جلسات مع orthophoniste لمساعدة ابنك على التكلم

[mereyoucef]

شكرا اختي oum radja بالنسبة لوليدك انتي دايما وين تروحي اديه معاك وتكلمي بشكل مستمر في المطبخ في البيت وانتي طيبي كلش المهم اتكلمي بكلام واضح و مسموع صدقيني هو راهو يسجل و يخزن و حاولي باستمرار انك اتشغليه يعني قوليلو جيب هادي خبي هادي ارمي هادي في الكيس المهم خليه يخدم معاك انا هادا الامر كنت انديرو مع وليدي بزاف و هو صغير صدقيني قاتلي المختصة بلي هادا الامر هو الي خرجو من حالة التوحد الي كان رايح يصرالو لانو لما تندهيه رايح يخدم في الدكاء انتاعو و يكون عندو النبهة و الفطنة و هو صغير ادن اختي من الان نبهيه خدميه ماتقوليش مازال صغير باش تفطنيه و حاولي دايما خليه يهدر واش راحو يحوس (يشرب الماء ياكل يخرج ) ماشي قبالة تمديلو واش يحوس وحاجة اخرى خليه يلعب مع الاولاد هادي ثاني حاجة مهمة بزاف يخرج يلعب رايح بلعقل و بشوي يتكلم معاهم

[oum radja]

يعطيك الصحة اختي في انتظار مشاركاتك

[ام ياسمين10]

شكرا ليك .mereyoucef..اكيد راح يستفادو منك الكثير من الامهات .انا تانى كنت ندى فى وليدى لارتوفونيست وعمره 3سنوات ونصف والحمد لله تحسن كثيرا ودخلتو للحضانة بصح كي تحسن نحيتو منها على البرد وكى يسخن الحال نرجعو.حبيت نحكى على التجربة نتاعى بصح منعرفش ندير موضوع مستقل.

[ام ياسمين10]

اختي قد وضعتي يدك على الجرح

انا اخي الصغير عندو نفس المشكل و عندو 8 سنين

الصراحة مالقيتش اورتوفونيست باش نديهلو

مخارج الحروف ماعندوش مشكل معاهم لكن الجمل عندو مشاكل باش يركبهم

خاصة في بداية الكلام الحرف الاول يعيدو اكثر من مرة مثلا لما يقول : راها قاتلك ماما

يقول: را را را را راها قاتلك ماما
لي يقدر يساعدني مايبخلش اختى وليدك راه عندو تاتاة ولازملو ارتوفونيست قبل ما تتازم حالتو انا كنت نعالج فى وليدى (باش يهدر) عند اورتوفونيست فى البيرين طبيب هايل اذا تحبى تروحى ليه نقلك على اسمو وعنوانو .وان شاء الله رايحة تتدعيلى

[lyna2007]

بارك الله فيك وجزاك الجنة موضوعك مهم ويجاوب على كثير من التساؤولات شكرا لك

[ماريا205]

بارك الله فيك اختي على الموضوع المفيد ونشكروك ياسر اللي افدتينا بتجربتك
اكيد اكيد تنفعنا انا معنديش هذ المشكل مع اولادي والحمد لله لكن هزيت معلومات كثقافة ليا
يعطيك الصحة ان شاء الله تبقاي على تواصل معنا وتنقلينا الجلسات اكيد راح يستفيد الكثيرون

[ام عبد السميع]

شكرا اختي راكي عاونتيني بزاف بارك الله فيك

[mereyoucef]

شكرا لكن جميعا راني ماندخلش بزاف للمنتدى لاخاطر في النهار لما يكون ابني في الروضة نخدم الشغل و نحاول انكملو قبل ما يجي و لما هو يكون في البيت نكون معاه كل الوقت حتى ينام نتكلم و نلعب معاه حتى ينام لهادا ماندخلش المنتدى بزاف لاني نقولها بصراحة اني كنت نجري ورا الشغل و هو مهاملاتو ادا عرفت بلي الشغل يتعاود دايما اما وليدي وقتو ما يتعاودش و نطلب من الاخت ام ياسمين 10 انك تحكيلي عن تجربتك و تحسن انتاع وليدك هنا في الردود انا تاني حابة نستفاد منك
بالنسبة لما تكوني تلعبي مع وليدك حاولي دايما انك تلعبي و تتكلمي و لما يرجع من الحضانة اساليه واش كلاو واش لعبو واش دارو حتى لما مايجاوبكش خليه لكن كل يوم اساليه انا بعد 5 اشهر ملي بدا في الحضانة هادا الاسبوع ولا يجاوبني اعطاتنا طاطا ...... و اليوم رسمنا و درنا ............ حتى لما يخرج عاد يحكيلي واش يصرا معاه .
و بالنسبة طفل الي عندو التاتاة لازم اورتوفونيست صح قبل ما يعقدوه اصحابو

[ام ولي]

بارك الله فيك اختي على هذا الموضوع من فضلك ممكن اسم الاغطوفونيست وعنوانها لآني نبحث على وحدة لأنو عندي نفس المشكل وجزاك الله خيرا

[أم أولادي*]

ياريت لوكان تعطوولنا عناوين اورتوفونيست ملاح في العاصمة شكرا للموضوع
حبيت نسقسي شحال المدة تقدري تميزي الفرق بالتحسن

[ام ياسمين10]

اهلا بيك اختى انا وليدى مين كان فى الحضانة كنت نسقسيه كل الاسئلة لى كتبتيها بصح ميجاوبنيش يعقد ساكت وبعد ما تحسن ولا يهدر ويحكيلى على صاحبو بصح المدة لى قعد فيها فى الحضانة قليلة شهر واحد برك لانها بعيدة على سكنتى رانى حابتو يتعلم الحفظ قالولى دخليه مدرسة قرانية خير من الحضانة وانا فى حيرة بين هاذى وهاذى.اما بالنسبة لجلسات الارتوفونبست قالى بزاف حوايج كلما نتفكر حاجة نقلك اولا قالى اشريلو نشاطات يعنى العاب ذكاء وعلميه يلعب بيهم ونتوما تلعبو كل حاجة قوليلو على اسمها وهو راه يسجل ويجى النهار ويعاودهالك يعنى كيما قلتى انتى تكلمى معاه فى كل وقت وفى كل مكان نرجع للالعاب اشتريتلو كرات صغيرة بالوان مختلفة ومعاها بسينات صغيرة بنفس الوان الكرات ونحط االكرات الحمراء فى البسينة الحمراء والزرقاء فى مكانها حتى نكمل كل الكرات وبهذه الطريقة علماتو يميز بين الالوان وبعد مدة ولا كل لون يعرفو وينطقو مليح وااللعبة الثانية هى اشكال من البلاستيك مربعات ومستطيلات تشتريها من محلات الالعاب اختاريلو السهلة وركبيهالو على شكل منزل او قطار وخليه يبتكر اشكال جديدة ............يتبع

[mereyoucef]

شكرا اختي على هاته المعلومات انا تاني في الصيف رايحة اندخلو مدرسة قرانية بالطبع نشرح للمعلم على الوضعية ديالو و اورتوفونيست هي في عين النعجة قدام المارشي و البرارك هكدا انا وراوهالي و اسمها مسعودي حياة و المدة الي تقدري تميزي بالتحسن هي حوالي شهر الى شهرين و هادا راجع للمجهود ديالك لاخاطر ارتوفونيست هي تعطيك تمارين و افكار انتي للازم طبقيهم و دريهم باش تحسي بالتحسن انا في الحقيقة تركت الدنيا كلها من اجلو نقصت الخرجات الاعراس وووو المهم منحيلوش وقتو خلاص و ايضا كنت و مازلت نشريلو الالعاب الي تنمي الدكاء انتاعو بزاف بزاف و دايما العبي معاه

[فايزة العباسية]

بارك الله فيك اختي على الموضوع القيم حتى انا راني نعاني مع ولدي الوحيد لي عندو قريب 3 سنين ومشكلتو انو عندو صعوبة في نطق بعض الحروف تقوليلو حرف يقولك حرف اخر وتاني ما يركبش جملة ايلا كتر يقول 2 كلمات بلا ما يربط بيناتهم و مرات يبدى يتكلم بوحد اللغة تقولي شنويةولي لاحظتو عليه انو يخزن الكلمات كيما قلتي حتى ولو ما ينطقهمش مليح ان شاء الله نصائحك تفيدني و الله وليت نغير كي نشوف صغار عليه يتكلمو خير منو

[kk1]

شكرااااااااااااااااااااااااا

[nor hayati]

المشاركة الأصلية كتبت بواسطة mereyoucef

السلام عليكم انا ام لولد رائع عمره 3 سنوات لما كان صغير و بحكم الضروف كنت نلاحظ انو قليل الكلام و مايكونش جمل لما الحق السن انتاع الروضة دخلتو فيها هناك لاحظت المختصة النفسية انو مايتكلمش و اتصلت بيا ووووو المهم ابديتلو عند المختصة فعلا كل واحد و اختصاصه بعد عدة جلسات اتاكدت انو ماعندوش توحد الحمد لله كانت كل خطرة تعطيني دروس انقومها معاه في كل مرة رايحة نعطيكم اشياء اتعلمتها منها و ساعدت ابني كثيرا
1-الشيء المهم انك اتبعديه تماما على التلفاز ولما تتفرجي معاه ( ماتخليهش وحدو ابدا) اختاري رسوم متحركة تكون بسيطة و ما فيهاش عنف و ابداي احكيلو كل مايحدث قاتلي هو راهو يخزن في الكلمات
2- من اهم الاشياء انك دخليه الروضة هادا مهم بزاف ليه رايح يحتك بالاولاد ورايح يقلدهم و يتكلم كيما هما
3-كاين حركات ديريها معاه رايحة تساعد عضلات الفم تخدم باش يتكلم وهي ,
1* اشريلو بالونات او نبولات ونفخيهم معاه باش يجبد النفس ديالو راهو تمرين صعب بالنسبة ليه لكن بشوي و صبر معاه وايضا ديريها مثل لعبة .
2* هات شمعة و شعليهالو وقولو يطفيها لما يطفيها قولي bravo ثم بعديها مسافة صغيرة و شعليها وخليه يطفيها ثم شجعيه ثم زيدي بعدي الشمعة و هكدا حاولي في كل مرة بعدي الشمعة و هو يطفي باش يخدم عضلات انتاع فمو.
3* العبي معاه و خرجي لسانك فوق و تحت يمين و يسار و قوليلو يعاندك مع الضحك هادا ايضا تمرين مهم بزااااف ليه و حاولي ديريه كل يوم.

4- كاينة حاجة مهمة هي انك تتحدثي معاه وهو معاك في المطبخ في كل شيء هادي ثلاجة هدا كاس ..........انا كنت نتكلم الحق عييت بزاف حسيت اني كنت نتكلم باطل حتى جا نهار قالي ماما حطيها في الثلاجة انصدمت صح عندها الحق كي قالت راهو يسجل كل شيء و مرة اخرى انزيد نعطيكم اكثر لاني مازالت انتبع عندها و نتمنى اني فدت و لو ام واحدة

بارك الله فيكي انا كذلك عندي بنتي ثقيلة تقول بعض الكلمات فقط عمرها سنتين و اربعة اشهراو ما زال متهدرش بصاح تسمع او تنتبه كي نكون نهدر معها او في بعض الاحيان تقول كلمة تكون سمعتعها بصاح متزيدش تعاودها هههههههههه المهم زيدي فيدينا ببعض النصائح و جزاك الله كل الخير