وين راكم يا جماعة المنتدى راه راقد

[mer ilham]

سلام واش يا جماعة خلاص فاتو الامتحانات خلاص رقد المنتدى ماكين مشاركات جديدة ولا مواضيع جديدة شوية حركة شوية امبيونس خلونا من الخلعة و من التشاؤم خلونا نتفاءلوا و نتجاوزوا لي فات و نحكيو على الجديد ديرولنا شوية جو كرهنا من الروتين و الهدرة على الخوف من النتائج تخيلوا رانا كامل نجحنا مثلا هداك الوقت وشي الخطط نتاعكم للعام الجاي ....واش راح يصرا بعد ما تنجح شاركوا بسرعة و نشطوا لحالة كرهت ملي ندخل ما نلقى حتى جديد راني نستنى يالاه يالاه إيه نسيت مبروك النجاح.

[Hamza touazi05521763]

مرحبا اختي الهام انا من مدة نحاول نفتح منتديات الجلفة مقدرتش يمكن في خلل والكثير من الاعظاء مقدروش يدخلو حتى رحت لقوقل وكتبت منتدى المراسلة باش خرجلي المنتدى مباشرة خاوتي لازم نديرو الثقة في ربي هل عندكم شك في الله كنت منهار نفسيا كامل انا تعبت وصرفت بزاف دراهم عالباك باسكو اول مرة نجوزو وزيد ليبر الحمد لله صح مخدمتش مليح مليح وقلت منجيبوش مي التشاءم والله مامليح بالعكس راح يظرنا لازم نتفائلو ونديرو الثقة فربي سبحانو باسكو قادر على كل شيئ ولو تحالف ظدنا كل الناس مندو غير لكاتبهالنا ربي سيحانو كثرو من الدعاء خاصة في الليل واعني قيام الليل ادعي وكثر وكون متفائل بلي ربي راح يستجيب لدعاءنا خاوتي بادن الله رانا ناجحين ربي ميخيبناش اتفائلو برك انا منيش نرقد ليالي من تخمام على النتائج مي كل شيئ بالمكتوب بادن الله نجيبوه يارب قولو امين

[houhou92]

عندك الحق أخت الهام المنتدى راه راقد لانو كل الناس متخوفة ومترقبة للنتائج الشي المليح أنو النتيجة راها في العد التنازلي وما بقاش بزاف على 27 جوان ومنا لداك الوقت لازم نديفولوا على بعضانا

[mer ilham]

صح مابقاش بزاف مي ما قلتوليش واش راح ديروا كي تنجحوا وشي الخطط لي حاطينها و راح تمشو عليها يعني أحلامكم ...أنا اذا نجحت راح نطلع للباك يعني راح نحاول نحضر من درك خاصة الفلسفة تبانلي راكم علابالكم من درك و يا ربي و انتوما*

[houhou92]

اخت الهام الواضح انك سنة ثانية ثانوي اداب وفلسفة انا والاخ حمزة اجتزنا الباكلوريا احرار ومبقى غير النتيجة على كل نتمنى النجاح للجميع

[salahe14]

سلام الهام والله الحية راهي راقدة جماعة راهي مخلوعة وعلاش هذا الخوف لي مكتبها ربي هاذيك هي يلزم علينا نتفائلو انتما دايرنو حاجة هذا الهم الحاجة لي خايف منها تجيك حتى لو كان رسبت نتمنو ما يسراش هذا الدنيا عن تحبس ياخي الطريق مازال طويلة خطوة الف ميل تبدا بخطوة والله شبر انا صحيح ما راني متقلق ما والو لي مكتبها ربي هاذيك هي كل واحد واش مكتب ليه ربي اذا نجحت وانشاء نتمنو للجمبع النجاح راح نطير بلا جنحين واذا رسبت خيرها في غيرها كيما قلك كامل ما دروهاش حاجة كبيرة حتان تعود دير في حوايج لا يحمد عقبها راح تتعقدوا كان بقيتو في هاته الحالة ربي ينجحكم كامل وينح الخوف من قلوبكم اذا ما نجحناش السنة نبدو نحضرو من اليوم لباك 2014 ..........

[Hamza touazi05521763]

انشاء الله خاوتي في الله انا بادن الله ادا جبت الباك نقرا صحافة ولا علوم سياسية حاب نغير في الجزائر ويكون عندي صوت فبلادي يارب ننجحو متفائلون لان لدينا رب كريم وكبييييييير

[kamelaka]

كيزيد نسموه بوزيد

[salahe14]

يا جماعة ان كان ما نجحتش السنة بربي راح نقلبها شعبة اداب كرهت من شعبة العلوم يالله معا نحضرو بكالوريا 2014 من الان

[mer ilham]

ان شاء الله تنجح اخ صلاح تفاءلوا خيرا تجدوه اخي kamelaka صح كل حاجة في وقتها مليحة مي مليح الواحد يحط خطة و يمشي عليها وتاني الانسان كي يكون عندو أحلام و يسعى لتحقيقها أفضل من أنو يعيش على كلمة جات جات راحت راحت ربي يوفقنا كامل يا رب

[mer ilham]

بالتوفيق حمزة ان تتحقق أحلامك