مشكلتي اهل زوجي

[فاطمة_26]

اخواتي العزيزات انا متزوجة منذ سنتين انعم الله فيها عليا ببنت اروع من القمر منذ زواجي وانا اسكن مع اهل زوجي المشكلة انهم ينتقدونني دوما ويعلقون على طريقة اعدادي للاعمال المنزلية كما لاتتوقف حماتي لاحراجي وسط اي كان
بدات العمل منذ فترة بسبب حاجتي الماسة لاي دخل كان فزوجي عاطل عن العمل ومن يومها لم تتوقف المشاكل فزوجة اخ زوجي لم يعجبها الامر وبدات تغير مني بسبب عملي واصبحت تختلق المشاكل حتى اتشاجر مع زوجي وعندما اتشاجر معه تبدا هي بملاطفته وتنفيذ جميع طلباته
زوجي لم يعد يحبني بسبب كثرة المشاكل رغم انه كان يعشقني ماذ افعل لقد اصبح يضربني بدون سبب ويعايرني بمكسرة اليدين
ارجوكم كيف احافظ على بيتي ممن يريدون تهديمه
هل اواصل العمل ام اتوقف
ساعدوني لا تبخلو عليا بالردود ارجوكم

[minanfel]

السلام عليك حبيبتي

اذا كان لديك اولاد منه من الافضل ان تصبري ، بالنسبة للعمل اذا كان هو المشكل الرئيسي بينك وبين زوجك من الافضل خسارة عمل او مدخول على خسارة رجل يعشقك كما قلتي ، لاتجعلي من نفسك ضحية اهله او حتى زوجة اخوه ، حاولي ان تفهمي وجهة نظره واطلبي منه النصح واظهري له مدى تمسكك به وانه لا يساوي شيئا امام عملكـ ، اذا كان طلبه التنازل عن العمل فافعليه على الفور -اذا كان زوجك يحبك ويحترمك والسبب الوحيد في المشاكل هو العمل- وبالنسبة لاخت الزوج او زوجة الاخ لا تدعي لها الفرصة للتاثير فيك او فيه ،حتى لو كنت متخاصمة مع زوجك اظهري امامهن انك في احسن حال والحمدلله ولا تتركي لها فرصة التقرب منه لتظهر انك المقصرة في حقه لا هي ، بالنسبة لامه احترميها قدر المستطاعـ لانها ام وحاولي التقرب منها حتى لو ابتعدت هي سياتي اليوم الذي تعرف قيمتك فيه مهما فعلت او طلبت قولي حاضر وستلاحظين تغيرها في التعامل معك ، قوليها لها انك في مقام امها ومهما فعلت تبقى كذلكـ ، وزوجك حاولي التقرب منه اكثر من اي وقت كان لبي طلباته واظهري احترامك له ، وضاعفي اجهادك ـ اذا ممكن يوفر لك بيت وحدك لا تترددي في الطلب واذا لا اصبري سياتي يوم الفرج ، بالنسبة لزوجة اخوه او اخته عامليهن بكل احترام وتقدير ايضا وارسمي ابتسامة لا تفارق وجهك اذا كن من معدن ثمين سيعاملنك بالمثل واذا العكس ستقتلهن تلك الابتسامة -الابتسامة عند الخسارة تذيب لذة الانتصار للعدو-
وربي وفقك ويهنيك ،

[اية الرحمن1988]

السلام عليكم
بما أنك تفكري تحافظي على زواجك فأنت إمرأة واعية ما شاء الله عليك
هناك ف الحياة فترات تكثر فيها المشاكل ما تلقي وينا مشكل تلهاي بيه وتعجزي عن التفكير
لكن مع الوقت وبالعقل يفرجها ربي ان شاء الله
عندك بنت ربي يحفظهالك وعلى جالها لازمك تفكري بعقلك حاولي كيفاش تميلي حماتك ليك
ممكن بهدية بسيطة ولا حتى في شغل الدار كي تحب تنتقدك حاولي تتعلمي طريقتها باش ترضيها
لانك عايشة معها ف البيت لازمك تنسجمي بأي طريقة معاها ولا عيب أنك تشتغلي باش تعاوني زوجك وربي يجازيك على جهدك
لازمك حتى وإذا كان قلبك ماشي مرتاح لا لزوجك سلفك لا لحماتك على خاطر زوجك وبنتك حاولي كيفاش تتفاهمي معاهم
وتجاهلي انتقاداتهم كل ما تنتقدك حماتك فوتيها ضحكة واخلاص خير ما تعمري قلبك وما تمرضي غير نفسك هدرة وتفوت
أما زوجك أنت أولى بيه تهتمي بيه ماشي زوجة سلفك كل ما يحتاج حاجة ديريها وانت تضحكي ماشي من فوق القلب حتى تكرهيه
أدعي ربي في سجودك والله ما يخيبك وقربك من ربي أكيد راح يحسن نظرة زوجك ليك وترجع المياه لمجاريها
ربي يفرجها عليك اصبري برك فترة وتفوت

[ing.lakhdar]

ناجي الله في سجودك وابكي لربك بحرقة واشكي لله فهو خير المشتكى
وتاكدي انه لن يضيعك واحسني به الظن
اكثري الصلاة وقراءة القران

لاتكثري الكلام مع الاخرين غير زوجك
تجنبي مجالستهم لكي لا ينتهز الشيطان الفرصة
وتجنبي ان تحكي لاي احد مشاكلك

تصرفي وكان شيئا لم يحدث
اللامبالات تشعر الاخرين بالحيرة

الله يوفقك ويصلح حالك

[فاطمة_26]

شكرا لكن اخواتي

[mamia20]

السلام ياختي ربي فرجك عليك انشاء الله اصبري و حاولي ان تنالي ثقة زوجك و رضاه و تقربي من ام زوجك فهي مثل أمك فسيأتي يوم و تعرف قيمتك و لا تترك فرصة لزوجة اخوه تستغل فرص ربي يكون معاك حبيبتي و يفرج عليك كربتك انشاء الله .

[جسور المحبة]

عليكما بالحوار الهادف والهادى انتي وزوجك لازمك تاخذي فترة ما تخدميش فيها وريلو شطارتك وتحاوري معاخ بكل هدوء وحاولي تقنعيه وتفهميه بلي ما ضيعيش دارك وقوليلو اي مشكل ما تخلوش طرف اخر يدخل لازم تجتمعي نتي واياه وتحلوه وكيما قتلك ما تبطليش اخدي عطلة وحاولي تقنعيه وادا ما حبش بطلي

[ياربي اني راضية]

يااختي الكريمة المهم ان المشكلة ليست في زوجك اما الاخرين ماتجمعيش بزاف معاهم اخدمي خدمتك وتقنيها وخليهم احلوا افامهم وزيد وسعي بالك راهاتغير منك لخاطر اخدمتي وانت قدامها لاطفي زوجك واكسبيه ليك وجديلوا حبوا ليك لخاطر مع المشاكل اكيد مايحملش ومتشكيلوش بزاف وفوضي امرك لربي سبحانه

[ميمنة الجزائر]

المشاكل راهي هي هي وين تروحي يا اختي تعرفي تخدمي ولا مكسرة راهم

يهدرو لكن اعاتبكيلانك تبادلي الكلام بينك وبين زوجك لازم ما تخليش زوجك يدخل بيناتكم ابدا واتركيهم يتكلمو كيما يحبو

وربي راهو يشوف وااخدمي كيما تعرفي وخلاص لكن زوجك لا تتركيه يذكرك قدامهم بسوء ابدا خلي مشاكلك بينك وبين زوجك

ولا تخليها بينهم وما تشمتيش فيك الاخرين اخدمي حوايجك دائما في الليل او العشية ولصباح روحي تخدمي وبنتك خليها عند يماك اذا قدرتي ولا خليها عندوحدة كوفيونس وروحي تخدمي لانو هو ما يخدمش وانت مين رايحا تجيب حوايج لبنتك وليك

تبطلي كي يكون يخدم ويجيبلك واش تحوسي انا ضد الخدمة كي تعودي عندك مشاكل بسببها ولكن هو مش خدام وانت يحب يبطلك

هذا ليس عدلا وما تخربيش بيتك دايما راضيه وقولي انشاء الله غدا سوف تفرج وصلي وادعي ربي يفرج عليك ان شاء الله

وما تخليش المشاكل تتغلب على علاقتك بزوجك لازم اانت من يلم المشاكل وديري لو واش يحب من اكل وما تخليهش ابدا

لكن قولي في نفسي راني نديرها لوجه الله ليس لوجه احد والله واقولها ربي هو من سيفرج عليك ولكن لا تتشاجري

مع زوجك امام الاخرين خلي سرك بينك وبينو والكتمان في الاسرار والمشاكل تخليك دايما بين الناس مرفوعة وقيمتك هي هي
اللهم يارب الناس يفرج عليك عاجلا غير اجل

[ام محمد78]

ولكن انا في نظري لو هذي العجوزة تحافظ عليك
ما دامك صابرة على وليدها العاطل عن العمل
وانت الي تخدمي عليه
الله يهدي الجميع ويفرج همومك غاليتي

[منى]

الصبر يا أختي،، كلنا لدينا هذه المشاكل مع الطفالات و السلافات و حتى الحماة أحيانا،، نصيحتي ليك اكسبي حماتك بأي طريقة (اضربيلها الشيتة) هي لي تعاونك على سلفتك،، و لكن حاولي تكسبي سلفتك إلا هداها ربي،، كوني هااااااااااادئة معاهم عامليهم بالحسنى مهما يديرو و لابد يجي يوم و يفوقو لعمارهم،، القضية قضية وقت و صبر،، أما زوجك حبيلو راصو صباح و عشوة،، عيشيه أحلى عيشة و لابد كاين طرق باه تكسبيه ابكيلو،، حلليه،، نفاهمي معاه بأي طريقة،،، و هذا كلو على خاطر ربي أولا،، و تربحي الأجر ثانيا،، و على خاطر الأمورة لي عندك ربي يحفظها و يباركلك فيها..
كثري الاستغفار و الدعاء...
و ربي معاك، و مع المجاهدات في بيوت أزواجهن...

[فاطمة_26]

شكرا لاخواتي الغاليات على النصائح اما بالنسبة لابنتي ما نقدرش نخليها عند يما لخاطر يما ميتة وما عنديش خياتي ودارنا بعيدة انا من تيبازة وتزوجت هنا في المدية وهوما كي شافوني وحدانية تلمو عليا كامل وقاع حقروني وقاسوني بالكلام من الشيخ للعجوزة للطفالات للسلافات قاع

[جسور المحبة]

ربي يهديهم كامل واول حاجة اكسبي راجلك وعجوزتك زشيخك لصفك انا حيرتيني كي قلتي شيخك يعاملك هك عادة تلقا الشيوخ حنان اكسبيه ليك باي طريقة بش يجي لصفك باه يوعي مرتو وبناتو وحتى ابنو لا بقى كيما راه

[hano.jimi]

اختي حاولي الاهتمام بزوجكي اكثر حتى لو كنتي تعملي نظمي وقتكي . كم من امراة عندما حدث لها مشاكل مع اهل زوج بسبب اعمال المنزل .عزلت اي اصبحت تطبخ وحدها دارت كوزنتها وحدها كاين حتى لطيب في شمبرتها
وهكذا تبعد عليك المشاكل ومكيش ملزوما تقضي معاهم ولاتتركي اي احد يقوم بواجبات زوجكي .اشعريه بحبكي له
قدمي له هدية وافعلي اي شيء يحبه

[ام رحوقة]

ربي يفرج عليك امين