ام زوجي و ابني

[مشكلتي]

السلام عليكم
مشكلتي تكمن في عجوزتي حيث تطلب منا ان نعطيها ابننا
و الله نحس قلبي يوجعني كي نسمعها تحكي هكذا و تقول لوكان ماجاش يرضع فيك كون يا حسراه ملي اديتو و الله قلبي يتعصر كي نتفكر الايام الاولى بعد ولادته كي كانت تاكد عليا بش نولفلو بيبرون بغات تحرمني منه الحمد لله ابني ما بغاش يحكمو خلاص لحد الان
و انا قريب نرجع للعمل ( ما تفتوليش في العمل لازم نعمل و زوجي قابل ) و راني نحط في العطل بش غير ما تحكموش و الله حكمني دركا وسواس تديلي ابني وليت فليل ما نرقدش من كثرة التخمام انا متعلقة بابني بزاف بعد ما فقدت اخوه الكبير مستحيل نخليها تديه لكن مع عودتي للعمل لازم تحكمه و انا قلت هي تجي عندي للدار لكن خايفة تطلب تديه و يبقا عندها اسبوع كامل بلا ما نشوفه مستحيل و الله و زوجي يرفض تحكمه اي وحدة من غير امه
قلت نكلم زوجي لكن خفت يظن بلي ما باغياش امه
راسي اتحرق من التخمام مخليه الامر لله
ولات كي تجيني للدار ديما تسمعني نفس لحكاية وليت ما نحملش قتلها مستحيل هي تقول ما فيها والو
قلبي راح يوجعني و الله
اتمنى حذف الموضوع بعد افادتي
بارك الله فيكم

[cicilya]

هي تساعدك استغلي الفرصة اتركيه عندعا في النهار و استرجعيه في المساء

[fella111]

مافهمتش واش معنى تديه هاذي يعني 24 ساعة عندها ام ماذا ......قولي لها انك ستتركينه عندها ما دمت في العمل فقط لكن ما اخشاه ان ذلك سيزيدها تعلق به شوفي حل وسط . ابنك او ابنها حتى تتركينه لها.

[lمنال]

عادي اختي وعلاش اتكبري في الامور من مرة الالى فهمي راجلك و ام راجلك بصريح العبارة قلها يقعد معاك في النهار وقت كي تكوني خدامة وفي المساء تاخذي ولدك انتي او راجلك اللي يرجع الاول يجيبو للدار وما تخليش ولدك لازمك تقوليلها ما تخافيش قلها ما نقدرش انخليهلك طول كون من الاول فهمتيها راهي ما بقاتش تعاودلك لازمك تحزمي امرك
وربي يجيب اللي فيه الخير

[محمد جديدي التبسي]

وعليكم السلام ورحمة الله..
مادام مازال صغير ويرضع فمخاوفك مبالغ فيها وسابقة لأوانها أنت أمه وطبيعي يبقى معاك ثلاث سنوات الأولى على الأقل والحمد لله انك لن تضطري لتركه في الروضة
تبقى هي وحنانتها ممكن لما تتركيه معاها لما ترجعي للعمل يتعلق بيها أكثر منك باعتباره يقضي أكبر وقت مستيقظ معاها اذا حبيتيه ليك وحدك حبسي لخدمة لا توجد ضرورة للعمل (لازم نقولها) مادام زوجك موجود لا توهمي نفسك بالعكس. وربي يحفظ ابنك ويكبر في طاعة الله..

[أم ريتاج زهرة]

ربي يوفقك اختي مالقيت ما نقول راهي الكبدة

[oum radja]

ماتخافيش اختي
خليلها ولدك فالنهار وكي ترجعي من الخدمة اديه معاك ياك مازال يرضع وزيد يعطوك ساعات الرضاعة فالخدمة
وهو كي يبدا يعرف ما يصبرش عليك تأكدي منها
ماتخسريش عزوجتك راح تنقص قيمتك عند زوجك

[وفاء الياسمين]

السلام عليكم
في حالتك هذي يا أختي ماعليك غير تخيري مابين وليدك و بين الخدمة ( لازم نفوتو في الخدمة لانها اساس المشكل )
اعرف حالات مماثلة وللأسف مش راح تقدري توقفي في وجه الجدة هاذا شيء واضح

لذا اختاري مابين القرار في المنزل و تسليم ابنك للجدة

[غربة أهل السنّة]

وعليكم السّلام ورحمة الله وبركاته
أتي الفاضلة أنتِ قلتِ (ما تفتوليش في العمل لازم نعمل و زوجي قابل )
وللأسف المشكلة كلّها تكمن في العمل لأنّك بخروجك للعمل ستتخلين عن جزء كبير من دوركِ كأمّ
وأنتِ تعلمين ذلك لذلك سارعت بقولك (ما تفتوليش في العمل لازم نعمل و زوجي قابل )
أمّا عن حكاية زوجك قابل،،، صراحة كلام محيّر فعلا
هل كلام الزّوج هنا قرآن؟؟؟
هذا حقّ إبنك ويجب أن تبقي معه وإن أخذته جدّته فسيتعلّق بها
وحتّى لو كان عند جدّته فكيف تستطيعين الإطمئنان عليه؟؟
(كلّكم راع وكلّ راع مسؤول عن رعيّته)
ستُسألين عنه يوم القيامة أنتِ وزوجك وعندها لن ينفعكِ قول (زوجي قابل الخدمة تاعي)
تقبّلي مروري واسأل الله أن ييسر لك أحوالك

[biologie2001]

يا اختي مرة اخرى لما تولي تحكيلك و تقولك نديه انت جيبيهالها بضحكة و قوليله غير وليدي اللي منفرطش فيه

[AMINA.Z]

هاذي قضية لا تحتاج التفكير
ابنك و لا احد في الدنيا يحق له اخذه منك
قوليهالها بصريح العبارة و ما يهمك حتى واحد ...بني و ما تحلميش تديه.
هاذا اللي كان خاص

[(( هبة الرحمن ))]

يا بنتي العاملات ماللقاوش عجوز تقولهم جيبو نربي
الله يرحم والديك ابنك راح ينساك ؟؟ أبدا
بالعكس ستكون أحنّ عليه من غيرها وبما أنها تحبّه أكيد ستعتني به
عادي ،هي تحبّه ...يا سلام ....ربي يكثر من أمثالها ، كاين عجايز من كثر اللي تكره عروستها تكره حتى أحفادها
كون أنا في بلاصتك نزيد نولد 6 أطفال وتعاوني فيهم،،،،،،
ما عليش يقوللها ماما وين راه المشكل أمّ أبيه هي أمه أختي لوكان اللي راح تديه هي أمّك تكبرِ الموضوع وتزعفي ، أكيد لا ..
عادي جدا نقولك أنا أولاد عمي راهم رجال ومتزوجين جدّتي الله يرحمها هي رباتهم وأمهم في البيت ، الجدّة ينادوها أمي وزوجة عمي أي أمهم الحقيقية ينادوها باسمها ....واليوم عايشين مع أمهم اللي ولدتهم وكيفهم كيف الناس.

[أم عبد الكريم]

اختي متخافي ماوالو الابن ابن امه و ولدك ميخليكش انا كنت كيفك عجوزتي تقولي ندي بنتك ترقد عندي وانا نبدا مطلع و نهبط وضرك بعد ما زدت جبت طفل راني متمنيتها تروح ترقد عندها .........و نقولك اعز من الولد ولد الولد

[سيرين 5]

راني حاسة بيك صدقيني عندي بنت لوستي دارتلها هكذا عجوزتها داتلها ابنها ماشي باش نخلعك بصح والله داتهولها ،
بنت لوستي ماشي خدامة قاعدة في الدار ، كانت في الأول عجوزتها ساكنة عندها بعدها داتو لعندها يبات عندها و بنت لوستي تروح لعندها كل يوم الصباح و ترجع لدارها لعشيا ؟ بنت لوستي كرهت حياتها و ما قدرت تقولها والو و راهي حابة تخدم غير باش تتهنا منها ؟
أما أنا فعجوزتي هي لي حبت تشدلي بنتي و في الأسبوع الأول لي بديت نخدم فيه حبت تقلقني قاتلي دوك تنكرك ، دوك تولي تهربلك وتجي لعندي دوك تقولي ليا ماما ... صح تقلقني بصح ما نحبش نبينلها نرجعلها ببرودة إيه ماعليش خليها ياك مانها ؟؟؟
يا أختي أنا صلاحي و صلاح بنتي ما نخليهاش عند الناس أنا يما قليلة صحة و لوكان تشدلي يعاندوني نسا خاوتي و يما ما تقدرش ؟ و بنتي نفضل يحبوها ناس داري خير ما يخرجو فيها العيوب السبعة كيما بنت مرت لوسي يقولو عليها شغل وليد وردية "يما حبيت نقيا " و بنتي مسكينة ما نخرجهاش في البرد نهبطهالها كي نكون رايحا للخدمة و لعشيا نطلعها صح ما نشبعش بنتي بصح الحمد لله راني مطمنة ما راهيش عند الناس و ما راحش يضروها بالعكس يحبوها و يستحفظو عليها
أنا بنتي كي قالت أول مرة ماما قالتهالي ليا و كان معايا راجلي قالي إيه أحلمي ، ما أمنيش من داك الغدوا زادت قالتها و تبكي قاتلي لوستي قالتها ليما يعني لعجوزتي بديت أنا نضحك و قلتلها قالتهالي ليا البارح و كي قلت لراجلي ما أمنيش ؟
ما تخافي ما والو وليدك ما تقدرش تديه يبقى وليدك أنت وأنت ماماه تحب ولا تكره ؟

[ايمان4]

عادي جدا انت عندك الزهر عندك لي تحكمهولك باقية تماك تشكي مجاياش حتى عليك ناس تخلص الدراهم باش يحكموهولها سويعات و انت ... لا حول و لا قوة الا بالله ..... مكااش مشكل كاامل