثالها
افتح عينيك و ستجد حتما من ستبحث عنها لا تبحث في الاماكن العامة استرشد بمن هي ذات دين و تربية و اخلاق فانتم الرجال احيانا تميلون اكثر لمن
تلبس و تتزين في الشوارع و تكون مع الموضة تهتمون بها ومن كانت متحجبة و متخلقة تسمونها متخلفة و رجعية لكن العكس اطلاقا

الرجعية و المتحجبة هي من تكون ذات مسؤولية و طريقها واحد لا تعرف اثنين هي من تعينك على هموم الدنيا و تكمل معك طريقك......
انصحك اخي ان تبر والديك و ان تسعدك والدتك فهي حياتك وجنتك و اترك والدتك تختر لك زوجة فقلب الام و احساسها لا يخطأ

هي حتما لن تبخل عنك و تتمنى لك السعادة اكثر من اي شخص كان او يكن اتبع هذه النصائح و ابحث جيدا عن امراة ذات اخلاق اولا من ان تبحث
عن الجمال فالجمال جمال الخلق لا جمال الوجه

رزقك اخي بالزوجة الصالحة الطيبة و افرح قلب امك بك و اسعدك و وفقك ان شاء الله