كاتشب 100% صحي

[جوهرة الغرب.]

السلام عليكم
اليوم جبتلكم طريقة صنع الكاتشب المنزلي





سامحوني معنديش صور لانو حبيبتي سيرين فسدتلي الكاميرا للاسف مي والله الوصفة انا جربتها اول امس وخرجت ناجحة وبنينة ....

المقادير:

2كغ ونصف طماطم بما انو راه وقتها وراها رخيصة
1 بصل احمر كبيرة انا مكانتش عندي درت 3 متوسطة بيضاء**من الاحسن تكون حمراء لانها فيها نسبة سكر اعلى وتاني تمد احمرار**
3 فصوص ثوم
2 اعواد كرافس تقدري تزيدي الاوراق اذا كانت السيقان رقيقة
4 حبات قرنفل
ملعقة صغيرة قرفة
ملعقة صغيرة موطارد
فنجان خل
فنجان سكر
ملح
ملعقة صغيرة فلفل احمر اللي مخدوم باليد
ملعقة صغيرة عكري
نصف ملعقة كبيرة معجون الطماطم



طريقة التحضير:

اغسلي جيدا الطماطم وقطعيها على اربعة ضعيها في طنجرة + بصل مقطع مربعات كبار + كرفس مقطع +ثوم+قرنفل ديريه في قطعة قماش باه يسهال عليك كي تنحيه+ قرفة واتركيه فوق النار وحركيه حتى تطلق الطماطم الماء بعدها غطيها وخليها تذوب مليح تقريبا ساعة ....
من بعد نحي القرنفل واطحني الكل جيدا من بعد صفيه في صفاية مليح وزيدي عليه المقادير المتبقية وحركي بالفوي وخليه على نار هادية حتى تتبخر المياه اللي فيه وكل مرة حركي باه ماينحرقش من التحت ...وانت عينك ميزانك كي تشوفيه اعقد اطفي عليه وخليه يبرد مليح مليح
ثم بعدما يبرد حطيه في بلارات وحطيهم في الثلاجة....
انا دارتلي زوج قرعات نتاع الماء الصغار درتهم في الكونجيلاتور وعمرتلي علبة نتاع نيسكافيه المتوسطة نتاع الزجاج درتها في الفريجيدان ...
اللي في الفريجيدان من الافضل تستهلكيه في مدة اسبوع ...


اتمنى تجربوه الوصفة جد رائعة سهلة وبنينة وزيد صحية مافيه ني حافظات ني ملونات او مضافات غذائية ...
ادعولي