بداية يوم جديد

[ام مؤمن]

واش يا جماعة اليوم كي قدرت ندخل للمنتدى راني ندور وحدي المهم درت دورة و رجعت و جبتلكم معايا خبر

للمشاركات في المدرسة راهي بدات الدروس و هذا اول درس

https://www.djelfa.info/vb/showthread.php?t=1919421

روحو كاش ماتطبقو ههه انا مع المرض الله اعلم مدرسة الفايس و راني ماطبقت فيها والو هذا الاسبوع

[فراشات العمر]

السلام عليكم
واش راكم فرفوشات
ام مؤمن صح عندك الحق يزيد ضيف نجبدو لماعن اكل تقول عرس هههههههه
زيد علاه تاكلي عسل ياك الفيروس يتغدى عليه جامي تغلطي وتعاوديها اشربي زعتر دفي رجليك مليح راسك جسمك اخرجي للشمس بلا ما ننسى راني في السطح تغدينا خرج زوجي رائد اغتنمت الفرصة وصعدت معايا الميكرو
ام صابرين بالنسبة الشاورما لما تحيت العلبة بات شادة روحا كي نحيت عيني رابت هههههه المهم شفتها ماعلاباليش وين الغلط بالمناسبة راني كرفت الجاج برك مماهوش مرحي
المسمن علاه تطيبيه عندك الحق سميتيهم معارك الدخان تقول حرب
اليوم كي العادة قبل الاذان الاول جهزت لفطور وفطرنا نوضت ولادي فطرو وحدهم ورحت لبلاستي رقدت للعشرة نضت صليت الضحى وكتبت واش لازم ندير بالتوقيت الازم المهم زوج سوايع ونص لميت القش وكنست غسلت لماعن تاع البارح وتاع اليوم خبزت درت شرمولة بالباكاطا المقلية وسلاطة الحمد لله لما رجع راجلي لقى كلش في بلاستو الحمد لله الذي بنعمته تتم الصالحات
نسمة ركي هايلو كملي وربي يوفقك برافو تسفيقة حارة

[فراشات العمر]

يعطيك الصحة طهور ان شاء الله

[نسمة صبح]

رانا غير مع المعاااندة


فراشات راح نعاااندك و نخرج للشمس و شكراا حبيبتي على التشجبع

ام مؤمن نحيتيلي علي قلبي باسلوبك المرح

[ام مؤمن]

فراشات العمر بصحتك الغذاء و التشميسة الشوارما بلاك مارصيتيهاش مليح لازم ماتخليش فراغ او ممكن ماداتش وقت كافي باش تطيب على العموم ام صابرين ادرى باش تجاوبك

شكرا على النصيحة انا دائما ندير ملعقة عسل حر مع زيت زيتون و عصير ليمون باش نخفف من التهاب الحلق حتى الطبيبة نصحتني بالعسل و القارص كمهدئ للسعال

بالنسبة للزعتر خفت منو ممكن نشربو عادي و انا بالحمل الصراحة الحشاوش نبعد عليهم لما نكون حامل هل هو امن

نسمة واش احوالك راهم ضربونا بعين

ماتنساوش تدعولي بالشفاء و نجوز لاقريب خفيفة المرة اللي فاتت حكمت الفراش اسبوع

انا نروح نرمي العشاء يطيب على راحتو عندي لحم غنمي يحتاج وقت باش يستوي الى المساء ان شاء الله سلام

[oum sabrin]

السلام عليكم حبيباتي
على سلامتك أم مؤمن طهور ان شاء الله و بصحتك نهاية الاسبوع مع الوالدين الكريمين ربي يخليهملك
شكرا على رابط الدرس انا عجبتني المدرسة و لكن ما شاركتش لانهم اشترطو الالتزام بالوقت .و لكن احاول التطبيق لنفسي و لو كيفية .
فراشات العمر ضحكتيني على المعارك وا قيلا كثرت بزاف لزيت علا بيها الشياط دار حرب
و بالنسبة للشاورما لازم تتبل من قبل بمدة و لما تديريها في العلبة لازم تدركي عليها بيديك باش تشد شكلها كي تطيب و ما تريبش
بالتوفيق في المرة القادمة .

[oum sabrin]

حبيباتي وليدي خرجولو 3 حبيبات على وجهو و 2 على بطنو و يكلوه شويا مرت لوسي قالتلي بو شوكة ما عنديش خبرة فيه و خفت يعدي ختو و قريب الامتحانات
قولوليمن فضلكم لي عندها تجربة اذا كان هو واش لازم نديرلو غير دوا لحمر او لازم ناخدو للطبيب و اذا لازملو مضاد حيوي لاني بحثت على النت و لقيت انو يمدو عليه مضاد حيوي
ادعولي

[arwa alaa]

واش راكم
ام مؤمن على سلامتك
نسمة فرحتيني متقلقيش بزاف
فراشات بصحتك المعالك
ام صابرين على سلامتو وليدك
بوشوكة يعادي العام الي فات مرضو بيه راهو ياكل بزاف انا ننصحك تديه لطبيب انا العام الي فات وليدي حكمو وانا عند عجوزتي قاتلي ديري الدواء الاحمر ؤبصح قعد باكلو وخبش زوج حبات في وجهو وقعدتلو امارة في وجهو
بصح لبنات اديتهم لطبيب مداهم وحد المطهر خفف ليهم الحكة وطفاو الحبات في مدة قصيرة متخصري والو اديه ومتخليهش يحك الحبات ادخلي للنت كاين افكار تديريها في يديه باش ميخبش روحو

[arwa alaa]

واش راكم
ام مؤمن على سلامتك
نسمة فرحتيني متقلقيش بزاف
فراشات بصحتك المعالك
ام صابرين على سلامتو وليدك
بوشوكة يعادي العام الي فات مرضو بيه راهو ياكل بزاف انا ننصحك تديه لطبيب انا العام الي فات وليدي حكمو وانا عند عجوزتي قاتلي ديري الدواء الاحمر ؤبصح قعد باكلو وخبش زوج حبات في وجهو وقعدتلو امارة في وجهو
بصح لبنات اديتهم لطبيب مداهم وحد المطهر خفف ليهم الحكة وطفاو الحبات في مدة قصيرة متخصري والو اديه ومتخليهش يحك الحبات ادخلي للنت كاين افكار تديريها في يديه باش ميخبش روحو

[amel...]

مساء الخير عليكم يا جماعة الخير و ان شاء الله راكم ملاح و الصحة بخير

ام متين . ام صبرين و اروى الاء يعطيكم الصحة على التشجيع و حسيت روحي صرعتكم بالطابلية صح هههه خدمتها يالدوبلور يعني نخدة وردات بالدوبلور

نلصقهم و نطرزلهم الاغصان ....

ام مؤمن علاسلامتك و ربي يشافيك اختي حاذري علا روحك برك و غير بالشوية ....

لااباس علا وليدك ام صبرين و ان شاء الله ميكون غير الخير

يا نسمة روحي غير بالغقل و متقلقيش حنونة ...

اما عن يومي .... يديتو بالنهوض فالصلاة ثم جهزت نفسي و شربت كاس الماء و سهلت نخدم ... اليوم نسيت تطبيق لو كان اخر يوم في حياتي

بصح منسيتش الرسائل الايجابية .... تطبيق خطوة في كل مشروع تم و الحمد لله

الشيئ لي مزال من بعد نكملو باذن الله

فراشات عندي مشكل في فطولر الصباح ... ديما نروح نخدم بلا ما نفطر نحس بالشهية مكانش و هاد الشيئ تعبني

يا ريت لي عندها افكار او روتين باه نبدل هاد السلوك السيئ تعاوني .....

[ام متين]

السلام عليكم مازال ما قريتش كل شيئ لكن قريت العاجل نتاع ام صابرين ما تخافيش ياام صابرين لان بوشوكة يبرى بالدوا الاحمر اذا كان ما معاهش حمى وممكن الطبيب يعطيك مضاد للحساسية باه ما يحكش بزاف ولازم لما يدير الدواء الغد من ذاك دوشيه الماء وصابون الطرف (الحجرة) وزيد اذا بنتك تعدات فهو خير لان تمرض بيه وهي صغيرة احسن من وهي كبيرة المهم ما تخافيش والاطباء كاينين المهم ماشي حاجة كبيرة ما تخليهش يخبش فيهم باش ما تبقاش الاثار ربي يشفيه

[ام متين]

ام مؤمن على سلامتك يخي معليكش المهم غير بالشوية ؤاكي ماشاء الله شاطرة ربي يبعد عليك العين ويحفظك
لي عودة ان شاء الله

[OME AHLAM]

أعوذ بكلمات الله التامات من شر ما خلق

أعوذ بكلمات الله التامات من شر ما خلق

أعوذ بكلمات الله التامات من شر ما خلق

[نسمة صبح]

اسم الله الفتاح


الفتاح من الفتح نقيض الإغلاق ، والفتح النصر ، واستفتحت: استَنْصَرت ،والفتح الحكم والقضاء بين الناس .

المعنــى الاول: النصر
قال الله تعالى {إِن تَسْتَفْتِحُواْ فَقَدْ جَاءكُمُ الْفَتْحُ} [الأنفال:19] أي إن تستنصروا فقد جاءكم النصر.

المعنــى الثاني: القضاء والحكم بين الخصوم
قال الأزهري: الفتح أن تحكم بين قوم يختصمون إليك كما قال الله تعالى مخبراً عن شعيب {رَبَّنَا افْتَحْ بَيْنَنَا وَبَيْنَ قَوْمِنَا بِالْحَقِّ وَأَنتَ خَيْرُ الْفَاتِحِينَ} [الأعراف:89] فمعنى الفتح ها هنا أي (اقض بيننا).

المعنــى الثالث : نقيض الاغلاق
يقول الله جل وعلا {إِنَّ الَّذِينَ كَذَّبُواْ بِآيَاتِنَا وَاسْتَكْبَرُواْ عَنْهَا لاَ تُفَتَّحُ لَهُمْ أَبْوَابُ السَّمَاء} [الأعراف:40]





أن صفة الفتاح صفة جمال وجلال، بمعنى أن ربنا يتنزل برزقه وخيره ورحمته على الطائعين، لكن قد يفتح أبواب الهلاك والبلاء على الكافرين، وهو سبحانه وتعالى الذي يفتح على خلقه ما انغلق عليهم من أمورهم، فإذا ضاقت عليك الطُرق وضاقت عليك الأرض بما رحبت فالجأ إلى ربِّك الفتاح، يفتح لك كل عسير وييسر لك أمرك.




كيف ندعو الله تعالى باسمه الفتـــاح؟

ادع ربَّك الفــتــــاح أن يفتح عليك إذا انغلقت في وجهك الأسبـــاب والأمور ..

ومن الأدعيــة الواردة في القرآن والسُّنَّة: رَبَّنَا افْتَحْ بَيْنَنَا وَبَيْنَ قَوْمِنَا بِالْحَقِّ وَأَنْتَ خَيْرُ الْفَاتِحِينَ ..

واللهم افتح لي أبواب رحمتك: عند دخول المسجد .. قال رسول الله "إذا دخل أحدكم المسجد فليقل: اللهمَّ افتح لي أبواب رحمتك. وإذا خرج فليقل: اللهمَّ إني أسألك من فضلك" [رواه مسلم]

اللهم افتح لنـــا أبـــواب رحمتك وافتح لنــا أبـــواب فضلك واجعلنا من عبـــادك الصالحيـــن،،

الحمد لله الفتَّاح العليم، يمن على من يشاء من عباده بالفتح والفهم فيوفقهم ويهديهم، ويفتح لهم المغاليق سبحــــانه وتعالى ..

[ام مؤمن]

مساء الخير

شكرا ام صابرين على كلامك الطيب اما المرض تاع وليدك ربي يشفيه نصائح ام متين تفيدك بزاف

اروى ربي يقدرك على تربية التوءم ماهيش حاجة ساهلة ربي يكون في العون

ام متين ربي يخليك راني شوية خير من الصباح دارتلي السخانة لعشية و شربت نص حبة بارستامول راني نطبب في الحالة و الحمد لله

امال يا عروستنا الحلوة الطابلية تاعك درات السوكسي رانا نسناو نشوفوها ربي يهنيك و يكملك

حبيبة يا حبيبة كي ندخل و مانلقاش اسمك نفشل ربي ييسر امورك و يرجعك على خير تنورينا

الغايبات بزاف

نسمة وين راكي واقيلا نرجعولك المسابقة و النماذج باش نعودو نشوفوك بزاف

سلام ندير لبنتي استظهار راهي تحفظ في الخلاصة تاع التربية المدنية ههه سلام

غذوة نحاول نلتزم بالروتينات و التطبيقات اكثر اذا صبحت مرتاحة ان شاء الله

تصبحون على خير