طريقة أكيدة لتصبحي ربة بيت سعيدة

[رندة.]

مرحبا بكل الفراشات الشاطرات
رانا معاك أم شمسو في موضوع الجمال والعناية بالبشرة
فرحة العمر ربي يعينك والنوم حاجة عادية للمرأة الحامل. حاولي ماتعبيش روحك كي تتعبي حبسي ربي ورحمته

[ام تينة]

السلام عليكم

فكرة رائعة اختي ولنتحدت كل يوم عن جزء من الجسم وكل واحدة تعطي خلكاتها وتدبيراتها المجربة
متلا اليوم الاول هو اليوم العالمي للشعر

اليوم التاني هو اليوم العالمي للبشرة وهكدااااااااااا

[فرحة العمر]

فكرة رائعة أختي أم شمسو انا نهارات اللي ندير فيهم ماسكات ونهتم بروحي نحس روحي أنثى خاصة إذا جاوني ضيوف على فجئة ولقاوني باهيوشة والله نحس روحي ملكة أصلا العناية بالنفس تزيد الثقة بالنفس
حاليا راني مدايرة جدول للعناية بنفسي وراني ناوية ندير جدول للعناية بنفسي في النفاس مع اللي نزيد في رمضان لازم كي نخلص بإذن الله الربعين نكون مختلفة
أدعيولي نقدر برك لاني رايحة نفس في داري وانا اللي رايحة نخدم
طولت عليكم سامحوني

[رندة.]

السلام عليكم ورحمة الله وبركاته
ام متين شكرا على النصائح الي قدمتيهم بخصوص اتيكيت العلاقة بين الزوجين
كل ما نقرا نقطة نقول هاذي مهمة حتى وصلت في الاخير انهم كامل مهمين. يعطيك الصحة

[الفجر القادم]

مساء النور و البركات لكل الفراشات الجميلات و الله اشتقت اليكن،رجعت الى البيت و قلت اتواصل مع احلى اخوات،ان شاء الله تكونوا بخير كلكن.
بوركت اختي ام متين و الله موضوع قيم و قد استفدنا منه جعله الله في ميزان حسناتك.
اختي ام شمسو نحن دائما معك في اي فكرة تقترحينها،ساتابع معكن ان شاء الله و لكني ساغيب قليلا لاننا بصدد التحضير في دار ختاني حماتي وشيخي راهم رايحين للعمرة الاسبوع القادم ان شاء الله.
سلامي الحار للجميع و بالتوفيق لكن.

[Sii]

السلام عليكم ورحمة الله وبركاته
في صباح درت الروتين الصباحي ووجدت الغداء
درت التنظيف الاسبوعي للثلاجة وزدا معاها ادراج الخضر و بدون القمامة اعزكم الله
ورا لغدا وجدت مسكوتشو وعيطت لعجوزتي ولبنات جاو شربنا قهوة وتاي هوما روحو وانا غسلت الاواني و حطيت لعشا يطيب وجيت نطل عليكم
اختي فرحة عمر راني جربت ماسك لقلتيلي عليه درتو ساعة صباح كي كنت نقضي فاشغالي كما غسلتو في الاول لقيت وجهي احمر بزاف خلعت مي من بعد تنحاتلي لحمورة عجبتني نتيجتو ان شاء الله نعتمدو

[فرحة العمر]

السلام عليكم
انا وجدت عجينة المحاجب والصلصة مازالي غير نطيب قلت يقرب الزوج يجي ونطيب لانو امو تتعشا بكري
الأخت سي الحمد لله كي عجباتك النتيجة وإذا حبيتي ممكن تستعملي الكمون والحليب للتقشير ثاني مليح انا نديرو هو وساعات كي نضرح ندير مقشر جاهز و متنسايش البخار مرة في الأسبوع ولا أسلوعين انا مانديروش نتخنق وعندي الحساسية على هذي مانديروش نمسح وجهي بقطنة فيها ماء دافئ يكون مغلى فيه الإكليل والنعناع أحسن من لاشيء وإذا حبيتي ممكن نحطلك طريقتي في العناية بنفسي

[Sii]

رايحة نجرب تقشير تاع الكمون لانو انا ايضا تقريبا نستعمل غير التقشير الجاهز
اكيد اختي الحبيبة لكان منثقلش عليك تكتبيلي برنامجك وجزاك الله كل خير
بصحتكم المحجوبة بالصحة والهنا على قلبكن

[ام هزار]

سلام لبنات راكم مزهين الدنيا ربي يحفظكم
ام متين يحمد رايك على خير اختي العزيزة . و شكرا جزيلا و ربي يبارك فيك على المعلومات الخاصة بالحياة الزوجية . رايحة نطبق منها ما يناسبني ان شاء الله و ربي يجعل عملك هذا في ميزان حسناتك . امين يا رب
سي رب ييسر ولادتك و تفرحينا ان شاء الله
الفجر القادم .شحال نتفاءل باسمك . ربي يثبتلكم الاجر في العمل اللي رايحين تقومة بيه و عمرة مباركة لحماك
ام شمسو القائدة الرائعة تاعنا ربي ياجرك و يزيدك خير على خير و رانا معاك في كل ما تقتارحيه
البقية كل وحدة باسمها ربي يسرلكم اموركم و يحفظكم . و يحفظلك حملك اختي فرحة العمر و اخطيك من العمل الشاق و ايضا المتواصل راكي هازة روح اخرى معاك . ربي يحفظك و يحفظلك وليدك امين يا رب العالمين
بداية اسبوع موفقة . بالمناسبة راني مطبقة الروتينات بحذافيرها ما عذا الجانب الجمالي .............سلام ليكم الكل غالياتي

[فرحة العمر]

السلام عليكم
الحمد لله كملت شغلي والجانب الديني تم ولله الحمد
أختي سي بإذن الله غدا نحطلك عنايتي لإني تعبانة جدا
ربي يوفقكم كامل واللي حامل ربي يسهلي ويسهللها والمريضة ريي يشفيها والمهمومة ربي يفرج عليها وربي يفتحها في وجوهكم كامل

[Sii]

امين اختي هزار العزيزة ربي يحفظك وينورلك دربك
فرحة عمر الحبيبة متقلقيش روحك منين تلقاي وقت حطيه المهم راحتك
قبل ان تنامو قولوا اللهم اجرني من نوم الغفلة ولا تاخذني من النوم الا وانت راض عني
تصبحون على خير وعافية

[ام شمسو محمد]

السلام علبكم فرااااشاااااات ....جيت متأخرة و اقيل رقدتو ، كنت مع تلميع الحوض و تجهيزات الغد و العناية المساااائية ، المهم أتممنا بحمد الله الأسبووووووع الرابع من شهر جانفي و أنجزنا بمن الله تنظيفاتنا في غرف النوم ،غدا أسبوع آخر نصفو الأسبوع الأخير من جانفي و نصفو الآخر الأسبوع الأول من فيفري ، الأسبوع الأخير تاع جانفي نديروه ان شاء الله في غرفة الجلوس إذا بقات عندكم همة كل يوم 20 د حتى نهاية جانفي بإذن الله .
ما ننساوش روتيناتنا اليومية و مخططنا الأسبوعي لحياة شااااملة و منظمة .

[ام شمسو محمد]

الشيء البديع في أسلوب الفراااااشة التنظيمي هو أنك بعد الإكتساب السهل للعادات تعودي ما تقدريش تستغناي عليها و مهما كان ظرفك راح تنوضي و تلمعي حوضك مثلا أو تجهزي للغد أو ترتبي السرير و تنظيفات المناطق اليومية تاع عشرين دقيقة كاااافية جداااا للحصول على داااااخل نظيف الآن بالتأكيد ماكانش حتى نقطة في بيتي نحشم بيها لأنها ساخنة بالإضافة لميزة الوقت الخاص و قدرتك على فعل الأشياء اللي تحبيها بلا ما تشعري بالذنب على أشغالك اللي ما تخلاصش .

[ام شمسو محمد]

كلامكم كان مشجع بالنسبة لدورة التجميل المنزلي أكيد رانا كامل محتاجين لهذي الدورة ...نخصصو يوميا ربع ساااعة لأنفسنا ندللوهااااا و نعيدو البريق لبشرتنا و شعرنا و نصححو مفاهيمنا و نتعرفو على المنتجات اللي تناسبنا ....وجّدتلكم مادة موثقة تندرج دائما تحت أسلوب "السهل السريع " نتمنى تعجبكم ...كل شي راح يكون في منازلنا و المكونات من بلاكاراتنا .....بعد شهر من التنظبف العميق للمنزل جهزو رواحكم فراااااشااااات لفترة من اللإسترخاء و العناية و الجمال .

[ام شمسو محمد]

لا تنسوا قراءة سوووووورة الملك .
النوم على وضوووووووووء .
أذكااااااااار النوم .
سامحوا الأناااااااام ..
تصبحون على خير .