مشكله مع اهل زوجي ....

[مشكلتي]

السلام عليكم ورحمة الله وبركاته
راني قريت بالزاف من مشاكل قبل ما حطيت مشكلتي ولقيت اعضاء خدمتهم ماش يحلو المشاكل يزيدو يعقدوه فرجاء لي باش يحلَـلي المشكل نتاعي ويزيد يعقده مكلاه يتعب روحو .......
الموهم ... نبداء في المشكل نتاعي .. انا فتاة عمري 22 متزوجه من تقريبا عامين وعندي ولد اسكن مع اهل زوجي ... المشكل انه دائما هناك صراعات بيني وبين امه واخته يعني زوجي .. صراعات يعني لاسباب تافهه تختلقها امه وتدعمها في ذلك اخته ... والآن مايكلمونيش وحاقريني ومخرجيني انا الغالطه ... وزيد انا تاني عايشه في الغربه وحاسه دائما اني بعيده على امي وابي وما عندي لمن نحكي .. وما عرفتش واش ندير باش نتجاوز هذه الاختلافات ... حياتي الان اصبحت ممله ومحدوده نوم وطبخ ونرجع نقعد في داري ما نخرجش بالله عليكم اخوتي واخواتي اريد حل لتجاوز هذه الخصامات اريد من كل اخت ان تضع نفسها مكاني وتقولي واش يكون التصرف نتاعها هيا كي يعملولها كيما هكدا .... ومن كل رجل يضع نفسه مكان زوجي وزوجته متخاصمه مع اهله واش يكون التصرف نتاعه باش ننصح زوجي وشكرااا مسبقااا ...

[سجل أنا جزائري]

حل هو انك توقلي لراجلك تروحو تسكونو وحدكم أفضل تكريو يا لوكان f2 و تعيشو حياتكم لانو العيش مع اهل الزوج ذائما هناك مشاكل حتى ولو كانو في زوج عاقلين

لكن ما تقولوش باش نهربو من داركم هكذا ما يقبلهاش مي قوليلو باش نعيشو حياتنا ...

أما استحالة هذا الأمر رأي حاولي تكبي ودهم و تعاملي برزانة ما تكونيش ند ليهم يعني مثلا كي ديرلك حاجة تافهة ما تعاندهمش هما وحدهم وحدهم يفهمو

[سيرين 5]

ربي يكون في عونك يا أختي ، أنا نقولك ادفعي بالتي هي أحسن ، ما ترجعيلهمش و ما تعمريش راسك بيهم أنت أنت حاولي تكسبيهم بالتي هي أحسن يعني تقدري العجوزة تطيبي و تمديلها تاكل و أخت زوجك إذا كانت أصغر منك ديريها قد عقلها و ما تعانديهاش و تعاملي معاها على أنك أنت أكبر منها و أعقل منها , إذا كانت أكبر منك اصبري عليها و احترميها و ما تعانديهاش و ادعيلها ان شاء الله يجي مكتوبها و تروح ، علاجال علابالي كاين بعض اللواسات غيورين و يحبو ينشعو العجوزة وووو أنت قولي الحمد لله عندك لوسة وحدة أنا عندي 9 و بناتهم في عرش قريب قدي في العمر واش نقول ؟؟؟ مام العجوزة نقدر نكلخلها مينداك بخبزة كسرة ، طبسي طعام، بريوش ، مسمن ... تكون مليحة معايا أومبعد دور عليا بلا سبة حتى نقول بالاك حرشوها عليا ؟؟؟ ماعليش أنت ادفعي بالتي هي أحسن و كوني خير منهم و قابلي السيئة بالحسنة مام إذا ما كسبتيهمش راح تكسبي من جهة ربي سبحانو و خلي مع الوقت راجلك راح يشوف الحقرة بعينو و انت كيما قالك الأخ جربي قنعي راجلك ديرو سكن مستقل حتى و إن كان بالكراء يا لوكان تبداو بستوديو و مع الوقت ربي يعمل تاويل ان شاء الله .

[milissa21]

اختي هادي المشاكل كاينة في كل عروسة ساكنة مع اهل الزوج و لكن الفرق بين كل وحدة هو في التعامل مع هادي المشاكل و كيف تحليها او تحاولي تتفادايها نصيحتي ليك ادا كان الزوج قادر و نزيد نعاود قادر يكريلك بويتة اللهم بارك ادا امكانياتو ماتسمحش ولايكلف الله نفسا الا وسعها فما بالك احنا البشر المهم لازم تحاولي تتفاداي المشاكل لانه اكثرها لاسباب تافهة و تنغسي حياتك و حياة زوجك المسكين اللي راه بين نارين دارهم و زوجتو شوفي الوالدة تاعو حاولي تكسبيها غير باللسان لحلو و كي تقدري و تكون وحدها عاونيها في شغل الدار و كي تخرجي اشريلها حويجة خيمار جبيبة صابو و حاولي تتحكمي في روحك ادا رماتلك كاش كلمة و لا جاست كيما تكون ام زوجك وواجب عليك طيعيها على الاقل على وجه وليدها اما اخنو ديري دايما ديليميت بيناتكم شفتيها قبيحة و ماتتعاشرش اجبدي روحك منها وكي ديرلك حاجة حاولي توقفيها عند حدها و لكن باسلوب راقي يعني زوج كلمات و مادوريش موراك و حاولي تفوتي كي تسمعي حاجة ارميها وراك والا اضحكي و قوليلها ربي يهديك و لكن ادا شفتيها تمادات حبسيها عند حدها و ما تحاوليش تكلميها و اشغلي نفسك باي شي حفظ القران خياطة في غرفتك و ربي يفرج عليك

[خالة امير]

السكن المنفرد ليس حلا سهلا

واش نقلك تجاهلي المشاكل الي يخلقوها و بيني روحك سعيدة و مش مهتمة ...يوليو هوما لي يتقلقو
و الأهم من هذا كلو اصبري يا أختي و ادعي ربي
وان شاء الله يفرج عليك

[ibtihal18]

اختي مادام تقولي مشاكل لاسباب تافهة اذن ما تعمريش راسك بيها لانك راحا تخسري انتي و يربحو هوما لان هدفهم تحقق و هو ازعاجك ما تحققيلهمش الهدف هذا و ارمي كلامهم ورا ظهرك باش تربحي راحة بالك و صحتك اختي لانك مازالك صغيرة الله يبارك ما تخليش المشاكل تقضي عليك و تطفيك..............انتي ديري معاهم كلشي لوجه ربي برك و هو وحدو اللي رايح يعوضك ........................ربي يفرج عليك اختي .................ما تنسايش الدعاء
دعاء الفرج ***** لا اله الا انت سبحانك اني كنت من الظالمين*******

[تاييد]

سلام جميل للاخت صاحبة المشكلة
اختي عليك ان تعلمي أن ماتحدثت عنه هو ما يحصل بغالبية البيوت
حين تعيش زوجة الابن مع العائلة فغالبا توجد هناك احتقانات و والكثير من سوء الفهم والمشاكل
والتعايش بينهم يتطلب الكثير من الحكمة والصبر والاصطبار والاهم والمهم التغااااااااااااافل
التغااااااااافل وعدم التدقيق مع كل صغيرة وكبيرة تصدر من امه واخته...بل تجاهلي وكبري بالك
ساعة ساعة بادري بأمور تعجبهم....وثقي ان لها تاثير عليهم لانها ستمتص الشحنات السلبية بينكم
وتعطي روح السلام والسلم في البيت....وتذكري حتى الاخوات يحدث بينهن اختلاف وخلاف

باختصار
تغافلي ولا تضخمي الاموروالتمسي الاعذار لهم ولا تحدثي زوجك بكل شيئ وخاصة عن امه ....فهو مأمور ببرها واحترامها
وتذكري أن دوام الحال من المحال ....قد تتزوج اخته..وقد تنتقلو لتسكنوا لوحدكم انت وزوجك..فاجعلي عملك وتعاملك معهم لوجه الله
ولن يخيبك الله ابدا...
ربي يصلح احوالكم واحوال كل بيوت المسلمين

[bachir94]

المشاركة الأصلية كتبت بواسطة ibtihal18

اختي مادام تقولي مشاكل لاسباب تافهة اذن ما تعمريش راسك بيها لانك راحا تخسري انتي و يربحو هوما لان هدفهم تحقق و هو ازعاجك ما تحققيلهمش الهدف هذا و ارمي كلامهم ورا ظهرك باش تربحي راحة بالك و صحتك اختي لانك مازالك صغيرة الله يبارك ما تخليش المشاكل تقضي عليك و تطفيك..............انتي ديري معاهم كلشي لوجه ربي برك و هو وحدو اللي رايح يعوضك ........................ربي يفرج عليك اختي .................ما تنسايش الدعاء
دعاء الفرج ***** لا اله الا انت سبحانك اني كنت من الظالمين*******

نفس رأي الاخت ....

[خالد عنابي2]

يوجد دائما مشاكل بين الام والاخت وبين الزوجة فهم يتنافسون على الرجل فالزوجة تنظر اليه من زاوية الزوجية وتريده لها وامه ترى ان الزوجة تسرق منها ابنها بينما الاخت ترى في نفسها الندية لتلك الزوجة وغالبا ما يكون الطرف الظالم هو اهل الزوج

الحل هو الصبر والتجاوز ومقابلة الاساءة بالاحسان فان لم ينفع فلا حل غير انكم تديرو دار لوحدكم ولو حتى كراء شقة فيها غرفة نوم واحدة
ولكن هذا صعب لو كان زوجك هو من يصرف على امه واخته فهنا الامر صعب اذا لم يكن له راتب جيد

[ولد الشاوية]

اوسط الحلول يا بنت الناس هو القسمة يعني تبقاي في منزل عجوزتك لكن لك استقلالية الطبخ و غيرها
هذا الحل معروف منذ القدم ثم حاولي اجتناب الامور التي تثير الصدام بينكم و ربي يهنيكم

[كلنا راحلون]

مشاكل اسرة دائما بين ام و زوجة واخت

الحل هو خروج من بيت

[ماريـام]

الحل بسيط رغم ان تطبيقه صعب لانو فيه محاربة للنفس

اول شئ الابتسامة الدائمة صدقيني دواء عجيب
ثانيا مقابلة الاساءة بالاحسان لا اقصد الاذلال لكن مثلا ام الزوج ترمي اشياءك في الارض مثلا هاذا شئ تافه انتي اسرعي للاحسان و حضري لها طبقها المفضل صدقيني محاربة للنفس الامارة بالسوء لانو الشيطان يدخل يوسوس و يقلك شتي واش دارت و اخلفيها و دير مشاكل تافهين

حاربيهم بالاحسان تكبري في عينين زوجك تكسبي مرضات الله و زيد عجوزتك حتى و تكون شريرة راح يجي نهار تقر بيك و تكوني من اقرب المقربين

و ربي يديرلك مخرج من حيث متعرفيش و اشغلي نفسك باشياء كالمطالعه و الطيب و غيره باش متتلهاش بالاشياء التافهة من المشاكل

[wahibaazel]

اخيتي ،هذا امر طبيعي في كل البيوت الجزاءرية والاخوات راهم وفاو وكفاو .
اجعلي عملك خالصا لله عزوجل وباذن الله يعوضك خير .
انا من بين الكثيرات ،عانيت في الاول لكن ماشي عجوزتي لانها تحبني بزاف الله يرحمها ويجعل قبرها روضة من رياض الجنة .والان انا ملكة في بيتي ولله الحمد وبعععععد ضيق ومعاناة اتى الفرج من عند الله عز وجل من حيث لا احتسب ولله الحمد .
اذن نصيحتي عجوزك ثم عجوزك مهما فعلت لك قابليها بالاحسان وسينعكس ذلك عليك باءذن الله ،
اكثري من الدعااااااء والاستغفااااااااار وسيلهمك الله صبرا لتتجاوزي كل هذه الامور .

[ابتسام smile &hope]

اصبري وطبقي واش نصحوك الاخوات
يجي نهار وتولي عجوزة وتصيبي عروسة تعاملك كيما راكي تعاملي عجوزتك
واذا جاو عرايس موراك تولي تعرف قيمتك
ومااتعمريش قلبك ديري روحك كي شغل راكي في مسلسل تركي ههههه يعني البسي مليح وحافضي على رشاقتك و متكثريش الهدرة على راجلك يدخل عيان ماالخدمة لازم يصيبك مبتسمة ولابسة مليح يعني تهلاي فيه واحتسبي الاجر عند ربي
نوضي قبل الفجر بنص ساعة وقومي الليل ودعي واش حبيتي وكثري الاستغفار

[صبرين صبرينة]

اختاه الزواج هو كفاح و الدنيا هدي ربي خلق فيها الهم باش يجي موراه الفرح لازم تعرفي جاجة وحدة و ديريها في بالك دوام الحال من المحال باش تعيشي قيسي موراك ماتخليهمش ينارفوك لما يقولولك كلام ماتبينيش زعافك و قوعدي نورمال حتى ولوكان النار شاعلة في قلبك
عامليهم عادي والنية تغلب و ربي عمره ما يخلي الظلم يطول واش غادي يديرو غير يزيد في الدنوب وانت بصبرك ربي يجزيك خيرا و يفرج عليك لما يزعفوك قولي الحمد لله مانيش ظالمة ووكلت امري ليك يالله المهم انت عرفي كي تعامليهم ليس بالسيئة و انما بالحسنة و يجي النهار اللي يندمو فيه و نقولك اخته ماراهاش دايمة داك تروح و امه تقعد وحدها غدي تتوليلك انا نصحتك و انت تعرفي حالك و الراجل يخير امه وانت تعرفي راجلك ربي يفرج