موضوع مميز برامج ناشيونال جيوغرافيك في حياتنا اليومية == تفضلوا بالدخول ==

* عبد الجليل * · 2014-08-17, 17:49

بسم الله الرحمن الرحيم

بداية الكلام بالتحية و أحسن تحية تحية الإسلام و تحية الإسلام السلام
فالسلام عليكم ورحمة الله تعالى وبركاته
الحمد لله و الصلاة و السلام على خير خلق الله محمد صلى الله عليه وسلم

تحية عطرة لكل أعضاء ومحبي ومتابعي الجلفة لكل الجزائريين والعرب خاصة ركن النكت والطرائف

اليوم راح نشوفو برامج ناشيونال جيوغرافيك في الحياة ايام الدراسة في الجامعة

العبارات بين علامتي الاقتباس و بالأزرق هي عناوين اشرطة وثائقية تعرض على قناة نات جيو ابوظبي

- مدير المعهد اللي كان امبراطور بمعنى الكلمة نعطوه "انا وحش"

- اساتذة الورشة وما ادراك ما الورشة "خلق ليفترس"

(خاص بطلبة تسيير التقنيات الحضرية اللي اصحاب الهندسة المعمارية منهم )

- اللي قاعد في لاسيتي "مسجون في الغربة"
- الريسطو ولاشان ...الخ الخ "الصراع من اجل البقاء"
- زيد ما نعرف علاه اللي ساكنين فوقك لازم يكونو من "العلماء المجانين"
و يفوتوا الليل كامل اخبط اخبط حابين يحلوا نظرية الدومينو؟؟؟
- تكون قاعد في td لاباس عليك و بالك هاني وفجاة يقولك البروف انتيرو "ما قبل الكارثة".
- بضعة ايام قبل الكونترولات احنا نولو "المجهزون لليوم الاسود" واذا اردنا التعمق اكثر فالريفيزيون هي "عمليات نقل عملاقة" واذا كان هذا الكونترول الدوزيام لازمك لي سوجي لقدم او "ابكاليبس الحرب العالمية الثانية" و احيانا ممكن حتى "احاجي التاريخ" واكيد كاين زوج اصحابك يحضروا لي كور و يبداو يفهمو فيكم و اللي هم "ميكانيكيو الكوكب" ، وباه تنتقل موديل لموديل لازمك "دليل المسافر بين الكواكب".
اما الكونترول في حد ذاتو "مواجهات حتمية" وكي تشد السوجي و ياعيني...تقول جايبينو من "الثمانينيات "وما تعرف الا راك تشوف في الورقة نورمال ولا مقلوبة لتم تفقد الامل ،هاديك هي "تفجيرات هندسية" و ايضا "ملفات محيرة" ولازم عليك تدير "تفكيك هياكل عملاقة" اللي نقلتم من قبيل باه تجاوب ويتبادر الى ذهننا سؤال "كم يصعب فعل ذلك؟"،طبعا البروف يكون في غاية السعادة ، في تلك اللحظات تتمنى انك تكون "اسرع افعوانيات العالم" و تنطلق بــ"اقصى سرعة" للخروج من "مسرح جريمة مفترس".
وفي نص الكونترول، اللي وراك و الزوج اللي بجنبك "محاصر" راح يحاولو يكوبيو عليك واسمهم " لصوص الغابة " بعدها بقدرة السميع العليم البروف اللي يعس تم والذي يكون احد "عملاء فيلاديلفيا المتخفون "يحكم واحد عندو ورقة يكوبي منها... هاداك المخلوق راه في احد الــ "مواقف حرجة".
وبالعودة قليلا بالزمن كي رحت تدير فوطو كوبي على لي كور عا 12 نتاع الليل في "وجهات متطرفة" كاين زوج مادرتش عليهم وهادوك هم اللي جا منهم الكونترول ...راح تقول تبا "لم اكن اعلم".
الان نحن في انتظار لافيشاج وراح تكون "ايام عصيبة على كوكب الارض" ومنبعد يجي صاحبك يقولك راني سمعت بلي افيشاو لي نوت هيا نديرو دورة على الديبارتومون "نظرة عن كثب" وانت في الطريق تقول ندي 9 ...اوووو لالا مانفرحش ياسر نحطوها 7، 5 حاجة هكا كي توصل وتشوف هههههه "لا شيء مما سبق" 2.25 وراح تكون "في قلب الاعصار" طبعا هذا "من واقع الحياة" وفي تلك اللحظة يخطر شيء واحد ببالك " لا تخبروا والدتي" ومازلت تحت تاثير الصدمة وتقول هذا "حقيقة ام زيف"، لكن المفاجاة انو هادوك زوج ميكانيكيو الكوكب واحد جاب 3 ولاخر 3.5 وبلا مانحكي على حالتهم "صور تروى" ومن المتوقع انهم يطالبوا بكونتر كوريكسيو "تحقيق الكوارث الجوية" كحركة لمعرفة الاسباب الفعلية لهذه النتيجة باختصار "اسرار للكشف"، وفي نفس الوقت تلقى اللي جابو 15 اوما يطلق عليهم "الخارقون" واللي حلو السوجي بــ "هندسة عبقرية".
الان عودة لحبيبنا نتاع الفوق خلق ليفترس و بالضبط ليلة لافيشاج نتاع لبروجي فينال حيث يمكن الملاحظة انو اغلبية ليشومبر رجعوا "مصانع عملاقة" ولي بلونش نتاع الطلبة فيهم "هياكل عملاقة" واحد مارقد مند 3 ليالي التعب، النعاس، القلقة ، لعياط ... وانت طالع هابط من شومبر لشومبر كيما "الدب المرتحل" على جال قلم تلوين اخضر....المهم تفوت" ليلة عنف حقيقي".
على الساعة السادسة صباحة كملت الخدمة وراك تتفرج في لي بلونش نتاوعك وتخمم واش راح تهدر في لافيشاج... وفجاة تلقى غلطة كبيرة و الوقت غير كافي لتصحيحها، يعني لازمك "هروب ماكر" و لتحقيق هاذ الامر لازم عليك تختار "السلاح الامثل" من بين "اسلحة العائلة" والعائلة تمثل صحابك في هاد الحالة.
راك في الطريق رايح لـ لاصال اللي راح تافيشي فيها و في نفس الوقت و في الديبارتومون تجمعوا لي بروف نتاع لاتولي "مفترسوا الكوكب" وعند وصولك الى "ارض الكارثة" يحكمك واحد الشعور لايمكن وصفه بالتحديد... كانك وحدك في "براري روسيا" تبدا تافيشي وحدة وحدة ويبدا لبروف يلعبلك "العاب العقل" ، مي اذا كنت انت "لاعب الورق المخادع" وقدرت تخلي غلطاتك "اسرار مطوية " وزدت درت عملية "تثمين ما لا يقدر بثمن " لخدمتك يفوت لافيشاج على خير وتخرج سلمات "من اجل يوم الارض"
مع انو لا فيشاج فات على خير خلاص مي الحقيقة راك رسميا مسنتز على خاطر عميتها فلي كونترول، و السانتاز للي ما يعرفوش هو احد "اصعب تصليحات العالم" وراح تكون كانك راح تبني "مدن عملاقة" حالتك سيئة جدا موراليا و ماديا مي كي تلقى معاك 80 واحد داخلين تقول اذا عمت خفت "بنوا ادم اخوة "، بلا ما تفيق تلقى واحد تعرفوا يتخرج هاد العام يسقسي فيك واشبيك مقلق....وكي تحكيلو يقولك نورمال منبعد يطلع العام ويبدا يحكي احنا بكري...."شين المغامر"....ومايزيدش يحبس........
وتبدا تريفيزي و لقراية مش حابة تدخل في راسك كيما "سمكة التونة العنيدة"......المهم فوتت السانتاز وكي رحتو شفتو لي نوط نتاوعكم انت و اصحابك لقيتوا رواحكم ما طلعتوش حالتكم ولات كيما " شعوب يتوقف عندها الزمن " ....دركا ولينا في الراطراباج ...مصيبة على خاطر "رمز عملية الانقاذ احمر" راك في " عالم جامح " لازمك تطلع عامك والا....آديو"اغتيال كينيدي" او " فقد في الصين" ، وكانك "تتشبث بالحياة في الاسكا" ، رحت توجد في روحك وريفيزيت فور و بدات " رحلة في الوقت و الفضاء".
اخيرا اليوم المنتظر الديليبيراسيو ، رحت تشوف وانت كلك قلق و ترقب ....وصلت ولقيت روحك نجحت راح تكون هاديك "لحظات مذهلة" وينطلقوا " مهرجانات هونغ كونغ" و الفرحة تعم الاجواء..... ثم تبدأ "هجرات عظمى " وكل واحد كابتو ولايتو وتبقى لاسيتي كاحدى الــ"معالم مهجورة"
ويتكرر السيناريو كل عام حتى تتخرج و تبقى هذه الاحداث في الذاكرة و تصبح "تاريخ لا ينسى " يضاف الى "قصة الارض".

اللي كمل لقراية نقولو ان شاء الله تلقى "افضل وظيفة في العالم " و اللي مازال ربي يوفقو واكيد راح تستفادوا من الموضوع لانو مثل "مغامرات كريتر كام " بالنسبة ليكم، اما اللي ماكملوش بالاك هكا خير وممكن لوكان قريتو تروحوا في " رحلة لقاع الارض " وربي يسهللكم في حياتهم..

النهاية
عذرا على الاطالة اتمنى ان يكون الموضوع اعجبكم ولا تندهشوا لان هذا "علم مجرد" وجميع عناوين الاشرطة موجودة في موقع القناة، اما الان ساذهب "عبر الحدود" لقسم اخر من اقسام منتدانا الغالي.
درك كل واحد يعطينا "مقتطفات" على حياتو بطريقة "NatGeo مذهلة"
في رعاية الله

nihed la reine · 2014-08-17, 17:58

ههههههههههههههههههههههههههههههههههههههههههههههه
مشكــــــــــــور فوور خلااه

* عبد الجليل * · 2014-08-17, 18:02

اقتباس:

المشاركة الأصلية كتبت بواسطة nihed la reine

ههههههههههههههههههههههههههههههههههههههههههههههه
مشكــــــــــــور فوور خلااه

اضحك الله سنك ههههه
العفو ... وشكرا لمرورك الطيب
لا تنسوا توافوننا بقصصكم الغريبة على طريقة Nat Geo

سهام الخير · 2014-08-17, 18:12

اضحك الله سنك
ما كنت اعلم انني خلقت لأفترس

* عبد الجليل * · 2014-08-17, 18:52

اقتباس:

المشاركة الأصلية كتبت بواسطة سهام الخير

اضحك الله سنك
ما كنت اعلم انني خلقت لأفترس

اضحك الله سنك
ههههه اختي الكريمة سهام الخير آآآآه معنتها انت جزء من القصة
نغير الروتين قليلا لنصبح جزءا من ابطال القناة
ناشيونال جيوغرافيك الجلفة برعاية المرح والغرابة

~~serine souou~~ · 2014-08-17, 19:10

ههههههههههههههههههههههههههه

♥ بسمة ♥ · 2014-08-17, 21:03

- اللي قاعد في لاسيتي "مسجون في الغربة"
- الريسطو ولاشان ...الخ الخ "الصراع من اجل البقاء"
ههههههههههههههههههه
يطيييييييييييك الصحة

yuuke-chan · 2014-08-17, 21:26

و الله جبتها هيا بعد سبحان الله اني رايحة ننعتها لاختي باش تضحك حتى هيا نفكرها ب"سنوات الضياع" و نعيشها "لحظة وداع" للماضي و تتذكر ما جرى لها "على مر الزمان" عندما كانت كهيام في" حريم السلطان" و رغم "سنوات الصفصاف" التي عاشتها في الاقامة التي كانت "وادي الذئاب" الا انها الان في الدار عايشة قصة "العشق الممنوع " مع الخدمة
هههههههههههههه
انا راني في mbc دورت من ناشيونال جيوغرافيك

Jack-Sparow · 2014-08-17, 21:58

وعليكم السلام و رحمة الله

و الله غير فكرتنا في أيام الجامعة ... هههههه ..
رغم المعانات التي مررنا بها إلا أنها كانت أيام و ذكريات جميلة ...
"تاريخ لا ينسى "
بارك الله فيك أخي على الموضوع .. و الله غير ضحكت....