حاجيتكم ماجيتكم ... وبالمسك رشيتكم ... ومايحلا الكلام غير بالصلاة على النبي العدنان عليه الصلاة والسلام ...
يحكو ناس زمان على عجوزة رزقها ربي من فاكهة الدنيا طفل واحد هو عينيها اللي تشوف بيهم وعمرها ...وكانت تخدم عليه مرّة منسج ومرّة صوف تغزلو والاّ تغسلوا حتى كبر ... وقالت ضكا نتكّل على العوينة يوكلّني عسل ودهينة ....❤❤
بصح هذاك الطفل ديما راقد طول اليوم ...بدات تشجع فيه على الخدمة والسّعي ...حتى الجارات كل مايشوفوها يقولولها جمالنا تتعارك وجملك بارك... ..و خدام ذراعو سيد الرجال... والخدمة تقصّر الايام والبطالة تطوّلها... ومعونة النصارة ولا القعدة خسارة ... وهو تحدثوا ما يسمع ،تنصحو مايفهم ويقولها ، انا رزقي متكفل بيه ربّي سبحانه ويجيبو لعندي ورزق يومي ما نحير فيه وانا عليا عبادتي وصلاتي ..... عيات أمو المسكينة من الحديث .....
و في نفس المدينة كان كاين تاجر كبير من اصحاب المال كان حافر حفرة في شجرة يلوح دريهماتو اللي يجمعها فيها وضامن اللي حتى واحد مايجيبلها خبر ويعرف اللي فيها كيما يقولوا الضامن ربي سبحانه .....نهار جات ريّاح قوية وفاض الواد قلّع الشجرة من ساسها وجرها الماء من بلاصة لبلاصة حتى لحقت عند باب محمد ولد لعجوزة ...
الصباح ناضت حلّت الباب تلقى الشجرة معرضة... ومسكّرة الباب ...عيطت لولدها باش يبعّدها.. ..تقّعد سي محمد وجر الشجرة للدار ....منها قالها خلّي نقصّها ندّفوا بيها في البرد ووقيد للكسرة ......كلّ مايضربها بالفاس يتفتح شّق ويطيح اللّويز ......والفرحة فرحتين ...قاللها ها اميمتي مش قلتلك الرزق يجي لعندي .....😍😍
شرى من كل خير ، ودار كبيرة تسكّت الصغير وفرس بيضة زينّها بالسّرج ....أمّا لعجوزة ماحبتش تخرج من دارها... بقات في عشّتها قالت دار ورزق ماتعبت عليه مانشاركك فيه .....
روح يازمان وارواح يا زمان نهار لعجوزة يجيها سائل عند الباب وحالتو تغيض العدو وقاللها يا اميمتي الحكاية فيها ومافيها وشجرة فيها لويزاتي تبعت جرتّها جات لعندك ومن عام وانا نتبع في الجّرة ..ما تعرفيش حاجة عليها؟.. قالتلو مانعرفش يا وليدي (الحكاية فيها كبيدتها،😁مانجمتش تبيعو...😍😍 ) قالتلو الخبر ماعنديش ..لكن استنى نعجن لك خبيزة تاكلها في طريقك ... وعجنت الخبزة وحشاتها باللويز وغطاتها بخبزة اخرى وطيبتها ومدتهالو ..
داها الراجل ومشى حتى وصل للسوق وحّس هاذيك الخبزة ثقيلة عليه ... قال انا ماعيني في ماكلة نبيع هاذي الخبزة خير ..وبدا ينادي خبزة بدينار خبزة بدينار ....جا سي محمد ولد لعجوزة على الفرس البيضاء فاي... قال انا رايح رايح لميمتي خلي ندي معايا خبيزة ناكلها معاها ومانتعبهاش بالقضيان وتشعيل النار ..وشراها بدينار وداها ....
ومانطولو في الحديث وصل لميمتو ...رحبّت بيه ...سلّم عليها وقالها ها اميمتي جبت خبيزة ناكلها معاك وربي رزقني بيها بدينار ......أوّل ماشافتها لعجوزة بدات تضحك وولدها ماهو فاهم شي....حتى حكمتها وقسمتها على اثنين ويطيحو اللويزات ....قالت له يا وليدي كيما قلت... اللي رازقو ربي رازقو بلا تعب وشقا والرزق الي ليك ليك.. وليدّيك يجيك ...
وحكايتنا طابة طابة والعام الجاي تجينا صابة...
ليلتكم سعيدة ... واحلامكم اسعد ...
وتصبحون على واقع اجمل باذن الرحمن الرحيم
💚💚💚
( تقرير عن مشاركة سيئة )، و الموجودة أسفل كل مشاركة .
2022-08-05, 00:18
اللي ليك ... ليَدِّيك يجيك ... 🌼
العرض الشجري