وصفة لقريوشة ...... بآلة جديدة

fatimazahra09 · 2014-06-20, 21:17

السلام عليكم

في الحقيقة هادا نوع من قريوشة تكونو اكيد شفتوه من قبل .... انا جربت الوصفة بالسمن وماصلحتليش .... قررت اني نقعد نجرب ونجرب ونجرب في الوصفات حتى تجيني مليحة ومفخفخة وبنينة اكيد كيما يحب الخاطر ... المهم اعتمدت هادي الوصفة و لي هي . 3 عبارات فرينة اي 1 عبر فرينة بالكيل = 125 غ اي انا حطيت 375 غ
و 1/2 عبر زبدة التوريق دائبة = 113.5 غ .................اي 1عبر زبدة يساوي 227 غ ..... وعلى فكرة ماناش نقرو في الرياضيات .... وكيما يقولو
faire des gâteaux ce n 'est pas résoudre des problèmes mathématiques
بغيت برك نفهمكم الكيلات بالميزان فقط
فاني + 1/4 كيس خميرة كيمائية . انا مانديرش الملح في القريوشة لي تفادي الفقاعات ... بالاك راكم مجربينها مع بورك العجين .... تخلطي كامل المواد وتبليها بماء دافيء وماء زهر بش ما ديرش الحبيبات . و هنا تبغي ديري البيضة او لا ... رايحا تجيك + كروستيونت اكثر بلا بيضة ... بفعل زبدة التوريق لي ولاو يديرو بيها تقريبا كلشي ... ... و شوية شوية هشوشة بالبيضة ....مليحة برك ..... لان كيما نعرفو الصفار وحدو يطري الحاجة وكي ولات بيضة كاملة مارايحش يبان مفعول بياض البيض لي هو في الاصل وين ما ديريه وفي اي وصفة رايح يقرمشلك الحاجة ... علاه مثلا في الصابلي نستعملو غير الصفار .......قلت مفعول بياض البيض ماريح يدير والو امام زبدة التوريق .......
تلميها برك تكون عجينة ماهي يابسة ما هي طرية بزاف ......ماتعجنيهاش رايحا تعجني في الة البقلاوة من بعد ...
هنا نمدلك المقادير بكمية كبيرة : 9 كيلات هي بالظبط 1 كلغ و 25 غ مقدار 1/2 م ك .... و الزبدة تحطي ...1/2 عبر مكرر ثلاث مرات بالمعنى = 340.5 غ ....اوزني مباشرة 350غ ودوبيها ...+1كيس كامل خميرة كيمائية .
وتحطيها في كيس بلاستيكي او تلميها في فيلم اليمونتار .....تخليها تريح في الثلاجة على الاقل 4 ساعات ... وتحلي بالحلال هو الاول ثم بالماشينة نتاع البقلاوة ... تبداي برقم واحد ... تحلي العجينة فيه وانتي في نفس الوقت راكي تعجني فيها ...بالمعنى حلي و عاودي طبقي و حلي وعاودي طبقي كيما تبقي البارمي .... عاودي هادي العملية على الاقل 4 مرات وفي رقم 3 لي تبداي ترشي وتحلي بالمايزينة ... كملي وحلي في الرقم الاخير لي هو 5 .
انا استعملت هادي الآلة لي سهلت عليا بزاف المهمة وبها مارايحاش دوري لا ادروات لا اقوش ....ههههههههههههه.
المهم فوتي هادي الالة على شريط العجينة في الوسط تماما واضغطي شوية باش تتمركا الخطوط ... مارايحاش تقطعهم لاكن تمركي فقط .... انتي عاودي بالجرارة فوتي ... وحاولي تحلي على الاقل تشوفي بعينك راهو باقي 0.5 سم على الحاشية ...
هادي الطريقة رايحا تخلي القريوشة في القليان تتفتح اكتر وتصيب ليتساع باش تتنفخ ...... و ما يجوكش الاطراف خشان ...
المهم انا جربت حليت 16 شريط و كي قليت الحبة جاتني مليحة لكن كبيرة بزاف ...بالمعنى ضخمة ... تقعدي نصف ساعة باش تكمليها في دارك ... وعند الناس اكيد تقعدي ساعة ...ههههه.
المهم حليت 12 شريط فقط و طويت .... كل مرة احسبي 4 شرائط واقلبي ... رايحا هنا تقلبي 2 مرات فقط ....افتحيها في الوسط تماما ... ودخلي الجهة العلوية في الوسط ووخرجيها ... والله بدون قصد نسيت باش نصور هادي المرحلة .... ولا كنتي موالفا تمشطي للبنات اكيد رايحا تعرفي الطريقة .....هههههه
المهم اقليهم في زيت سخونة و ماشي على نار قاوية و دايما جربي قطعة من لي شوت اقليها هي الاولى .... وما تخسريش حبة .

انا هادي نصيحة مدتهالي ما حبيبة و لي هي جداتي ... الله يرحمها برحمتو ... كانت دايما تقولي عمرك ما تعسلي القريوش في نهارو ... خليه يبات وعسليه ..... وحقيقة كاين فرق بين تعسلي تم تم وتعسلي الغد من داك .
رشي شوية جلجلان وحتى باييت اليمونتار دوري يجو يهبلو ....... ان شاء الله تكونو ستفدتو من الطريقة .
هادي الحبة نتاع 12 شريط

هادي الحبة نتاع 16 شريط

وعلى فكرة الالة رايحا ان شاء الله نديرلكم وصفات اخرى بيها ترقبو ان شاء الله .
سلامي الحار ليكم ....
وعلى فكرة هادي الالة ثمنها 350 دج
ماتنساونيش في دعوة خير حبيباتي .... من القلب طبعا

انتصار فاطنة · 2014-06-20, 21:23

انا الاولى اللي رديت ندي الصحن تبارك الرحمان على الخدمة المتقونة

fatimazahra09 · 2014-06-20, 21:30

اقتباس:

المشاركة الأصلية كتبت بواسطة الحزينة بجدارة

انا الاولى اللي رديت ندي الصحن تبارك الرحمان على الخدمة المتقونة

اديه كامل ماشي خسارة فيك حبيبتي
شكرا
الله يخليك

الحركاتية · 2014-06-20, 21:24

الله يبارك خرجلك روووووووووووووووووعة
وهديك الآلة عملية وتربّح الوقت

fatimazahra09 · 2014-06-20, 21:32

اقتباس:

المشاركة الأصلية كتبت بواسطة الحركاتية

الله يبارك خرجلك روووووووووووووووووعة
وهديك الآلة عملية وتربّح الوقت

شكرا حبيبتي و الله يبارك في عمرك ان شاء الله
و الله غير عملية للهيه .... دقيقة كملت ما حطيت مسطرة ماحطيت حاجة اخرى نعبر بيها كيما موالفة
سلامي الحار ليك حبيبتي .... وشكرا على التقييم ......

oum tesnime · 2014-06-20, 21:33

فوووور بزاف الله يعطيك الصحة أختي

fatimazahra09 · 2014-06-20, 21:48

اقتباس:

المشاركة الأصلية كتبت بواسطة oum tesnime

فوووور بزاف الله يعطيك الصحة أختي

انتي لي لـ coooooooooooooooooooooooooooooooool
ياتيك الصحة
بارك الله فيك

ام اريام · 2014-06-20, 21:33

انشاء الله انا اول من يرد و نقولك يعطيك الصحة اختي روعة كنت نبحث على القريوش لقيتك حطيتي الوصفة جزاك الله كل خير و الله يرحم جداك

fatimazahra09 · 2014-06-20, 21:52

اقتباس:

المشاركة الأصلية كتبت بواسطة ام اريام

انشاء الله انا اول من يرد و نقولك يعطيك الصحة اختي روعة كنت نبحث على القريوش لقيتك حطيتي الوصفة جزاك الله كل خير و الله يرحم جداك

الله يجازيني ويجازيك و يرحم كامل موتانا يارب
القلوب عند بعضها...
ان شاء الله نكون عند حسن ظنك وظن كامل المشاركات
جربيها و ما تندميش ..... انا درتها لـ بابا اليوم جاني ضيف .... و فرحت لمجيتو بزاف و كيما علابالي يحب القريوش قلت ندوجدهالو و هادي المرة بالالة الخاصة هادي ....
و الله غير فرجة ...
سلامي الحار ليك حبيبتي