ماذا افعل لا وقت معي ولا حل ...

[مشكلتي]

السلام عليكم و رحمة الله و بركاته
صباح الخير على الجميع
صراحة البارح مارقدتش خلاص سوفريت و انا نحوس على الحل ماصبتوش ..مابقالي غير ربي سبحانو و انتوما بسكو حكايتي مانقدر نحكيها حنى لواحد لا فامي ولا صحا ,اسمحولي نطول عليكم شوي و عاونوني يعاونكم ربي +اسمحولي نحكي بالدارجة باش نوصللكم
انا راجل عندي 27 سنة مدرس رياضيات فالثانوية متزوج من حوالي 4 اشهر زوجوني لافامي من وحدة مانعرفهاش ليسونسيال بنت صاحب بابا لانتيم و قالك متربية و عاقلة وطبيبة... بعد شهر و نص من الخطبة تزوجت من قبل حكيت معها مرتين و لا ثلاثة بانتلي غامضة و كل مرة تحب تقول حاجة وماتقدرش.؟؟؟ ليسونسيال نهار عرسي بعد قاتلي الطفلة هادي راهي فقدت عذريتها كي كان عندها 15 سنة و ماهيش تلزمني بحتى شي شوكيت انا راسي حبس قاتلي اديني نروح ..شفني باباها و خوها ناس ملاح وشفتني هي بعد قتلها اقعدي شهرين و مبعد كل واحد يروح لحالو قاتلي ماعليش .فالاول كرهتها ماتتصوروش شحال و احتقرتها هي في شمبرا و انا في شمبرا و مكاش خلاص هدرة بيناتنا فاتت السمانة الاولى و الثانية وليت نلاحظها هكا كل ماندخل نصيبها تصلي .تقرى القرأن مرات تبكي الدار ديما نظيفة مالgري تروح تخدم بصح ديما العشا كاين ملابسي و حوايجي ديما نظاف مرتبين جامي رجعت للدار و مالقيتهاش تما صدقوني نشوف فيها مرأة مثالية حتى من الاولاد الصغار تاع الجيران ديما نرجع نلقاهم في داري تلعب معاهم و يحبوها بزاف خلاص تعاونني فالخدمة تصححلي الاوراق تاع الاولاد كي مرضت مارقدتش دقيقة مالقري انا كي مرضت مافيباليش حتى صبت الدواء فالخزانة و زيد فالاول تبان عادي مي ذركا نشوف فيها اية فالجمال؟ ..بديت بشوي نميل ليها و نحبها بالبزاف مي الله غالب مانفدر لا نحكي معاها و لا حتى نشوف معاها و هي كيف فاتو شهرين قاتلي كيفاه ؟ قتلها زيدي شهر باه مايبداوش الناس يحكيو و انا صراحة مابغيتهاش تروح المهم هي ماقدرتش تسامح روحها رانا فالشهر تقريبا الرابع عيطت لباباها و خوها قاتلي نحكيلهم ماحبيتش نكون ثقل عليك اكثر ليسونسيال جاو و حكاتلهم و انا حاظر مسكينة ظربوها و اهانوها و ماقدروش يشوفو حتى معايا مين حشمو مني و انا مالقيت كيفاه نعمل وقفت مشوكي ؟؟ المهم تأسفلي باباها و قالها غدوة نجي نوصلك "اليوم يعني " بغيت نقولو لالا راني نحبها و ماقدرتش صراحة خايف نندم مبعد وانا والله ما بغيتها تروح بصح درك روطار ؟؟+راني لذرك ماحكيتش معاها نورمال و ماقعدتش معاها خايف مايتخرجش كيما فبالي ؟؟
واش ندير راه مابقاش في يدي وقت و ماكاش حل ؟؟عاونوني راها حياتي تضيع ....
و السلام عليكم

[فارس الجزائري]

وعليكم السلام ورحمة الله
يا أخي من ستر مؤمن ستره الله يوم القيامة ومن خلال كلامك الزوجة صالحة وهي لا تفرض عليك نفسها بالبقاء
فلك أن تمسك ويكون لك الأجر الكبير عند الله ولك أن تسرح مع كتمان الأمر وجزاك الله على ذلك
وأنا أعرف شخصا تزوج فتاة من الحانة (موطن الفساد خمر ونساء ) وهي الآن يظرب بها المثل في الأخلاق والصلاح
تصور بعد ما كانوا يقولون عنها....... الآن هي ست البنات بما تقوم به من أعمال وطاعات لله
استخر الله وتوكل
بالتوفيق إن شاء الله

[anoire-bec]

تمسك بزوجتك اذا كنت تحبها ولا تبالي برأي غيرك فيها
وفقك الله

[samssou]

يااخي كما قال لك الاخ فارس من ستر مؤمنا ستره الله يوم القيامة انا نقولك مادامها انسانة صالحة ومتقية لله فتمسك بها اخي وعفا الله عما سلف علابالي ماش حاجة ساهله بصح انظر فيها الى الاشياء التي اسرتك وارجعها الى بيتك وربي يدوم المحبة بينكما اخي ويرزقكما الذرية الصالحة ولا تنسى ان الله هو المستعان .

[free_voice]

السلام عليكم

قضيتك أخي الكريم تحدد مصيرك و حياتك . و هي قضية لا تحتمل المزايدة و لا يمكن أن تربطها بتفكير أحد آخر

غيرك . تكمن الاجــــــــــــــــابة في داخلك مهما تشتت أفكارك مهما شعرت بالضغط أنت الوحيد سيد قرارك .

يمكن أن تسأل نفسك ماذا كنت تتمنى قبل أن تتزوج أن تكون زوجتك ؟

وهل كل فتاة عذراء يمكن أن تصبح في يوم زوجة صالحة ؟

وهل مشاعرك تجاهها مشاعر حب أو مشاعر شفقة واحساس بالذنب ؟

بغض النظر عن مشكلها فهل ترى فيها زوجة صالحة تفهمك كما تريد؟

هل تستحق فرصة أخرى ؟

و تذكر أنك أنت من يحدد قرارك لا التقاليد و لا الاعراف و لا حتى شيء آخر .

[نيروز الجزائرية]

استرها اخي ربي يسترك استرخا اخي ربي يجازيك الخير
لو كانت فيها الحيلة لوكان ما قالتش لباباها واخوها ولوكان ما طلبتش منك الرجوع
اتكلم معاها وخذ منها عهد ان تكون نعم الزوجة
استخير واتوكل على ربي

[- بصمة خير -]

ربي يكون معاك و يفرج همك

نصيحتي ليك خليها عندك و استر عليها و لكن مازيدش تهدر على الموضوع هذا خخخخخخخخلاص لانو تولي مذلة

و لكن قبل ما تقرر ترجعها صلي الاستخارة و اذا كان فيه خير ربي يكملك ان شاء الله

نعرف قصة مرة واحد تزوج بوحدة ماهيش عذراء و ستر عليها و الله دار الزمان و الله هي اللي ستر عليه في قصة كان ممكن يروح فيها خخلاص

ربي يوفق

[hamzagolf6]

خو انا صغير بزاف على هاذ المشكال نتمنى لك تتسقم امورك وربي يهنيك

[عُضو مُحترم]

اكمل حياتك معها و ربي يجازيك

[نجمة ساطعة]

يكفي انها صارحاتك و لم تخدعك .... 15 سنة صغيرة كانت مراهقة ربما تم التغرير بها
بما انها تابت .... شوف اعتبر تكملة زواجك معاها تجربة .... اعطيها فرصة اذا شفت
ان هذه الفتاة بقيت كما هي عليه كيما حبيت تصرافتها راح تححبها كزوجة
احتسب هذا لله و ربي صدقني راح يسترك يوم العرض يوم لا ينفع لا مال و لا بنون

[أبو صهيب ناصر السنة]

السلام عليكم




أنت تقول أنك تخشى أن لا تكون كما ظهر لك (يعني تخاف أن تكون تمثيلية و هذا وارد)..أخي أنت لن تخسر شيئاً لو أمسكتها .. ففراقها بيدك في أي وقت ..أعطها فرصة أو بالأحرى أعطي نفسك فرصة إن كنت تريد أجر سترها حتى تتأكد من صدق توبتها .. والله سيأجرك على صدق نيتك . لكن أنصحك بأمرين
1- تأكد أنك نفسياً ستتأقلم مع الوضع وتسامح
2- لا تمسكها وتعاملها من منطلق الشفقة أو من باب أنك صاحب الجميل والفضل عليها أبد الدهر ..


أخيراً تذكر كم من ذنب أذنبته أنت من الكبائر ستره الله عليك ربما أكبر من ذنبها الذي اقتضت حكمة الله أن يبقى أثره ... ولا تنسى رباً حكيماً أمرك أن تلجأ إليه في الشدائد بالدعاء والاستخارة

.

[khado586]

golalha bli thabha wsayi matkhalihach trouh manak

[فاطمة_26]

استرها ربي يسترك هي غلطة غلطة نتاع الصغر نورمالمو ما تتحاسبش عليها وتخيل ربي سبحانه اللي خلق قاع هاد الدنيا يسامح وحنا العباد نتاعو ما نسامحوش استرها وخليها في دارك رايح ما تنساهالكش ما تخليهاش تروح لدارهم باين بلي يديرو فيها حاجة ولا يكرهولها حياتها قكن اخي السبب في سعادة انسانة لا تعاستها ووفقك الله

[نورالهدى**]

كل بني آدم خطاء




ربي سبحانه يعفو ويسامح

ونحن لما لا ؟؟؟

[اريج16]

اخي انت من شهدت للفتات بحس الخلق وغيرها من الصفات الجميلة التي يتمنها كل رجل فلماذا تضيع هذه الجوهرة الثمينة من بين يديك لقد تابت ونتى بديت تميللها اخي هي زوجتك فلا تفرط فيها وتركها في عصمتك واحول ان تتقرب منها فهي زوجتك حلالك
ويبقى الامر في الاخير لك