هذه من أروع قصائد قصة وقصيد لفيصل كرشوش أرجو أن تعجبكم
بسم الله عالـــم الشهـــــادة سبحــانو عـــالم الغيبي
والصلاة والسلام على المقتدى محمــد النبـــي العـربي ً
لمّا أنا حسّيـــــت بــالوحــــدة ولما بغيــت نشكي عذابي
مــا قصدت هــذا ولا هـــذا قصدتك غيـــر أنت يا ربي
راني حــــــاير منيــــــن نبــدا وأنت العــالم ما في قلبي
سبحانك أنـــت علــمك عدّى الشي الي راه فقلبي مخبّي
رانـي جــايك وحــدة وحـــدة ما نروح شرقي ولا غربي
نــروح للقبــلة نسجـد سجـدة لتمّا الي نبكي ونفـرّغ قلبي
خايــــف بـــرك إيـــلا نتمادى وأنا نشكيـــلك عــــذابي
عسى نقـــــول كــــلمة زيـــادة ما تليقش بمقامك يـا ربي
عارف قلبــــي ليــــــك نـــادى غير لمّـا تغلقوا بــــوابي
قصدتك غير في وقت الشـــــدة لمّا الضّـــر لحق لجنابي
وغيــــر تفــــــرّج علّيا مبـــعدا غير لمّا نــــــدّي جوابي
نعــــاود نــــوّلي كيـــــما العادة عاصي نلايم غير فذنوبي
ربي رانــــــي حــــــاب نتنهدى أهديـــني واستـر عيبي
والدعـــــــاء يـــــاك عبــــادة سلّكت بيها شحال من نبي
براهيم عليه السلام نــــــادى لمّا قالوا للنــــار ألهبي
أنت قلتلـــــها كــــوني بــــردا وسلاما سبحـــانك ربي
ويوسف الي فالحبس عـــــدّى سنين وسنين وهو مخبّي
ولما دعاك دعـــــوة وحــــــدة ردّيتو حاكم لخزاين ونبي
وزكريا تنحــــرم مـــالولادة دعاك ربي بعد الـــشيـبي
قــــالك لا تــــذرني فــــــردا بشرتو بيحيى حكيم وصبي
والحوتة الي كــــــــانت رافدة يونس في كرشها مخبّي
وسط البحـــر وطـــــالت المدة وخرج سالم كي دعاك ربي
وأيوب صبر شحــال وتحدى وشاف زوجتو شعرها مخبي
عرف بلّـــي باعتـــو ولتم بدا يقولك مسني الضر يا ربي
ولالة مريــــم نعــــــــم الوالدة وسط الصحرة دعاتك ربي
فرجت عليــــها وهــــي قاعدة وقلتلها كـــــولي واشربي
ولما دخلت لأهلـــــها رافــــدة عيسى وهو رضيع وصبي
تهموها فولدها ولتــــــــم بدا يتكلم معاهم بقـــــدرة ربي
والصلاة والسلام على المقتدى سيدنا محمد النبي العربي
دعوتو خــــــلاّها أوممبـــــــعدا شفـاعة لينا عندك يا ربي
ربي عنــــدي دعــــوة وحــــدة إلاهي لا تخيّــــــب طلبي
هذا شحـــــال وهـــــــاذي مدة وأنا نحبـــها وكـاتم حبي
هي لعمــــر وهـــــي الكبــــــدة وهي الســــر الي مخبي
ماهي سمرا مـــاهي بيضـــــا بين الأمازيغي والعـربي
ونهار الي تكون معـــــــروضة للعراس الدعوة تلــــــبّي
تشوف لبنات بـــــــآخر موضة بالحطات ولباسهم غربي
ونتاجـــاتها يدّلكـــوا الجلدة زادوا صبغو شعرهم ذهبي
أو يتساءلوا شكـون دالوحدة الي دخلت بلباسها الشعبي
دايرا حايك وعجار بيــــــــوضا ولاّ حجاب تحتــوا مخبي
واش من ذهــب وش من فضة سبحانك ما صورت يا ربي
مستورة وسنــــانها بيــــــوضا ديما تضحك وحامدة ربي
وياك خطبتها شحال من وحدة لولدها الشرقي ولا الغربي
ولو كمــــلّت هـــــي العــــــــدّة تاع زوجها يرحمــــو ربي
حبّت تقعــــــد ديـــــما هكـــــذا وما تتزوجش بــــالأجنبي
فالشهيــــــد قعـــــــدت شايدة ما دامو حي فرحمت ربي
عرفتوا درك شكون ذالــــوحدة شكون هي حبيــــبت قلبي
هي لعمــــــر وهـــــــــي الكبدة هي عشــــقي وهي حبي
هي السمـــــرة وهـــــي البيضا أرض الأمازيغي والعربي
أرض الوئــــام أرض الفــــدا أرض الجهاد شعبها حربي
مليون أو نص مليون شهــــادا سي لحواس والسي لعربي
ديدوش مراد ولالــــة وريدة وحسيبة وبن صافي الصبي
وعميــــــروش آيــــــت حمودة وعلي لا بوانت يرحمو ربي
طالب أو عبّان ولوكــان نبدى نموت أو ما نكملش حسابي
سبع سنين كـــــانت مــــــــدة وستقلّيــــنا كي بــغى ربي
خرجت فرانسا وهــي رافدة يدها فوق راسها كيف الغبي
وليـــــنا أحـــــرار أو مــن بعدا دخل ريح شــــرقي وغربي
هذا خطـــــف وهـــــــــذا ادى هاذوك حســــابهم مع ربي
وزاد لحــــق وقــــــــــت الشدة أنت قبايلي وأنت عربي
أنت مسلــــــم وأنــــــــــــت كذا ولوخر مجرم أو إرهابي
نشفى عليهم وحــــدة وحـــــدة ناس القصبة أو صالومبي
بن طلحة وساحـــــة الشهـــادا سماعيل يفصح أو مجوبي
عبد الحـــــق بــــــن حمــــودة أو بوضياف يرحمو ربي
جاوود ومصــطـــــفى عبــــادة وكلّة وبختة وشيخ وصبي
وبـــاب الــــوادى الشـــهــادا كامل كامل أرحمهم يا ربي
الفضــــة دايــــما تبــقى فضة والّي ذهبــــي يبقــى ذهبي
ومهما يزيدوا يعفســوا الوردة تزيد ريحتـــها بقدرة ربي
عشر سنيـن راحـــت ســــــودا ولمّا حــــب وقــــــدّر ربي
عبد العـــــزيز في وقت الشدة لقيتو راجل واقف جنبي
جاب السمـــــاح وبيـــــــه بدى والسماح ياك يحبو ربي
عـــــاودنا وليـــــــنا أمة وحدة وتصالح شعبي مع شعبي
ربي عنـــــدي دعــــــوة وحدة إلاهي لا تخيّــــــب طلبي
حب الأوطـــــان يـــــــاك عبادة من الإيمان عليــــها ربي
رانـــي حــــاب منّـــا وهكــذا الشي الي راهو لينا مخبي
نشاء الله يكون خير ملّي مضى وتحيا بلادي ويحيا شعبي
تحيا بلادي 
( تقرير عن مشاركة سيئة )، و الموجودة أسفل كل مشاركة .
2010-03-03, 07:14
الجزائر
العرض العادي
