الى مترشحي الاحرار..... شعبة اداب وفلسفة

انا الذي · 2011-10-10, 14:39

شخصيا اول باك واخر باك ليا كان من 13 سنة.... وهدا العام قررت اني نعاود الباك ونجيب الباك ....قولو امين -لينا وليكم كامل

على كل حال على بالي كاين بزاف لي رح يفوتو هاد العام احرار ...ويعني ( مترشح حر ) كاين حوايج مرتبطة بيه

- قلة المراجع
- قليل لي تلقى باه يفهمك ولا ينعتلك
- المراجعة يا انت وحدك ولا زهرك تلقى زوج معاك
- ويلي حالتو كيما انا مدة وهو بعيد على دراسة رح يكون لا علاقة بلمجال الدراسي والمقرر
والا راني غالط قولولي
المهم والمفيد

حنا جماعة الاحرار محتاجين شكون لي ينعتلنا منهجية صحيحة للمراجعة
محتاجين مراجع
محتاجين طريقة صحيحة نمشو عليها
محتاجين كي نحصلو في حاجة نلقاو شكون يفهمنا

على عكس النظاميين راهم في كلاصة ومع زملاؤهم و مع شيوخة تاعهم كاين كيفاه وهدا شي مليح ليهم وندعو ربي يوفقهم وينجحهم

على هاد الشي كامل
فكرة يا خاوتي وش رايكم نعملو حنا في هاد الموضوع
شغل مكان نتلاقو فيه
نتحاورو فيه
يلي عندو مراجع يفيد بيها خاوتو يلي عندو سؤال ولا حصل يجي لهنا يسئل
نتفاهمو على طريقة كيفاه نبداو نتلاقاو ولو مرة في السمانة نراجعو فيها منهجيتنا

وحتى خاوتنا في نظاميين ياريتيكونو معانا و ينورونا هوما تاني باسكو محاتجين عونهم لينا
على العمووم انا فكرة وطرحت لفكرة تاعي وياريت تعجبكم لخاطر صح لازم نكونو ايد وحدة هكدا نمشو درجة درجة
ولعقوبة لنهار نتلاقاو هنا كامل فرحانين ونباركو لبعضانا نجاح لبكالوريا

واعذروني خاوتي بلاك طولت عليكم واسمحولي على الدارجة تاعي حبيت برك نحكي بيها باه توصل لفكرة مليح

يلا تهلو في رواحكم ورانا نستنو ردودكم

ربي يوفق الجميع وربي يكون في عونكم كااامل وبربي النجاااح

سلام عليكم

يارب رحمتك · 2011-10-11, 08:35

اخي بالتوفيق ....انا مثلك بعد 13سنة اعدته هذا العام آداب وفلسفة والحمد لله سجلت في مركز التكوين عن بعد وصراحة دروسهم صفر حرّ افضل لمن يستطيع ان يتحصل على الكتب النظامية ....المهم ابشرك اخي انا متزوجة والحمد لله تحصلت عليه هذا العام إضافة أنني على مستوى العاصمة تحصلت على اعلى معدل في شعبة آداب وفلسفة في مركز التكوين عن بعد في الباك...وكل هذا اخي بالإرادة ولازم اخي يكون عندك هدف معين تعمل من اجله ..اخي صدقني وحدك تقدر تقرا انا كنت فقط تايهة لان البرنامج جديد فلقيت بعض الاخوات من النت وجهوني ..وإلاّ عملت وحدي ..انصحك بشراء الكتب الخارجية وإن اردت اعطيتك عناوين بعض الكتب التي ساعدتني كثيرا ...أما عن الفلسفة فوالله لخصت الكتاب المدرسي لوحدي ويوم الباك وضعت في المقالة مالخصته انا بنفسي لا ماوجدته في المنتديات والحمد لله تحصلت على 13.5 مع انني لم اتمرن على طريقة الإستقصاء ولكن الحمد لله

خلاصة القول اخي والله اقرا واعمل بذكاء ودعك من الكلام من هنا وهنا ..اقرا برك اقرا والله ستنجح ....

ولكن نصيحة : انا ندمت لوكان عرفت لكنت اجتزته لغات بما انني ودتت لو وجهت إلى اللغة التي كنت احبها ..فتلاميذ اللغات كان عندهم الخيار افضل منا بكثير ....وحنا في الباك قهرونا مقارنة بالآخرين هذا العام.

بالتوفيق اخي ....وإن احتجت استفسار انا هنا ..وماتفشلش لازم تقرا لازم ....

"راجية الجنة" · 2011-10-11, 10:44

السلام عليكم
الحمد الله ربي العالمين عمري لا لقيت ناس كما ناس الجلفة
انا ثاني حابة نعاود باك مترشح حر بعد 6 سنوات من ديت الباك وكنت علمية
ياربي نلقاو وشكون ياعاوننا
عندي معلومات قليلة فقط على شعبة اداب وفلسفة
عمبالي بلي راهي سعبة نتع حفيظة فقط
واهم المواد فيها هي

تاريخ وجغرافيا
ادب عربي
فلسفة

ممكن الاخة يارب رحمتك تفيدينا بالكتب الي اعتمدتي عليهم يا حنونة
والله ولي التوفيق
وعليكم السلام

ramrouma dz · 2011-10-11, 11:56

ربي يوفقناكااامل

انا الذي · 2011-10-11, 13:24

ياربي يستركم كاااااااامل ويفقكم وينجحكم
والله يا اخت رحمتك ربي عجبني كلامك بزاف وربي يوفقك في حياتك
من ناحية الارادة والله كاينة وراني عازم بربي ان شاء الله نجيب الباك
لمشكل المدة لي قضيتها بعيد على الدراسة وزيد كنت نقرى تقني يعني فرق كبير بينها وبين الادبي
وانا خيرت هاد الشعبة كيما قالت الاخت راجية الجنة ...انها شعبة تع حفيظ لانو وبصراحة الراس مابقاش يتحمل بزاف العلوم التقنية وغيرها
المهم مشكورين كاااامل وياريت تفيدينا بعناوين الكتب يلي ساعدوك
وربي يستركم ويهنيكم كامل خاوتي وينجحنا ويوفقنا
سلام عليكم

يارب رحمتك · 2011-10-11, 15:09

بارك الله فيكم

امر سهلة تع حفيظة صدقوني الحفظ ليس بسهل اقسم بالله كنت عندما اقوم من الحفظ اشعر راسي سينفجر ....والمهم الفهم فمثلا الفلسفة فهم وليست حفظ ...العربية ليست حفظ بل يجب ان تكون لديك روح النقد وتعبير جيّد .....حتى التاريخ والجغرافيا لازم شوية فهم وإلاّ في الباك إذا بدلولكم شوية تحصلوا...

قبل كل شيئ اخي انت كنت تقني وانا قبل 13سنة كنت علمية وعمري ماقريت الادب ...

شيئ آخر الباك الآن ماذا ترجو ان تدرس به بعد ذلك؟ انا سجلت ادبي لان الإختصاصات العلمية لاتساعدني في مجال العمل ...

الآن انا اخطات الإختيار ولم اجد من ينصحني ..انا تمنيت لو اعطوني تخصص انجليزية لكن للاسف وجهوني للفرنسية وماكنتش عارفا لازم نركزو على المادة وإلاّ كنت ركزت على الإنجليزية جيدا ولو علمت كذلك كنت نجوز الباك لغات فهم اولى بالغات في الجامعة وليس الادبيين ...انا كنت اخشى من الغسبانية ولكن لو علمت حجم برنامج الفلسفة عند الادبيين لتوجهت إلى اللغات ...خلاصة القول فقد اكثرت الكلام حدد من الآن ماذا تريده واختر الشعبة المناسبة ...ولعلي سأعيد الباك هذا العام معكم ولكنني محتارة بين لغات وآدب خايفة مايكفينيش الوقت مع الجامعة ومانقدرش نرفع مستوايا في الإسبانية ..ندمت والله ...ولكن قدر الله وماشاء فعل.

بالنسبة للكتب :

الفلسفة : كتاب السبيل هذا وجدت فيه ضالتي ووجدت فيه مقالات رائعة ، اما عن التلخيص فهناك كتاب جيّد لسليم بومزبر هو : الانيس في فهم الإشكالية الفلسفية مع مراجعة الكتاب المدرسي فهو نافع جدا جدا ....بالطبع لمن له القدرة في الفهم والتلخيص

التاريخ والجغرافيا عليكم بهذا الموقع :https://www.khayma.com/dahdah/text/tip-templates.html

ابحثوا عن وضعيات في التاريخ ووضعيات في الجغرافيا ..وبإمكانكم مراسلة الاستاذ وهو استاذ فاضل وطيب ونصيحة ماضيعوش وقتكم في حفظ التواريخ سبقو بالمصطلحات والتعريفات ومن الآن ماتخلوش الحفظ إلى الشهور الاخيرة

العربية هناك دروس وضعها الاستاذ مصطفى بن الحاج في التقويم النقدي جيدة تجدونها في النت وفي هذا المنتدى الله اعلم وهي بعنوان : تهذيب دليل الطالب إلى دروس التقويم النقدي ، وكذلك للتمرن على حل النصوص ككتاب المجهتد وحوليات الباكالوريا "سلسلة جسر النجاح "لمنشورات نوميديا

أما اللغات انت وشطاراتكم والتربية حفظ ..

الرياضيات انا الحمد لله كنت علمية لم القى مشكل وتحصلت على علامة جيدة رغم مضايقات الاساتذة بسبب ردائي

ونصيحة الأولى والاخيرة تقوى الله ثم تقوى الله والنية الحسنة ..واحذروا من الذنوب وسوء النية

انا الذي · 2011-10-11, 17:29

معليش اختي وكيما قلتي قدر الله وما شاء فعل
ربي يوفقك في مسيرتك الباقية
وميرسي بزاااف على لمعلومات لي فديتينا بيها
وعلى المراجع
ورح نبذلو جهدنا بربي

على العموم انا لقيت هاد الملف
ملخص مصطلحات ومفاهيم وتواريخ وشخصيات - تاريخ وجغرافيا -

شخصيا انا طبعتهم 11 ورقة وكل مرة نحفظ شوي هكدا في لاخير نلقى كامل تواريخ وشخصيات ولمفاهيم عندي

ونضن طريقة ساهلة كل مرة اخفظ شوي خصوصا لوقت مزال

المهم رفعتلكم الملف وعليكم غير تحملوه
وكل واحد وطريقتو في الحفظ

ملف منظم وبالصور والوان يسهل في الحفظ

وهدي صورة من الملف

وهدا رباط التحميل

https://www.mediafire.com/?2x1ap6wdegkiwxr

يارب رحمتك · 2011-10-11, 17:48

ماشي كلمة مرسي التي اريدها اريد كلمة بارك الله فيك ...

نعم عندي هذه التعريفات ، وانا كنت احفظ من المصفوفة قام بها مجموعة من المفتشين والاساتذة على ما اظن

التواريخ صدقني في آخر المطاف ستجد نفسك مرهق ..دعك منهاالآن ......

شوف اخي الدروس التي في موقع الأستاذ دحدح احفظ منها وماتخاف .....

الفلسفة احذر تحفظ المقالات ..كل مقالة تجدها خذ منها الافكار التي ليست في غيرها واكتبها في كراس وبعد ذلك قم بتلخيص وآخر شيئ اعمل تلخيص لتلخيصك يعني رؤس اقلام ستساعدك في آخر اسبوع ..بالتوفيق

انا الذي · 2011-10-11, 19:58

بارك الله فيك اختي وجزاك الله كل خير وربي يوفقك ويهنيك
وانا رح يكون موقع دحدح مرجع تاني ليا لخاطر صح لقيتو موقع يستاهل
ورح امشي بنصايحك
يقلك صقصي مجرب ولا تصقصي طبيب
على كل حال ربي يجعلهم في ميزان حسناتك
سلام عليكم

benali17 · 2011-10-11, 21:03

الارادة والعزيمة لتحقيق ما تصبو اليه اخي بالاضافة الى الجد و المثابرة واهم شيء الثقة في النفس

قَاسِمٌ.قَاسِم · 2011-10-11, 21:11

السلام عليكم
ساهل إذا احتجتوا حاجة في العلوم الإسلامية راني هنا إن شاء الله
أعتبركم أساتذتي الكرام ونعاونكم باللي نطيق عليها وما نبخلش عليكم
المهم انجحوا برك
وفقكم الله

النقاء · 2011-10-11, 21:15

السلام عليكم عجبتني الفكرة

رائعة

بصح وين التطبيق

شوفو هذه الصفحة ورجعولي الخبر

وهذا المنتدى بكالوريا 2012 لمن يريد تطبيق الفكرة ومساعدة الممتحنين

يارب رحمتك · 2011-10-12, 09:16

أي شيئ انا هنا إخوتي بالطبع إن وجدت الوقت الكافي ...وفقكم الله ...

ramrouma dz · 2011-10-12, 12:51

لي سحق حاجة راني هنا نتعاونو ة ننجحو كامل باذن الله

انا الذي · 2011-10-12, 12:57

ربي يخليك اختي يارب رحمتك وانت تاني رمرومة ربي يحفظكم واكيد رح نحتاجوكم ونديرو لايد فلايد وبربي ناجحين

بصح عندي سؤال
ياخاوتي ياك قلتلكم راني لا علاقة مع دراسة سيرتو بعد 13 سنة بعيد عليها

ياريت تنصحوني بنهجية مليحة للمراجعة واي مادة نعطيها وقت كتر من لاخرى
ويادرى الا درت ليكور - دروس خصوصية - رح تنفعني ولا تشتت تفكيري