جلسات مع orthophoniste لمساعدة ابنك على التكلم

[mereyoucef]

السلام عليكم انا ام لولد رائع عمره 3 سنوات لما كان صغير و بحكم الضروف كنت نلاحظ انو قليل الكلام و مايكونش جمل لما الحق السن انتاع الروضة دخلتو فيها هناك لاحظت المختصة النفسية انو مايتكلمش و اتصلت بيا ووووو المهم ابديتلو عند المختصة فعلا كل واحد و اختصاصه بعد عدة جلسات اتاكدت انو ماعندوش توحد الحمد لله كانت كل خطرة تعطيني دروس انقومها معاه في كل مرة رايحة نعطيكم اشياء اتعلمتها منها و ساعدت ابني كثيرا
1-الشيء المهم انك اتبعديه تماما على التلفاز ولما تتفرجي معاه ( ماتخليهش وحدو ابدا) اختاري رسوم متحركة تكون بسيطة و ما فيهاش عنف و ابداي احكيلو كل مايحدث قاتلي هو راهو يخزن في الكلمات
2- من اهم الاشياء انك دخليه الروضة هادا مهم بزاف ليه رايح يحتك بالاولاد ورايح يقلدهم و يتكلم كيما هما
3-كاين حركات ديريها معاه رايحة تساعد عضلات الفم تخدم باش يتكلم وهي ,
1* اشريلو بالونات او نبولات ونفخيهم معاه باش يجبد النفس ديالو راهو تمرين صعب بالنسبة ليه لكن بشوي و صبر معاه وايضا ديريها مثل لعبة .
2* هات شمعة و شعليهالو وقولو يطفيها لما يطفيها قولي bravo ثم بعديها مسافة صغيرة و شعليها وخليه يطفيها ثم شجعيه ثم زيدي بعدي الشمعة و هكدا حاولي في كل مرة بعدي الشمعة و هو يطفي باش يخدم عضلات انتاع فمو.
3* العبي معاه و خرجي لسانك فوق و تحت يمين و يسار و قوليلو يعاندك مع الضحك هادا ايضا تمرين مهم بزااااف ليه و حاولي ديريه كل يوم.

4- كاينة حاجة مهمة هي انك تتحدثي معاه وهو معاك في المطبخ في كل شيء هادي ثلاجة هدا كاس ..........انا كنت نتكلم الحق عييت بزاف حسيت اني كنت نتكلم باطل حتى جا نهار قالي ماما حطيها في الثلاجة انصدمت صح عندها الحق كي قالت راهو يسجل كل شيء و مرة اخرى انزيد نعطيكم اكثر لاني مازالت انتبع عندها و نتمنى اني فدت و لو ام واحدة

[زهرة الشرف]

شكرا على الموصوع الله يفرحك بيه

[**افنان**]

بارك الله فيك اختي كاين اولاد مثله اكيد رايحة تفيدي الامهات وشكرا

[حواء 19]

السلام عليكم اختي وش نقولك كي شفت موضوعك فرحت بزاف لاني راني نعاني بزاف مع ابني راه عندو 3سنوات و 5 اشهر انا ابني كي يعود يهدر يخلط و ساعات قليلة وين ينطق كلامات صحاح بالرغم من اني نتكلم معاه وننطقلو الكلمات جيدا و لكنه يشاهد التلفاز كثيرا و تعلم كلمات من قناة طيور الجنة مرضت انا كي نشوفو يهدر هاكداك و يتقطع قلبي عليه باباه ما حبش يديه lorthophoniste ما حبتش تدخلو في راسو هادي الفكرة و انا عندي ولدي يقرى و لوخر صغير يرضع كون جات ضروفي تسمحلي ديتو وحدي وش نقولك ربي يشفي وليداتنا و يجازيك ربي خير على ما تقدمينه و راكي عاونتيني بزاف بزاف و شكرا

[hindoucha02]

شكرا لك أختي الفاضلـــــة على هذه المبادرة القيمة جعلها الله في ميزان حسناتك، ابنتي عندها 2 عامين و لا تتكلـــم سوف أستفيد جدا من المعلومات التي سوف تقدمينها لنا .شكرا مرة أخرى.

[sarfai]

wana 3andi wlid 3amti 9rib yedkhol lta7dhiri wmayahderch lssano t9il yGol klmate 9lale had el3am dakhloh leldjama3 ya9ra 7fadh chuia swar lakin ghir omo wkhwato eli yefhmoh ki ykon ya9ra fihom eda ta3arfou kach tbibe y3awno 3la notte9 rabi ydjazikom 3la fikra hwa yesken fe tissemsilt wles ville el9rabe lih homa tiaret w chelf

[أم همام 2015]

جزاكي الله خيرا افدتني كثيرا

[نورالهدى بيولوجيست]

اختي قد وضعتي يدك على الجرح

انا اخي الصغير عندو نفس المشكل و عندو 8 سنين

الصراحة مالقيتش اورتوفونيست باش نديهلو

مخارج الحروف ماعندوش مشكل معاهم لكن الجمل عندو مشاكل باش يركبهم

خاصة في بداية الكلام الحرف الاول يعيدو اكثر من مرة مثلا لما يقول : راها قاتلك ماما

يقول: را را را را راها قاتلك ماما
لي يقدر يساعدني مايبخلش

[ساندريلا]

المشاركة الأصلية كتبت بواسطة nour el houda--cqa

اختي قد وضعتي يدك على الجرح

انا اخي الصغير عندو نفس المشكل و عندو 8 سنين

الصراحة مالقيتش اورتوفونيست باش نديهلو

مخارج الحروف ماعندوش مشكل معاهم لكن الجمل عندو مشاكل باش يركبهم

خاصة في بداية الكلام الحرف الاول يعيدو اكثر من مرة مثلا لما يقول : راها قاتلك ماما

يقول: را را را را راها قاتلك ماما
لي يقدر يساعدني مايبخلش

سلام اختي
بالنسبة لاخوك لااااااااازم تبعوله عند المختص راه عنده تأتأة و الوضع سيتأزم عندما يكبر و يخرج مع الاصدقاء
عندي ابن عمي عنده 16سنة ان يعاني من هذا المشكل.و تبع عند طبيب نفسي و الحمد لله تحسن بزاااااف ورجع يركز على الحرف الاول قبل ما ينطق
ما تخلوهش يعاني و ربي يشافيه ان شاء الله

[ساندريلا]

مشكووووووورة أختي على موضوعك الراااااائع
لما سألت عن ابني كنت كتبت رد و طلبت الأخوات منك المساعدة
و الحمد لله على اجابة طلبنا
أكيد رايحة نستفييييييد بزاف مع ابني من تمارينك
ربي يشد لك وليدك
وبارك الله فيك على الافادة أختي

[أم أولادي*]

سلام موضوع مفيد شكرا حبيت نسقسيك شحال من خطرة تديه في الاسبوع واذا تديه عند الخاص ولا عمومي اذا خاص شحال تدفعيلها النقود حبيت نعرف التفاصيل باش ندي بنتي شكرا مرة اخرى ربي يرزق الشفاء لجميع اطفالنا

[nihale89]

السلام عليكم
حتى ابني في عمرو 3سنوات عندو تاتاة اي يعيد الحروف الاولى ويتقطع نفسو مايحي خرج الكلمة بالسيغ
كانت تجي وتروح وضرك ولا ت حادة والله مقلقني بزاف
الي عندها حل تفيدنا بيه واجركم على الله

[mereyoucef]

شكرا بزاف للاخوات على التفاعل معي انا في الحقيقة نسكن في العاصمة وندية عند واحدة privee لاخاطر جربت عمومي لكن كل خطرة كيفاش ( مرة تجي متاخرة مرة مجيش مرة يبدلوها مرة تخدم معاه بالتشناف ووووو) وليت نديه عند واحدة جاية في عين النعجة الحق عندها سنوات تجربة 2 خطرات في الاسبوع كل حصة ب 700دج

[mereyoucef]

بالنسبة لما يكون الطفل صغير ويبدا يحب يهدر انا الغلطة الي كنت انديرها مع وليدي (بحكم انو الاول ديالي و معنديش تجربة) كنت نروح نجري نعطيلو كلش بلا ما يحاول يهدر ياكل يشرب يلعب ووو بالا مانفيق ماخليتوش يحاول يتكلم لاخاطر كنت نخدمو و نفهمو بلا ما يهدر alors المختصة قاتلي بلي هو بالنسبة ليه علاه يهدر ادا كلش يحضر قدامو علاه هو يكسر في راسو و هدي ااغلطة الي درتها معاه ادا انت وهو صغير ديري روحك مافهمتيش واش راهو يحوس باش ينطق و عوديه في كل مرة يعني استفزيه باش يتكلم و نحيلو الطبيعة انتاع الاشارة يعني ايوريلك بيدو الحاجة قوليلو دايما مافهمتش واش تحوس رايح يهدرها عاجلا ام اجلا

[oum radja]

يعطيك الصحة اختي موضوعك راح يفيدنا خاصة انو ماكانش اورتوفونيست وين راني عايشة
انا ولدي عنده 20 شهر بالضبط وكي كان عنده عام بدا يقول بعض الكلمات القليلة ومن بعد حبس و علا بالي بلي المشكل راه في المشاهدة المستمرة لقناة طيور الجنة انا ماكنتش نعرف بلي رايحة تأثر عليه وراني نادمة بالزاف لي خليته يتفرج ليها طول الوقت
المهم هو الان يفهمني كي نقوله هاك ولا ارواح تاكل بالصح مرات يجيني احساس بلي ماراهش يسمعني نعيطله مايتلفتش خلاص
نتمنى انك تعطينا المزيد من النصائح باش نعاونو وليداتنا باش يتكلمو وربي يجازيك كل خير