السلام عليكم
كنت أدرس في شعبة التسسير والإقتصاد .. عام الباك تاعي ضربتني جياحة .. كثرة الغيابات وأضعف معدلات فصلية خلال مساري الدراسي .. كان يدور غير بين 7 ... المهم بعد دخولنا الفصل الثالث بأيام اقتنعت بلي هاذ العام محال نجيبوا .. كنت نشوف صحابي يروحوا يقراو ساعات اضافية درووس الدعم ويقولو ا بلي متخوفين بزاف مايجيبوهش .. فمابالك أنا العام كامل ضاربها بركلة .. قلت ماعليهش العام هذا ضاع بصح العام الجاي ان شاء الله نبدا من البداية ونجيبوا.. عدت مانروحش للثانوية وقلت للوالد بلي هاذ الفصل ماداخلش في الباك ( صح كانت اشاعة تقول هكذا ) وقلتلو نبقا نقرا وحدي خير ما نضيع الوقت في الليسي.... جازت فترة وانا على هاذ الحال لا قراية في المنزل لا الليسي .. قلت للوالد كاين هنا ملهيات بزاف مايخلونيش نقرا كيما التلفاز والانترنت .. وقلتلو عندي اصحاب في الجامعة نروح نبقا عندهم الفترة لي مزالت ونقرا لتم بأريحة ... رحت لعندهم للجامعة وجوزتها جياحة كي العادة .. كتاب ما فتحتو ... بقات سمانة للباك رجعت للمنزل ...النهار لي رجعت فيه خممت وقلت لازم نحتم على روحي ونقرا شوية عيب لوكان نجيب المعدل 2 أو أقل .. لازم مايهبطش من 5 .. قررت نقرا شوية .. الكراريس لقيتهم فارغين ومش مفهومين .. والكتب الدروس فيها طويلة .. بحث في الانترنت على ملخصات وطبعتهم .. اقتصاد,قانون,تاريخ و جغرافيا,تربية اسلامية .. ملخص المادة الواحدة ماكانش يزيد عن 6 أو 9 صفحات .. في أقل من يومين لقيت روحي خلصت الاقتصاد الملخص هذاك حفظتوا واستوعبتوا بسرعة .. يوم اخر خلصت القانون....نفس الشيء للعلوم الاسلامية .. جاتني ساهلة المراجعة والحفاظة وبدا يغيض فيا عمري .. كي بقا يوم او يومين وليت نقول لوكان جاء الوقت يتباع بالصوارد والله نشري على الاقل يوم اضافي ولو بالملايين ..الرياضيات و التسيير حضرتلهم بضع ساعات الوقت مكانش .. الوقت ل بقا تقسم بين الفلسفة الفرنسية العربية الانجليزية ... دقت ساعة الصفر ...ودخلنا في ايام الباك ...كنت نروح بتمسخيرة نرجع بتمسخيرة لا ضغط لا خوف .. ندخل روطار نجاوب على كل شيئ حتى ولو مانعرفش الاجابة نكذب ونجاوب سؤال ما نخليلو قلبو في الشط .. ونخرج مع الأولين .. والسبب هو اني كنت مقتنع من قبل بلي مافيهاش وإنما العام الجاي .. نفسيا كنت مرتاح .... جاز الباك .. جازوا الايام لي وراه حتى ليوم النتيجة .... والحمد لله جبتوا 10
..................................
واش حاب نقول : الوقت .. والله كلما يقرب الباك كلما تعود الدقيقة بحقها .. ماتضيعهاش
الراحة النفسية ... كالمي روحك لأقصى درجة .. خطيك من الحسابات
وبالتوفيق لكم .. سلام
( تقرير عن مشاركة سيئة )، و الموجودة أسفل كل مشاركة .
2017-05-10, 11:06
قصتي مع بكالوريا 2011 "لاتيأس"
العرض العادي
