وصفة سحرية لادرار الحليب

[SS86]

شفت حنا الجزايريات دايما كاين مشكل الحليب و المرأة ما تقدرش ترضع مدة طويلة
.هاذي حلبة يعملوها المشارقة للوالدة ومفعولها مجرب ،صديقتي قاتلي كي توكلها حتان يولي بنها يجيف من قوة الحليب لكن شرط انو تعمليها على الاقل 3 ايام متتالية حتى جيب فايدة وحتى انها تزيد في شهية الرضيع لانها تمر في الحليب
. شفتكم تهدروا على الموضوع نضت طيبتها باه نصور المراحل والله القادر على كل شي هذي فقط اسباب ناخذ بها
هذا المقادير تاع مرةواحدة
نبداو بسم الله
اولا النار لازم تكون قلييييلة طول مدة الطهي
قلي معرفة صغيرة حلبة في شوية زبدة حتى يتبدل لونها لكن احذري تتحرق يولي طعمها مر[]


زيديلها كاس ماء مملوء و خليها طيب على نار ضعييييفة
خذي كاس حليب فايض و بارد ذوبي فيه ملعقة اكل فرينة و ملعقة اكل سكر
لما ينشف تقريبا الماء تاع الحلبة أو تشوفيها ولات طرية صبي هذا الخليط كي الخيط ونتي تحركي واستمري في التحريك حتى يغلي الخليط و يصبح كي المحلبي طفي عليه وتقدم ساخنة و مزينة بالقرفة انا هنا ماكانتش عنديو


الحلبة بها تجيب فائدة لازم تكليها هيا والعصارة تاعها ،التيزانة وحدها ماتكفيش وزيد لازم تكليها 3 الى 5 ايام متتالية توقفيها مدة ثم تعاودي الوصفة هذي متوليش فيك ريحة الحلبة اطلاقا ،المشرقيات شفتهم ما عندهمش مشاكل خلاص في الرضاعة زيد عليها اكل البيض مفعولو مليح ايضا ،عند الصينين الرضاعة تعتمد على شرب الماء كثيرا مع اكل البروتين والسمك وكل اكل المرضعة يكون عبارة عن حساء ،عند الامريكان الشوفان و الدجاج هم سر الحليب.
اضا عزيزاتي حاولوا تكثروا الشوربات ممكن حساء خضر و كثري فيه الكرافس مع بيض مسلوق وجبة متكاملة و متسمنش أو يمكنك ايضا ديري شربة عاديةبالجاج و في مكان الفريك ديري شوفان مع التركيز على شرب الماء وان شاء الله يدر الحليب
الله يقوي كل ام و يدر فيها الحليب ،اللهم امين. نتمنا جربوها أو فقط ادعولي دعوة خير راني محتاجتها كثير الله يهديني و ينولني مرادي قريبا ان شاء الله