وصفات من حراير مطبخ وش طيبتي اليوم

[lahna moka]

صابلي بمول السيليكون yasmalak
المقادير:
500غ زبدة
1 كاس و نصف سكر ناعم
5 بيض
ملعقة عصير الليمون
م ك فانيلا
رطل مايزينة
1 خميرة الحلوى
فرينة
التحضير
نخلط الزبدة ونضيفلها السكر والبيض وعصير الليمون والفانيلا و ونشاء وخميرة الحلوى والفرينة
نعجن و نشكل كريات و نحطهم في مول السيليكون
دخليهم الفرن
في الوسط عمري بالجولي
وهدا مول السيليكون اللي خدمت بييه

[أم ماجد]

المحاجب لام ريمة
العجينة عندك 2خيارات
1تعملي عجينة تاع محاجب نورمال بالصح ماتكونش طرية
انا اذا السميد مليح نعمل سميد وملح وماء بارد وشوي كربونات باش ما تديرش الجاير اي الحريق واذاالسميد شوي نزيد معاه الفرينة بالصح السميد يكون اكثر
ونبلها ونخليها ترتاح ثم نبدى نعجن لما تتعجن نبدى نسقي فيها بالصح مانطريهاش
ونحطها في كيس ترتاح مليح ثم نلوزها ونحلها بالقراص باش ما تتثقبش ونرشها بالزيت ونعمل الحشو ونغلفها ونطيبها وكل ما نقلبها نرش بالزيت
2 نعمل كسرة رخساس نفس وصفتي لي حطيتها موضوع فقط ما نعملش المنكهات نعمل خميرة القاطو برك ونفس الطريقة تاع الرخساس
ثما نحلها نفس الشيء بالقراص رقيقة خلاص لاقصى حدونندهن بالزيت ونحط الحشو ونغلقها ونطيبها بنفس الطريقة الاولى

الحشو او الشكشوكة
نعمل قطع مسلي ونرققهم بالموس +شوي ايدام تاعو +لحم مرحي +كمية مليحة بصل رابي والملح +فلفل حار وحلو نرحيه ثاني في الروبو ونخليها تطيب لماتبدى تنشف +كمية مليحة طماطم كعب مرحية ثوم +افاح طماطم كونسونتري هريسة ونخليها تطيب حتى نشف نطفي عليها ونزيد ليها سنارية رابي
نخليها تبرد ونحشي بيها

وصفة دائمة الحمد

[ام سراج وملاك]

قاطو اقتصادي اسماء 47

درت 3 بيض + كاس سكر + كاس الا ربع زيت+2 م ك نشاء+1 خميرة حلوى+فاني او زاست قارص+نلم بالفرينة نحلها حوالي 0.5 سم نقطعها دوائر ندهنهت بخليط من الصفار و الكاكاو و ندير خطوط و الى الفرن ساهل و اقتصادي

[ام سراج وملاك]

lange de chat ام سهام02

langue de chat

المقادير
1كاس بيض+نصف كاس سكر + نصف كاس فلان فاني+كاس زيت + 3/4 كاس ميزينة+ قشور البرتقال و قشور الليمون + باكي ونصف خميرة حلوى + رشة ملح + نجمع جميع

المقادير بالترتيب بالفرينة حتى نتحصل على عجينة طرية كيما الكروكي .خليها ترتاح 5 دقائق و مبعد ديري يدك في الزيت ثم شكليه ومبعد حطي السطح التاعو في السكر وحطيه في

صنية مدهونة بالزيت او ورق الشمع والى الفرن على درجة 180 دقيقة .

[ام سراج وملاك]

كوكا lahna moka

كوكا:
للعجينة: تاخذي 400 غ فرينة و تحطيلها نصف ملعقة كبيرة سكر عادي و ملعقة كبيرة مملوءة خميرة الخبز الفورية و تخلطي ثم تزيديلها 2 الى 3 ملاعق زيت (صراحة انا نستعمل زيت الزيتون يعجبني اكثر) و حكي شوية ثم أضيفي الماء الدافيء مع رشة ملح و لميها للحصول على عجينة طرية اعجنيها جيدا جيدا حتى تسمعيها تخرّج فقاعات خليها في اناء و غطيها بكيس فوقو منديل و خليها حتى تخمر تماما حوالي نصف ساااعة في مكان دافئ
حضري الحشوة تاعك اللي حبيتي. أنا ندير لحم مرحي نقليه مع شوية بصل و ثوم و حبة طماطم و توابل على النار حتى تنشف و نزيدلها في الاخير رشة سخية قصبر مقطع
نحل العجينة تاعي الى سمك نصف سم و نقطع دوائر بكاس و نحط الحشوة في المنتصف و نغلقها لنشكل نصف دائرة (ندهن شوية الحواف بالبيض باش ما تتحليش أثناء الطهي) نغلق الاطراف بواسكة شوكة بالضغط عليها و ندهنها بصفار بيض المخلط مع قطرات خل و ندخلها للفرن السااااااااخن و تطيب بلخف حوالي ربع ساعة فقط و نتي على حساب الفرن تاعك
ملاحظة مهمة : باش المعجنات اللي فيها خميرة الخبز تجيك طرية و هشوشة أبدا ما تنقصي للفور تاع بل لاااااااااازم يكون في درجة حرارة عالية و الا رايحة تخرجلك قاسية
راقبي النضج و نتي على حساب ما تحبي التحمير يعني تخليها تتحمر كثيرا او شوية برك كيما انا

[idron0]

الدويدة مفورة دائمة الحمد
نعمل صوص بيضاء او حمراء
لكان حمراء ماتكثريش الطماطم طيبيها عادي بالحمص واللحم اوالدجاج لما تطيب صفيها ونحي اللحم والحمص بجيهة ولازم تكون ماهيش ياسر وماهيش ناشفة
اكثر من تاع المقرونة واقل من تاع التليتلي روحي افهميها انت ذرك ههههههههه
هزي رطل دويدة او اكثر او اقل حسب الاسرة واعملي عليه الزيت وافتليها شوي وحطيها تفور وما تغطيها ش هذي التفويرة الاولى
لماتفور نزليها ورشيها بكمية قليلة جدا ماء وافتليها وخليها ترتاح شوي وحطيها تفور وزيدي عاودي العملية هذي مرتين اخرين بالكل4 تفويرات
ثم حليها وحطيها في المرقة تاعها ليتكون سخونة مليح واعملي من فوق طريف صغير زبدة واغلقي عليها الكوكوط ونقصي النار خلاص وخليها وحد 5 دقايق ثم قوي عليها وطفي ثم ثم وماتنحيش السيفلي اهكذاك حتى تجي تسربي على خاطر تكمل طيابها بالبخار
وزينيها بالبض والزبيب مفور مع الحمص واللحم والفلفل مرقد وشهية طيبة.

إضغط هنا لرؤية الصورة بحجمها الطبيعي.

[أم ياسين الزهراء]

بارك الله فيكم

[idron0]

دويدة مفورة ام ياسين الزهراء

في قدرة نحط الجاج هو اللي يصلحلها مع الزيت والفاحات اللي عندك انا مانديرش القرفة مانحبش طعمتها ونرابي حبة بصل كبيرة وثوم وحبة طماطم حب ونديرها بيضاء ماراحش تاثر الطماطم تطلق البنة ونقلي مليح ونمرق بماء سخونوالحميصة ومن جهة في جفنة نحط الفرميسال وندير عليها الزيت ونحطها في كسكاس تفور على المرقة افضل ونحيها ونرمي عليها الماء غير بالشوي ونخليها تشرب الماء وندير الزيت ونردها تفور 3 مرات ومنبعد طاب الجاج نصفي المرقة ونحط الفرميسال في قدرة ونفرغ عليها المرقة المصفية ونخليها تشرب المرقة على نار قليلة وكل مانشوف المرقة نشفت نزيد لها المرقة باش ماتجيش ناشفة ونطفي عليها وكينسربيها ندير الحميصة والجاج اللي حمرتو والبيض المغلي والزبدة هكى نحبوها واللي تحب تزيد اللفت تزيدو للمرقى احنا مانحبو فيها والو

[nadia_19]

ya3tik saha baraka allaho fiki okhti

[اسماء47]

.................................................. .........................................

[ام ساجد]

يعطيكم الصحة وشكرا على المجهود

[ام ساجد]

يعطيكم الصحة وشكرا على المجهود

[idron0]

قاطو ام ريمة

إضغط هنا لرؤية الصورة بحجمها الطبيعي.



250 غ زبدة +5مغرف كبار عسل+5مغرف كبار حلوة الترك+5مغرف كبار كاوكاو او لوز مرحى +مغرفةكبيرة خميرةونلمو بالفرينة نقطع الشكل المرغوب لما يطيب نلصق كل 2مع بعض بالمربى وحلوة الترك والكاوكاو ثم نضع له قلاساج شيكولا ونزين كيما راه موضح فالصورة .

[idron0]

فول oum ibrahim

إضغط هنا لرؤية الصورة بحجمها الطبيعي.



الفول شمختو ليلة من قبل و الصباح بدلتلو الماء و درتلو الملح و حطيتو يطيب ممكن حتى ساعتين حتى يطيب مليح و درتلو الدرسة الي هي ثوم و زيت و كمون و طماطم مصبرة فلفل عكري حار وخليتو ربع ساعة و طفيت
من جهة اخرى شويت حبة فلفل حلو و قطعتها مع حبة طماطم و حبة بصل و خلطتهم زدتلهم ملح و كمون كي سقيت زينتو بيه من فوق مع زيت زيتون و الف هنا و شفا.

[ROSELUISE]

يعطيكم الصحة والله يكثر خيركم على المجهود الكبير المبذول من طرفكم ويجعله الله في ميزان حسناتكم