•[ نصائح من طالب جامعي بخصوص الأيام المصيرية ]•

[اكرام براءة]

السلام عليكم و رحمة الله
كيفاه راكم مع التحضير و المراجعة جماعة ؟
ياك صافا لاباس
إن شاء الله تكون تمام التمام و ماشية
بلا مانطول عليكم
هذو نصائح حول كيفية اختيار الموضوع نهار الباك و كيفاش تخلي نفسيتك مرتاحة
كتبهم واحد فوت الباك سابقا بناءً على تجربته

.
.
.
.

1* كي تدخل لقاعة الامتحان متكثرش الهدرة بزاف مع الطلبة حاول تحكم بلاصتك وترزن روحك وتقرا الادعية وتصلي على رسول الله
2* كي يوزع عليكم السوجي بالعقل برك متخلعش روحك والله غير عادي كيما بكري كي تحكم الموضوع الاول كيما الرياضيات مثلا اقرا كامل الاسئلة والسؤال لي تعرف الحل نتاعو ديرلو اشارة ✓ ولي متعرفوش ديرلو x بعد ماتكمل الموضوعين احسب الاشارة ✓ لي لقيتو اكثر هو لي تخيرو
3* اسمعوني خاوتي حذاري كي تخير الموضوع تخيرو على حساب لي يمتحنو معاك انت عندك شخصية كن انت الاصل لا تكن التقليد
4* كي تبدا تجاوب متخدمش بالمسودة حذاري راك ضيع غير الوقت خاصة الاجابات لي تعرفهم راك لاباس عليك نورمال تقدر تجاوب ماتبقاش تشوف لناس اذا بداو بالاجابة تبدا معاهم استخدم المسودة غير في صوالح خفاف كيما توحيد المقامات ولا تأكد من حاجة
5* كي تبدا تجاوب مثلا تبدا بالمتتاليات كي تلحق لسؤال لي متعرفوش متضيعش وقت بالتفكير فيه دوموندي ورقة اجابة اخرى وابدا بالأعداد المركبة كيف كيف كي تجاوب على اللي تعرفو كامل دوموندي ورقة اجابة وابدا فيها الاحتمالات كي تلحق عند سؤال لي متعرفوش حبس وروح دموندي ورقة اجابة وابدا بالدالة متكسرش راسك مع الاسئلة لي متعرفهاش
6* بعد ماتجاوب على كامل على الاسئلة لي تعرفهم ارجع الى الاسئلة لي متعرفهمش بربي تجاوب عليهم على خاطر عقلك في هذه الحالة يكون مرتاح موش كيما الخطرة الاولى
7* النقطة المهمة في نص الوقت يجيك ابليس ويقلك انت انسان غبي تخير في الموضوع الصعيب ويقلك المتتالية نتاع الموضوع الثاني عليها 5 نقاط وساهلة وانت في هذيك الحالة تصدقو وتقول والله غير كاينة وتبدا بالموضوع الثاني بعد ماتكمل المتتالية يعاود يرجعلك ويقلك انت صح حابس الاعداد المركبة نتاع الموضوع الاول ساهلة يخلطلك الحسابات كامل وتحس روحك منهار نفسيا ويروح الوقت وتحس بخيبة امل كبييييييرة وتولي تسرع في الاجابات ويتخلطو عليك اوراق الاجابة
8* خاوتي حذاري تسمع لابليس راهو يجيك في وسط الوقت ويقولهالك هذه الكلمة مالا قولو راهم وصاوني غير مكلاه تشقي روحك وتعوذ من الشيطان ورد بالك تغير الموضوع رد بالك تغير الموضوع حذاري اذا غيرت الموضوع راح كل شيء مووووت مع الموضوع لي خيرتو من البداية على خاطر الاختيار نتاعك كان سليم وصحيح ابليس برك يلعبلك على المورال
9* بعد ماتكمل اجابتك بعقلك متخرجش بكري اقرا مليح السوجي سؤال بسؤال والاجابة سؤال بسؤال ولعل تكون نسيت سؤال جاي في اخر السطر
10* كي تقتنع بلي كملت الاجابة اخرج في اخر الوقت لان القاعة كي تولي ناقصة من التلاميذ كل مايكون التركيز مليح ويقل عليك الفوضى وتجاوب مليح. المهم انت لي تمد ورقة الاجابة للحارس موش هو لي يجبدهالك حبيت نقلك متخليهش هو لي يقلك هيا ازرب انت لي تمدهالو اوك والفاهم يفهم
11* كي تخرج من القاعة هناك طريق واحد اسمو الدار مكانش طرق اخرى ولي يقلك واش خدمت قولو الحمد لله واذا قالك واش خيرت قولو الحمد لله ويقلك وجاك ساهل قولو الحمد لله اجابتك هي الحمد لله ولئن شكرتكم لأزيدنكم
12* حذاري والمناقشة حذاااااااااااري اذا ناقشت الحل يطيحلك المورال وتولي غدوة في اختبار العلوم كي تتفكر الرياضيات يطيحلك المورال وتبقى ساهي وعقلك متشرد اوك رد بالك تناقش حتى كون تحس روحك تدي 20 اياك اياك اياااااك
13* خاوتي هذه الفترة نتاع الاقتراحارات ستنطلق حملة الاشاعات ويقولولكم تسرب السوجي نتاع الفيزياء ولا الشريعة اياك ان تصدق فاذا صدقت فأنت فعلا احمق مع احتراماتي هاذو ناس حابين يشوشولكم الافكار رد بالك تصدق الشائعات كذب في كذب وهذو ناس حابة تخدم الفوطو كوبي نتاعها باه كي تروحلهم يديرولك الفوطوكوبي المهم منوصيكومش اكيد راكم فهمتوني وتسمعو كلامي
14* اخر وصية كل يوم كي تجي تصلي وتدعي بالنجاح ادعي لروحك وقاع المومنين وانا دعيلي دعوة سبيسيال ربي يخليكم خاوتي وربي ينجحكم وحاولو ديرو لي عليكم على خاطر كاين ناس تعبت على جالكم باه تفرح بالنجاح نتاعكم

وماتنساش بلي راك ناجح باذن الله في شهادة البكالوريا وتفرحنا معاك
تحياتي لكم


ريي يوفقكم ♥

[ياسين]

بارك الله فيك اختي نصائح في القمة و ااكد على جميع النقاط كوني انا ايضا طالب جامعي و اجتزت الباك لعامين

بالتوفيق للجميع و انكم ناجحين باذن الله

[نـــورسين]

نصائح قيمة بالفعل ، اضافة لنصائحه اضيف من تجربتي الخاصة
الجماعة الي تجيك وانت تنتظر في القاعة وتبدا تسقسي تاريخ مؤتمر الصومام ، تعريف المؤكسد ، قانون المجموع وووو اذا جاوبتهم وناقشتهم خلاااص معلوماتك تتخلط وتتوتر وطبعا انت الخاسر
نجو لجماعة الي تبكي وتعيط وتدوخ ماتهتمش بيهم نفسي نفسي فقط عيش فعالم وحدك ورقتك فقط
بالمختصر كن اصم وابكم
واهتم باورقاك ونفسك ماتبقاش تعس في الجماعة الي تنقل والاساتذة الي يعانو فيهم
وطبعا ماتكونش جايح ينحولك ورقتك قبل الوقت ولا يزربوك باش تخرج

[المتـــواضــعة]

ربي يحفظك اكرام

[بـــيِسَة]

بارك الله فيك
قيمة جدا ربي ينجحك

[اكرام براءة]

المشاركة الأصلية كتبت بواسطة ياسين

بارك الله فيك اختي نصائح في القمة و ااكد على جميع النقاط كوني انا ايضا طالب جامعي و اجتزت الباك لعامين

بالتوفيق للجميع و انكم ناجحين باذن الله

الله يبارك فيك ...

إن شاء الله
وفقنا الله و إياكم لكل خير

[اكرام براءة]

المشاركة الأصلية كتبت بواسطة نـــورسين

نصائح قيمة بالفعل ، اضافة لنصائحه اضيف من تجربتي الخاصة
الجماعة الي تجيك وانت تنتظر في القاعة وتبدا تسقسي تاريخ مؤتمر الصومام ، تعريف المؤكسد ، قانون المجموع وووو اذا جاوبتهم وناقشتهم خلاااص معلوماتك تتخلط وتتوتر وطبعا انت الخاسر
نجو لجماعة الي تبكي وتعيط وتدوخ ماتهتمش بيهم نفسي نفسي فقط عيش فعالم وحدك ورقتك فقط
بالمختصر كن اصم وابكم
واهتم باورقاك ونفسك ماتبقاش تعس في الجماعة الي تنقل والاساتذة الي يعانو فيهم
وطبعا ماتكونش جايح ينحولك ورقتك قبل الوقت ولا يزربوك باش تخرج

ايه صح
التشويش على الأفكار في الدقائق الأخيرة
بارك الله فيك نورسين

ربي يوفقنا

[اكرام براءة]

المشاركة الأصلية كتبت بواسطة المتـــواضــعة

ربي يحفظك اكرام

المشاركة الأصلية كتبت بواسطة الأنيقة بيسة

بارك الله فيك
قيمة جدا ربي ينجحك

وفقنا الله و إياكم